راجس

67

سياف ابتسم ومسك يد راجس الا كان مبعد وجهه اغلب الوقت وواضح انو متضايق
- ترى خلصنا دحين نخرج

راجس هز راسه بشويش .. هو ما تكلم طوال فترة الاجتماع .. رغم انو حامد سحبه للكلام كذا مرة بس كان يكتفي بردود قصيرة تماما

حامد طالعهم
- تمام اذا كذا بنتظرك ترسلي العقد بالتعديلات الا طلبتها

سياف رجع يطالع حامد
- تمام

حامد طالع في راجس
- تشرفت اني شفتك اليوم استاذ راجس .. اسمك مميز لدرجة ما اعتقد بنساه

راجس ابتسم بشكل مجامل
- شكرا لك استاذ حامد .. الشرف ليا

بعدها تحركوا وانفصلوا عن بعض وراجس كشر فضحك سياف
- غيرك بيتمنى المدحة منه

راجس هز راسه
- ما احب الا يحاول يفرض سيطرته على الموقف

سياف رفع حاجبه
- بس هو ما فرض سيطرته

راجس تنهد
- وقت كلامكم .. ما كان يقاطعك بس حركاته لما كنت تتكلم معاه تظهر انو مهتم بنقاط معينة وفي نقاط كان يتعمد يتجاهلك فيها او يلعب في القهوة الا قدامه .. بس لما جا دوره للكلام كان مستعد يعطيك نظرة حادة على حركاتك العفوية زي انك تشرب القوة قبل ما تقول الا ببالك عشان تعطي نفسك فرصة ترتب افكارك

سياف عقد حواجبه
- ما انتبهت لكل ذا

راجس قلب عيونه
- طبيعي ما تنتبه .. اصلا لو انتبهت كنت بتكون شخص سيء بالشغل .. انا مو ضمن دائرة الحوار فسهل ألاحظ الا بيصير بدون ما اتأثر اما انت .. فلو انتبهت غالبا بتغير الحوار بطريقة تخلي الطرف الثاني اكثر انفتاح للكلام .. وانا بصراحة ما ابغى اطول اكثر من كذا معاه !

سياف ابتسم ولف يده على كتف راجس
- بس في احتمال يزورنا في جدة بالمكتب

راجس كشر
- حلو بقدم اجازتي لذاك اليوم من الان !

⚜️⚜️⚜️⚜️⚜️⚜️

جولان قال لسند عن الفيديو .. هو ما وراه .. بس قاله .. وسند طالع فيه وفي ونواف قبل ما يبتسم بسخرية
- مافي شي يظل مستخبي كثير ! .. و .. الناس تحب السواليف .. بكرة .. بكرة تجي فنانة تسوي شي غبي عشان تسرق مني الاضواء وكل شي بيرجع طبيعي

جولان مسك يد سند الا ضغط عليه
- انا بخير جولان

نواف طالع بسند
- لو تحتاج تنعزل ف ..

سند ألتفت لنواف
- شكرا .. بس عادي بجلس بشقتي .. ذي المرة معايا جولان ينتبهلي فلا تخاف علي

نواف طالع في سند
- تدري انك تقدر تكلمني بأي وقت صح ؟

سند هز راسه بشويش
- ادري .. بس حاليا اعتقد انت كمان تحتاج تتكلم مع حبيبك ويكون جنبك .. ويعني لو قرر يتركك ففي سرير فاضي لشخص مكتئب اضافي عندي