راجس

69

اليوم الثاني :

راجس كان حاطط يده تحت خده وهو يطالع الاطلالة .. هو بدأ يحب ذي الاجازة الا كأنها شهر العسل لهم

طالع بجواله وكل القروبات هادية .. سند ما كلمه رغم انو امس رسله كيف الدوام ؟ .. وجولان كمان ما يرد

يمكن هما كمان غرقانين في عسلهم ؟! .. بس لو صار بينهم شي اكيد جولان بيجي يحكيه صح ؟ .. يعني من يوم ما وصل هنا وهو يحس انو جالس يبعد عن جولان .. الاثنين الا محد منهم كان يقدر يجلس اكثر من ٤ ساعات بدون اتصال او انهم يتقابلوا صاروا ما يشوفوا بعض بالايام ..

بس هو ما يقدر يلوم جولان .. ولا يلوم نفسه .. كل واحد جالس يستوعب اهله .. بتأقلم .. يتعرف .. ويحب ..

بس الموضوع مزعج .. انك تبدأ تنضج وتكبر بعيد عن أعز اصحابك ..

سياف قرص خده وهو يجلس جنبه
- بطل تفكر في حاجات منحرفة من الصباح بوسط الفطور !

راجس ألتفت وكشر لسياف
- ماني زيك !

سياف رفع حاجبه وميل نفسه ناحيت راجس
- ايوة صح .. مدري مين تلبسك امس وانت تنطنط تقول دوري دوري

راجس بعد وجهه باحراج
- انقلع !

سياف شال من صحنه قطعتين بان كيك وحطهم في صحن راجس
- اصلا شوي وبنروح المعرض فبننقلع سوا

راجس طالع بالصحن وابتسم .. هو كان يبغى يقوم يجيب بانكيك زيادة من البوفيه الا صحاه عليه سياف من أوله وطلعوا اول ناس لدرجة انو موظفين الفندق كانوا يطالعوهم ويقولو البوفيه بيفتح بعد ٣ دقايق !

سياف صحى راجس بدري عشان يطلع من بدري عشان لا يجلس يصيح انو فاته الفطور .. هو ما كان مقتنع بس هو شايف الفرق .. راجس مبتسم ونفسيتيه لطيفة وحتى تعامله مع موظفين الفندق لطيف .. هو يحب يحتك بالناس .. طبيعي بحكم شغله بس راجس ما لحق يشتغل في شغله لفترة طويلة .. هل كان موظف قبل السفارة ؟!

ألتفت يسأله بس بعدها تذكر لما قال قدام اهل عادل انو كان يشتغل عشان يسدد دين الجامعة .. فهو كان موظف من قبل .. يمكن عشان كذا يعرف يتعامل مع الناس

راجس ألتفت لسياف وشاف قهوته خلصت فابتسم
- اسويلك قهوة ؟!

سياف طالع بكوبه قبل ما يضحك
- ايوة بس لو تحط فيها كمون بدل الملح بكون لك شاكر

راجس ضحك وهو يوقف ويتحرك للبوث ويسوي القهوة بينما سياف سحب جواله يشيك على القروبات الا عنده واستغرب لما شاف طلال راسله
- عندك وسيلة اتصال مع صاحب راجس سند ؟! .. غير جواله لانو ما يرد عليه

عقد سياف حواجبه وكتب لطلال
- ذا رقم ولد عمه .. جولان

طلال اخذ لحظات قبل ما يرد
- تمام ولو رد سند على راجس خليه يتواصل معانا ضروري