بعد اسبوعين من العزا والحزن والالم على وفاة ابو حمود .. الكل اتجمع عند اليد واليده لانهم وايد تعبوا من وفاة ولدهم البجر .. كانوا يحاولون ينسونهم الي صار او على الاقل يغيرون لهم الجو .. والخبر الي فرح الكل صدق ان اميره ربت يابت بنت و سموها هند اليده : ما شاء الله تبارك الرحمن .. اميره اقري عليها كل يوم وحصنيها .. العين حق اميره: ان شاء الله نوره: خلاص انا ابا بنت ما يخصني اليده: لا واضح انج بتيبين بنت بشرتج فاتحه و خدودج مورده صايره حلوه نوره: ويييي يدوه استحيت هههههه الكل: هههههههه محمد: جان زين تكون بنت ام خليفه: ان شاء الله تكون بنت وليد: يدي ابا اطلب منك طلب اليد: اعتبره تم من الحين شو الي تامر فيه وليد وهو يشوف ميره: ابا املج على ميره .. ومب لازم حفله وغيره بس ف المحكمه وعشا اليد: والله يا ابوي الرد عند البنت و ابوها ابو خليفه: اخوانها الي يقررون .. شرايكم ذياب ببرود: انا من راي ما تكملون العلاقه هذي وتفصخون الخطبه الكل انصدم من رده .. وفهد ومحمد يراقبون تصرفات وليد ميره : ذياب شو الي قاعد تقوله اليده: ليش شو فيه وليد .. سوا شيء غلط ف شيء عشان تبا تفك الخطبه ذياب: يدوه وليد مسوي اشياء مب شيء واحد .. اعتقد انا سكتنا بما فيه الكفايه .. واختي ما تناسب واحد مثل وليد وليد: ليش انا شو سويت وف شو غلطت فهد: اتوقع تعرف شو مسوي .. اعترف ولا انا الي بتكلم .. وعاد انا اذا تكلمت محد يقدر يسكتني جود: شو مستوي .. وليد انت شو مسوي فهد رافع حايب: بتتكلم ولا اتكلم بدالك وليد: كل هذا عشان طلبت انكم تقدمون موعد ملجتي على ميره نوره: هوب هوب لا تيب طاريها على لسانك .. ميره من اليوم تعتبر مب مخطوبه .. وعشان اريحك اكثر ( راحت صوب ميره ومسكت ايدها وسحبت خاتم خطوبتها وفرته عند وليد) خذ خاتمك وروح دور وحده تناسبك اليده بعصبيه: نوره !! شو الي قاعده اتسوينه شو صار عليكم فجاة قمتوا على الولد .. اذا عندكم شيء قولوه لا تقعدون تتكلمون بالالغاز محمد وقف قدام اليده و وليد : انا بقولج شو مسوي .. اول جريمه ارتكبها كانت موت عمي سعيد .. دخل بيته وعطاه مخدر بجرعه كبيره وتوفى .. وبعدين حاول يتقرب من جود ونجود نجح ف شيء واحد انه تقرب من جود بس نجود لا .. وبعدها بدت اتصير لنا المشاكل والمصايب الي كل يوم اتطيح على راسنا .. كشف حقيقة زواج حمد وزور ف القصه وتلاعب بصورهم وغير جذي انه صورهم بدون علمهم .. وبعدها خطف فهد وامر عصابته بانه يضربونه وطبعاً من غبائهم انهم وصلوه المستشفى وردوا السياره.. وبعدها حط واحد يهدد هند كل يوم لما كانت مسافره وحتى انه حاول يعتدي عليها .. و ب.. قاطعه وليد وهو يدزه وطلع السلاح من مخباه و وجه صوبه ( الكل شهق وانصدم وخاف من الي بيصير) وليد: برافو .. يعني كنتوا تراقبون الي اسويه .. هه انزين جان تريتوا شوي عندي مخططات بعدني ما سويتها محمد: كنت بسكت وبشوف لين وين بتوصل بس سالفة قتلك لابوي خلتني اتكلم .. انت يتمتنا ورملت امي .. عيشت ناس مالهم ذنب باي شيء ف عذاب وحزن كبير وليد بصوت عالي: كل فرد ف هالعائله له ذنب باللي عشته انا .. من صغيركم لكبيركم .. خليتوني ادور ف الشوارع