راجس

78

راجس مسح عيونه بانزعاج من الاصوات وفتح عيونه وشاف الشمس مغطية الصالة وفي اصوات من المطبخ

رفع راسه بشويش وهو يتثاوب وشادي شافه فابتسم
- قلتلك بنعبي كل شي اليوم فليش تحمست ونمت هنا امس ؟!

راجس طالع حوله وطالع بالبطانية الا فوقه .. سياف ما جا .. رغم انو وعده

هز راجس راسه وهو يوقف
- اسف .. خربت عليكم الترتيب اكيد و ..

شادي قاطعه
- ما خربت شي .. ترى رازي ونواف جالسين يجهزوا حاجات جانبية مع الكيكة .. وانا جالس انفخ البلالين بالمنفاخ .. تعرف نفسي ضعيف فما اقدر انفخ بنفسي

راجس ابتسم لشادي وهو يسحب البلالين
- تدري اني اعرف اسوي زينة بيهم ؟ .. كنت دايما اساعد العمال لما يجوا يجهزوا عيد ميلاد امنية

شادي سكت للحظة
- امينة ؟!

راجس هز راسه وهو يشغل المنفاخ
- اختي الصغيرة .. بنت عادل

شادي ميل راسه
- عمري ما سمعت راشد يتكلم عنها

راجس وقف النفخ وطالع فيه بهدوء
- لانو عمره ما قابلها .. هيا .. هيا بنت عادل فما هيا اختنا كلنا فهمت ؟

شادي رفع حاجبه
- بس هيا اختك

راجس هز راسه
- ايوة بس مو اختنا

شادي طالع في راجس
- ليش تعتبرها اختك لوحدك ؟

راجس هز اكتافه
- لانو محد منهم شافها .. انا الوحيد الا كنت بحياتها فهما ما كانوا حتى جزء من ولادتها !

شادي
- بس هيا اختكم كلكم راجس

راجس سكت شوي يطالع في البلالين
- صح .. بس .. هما ما يعرفوها .. فكيف تقول على شخص ما تعرف انو اخوك ؟ .. الاخوة مو مجرد علاقة بالدم .. هيا اكثر من كذا بكثير ..

شادي سكت شوي
- صح .. بس ما ننكر انو الدم عمره ما يصير موية

راجس
- الدم اصله موية ..

شادي هز راسه
- الموية تحولت لدم في معجزة سيدنا موسى .. تدري ليش ؟ .. لان الموية ما بتتحول لدم الا بالمعجزات .. زي ما علاقتنا مع الناس ما تصير اهم من علاقتنا بأهلنا غير بالمعجزة

راجس ضحك بشويش
- احنا نعيش في عصر المعجزات اجل !

شادي تنهد
- ما قلتلي .. ليش ما نمت فوق في سريرك ؟

راجس مسك بلونتين وبدأ يربطهم ببعض عشان يدخلها مع بلالين ثانية ويسوي شي شبيه بالوردة
- ما جاني نوم فوق .. فنزلت اتفرج وغلبني النعاس

شادي طالع في راجس
- متأكد ؟ .. يعني لو صار شي وما تبغى تقوله لأخوانك .. تقدر تكلمني

راجس طالع في شادي شوي .. ظل يفكر .. كلهم غريبين عنه .. مهما كانو قريبين هنا .. كلهم غرباء ..
- امس راشد كلمني بخصوص قضيتي و .. اعتقد اني كنت حاد معاه شويتين