مسك الهلال وعلقه في الخطاف الا كان فوق الباب وزعق بصوته
- شغله !
لحظات واتنورت الدنيا والبيت ظهرت زينته
سمع اخوه الصغير يشهق وهو يطالع الانوار فالتفت وشافه وهو مبهور ويلتفت في الحوش .. ذا اول عيد يزينوه بذي الطريقة .. يمكن لانو اول عيد يكون ابوهم معاهم فيه .. ابوهم الا كان عسكري وكان دايما انتدابه للحد يجي بوقت رمضان والعيد ويحرمهم من صلاة العيد معاه .. ذي السنة كان الوضع مختلف لانو معاهم .. حتى لو كان تعبان فهو معاهم
نزل درجات السلم وهو يسمع جرس الدراجة من برة البيت وشافه يوقف دراجته بالحوش وهو شايل اكياس البقالة
- انتبه تطيح !
قلب عيونه وهو يرمي نفسه للارض ورجوله ناحيت الارض وبدل ما يطيح هو حنى جسمه ووقف على رجوله
قرب منه اخوه الكبير ( راشد ) وهو عاقد حواجبه وقرص اذنه
- قسم بالله تسوي فيها العميل الخطير انك لتاكل تبن مني بعد العيد !
حط يده على اذنه بألم وزعق في اخوه
- يعور يا زفت !
بس راشد قرص اذنه اكثر
- عشان تبطل الحيونة ذي
الصغير بيناتهم طالع فيهم وميل راسه
- ح .. حيونه ؟!
الاثنين التفتوا ناحيته واستوعبوا انو جالس يقلدهم فسحب الكبير يده بسرعة
- لا لا حبيبي .. راجس عيييييب ذي الكلمة بتجبلك العو بعدين !
بس راجس ضحك وهو يضرب كفينه
- حيونه ! .. حيونه !
ضرب رازي راسه
- بيفضحنا !
راشد طالع في السيارات الا كانت تمشي حولهم في الحارة وابتسم وهو يشوفه يوقف دراجته
- ادخل دخل الحاجات بسرعة قبل ما نتأخر
رازي التفت ناحيت الشارع وطالع في الشي الا خلا راشد يبتسم وقلب عيونه
- هييييي العيد ذا معانا مو زي كل سنة تشرد تروح معاهم !
راشد رفع اصباعه وضرب جبين رازي
- اسمع الكلام وانقلع دخل الاشياء .. قمر الدين لازم يتنقع من دحين لو بنسوي الدبيازة حسب كلام امي !
رزاي نزل عيونه بشويش
- بتجي تحتفل معانا ؟
راشد انتبه لتغير نبرة رازي فتنهد
- على الاقل حتجي عشان تاخذ راجس .. تعرفها .. ما بتسيبه هنا
رازي التفت لراجس وابتسم بشويش
- ليتني كنت بعمره .. يمكن وقتها ما كانت بتسيب البيت ..
راشد ما تكلم .. هو اكثر من عاش علاقة امه وابوهم المتوترة .. وهو اكثر من يفهم انو انفصالهم كان الافضل للكل .. بس ما يقدر يلوم رزاي الا كبر وهو يحبهم هما الاثنين وكان اكثر واحد اتشتت مع انفاصالهم بذات وامهم تركتهم هما الاثنين واكتفت بأنها تاخذ راجس لوحده معاها !
تحرك رازي لجوة البيت وهو يسحب الاكياس وترك راشد الا تنهد وهو يلتفت بيمشي للشارع عشان يكلم صاحبه ..
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