واتشحت من الناس عشت حياه ذليله عشت طفوله مرّه بسببكم وبسبب ابوي ذياب: هند شو يخصها وحصه ونوره .. شو يخصهم بماضيك وطفولتك .. ليش ما يت وتكلمت من البدايه وخذيت حقوقك وليد: لازم كلكم اتذوقون الي ذقته انا جود: وليد انت شو تقول اي حق الي تبا تاخذه وليد: الحقوق الي خذوها مني .. انتم المسوولين عن موت اختي وعن الحاله الي كنا فيها و حتى لما .. قاطعه فهد: اختك ماتت بسبب القنبله الي انت كنت زارعنها عشان ذياب ذياب طالع فهد بصدمه : فهد تقصد منو فهد : اقصد علا .. ذياب مب انت المسؤول عن موتها ولا حتى اللون الاصفر .. هو كان حاط القنبله عشانك بس ما عرف ان علا بتكون ف السياره وصار الي صار ذياب تقدم صوب وليد : قتلت اغلى شخص على قلبي وخليتني اعيش ف حاله ما يعلم فيها الا الله بسبب الموضوع هذا ... بتموت يا وليد والله بتموت تقدم صوبه يبا يضربه بس وليد وجه السلاح صوبه وليد: حركه ثانيه بطلق عليك ولا يهمني حد فهد طلع سلاحه ومحمد نفس الشيء .. وحس بشيء على راسه نجود: نزل سلاحك وليد بصدمه : نجود نجود بصوت عالي : نزل سلاحك وليد نزل سلاحه ولف عليها وهي بعدها مصوبه عليه السلاح نجود: شو تباني اسوي فيك .. كيف تباني اسامحك واغفر لك بعد هذا كله .. شو تباني اقولهم ها .. تباني اقول انك انت المسؤول عن حالة هند الحين وانت المسؤول عن موت عمي احمد .. انت المسؤول بالسالفه الي صارت مع حصه .. وانت المسؤول عن الجرح الي ف ايد نوره الي حاولت تقتلها .. انت المسؤول عن الحاله الي بتدخل فيها ميره قصيت عليها وحاولت تتحرش فيها اكثر عن مره .. والخوف الي سببته لدانه وانواع التهديدات الي حصلتها منك وخليتها ترتكب جريمه هي مجبوره عليها بسبب ابوها .. اذا تعتقد انك بكل هذا بترد حق من حقوقك ف انا اهنيك يا اخوي يا ولد ابوي .. انت خسرت حقوقك ومب بس جذي انت خسرت اهلك وخواتك وكرامتك وحتى رجولتك .. لانك لو انت فعلاً ريال ما بتسوي الي سويته وبتي تواجه الكل وبتتكلم وبتطالب بحقوقك الي ضاعت وما اعتقد ان في حد بيطردك او بيمنعك من حقوقك وليد: نجود كيف .. نجود انا اخوج وين راحت الثقه .. الناس هذيل ظلموني وانا صغير وبيسون معاكم نفس الشيء نجود: لا انت مب اخوي ولا اعتبرتك اخوي ف يوم .. كل الي كان يصير تمثيليه .. سويت هذا كله واتقربت منك بس لان فهد الي طلب مني وسويت الي يباه .. ومن يومها وانا اراقبك وعلى فكره اعرف اتكلم اسباني للاسف يعني انك ما تتقن الا اللغه الي انا تعلمتها .. كنت دايماً اراقبك واسمع مكالماتك واعرف مخططاتك .. ومن عرفت حقيقتك خليت فهد يعلمني كيف ادافع عن نفسي ويعلمني الرمايه .. كل هذا بس عشان هذا اليوم كنت اترياه على احر من جمر وليد: طلعتي خاينه مثلهم .. انت.. قاطعه ذياب ب بوكس على ويهه وطاح فيه ضرب والكل يصارخ ويحاولون يبعدونه بس هيهات ذيب وشاف فريسته .. شوي ودخلوا ربع ذياب بامر منه وخذوا وليد وكلبجوه والكل سلم سلاحه وليد والدم تارس ويهه وبابتسامه استفزاز وانتصار : على فكره .. اول جريمه ارتكبتها كانت وفاة ولدكم خالد مب سعيد فهد انصدم وتم واقف يطالعه وهم يسحبون جسمه المتهالك من ضرب ذياب له .. عاش صراع مع نفسه