راشد طالع بالغرفة الفاضية وهو مو مستوعب قبل ما يلتفت وهو يزعق
- رازي !
رازي فز وهو جالس فوق المكتب وقلبه دق بالقوة .. راشد جا ..
راشد وقف عند باب الغرفة .. نواف مو موجود لانو راح عند اهله زي ما قال لرازي ففعليا رازي لحاله
راشد قرب من مكتب رازي
- فين راجس ؟!
رازي بلع ريقه بتوتر
- م .. معرف
راشد طالع فيه
- كيف يعني ما تعرف ؟! .. اخوك بني ادم مو بسة في الشارع فكيف ما تعرف هو فين ؟! .. لا تقولي ما كلمته ولا دورت عليه وهو مختي وانت وهو نايمين بنفس البيت !
رازي عض شفايفه
- مو .. مو كذا .. هو .. هو تهاوش مع سياف .. حاولت افهم منه الموضوع .. قام قال كلام غبي عن سياف وانا عصبت و .. وما حسيت بنفسي لما ضربته
نزل رازي راسه وهو مغمض عيونه .. لو راشد ضربه ما بيلومه ..
مرة لحظة صمت قبل ما راشد يتكلم بشويش
- انت .. ضربته .. ووقفت بصف سياف ؟!
رازي هز راسه بشويش بدون ما يرفعه او يطالع بعيون راشد وهو متوقع الاسوء .. راشد عصبي بس ذي المرة بذات له كل الحق يعصب على رازي الا كان مسوي فيها المثالي والاخ المحب لرازي من يوم ما جاهم إلين جاب العيد وخلا اخوه يسيب البيت .. وهو فعلا ما بيقدر يسامح نفسه على ذا الشي ..
راشد غمض عيونه
- يعني ما تقدروا تسوا شي بدون دراما وتسيبوا الدراما ليا ؟
رازي فتح عيونه وهو مستغرب
- ايش ؟
راشد مسح وجهه بيده
- ما طلبت منكم تسوا شي وذا غلطي .. كان المفروض اقولكم خليكم لطيفين مع بعض وانا خارج عشان يمكن وقتها تتذكروا انكم اخوان
رازي عض شفايفه .. هل الصدمة جننت اخوه ؟
راشد طالع في رازي قبل ما يقرب ويسحبه من قميصه
- يدك ما تمدها على اخوك ثاني .. فاهم ؟!
رازي بلع ريقه وهو يهز راسه .. هو يضرب راشد لما يفقد عقله ويتكلم بشكل غبي .. بس هو يعرف انو راشد ما يمزح وانو محد يقدر يضربه او يتعدا عليه بأي شكل بدون ما يكون هو اصلا سامح للطرف الثاني .. فأي تهديد منه لازم تاخذه بعين الاعتبار
راشد ترك رازي
- انت العاقل بيناتنا .. لو صرت تضرب زيي راجس بيضيع .. والله انا كمان بضيع لانو تخيل فجأة يصير بيتنا بدون عقل بس عضلات ؟
رازي ابتسم بشويش
- انا عقل البيت ؟
راشد كشر
- لأ .. انا عقل البيت بس انت الضمير الحي
رازي قلب عيونه
- طيب طيب
راشد بلل شفايفه
- ما يرد على اتصالاتك صح ؟
رازي نزل عيونه
- لأ .. حتى سياف حاول يكلمه .. جولان ما يرد على نواف ونواف راح يشوفهم فلو هو هناك نواف بيقولي
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
