أحتجتلك يا أطيب بشر وين ألاقيك؟؟

3

بعد ثلاث ايام ( يوم الثلاثاء).. كان بيت ابو خليفه فاضي .. كانوا كلهم طالعين حتى الخدامه معاهم .. دخلت بيت ابوها مثل المينونه كانت اتصيح وتفتح باب باب وعلامات الضرب باين من ويهها وخشمها ينزل منه دم .. كانت اتصيح وتنادي باسم امها وأبوها وإخوانها وخواتها لكن ما شيء فايده محد فالبيت .. طلعت من البيت تركض وشافها حمود ..
حمود بخوف : خوله شو الي مسوي فيج جذي
خوله: حمود عيالي .. خذ عيالي.. طلقني وخذ عيالي عني .. بيعذبهم حمود بيعذبهم مثل ما عذبني معاه
حمود: وليش جذي ويهج
خوله صارخت عليه: اقولك سعيد ماخذ عيالي اتقولي ويهج .. ما يخصك فيني بس ابا عيالي .. ابا سلطان وزايد
حمود: ما عليج اهدي .. تعالي اقعدي عند يدوه وانا الحين بكلم اخوج خليفه
راحت خوله بيت يدها وراح معاها حمود .. اتصل حمود ف خليفه وخبره عن حالة خوله ... دقايق والكل كان موجود ف بيت اليد
ابو خليفه: خوله بنتي ممكن تخبريني شو مستوي معاج
خوله وهي تشاهق من الصياح: يبا طلقني .. سعيد طلقني من بعد ما ضربني وأهاني وظلمني بعد
خليفه بعصبيه: وليش كل هذا شو مسوي انتي
خوله: والله العظيم اني ما سويت شيء .. يوم الاحد كنت مطلعه العيال الألعاب عشان يستانسون ويغيرون جو وكنت مستأذنه منه ووافق بسرعه حتى بدون ما يحنون عليه العيال.. وديتهم ولعبتهم و عشيتهم ورديت البيت الساعه عشر .. ودخلت الغرفه من بعد ما تأكدت ان كل واحد ف غرفته .. حصلت ورقه عند الباب وخذيتها وكان مكتوب فيها " شكراً على الهديه الحلوه .. كل يوم اطلعي عشان استمتع مع ريلج نفس اليوم .. بس المره الثانيه طولي المده لا ترجعين من وقت " .. انا سكت وما تكلمت قلت يمكن حد يبا يخرب بيتي .. بس بعدين شكيت لان سعيد فالفترة الاخيره كان يتأخر عن البيت وكله على الفون .. يوم الاثنين هو الي طلب مني اني اطلع العيال وقالي بعدين روحي باتي عند أهلج اذا تبين .. انا وافقت وطلعت .. خليت الخدامه والعيال ف الألعاب ورديت البيت لان كنت حاسه ان في شيء .. و بالفعل دخلت البيت وسمعت صوت الضحك طالع من غرفتي .. رحت صوب الغرفه وسمعت صوت أنثوي وهو كان معاها كان يقولها كلام ف حياته ما قالي اياه وغزل وغيره .. انا وقتها انهرت وطلعت من البيت رديت عند العيال وطولت وانا برا البيت وبعدين رديت وكان وقتها هو مب موجود .. قعدت طول الليل افكر وأتقلب احاول انام بس ما شيء فايده .. اضطريت اني أخذ حبتين منوم ورقدت .. اليوم الصبح ما وعيت الا بماي بارد ف ويهي .. وبعدها قعد يضربني بكل قوته .. وتخيلوا شو السبب .. بس لاني مب مطلعه نعاله ( تكرمون) .. ما قدرت امسك نفسي وقلته عن خيانته لي قتله كل الي اعرفه عنه وعن خيانته .. عشان ينصدم ويوقف من الضرب .. بس ما كمل ثواني الا وهو رد يضربني اقوا من قبل وبعدها طلقني وطردني من البيت من بعد ما فر عليّ العبايه وقفل على عيالي الباب
ذياب ما قدر يمسك نفسه وطلع برا وهو معصب .. شافته هند ووقفته
هند: ذياب شفيك .. شصاير داخل
ذياب: ادخلي داخل وبتعرفين
هند: وانت وين ساير
ذياب: بروح أتفاهم مع الحمار سعيد وبيب عيال خوله
هند وقفت اتطالعه خايفه من عصبيته .. مشى ذياب عنها وبعدين رجع قالها تلبس عباتها وتروح معاه .. راحت هند سوت الي طلبه منها ذياب وصاروخ على بيت سعيد
دخل ذياب البيت وشاف سعيد قاعد و معاه وحده .. فار دمه وهجم عليه وضربه .. اما هند راحت ادور اليهال وبطلت عليهم الباب وطلعتهم وراحت السياره .. ركبت اليهال وردت عند ذياب داخل تحاول تهديه .. سحب ذياب سعيد من بعد ما تعب وركبه السياره .. ودقائق ووصل البيت
