راشد فتح الباب وشادي ابتسم اول ما شافه
راشد تحرك للسرير وباس جبين شادي الا تعلق في رقبة راشد
- وحشتني
راشد ابتسم وجلس جنب شادي على السرير
- ما غبت كثير
شادي هز راسه
- ادري بس .. المهم .. كيف اخوانك ؟
راشد تنهد وهو مبتسم
- زي ما هم .. امراض متحركة تصيب كل من يقابلهم بجلطة في القلب
شادي ضحك
- راجس كويس ؟
راشد
- ايوة .. الجرح مو خطير ..
شادي طالع في راشد
- و.. عرف مين الا طعنه ؟
راشد هز راسه
- حسب كلامه ذاك كان ملثم وطعنه فجأة
شادي عقد حواجبه
- ملثم تهجم عليه بشكل مفاجئ بمكان شبه عام ؟
راشد
- هذا الا قاله
شادي حك ذقنه
- بس مو ذا نفس الا صار ذيك المرة ؟ .. لما .. ضربه شخص في حوش البيت عندكم
راشد عقد حواجبه وهو يفكر
- ايوة .. قال انو ملثم جا و .. ضربه
شادي طالع في راشد
- وبرضوا جولان كان الشخص الا لقاه ؟
راشد طالع في شادي
- ايوة .. يك المرة هو دق على جولان بدالنا .. وجولان رحله .. وذي المرة .. ما اعرف لو جولان الا وداه المستشفى بس .. هو قال انو ساكن عند صاحبه والمفروض انو ما يعرف احد غير جولان كصديق هنا
شادي
- هل .. ذول الناس مستقصدين جولان وراجس جالس يحميه ؟
راشد هز راسه
- ما اتوقع .. جولان ما عنده شي حسب السجلات .. هو جدا مسالم .. بس المرة الا فاتت لما ضربوا راجس هما حاولوا يلفقوا التهمة عليه .. أهل عادل .. قالوا انو هو الا خرب سياراتهم والديلي الجروح الا يجسمه الا انفتحت .. بس عشان جولان اخذه للمستشفى ولان التقرير اظهر اثار الضرب في يده سياف قدر يشيل البلاغ الا منهم بدون ما نحتاج تدخل المحكمة حتى
شادي لمعت عيونه
- وايش الا بينقال عنه دحين ؟ .. يعني ليش الطعنة ؟
راشد مسح جبينه وهو يفكر
- سمعت شي عن انو ابوهم دخل المستشفى.. هل ذا انتقام ؟ .. انو بيحاولوا يوقفوا راجس عن انو يكمل القضية ؟!
شادي عقد حواجبه
- بس ايش بيفيديهم ؟ .. لو مات القضية بتصير لكم .. لانكم ورثته .. وبيتوقف التوزيع وكل شي بيتجمد
راشد طالع في شادي
- احنا غالبا حنتنازل .. ندري انو ذيك فلوس عادل وما ادري ليش راجس مصر ياخذها .. بس لو الوصية صارت لنا فطبيعي نرفضها ! .. ما بناخذ صدقة من ورث ميت !
شادي حك رقبته
- طيب ليش هما طعنوه ؟! .. هل في شي غير الورث ؟ .. هل لقيت شي ؟
راشد هز راسه
- لقيت خيط بس لسه ما وصلني لشي
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
