راجس

21

فتح سياف عيونه وهو يحس بالصداع من دموعه امس .. انتبه انو في شخص حاضنه فرفع راسه وطالع براجس الا كان نايم وواضح رقرته بتوجعه من الوضع

مسح عيونه ورفع جسمه وطالع بالوقت .. الساعة ٤ الفجر والكل نايم ..

رفع جسمه ومدد عضلاته قبل ما يهز راجس
- راجس .. راجس

بس راجس بعد يد سياف وهو لساته نايم
- ابغى انام ..

سياف ابتسم بشويش ورجع يهز راجس
- قوم اطلع غرفتك نام هناك .. يلا رقبتك بتوجعك كذا

راجس كشر بدون ما يفتح عيونه ورفع يدينه للهوا
- شيليني

سياف رفع حاجبه
- هاه ؟!

راجس تكلم بانزعاج
- شيلني للسرير مقدر اطلع جولان ..

سياف كشر من اسم جولان بذات لانو راجس بيفكر فيه وهو نص نايم بس هو قرب من يدين راجس بشويش ورفع جسمه فراجس لف رجلينه حولين سياف ويدينه حولين رقبة سياف وحط راسه على كتف سياف وهو لساته مغمض عيونه

تحرك سياف وهو يطلع الدرج .. عمره ما شاف أحد بذي الطريقة ولا حتى مرهف .. مرهف ! .. شي بداخل قلبه رجعله الحزن بسبب مرهف ..

اول ما وصلوا الدور الثاني راجس تكلم وهو لسه مغمض عيونه
- ريحتك حلوة .. زي ريحته

سياف تحرك لباب غرفة راجس وفتحه وتكلم بفضول
- زي مين ؟!

راجس فتح نص عيونه وهو لسه مو مستوعب شي حوله وتكلم
- سياف ..

سياف وقف للحظة وهو شايل راجس وتكلم بشويش
- ك .. كيف ريحته ؟

راجس دعك وجهه في رقبة سياف وهو مو حاسس على نفسه
- عيد .. ريحته زي العيد .. دافية .. مليانة مشاعر .. مليانة ناس

دق قلب سياف وهو مبتسم ورجع يتحرك لغرفة راجس
- تحبها ؟ .. ريحته

راجس هز راسه
- احبها ..

سياف نزل جسم رجس فوق سريره وجا يبعد بس راجس ظل متعلق فيه
- لا تسيبني .. ما .. ما ابغى انام لوحدي

سياف مسح على وجه راجس
- ليش ؟

راجس ميل راسه على المخدة بدون ما يفتح عيونه وما رد على سياف الا تنهد وفتح يدين راجس من حوله عشان يبعد .. سحب البطانية وغطى راجس وتحرك يطلع من الغرفة بس وقف عند باب الغرفة والتفت

شاف راجس يتحرك فوق السرير فأبتسم سياف ووقف يطالعه .. وضحك وهو يتذكر .. ريحته ريحة عيد ؟ .. عمره محد قاله ذي العبارة .. ولسبب ما .. هو شايفها لطيفة جدا

⚜️⚜️⚜️⚜️⚜️⚜️

نواف وقف سيارته وطالع البيت وهو مبتسم

رفع جواله وكتب لرازي
- انا تحت

رازي كان جالس بالمطبخ بعد ما جهز علب الاكل لنفسه ولراشد وسياف وطبعا ترك اكل لراجس في الثلاجة وسوا علبة اضافية .. يبغى يشكر نواف على امس وعلى التوصيلة .. اصلا فكرة انهم يروحوا سوا كل يوم جازتله بس لازم يسوي ثقيل شوي ..