راجس

4

راجس قفل منبه جواله وهو يفتح عيونه

طالع بالساعة وكانت ٥ الصباح .. رفع راسه وطالع بالغرفة .. لما رجع امس مع سياف هو طلع لغرفته وكمل نومته ..

غرفته .. المفروض انو ذي غرفته .. راشد ورازي جهزوها له وهيا بسيطة ومالها اثر كبير من شخصيته لسه .. بس هو ناوي يغيرها بشكل كامل

قام من فوق السرير وسحب شنطته من عند الباب .. ما مداه يفضي اشيائه خلال الايام الا فاتت فضروري يفضيها اليوم

فتحها وطلع الطقم الرياضي تبعه .. كويس او جولان الا عباله اغراضه لانو عرف ايش يجيب لراجس

بدل راجس ملابس وفتح الطاقة يطالع بالسما .. لسه الشروق ما اكتمل .. يدري انو جو جدة ما بخليه يقدر يطلع بعد الشروق عشان الحر فرجع سحب جزمته ولبسها وطلع من البيت

لما رجع شاف رازي بالمطبخ واقف قدام الثلاجة بدون ما يسوي اي شي

سحب راجس منشفته الا كان حاطها فوق الكنب عشان لما يرجع من برة وبدأ يمسح وجهه وهو يدخل المطبخ
- لا تسوي لنفسك شي

رازي فز والتفت بسرعة وشاف راجس الا جا وراه وسحب جك الموية الا بالليمون الا بالثلاجة وصب بالكوب ومده لرازي
- ما بنصحك تشربه الين تتعود عليه بس يعني .. بيخليك تكره الاكل لكم ساعة !

رازي طالع بالكوب بتوتر قبل ما راجس يسحبه ويشربه هو .. سحب علبة اكل كان مجهزها من اول ومدها لرازي
- ذا فطورك لليوم

رازي سحب العلبة وفتحها .. كان توست بنوعين .. واحد بالجبن وواحد بزبدة لوز

رفع عيونه وطالع براجس
- ذول لك مو ليا .. ما اكل زبدة لوز

راجس جلس على الكرسي
- كلها مواد عضوية وسعراتها محسوبة .. وماهي زبدة لوز تراها زبدة بندق لانك تحب البندق بس ما بتتهور وتاكل نوتيلا 

رازي طالع في العلبة بشك فراجس تنهد ووقف وراح للدولاب وسحب البرطمان ومده لرازي

رازي اخذه وبدأ يقرأ المكونات قبل ما يلف العلبة ويشوف سعرها

رفع رازي عيونه يطالع براجس
- بتفلس كذا

راجس هز اكتافه
- لا تشيل همي .. لو ما عجبك الفطور فدحين بحط شوية جبنة حلوم على الصاج فلو تبغى اعرف اسويلك سندوتش فنان بيه

رازي قفل علبة الاكل وهز راسه
- خلاص .. ب .. باخذ ذي

راجس ابتسم وهو يشوف رازي يحط العلبة في شنطته قبل ما يقفلها ويتحرك عشان يخرج بس راجس وقفه
- ترى بنتغدا سوا .. فلا تطلب اكل للدوام او تكلم العيال تتغدا معاهم

رازي التفت لراجس
- م ..ما يحتاج .. بأكل برة احسن

راجس كشر بشويش
- يعني بتسيبني اتغدا لوحدي ؟! .. خلنيا نتغدا سوا ابغى اخلص صحنك بدالك .. لو بخرج مع راشد هو الا باكل صحني !