ذياب: هند شلي اليهال و وديهم عند خوله وبعدها دخليهم داخل الغرفه
هند: ان شاء الله
نزلت هند هي واليهال ودخلوا داخل .. اول ما بطلت الباب الكل لف عليها
ام فارس: هند !! ... انتي وين كنت ومن وين يايه ؟؟
ابتعدت هند من الباب ودخلوا عيال خوله اول ما شافتهم خوله ركضت عندهم وحضنتهم وقَعَدت اتصيح
خوله: يمممههههه عيااااالي ... فيكم شيء .. سوالكم شيء أذاكم بشيء ماما تكلموا لا تخافون
سلطان وهو يمسح دموع: لا ماما ما سوا شيء بس قفل علينا الباب .. انتي تعورتي
زايد وهو يلمس الجرح الي فويهها: ماما يعورج هالمكان
خوله هزت راسها ب لا : لا ما يعور .. اهم شيء انتو ما فيكم شيء
هند: روووز ... روووز .. ياااا رووزز
روز: يس مدام
هند: ودي اليهال ف غرفة الألعاب ولا تخلين حد يطلع لين ما اقولج انا
روز: اوك مدام
خوله: لا خلي سلطان وزايد أباهم
هند وهي تهمس لخوله: خوله خليهم يروحون تراها أوامر من ذياب
راحوا اليهال كلهم مع الخدامه و طلعت هند تزقر خليفه وردت دخلت
فارس: شو فيج انتي ... وبعدين وين كنتي قبل شوي .. وكيف يبتي سلطان وزايد
وقتها دخل ذياب وهو يسحب سعيد
اليد: ذياااااااااااااااااااااب انت شو مسوي فالريال
ذياب: سويت الي كان لازم اسويه من زمان
خليفه: وليش جذي حاله .. ليكون ها يشرب بعد
ذياب: لا .. بس اكل ضرب
سعيد: هه وانت تفكر الي سويته يعني خلاص حليت المشكلة ولا تفكرني برد اختك .. ابوي انا ما أتشرف اخلي وحده راعية سوالف وشباب على ذمتي
حمود تقدم بعصبيه وضربه بكس على ويهه ولصقه فاليدار: انتبه على الكلام الي تقوله فاهم .. لا تخليني اخليك عبره لمن لا يعتبر والله العظيم اخليك تتمنى الموت .. بخليك تكره الساعه الي انولدت فيها
سعيد: زين .. بتشوفون يا عيال الأصول والأخلاق على قولتكم اذا ما رفعت عليكم قضيه وحضانة عيالي ترا بأخذها يعني بأخذها
هند: خلاص روح ارفع قضيه .. نحن نترياك .. بس قبل لا تنهار وتخسر فلوسك على قضيه بتكون من صالحنا نحن طبعاً .. بقولك انت شو مسوي .. اول شيء انت رفعت إيدك وضربت خوله وعذبتها بشتى انواع الطرق والوسائل وهذا الشيء بتثبتها التقارير الطبيه وطبعاً انت بتكون خالفة قانون حقوق المرأة .. ثاني شيء عيالك ما كنت تعطيهم حقهم وغير جذي كنت تضرب امهم قدامهم و طبعاً العيال تعقدوا من ها الشيء وغير الحاله النفسيه الي يمرون فيها الحين وطبعاً هذا الشيء بيثبتها دكتور نفسي وتقارير منه طبعاً وهذا يندرج تحت قانون وديمه واعتقد حقوق الطفل .. وفرق هذا كله في شهود للكلام الي أقوله اول شيء الخدم ، اثنين الجيران ، ثلاث التقارير الطبيه ، اربع الكيمرات المركبة ف بيتك وانت ما تدري عنهم ... هيه صح نصيحة مني لك لا تروح ادور الكيمرات لاني شليتهم وخذيت التسجيل
سعيد: حسبي الله عليكم من ناس .. حسبي الله عليكم
طلع سعيد وهو يتحسب وخايف فنفس الوقت .. اما داخل كلهم كانوا يطالعون هند باستغراب
هند: شفيكم جذي اتطالعوني
ذياب: انتي كيف تعرفين كل هالقوانين والشهود وغيره
هند بصدمه: لا تقول ان كل الي قلته صح !!!!!
ذياب: 100‎%‎
هند: اوووونههههههه
خوله: وعن اي كيمرات تتكلمين بالضبط
هند: هههههههههههههههههـ قصيت عليه عشان يخاف .. والله تميت ادعي انه ما يكشف كذبتي بس الحمدلله عدت عليه
الكل: هههههههههههههههههههههههههههههههههه
✖️✖️✖️✖️✖️✖️✖️✖️✖️✖️✖️✖️✖️