راجس

19

وقف سند سيارته قدام فلة وطالع بالحي حولينه بعدين بالبيت والتفت لجولان
- كلمه يطلع

جولان رفع جواله وهو يرسل لراجس
- تمام ثواني بس

سند زعق وهو يطالع جولان
- بسرعة ترى بمشي !

جولان ارتبك وزعق في سند
- استنىىىىى

سند ضحك بصوت عالي ورجع لف وجهه للطريق وهو يشغل اغاني ويرفع الصوت ويميل راسه مع الاغنية .. اما جولان قفلب عيونه ورجع يكتب لراجس

جوة البيت راجس عبى شنطة راشد وشنطة سياف وتحرك يطلع الدرج بس سمع صوت باب غرفة راشد ينفتح

رفع راسه وشاف سياف لابس الثوب الاسود وغترته البيضة وريحة العطر فاحت بالمكان لمجرد ما فتح الباب

طالع براجس لحظات قبل ما يبعد عيونه وينزل الدرج مع شنطته بيده

راجس مسك يد سياف الا ما التفت ووقف مكانه
- ع .. علبة الاكل .. سويت لراشد ولك

سياف التفت لراجس وطالع فيه .. هل ملامحه تصير أحلى بالثوب ولا ذا عقل راجس فقط ؟!
- شكرا

قالها ونزل الدرج بس لما وصل لاخر درجة وقف وتكلم بدون ما يتلفت
- انتبهلك راجس ..

راجس ابتسم بشويش
- حاضر .. و.. توصل بالسلامة .. سياف

هز سياف راسه بدون ما يطالع براجس وتحرك لبرة البيت بينما راجس طلع الدرج يغير ملابسه

سياف فتم باب البيت وشاف سيارة غريبة .. طالع بدخلها وشاف شخصين .. واحد بنظارة شمسيه عريضة باطراف فضية واضحة وشعر كيلي مرفوع ونازل منه كم خلصه على وجهه والثاني جولان .. الا كان جالس بالسيارة بدون نظاره .. شعره القصير وحلاقته الا واضح ما جددها من بعد التوقيف .. وذقنه الا كانت شوي طويلة وهو يضحك ويتكلم مع الغريب الا جنبه

لف سياف وجهه وتحرك لسيارته .. ركبها واول شي سواه هو انو فتح جواله ودخل على رقم زياد وكتب
- جيب نيسان .. ما اعرف الموديل بس اللوحة **** **** ابغى معلومات صاحبها كاملة

ما انتظر رد زياد لانو يدري بياخذ وقته الين يجيب المعلومة .. رجع ظهره على المقعدة وسحب نظارته الشمسية من علبة السيارة ولبسها وظل يطالعهم .. هما ينتظروا راجس أكيد

المفروض يحرك .. بس شي بداخله يبغاه ينتظر .. يبغى يظل يشوفه ايش لبسه وكيف بيكون شكله .. ابش العطر الا بيحطه ؟ .. هل بيدخل السيارة على طول ولا بيسلم عليهم اول .. هو بس يبغى يتطمن !

انتظر دقايق الين شاف باب البيت رجع انفتح وجولان نزل من السيارة .. شاف راجس يجري ناحيت جولان وينط في حضنه ويتعلق فيه وذا ما كان شي لطيف بعيون سياف ابدا !

راجس كان لابس تيشرت ابيض وفوقه جاكت خفيف أخضر غامق مع بنطلون جنز ازرق .. شنطته على الظهر كانت على كتفه وشعره كان لسه مبلول وكأنه ما نشفه قبل ما يخرج من البيت اصلا