راجس

22

لما أخيرا رازي فتح باب الحمام كان شكله متبهدل .. وواضحة عيونه الحمرا .. نواف كان جالس على المغاسل ينتظره يفتح الباب من أول .. هو ما تحرك من هناك رغم الموظفين الا دخلوا وخرجوا من المكان وهما مستغربين وجوده .. رازي كان يسمعهم يكلموا نواف يسألوه لو فيه مشكلة وهو كان يصرفهم طوال اليوم بدون ما يجيب اسم رازي ..

نواف طالع في رازي ونزل من فوق المغاسل ومسك يد رازي الا كان راخي راسه
- هدأت ؟

رازي هز راسه بشويش .. هو متقرف من نفسه فما يبغى يتكلم او يخلي نواف يشوفه

نواف مسح على اكتاف رازي بهدوء بعدها سحب مفتاح سيارته وحطه في يد رازي
- روح السيارة .. بجيب اغراضك وخلينا نخرج من هنا .. بكلم سلطان فلا تشيل هم

رازي هز راسه بهدوء بدون ما يرفع راسه او يطالع بنواف .. هو يبغى يخرج من هنا اصلا ومو قادر يتحمل الوضع ولا يبغى يكلم احد

نواف فتح باب الحمامات وطالع في الممر والكل كان مشغول فالتفت على رازي
- اوصلك للمصعد ؟

رازي غطى وجهه بيده وهو يهز راسه بلأ فتنهد نواف وفتح الباب عشان يخرج

رازي تحرك للمصعد بدون ما يلتفت لأحد ونواف تحرك لغرفة سلطان .. دق الباب ودخل المكتب بدون ما ينتظر سلطان يرد عليه

سلطان كان واقف ماسك جواله يتكلم وعقد حواجبه وهو يطالع نواف الا دخل بس أشرله انو انتظرني دقيقتين

نواف ما جلس على المكتب .. هو ظل يطالع سلطان بملامح ثابته

سلطان قفل السماعة والتفت على نواف
- غريبة جاي بذا الوقت ؟!

نواف ظل واقف مكانه
- بخرج دحين .. ورازي معاي

سلطان عقد حواجبه
- رازي عنده شغل يخلصه

نواف غمض عيونه
- لا تخليني افقد اعصابي سلطان .. رازي انا طلعته وشغله سلمه أي شخص ثاني

سلطان كان بيتكلم ويعترض بس نواف فتح الباب وطلع من المكتب وتوجه للمصعد ونزل لسيارته .. طالع فيها وشاف رازي جالس بمقعد الراكب .. كانت ملابسه مختلفة فالتفت لنواف لسيارة رازي وفهم انو رازي غالبا غير ملابسه في سيارته قبل ما يدخل سيارة نواف

تحرك نواف ودخل سيارته والتفت لرازي بس رازي بعد وجهه ناحيت القزاز عشان لا يطالع بنواف الا مد يده وشبك يده في يد رازي

رازي نطق اخير بدون ما يطالع في نواف بصوت مبحوح
- البيت .. و.. ودني .. البيت

نواف حرك السيارة وهو لسه شابك يده في يد رازي الا بدأ يضغط على يد نواف بشويش وهو يحاول يستمد القوة منه ..

⚜️⚜️⚜️⚜️⚜️⚜️

راشد طالع بالاوراق ورجع التفت يطالع المكتب .. المكان فاضي .. مد يده وسحب الملفات تبع سياف وشاف ملف قضية راجس ..