كانوا ساكتين على الطاولة .. راجس واضح انو غارق في افكاره .. رازي حاول يلطف الجو رغم انو لسه ما فهم شي لا هو ولا شادي .. بس قلبت وجه راجس كانت واضحة
شادي حط شوية قطع دجاج من الا هو حمصها لراجس
- ترى انا الا حمصتها !
راجس رفع عيونه لشادي وابتسم بشكل باهت
- حلو
شادي نزل عيونه .. يبغى راجس يبتسم
راشد مد صحنه لشادي
- حطلي انا طيب ! .. كذا بغار من راجس !
شادي ابتسم وحط لراشد
- لو .. لو كانت شوية محروقة ف ..
راشد اكلها
- ذي ألذ من اي شي سواه رازي من قبل !
رازي عقد حواجبه
- لا يا شيخ !
سياف مد يده ومسك يد راجس الا سحب يده لحضنه وذا الشي خلا سياف يعقد حواجبه بس هو عاذره .. اليوم بذات هو يدري انو راجس مو طايق احد
دف راجس طبقه بشويش ووقف وهو يطالع فيهم بشكل باهت
- اسف .. بس .. انا شبعت
بعدها تحرك يطلع الدرج بدون ما يعطي لاحد منهم يتكلم .. رازي عيونه كانت على طبق راجس .. هو ما اكل شي .. الطبق زي ما هو بنفس الكمية .. شادي طالع في راشد
- ايش صار ؟!
تنهد راشد ورجع ظهره على الكرسي بينما سياف تكلم
- طلعوا محادثات قديمة بين امكم وعادل .. قبل وفاتها بفترة بسيطة كانت تبغى ترجع راجس .. وهو شاف المحادثات و ..
راشد تكلم بعصبية
- وهيا مستفزة لدرجة انو حتى راجس ما كانت طايقته !
رازي عقد حواجبه يطالع راشد
- ايش ؟!
راشد عض شفايفه وهو يحاول يتحكم في ملامحه وهو يطالع رازي
- هيا مو بس تركتنا وحسستنا انها بتعيشه في نعيم واننا لازم ندفع حياتنا ونرضا بقدرنا عشان هو يعيش مدلل ! .. هيا اخذته وتعبته في كل شي ! .. رازي لو تشوف المحادثات .. لو تشوف تقرير الدكتور النفسي عنه .. انا بالقوة مسكت نفسي عن اني ابكي واحضنه ! ..
رازي هز راسه وهو يطالع راشد
- ل .. لو .. لو هيا ما تبغاه .. ل .. ليش اخذته من بيننا ؟! .. ليش تركته وحيد ؟!
راشد ضرب الطاولة
- ذا الا قاهرني ! .. كذا بس ملعنة ! .. اخذته وخلته يكبر بعيد عشان ايش ؟!
سياف بلل شفايفه بشويش
- عشانه كان الشخص الا متحمل كل مزاجيتها
راشد ورازي ألتفتوا عليه ورازي تكلم
- اي مزاجية ؟!
سياف اخذ نفس عميق ورجع يطالع في الدرج
- المفروض الكلام ذا ما يطلع بس .. حسب كلام دكتوره النفسي .. راجس كان يتحمل انهياراتها العصبية دايما .. كانت تزعق وتزعق فيه وتطرده او تتجاهله تمام إلين ينهار هو .. بعدها ترجع تراضيه بأي شي بسيط إلين تبرمج انو ذا الطبيعي .. انو عادي تزعق عليه .. انو الكل يسوي نفسه ما يعرفه لو هيا زعلانة منه .. عشان يظل يدور رضاها دايما
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
