سياف وقف سيارته ومرهف طالع بالمكان بحواجب مرفوعة
سياف فتح بابه بينزل
- مشينا ؟
بس مرهف كتف يدينه قدام صدره
- لأ !
سياف التفت مستغرب
- ليش ؟!
مرهف اشر على المكان
- بتراضيني بمطعم زي ذا ؟! .. من جدك ؟! .. لذي الدرجة انا رخيص عندك ؟!
سياف التفت متفاجئ يطالع مرهف
- اشبك ؟!
مرهف كتف يدينه ولف وجهه
- ماني نازل .. المكان ما عجبني !
سياف ظل يطالعه
- صدقني بيعجبك بس تعال
مرهف هز راسه بالقوة
- ماني انازل ! .. ذي اماكن صاحبك الفقراوي ذاك مو انا !
سياف رفع حاجبه مو فاهم شي
- مرهف ! .. المكان حلو تعال وبوريك
مرهف زعق فيه
- اكره برودك ذا ولما تحاول تراضيني بطريقة غبية ! .. كل مرة اسلكلك واقول تمام بس ذي المرة انت تركتني بنص سفرتنا عشان شغلك الغبي الا تقدر توكله لأي احد .. بس زي العادة الموضوع يتعلق بواحد من الاخوان الزفتين الا انت مسوي فيها امهم وكل شوي تتدخل وتحاول تعدل حياتهم الزبالة فكيف يعني تخلي احد غيرك يتدخل او تسيبهم يتصرفوا لوحدهم ؟! لازم تروح تنقذهم لانكم سوبر مان حقهم !
سياف قفل باب السيارة بطالع مرهف الا واضح انو كان بمرحلة انهيار بكمية الكلام الا بيقوله
مرهف كمل وهو يرفز الارض برجوله
- دايما هما أول .. راشد تعبان لازم تروحله عشانه بزر ما يعرف ياخذ نفسه للمستشفى .. رازي اغمى عليه عشانه ثور ما يعرف ياكل .. انت مو امهم ! .. اصلا طبيعي ابوهم ينتحر لما يلقى نفسه عايش من علتين زيهم !
سياف ما تحمل ومسك يد مرهف بالقوة وزعق عليه
-مرهففففف !
مرهف وقف كل شي .. اول مرة يزعق فيه سياف .. اول مرة يشوفه معصب ..
سياف ضغط على يد مرهف وهو يقرب وجهه ويتكلم بحدة
-سبق وقلتلك .. أهلي خط أحمر .. وذول من أهلي .. فاهم !
مرهف سحب يده بالقوة وحضنها
- هما مو أهلك .. أنت اصلا مفضلهم على اهلك !.. ذول .. ذول مجرد طفويليات جالسة تعيش عليك وعلى عطفك
سياف تكلم بحدة
- مرهف بطل الكلام الفاضي الا جالس تقوله
بس مرهف رجع يزعق فيه
- ما تروح تحب واحد من ذول الاخوان طالما بتعزهم لذي الدرجة !
سياف قفل بيبان السيارة وعدل جلسته وشغل السيارة
مرهف بعد وجهه للناحية الثانية .. ما يبغى يتكلم .. سياف لما ينهي الموضوع بباله يتوقف يتكلم وما يفكر اصلا يناقشك .. من اللحظة الاولى الا دخل فيها حياة سياف كان يدري انو ذول الاثنين متطفلين على حياته .. بس قال كلها فترة وبيقدر يسحب سياف له هو وحده .. قدر يبعده عن طلال وحنان وصار ما يروح مع ابوه مواعيد غسيل الكلى الا مرة بالاسبوع بدل ال٣ ايام الا كان يروحها زمان .. بس ذول الاثنين .. هما الوحيدين الا مرهف مو قادر يبعدهم عن سياف .. ويدري سياف ما بيكون له هو لوحده طالما ذول الاثنين بحياته
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
