راجس

61

سياف طالع براجس وتأكد انو نايم قبل ما يوقف ويسحب نفسه برة الغرفة .. تحرك لغرفة راشد واستغرب انو بابها مقفل ! ..

عقد حواجبه ودق باب غرفة رازي الا فتحها بسرعة وطالع بسياف بشوية خيبة
- نام ؟

سياف هز راسه
- ايوة .. او بيسوي نفسه نايم حاليا ..

رازي هز راسه بشويش
- ما .. ما بكي ؟

سياف هز راسه بشويش وهو يتخذ نفس عميق
- لأ .. بس ..

رازي رفع عيونه يطالع فيه
- بس ايش ؟!

سياف هز راسه .. قبل ما يغير رأيه وقرر انو ما يقول الكلام الا راجس قاله
- ولاشي .. هو .. مرة هادي

رازي تنهد
- مافي طريقة نخلص فيها القضية بدون ما يتأذى اكثر ؟!

سياف
- للأسف .. ما حتى لو حاولت اكمل القضية بدون وجوده .. أهل عادل حاطينه بدماغهم وجالسين يسحبوه للمحكمة بالغصب

رازي كشر
- الله ياخذهم .. حقيقي ماني طايقهم

سياف طبطب على كتف رازي
- فين نواف عنك اليوم ؟

رازي ابتسم بشويش
- اهله يحتاجوه في كذا شي فما بيقدر ينام عندي ..

سياف هز راسه
- لا تقطعه عنهم ..

رازي طالع في سياف
- طبعا ما بقطعه عنهم .. هما اهله .. ولو ايش ما صار ما ابغاه يكون بعيد عنهم

سياف ابتسم وتحرك يرجع لغرفة راجس
- تمام .. خليك كذا

رازي رجع قفل باب غرفته وتحرك يتمدد فوق السرير .. ألتفت جنبه و .. هو ما ينكر .. مفتقد حضن نواف .. لمساته .. صوته وهو يهمس في اذنه لما يحسبه نايم ..

عض رازي شفايفه .. هو يحبه غمض عيونه وهو يحضن البطانية ناحيته ومافي في عقله شي غير نواف

على الناحية الثانية سياف لما ترك غرفة رازي هو نزل الدرج وشاف جولان الا كان جالس يتكلم بالجوال مع سند .. وقف يسمعهم

جولان
- يعني كلمته ؟

سند هز راسه
- شوي بس .. فدحين برجع احط العداد على صفر عشان احسب ٣٠ يوم جديدة !

جولان ابتسم
- انت غشاش كذا .. كان المفروض نكلمه سوا عشان تعرفني على عمي !

سند
- عادي انتظر ٢٩ يوم وبرجع ادق عليه تكلمه !

جولان ضحك
- يعني بتخليني جنبك ٢٩ يوم ؟!

سند بلل شفايفه
- ما بتجلس معاي ٢٩ يوم جايين ؟!

جولان غمض عيونه
- بجلس معاك العمر كله .. مو بس ٢٩ يوم

سند ابتسم .. هو كان يبغى يسمع ذا الشي .. حتى لو في داخله يحس انو ما يستاهل .. هو يبغى يحس بكذا .. الاهتمام والرغبة فيه هو حاجة بشرية .. محد ما يحتاج اهتمام .. احنا فقط نعتقد اننا ما نحتاجه إلين ننحوج له