مدته دقيقه ولا قدر يستحمل اكثر الا وهو ساحب وليد من بين ايدهم ويضربه بكل قوته وهالمره محد اتدخل وحاول يبعد فهد لانهم اول مره يشوفون عصبيته هذي ودموعه الي قاعد تنزل من القهر على ابوه الي مات والمفروض يومها يكون حاضر افتتاح شركتهم الخاصه وعشان تعينه لمنصب مساعد المدير .. ومن توفى ابوه فارس الي صار يدير الشركه اما هو ف توجه يدرس عن جنايات وغيرها وخذ خبره بما فيه الكفايه بعدها تعلم طرق الدفاع عن النفس وبعدها تعلم الرمايه وعلم هند ومحمد ... واخيرا قام عن وليد بعد ما اغمى عليه من الضرب حطوه ف سيارة الاسعاف الخاصه بالشرطه و ودوه ................................................... بعد خمس شهور من الاحداث الي صارت.. ف بيت ابو خليفه/ ف قسم ذياب .. قام من نومه وتسبح وتلبس وتعطر وطلع رايح المستشفى كالعاده .. نزل وشاف امه قاعده اتطالع التلفزيون ذياب: السلام عليكم ام خليفه: عليكم السلام والرحمه ...احط لك الريوق ذياب: لا بس بشرب قهوه وبطلع ام خليفه: رايح المستشفى ذياب: هيه .. وين الباقي ام خليفه: حمد وخليفه وابوك راحوا الشركة .. ودانه فوق خلود وبناتها عند اهلهم وميره حابسه نفسها ف الغرفه ذياب سكت وتم يشرب القهوه ام خليفه: ذياب روح شوف اختك كلمها .. حرام الي قاعد يصير فيها والله قلبي يعورني ما تبا تكلم حد ولا تاكل معانا كله تبا تقعد بروحها .. الكل كلمها حتى نوره و خوله كلموها بس ما شيء فايده ذياب: اذا رديت من المستشفى بكلمها ام خليفه: على راحتك وقف ذياب يبا يطلع شاف ميره نازله من الدري وعيونها وارمه وضعفت اكثر وتحت عيونها سواد وشكلها متبهدل ذياب: ميره ميره رفعت راسها له بدون ما تتكلم ذياب: تعالي بكلمج شوي ميره تقدمت صوبه وهو مسك ايدها وقعدها عنده ذياب: شفيج ميره نزلت راسها ذياب: ميره اذا زعلانه عشانه ترا انا حذرتج من قبل وانا ما رفضت الا لهذا السبب .. وبعدين خالد لين الحين يترياج ومستعد يصونج ويسعدج بعد ميره:... ذياب: لا تعاقبين نفسج على شيء انتي مالج دخل فيه .. ولا تلومين نفسج على الي صار .. انتي اختي انا يعني الي ياخذج لازم يسويلج الف حساب قبل كل شيء ولازم يشلج من بيتنا و يحطج ف قلبه وعيونه ميره تمت اتطالع ذياب ذياب: عيونج مالها ذنب ولا صحتج ولا حتى جمالج .. ارجعي اهتمي بنفسج وعيشي حياتج بعدج صغيره والف واحد يتمناج .. واي شيء تامرين فيه قوليلي وانا حاضر حتى لو الكل رفض انا الي بوقف معاج وبقنعهم باس راسها وطلع من البيت وهو يفكر بطريقه تخليها تنسى وليد وتكمل حياتها بالطريق الصحيح دقايق و وصل المستشفى نزل وراح عند الغرفه الي فيها هند وقعد عند الغرفه كعادته ... فجأة شاف الدكاتره يتراكضون صوب غرفتها .. حاول يدخل وراهم بس منعوه تم واقف مكانه وهو يدعي ان ما يصير لها شيء وانها تقوم بالسلامه .. تم على هذي الحاله تقريباً ربع ساعه و طلع الدكتور ذياب: خير دكتور شصاير الدكتور بابتسامه: الحمدلله هند صحت من غيبوبه وما فيها شيء .. كانها معجزه سبحان الله ذياب: احلف!! .. لا لا ما اصدق ... الحمدلله يارب الحمدلله مشكور يا دكتور على هالخبر الحلو الدكتور: تستاهل سلامتها ذياب: الله يسلمك تسلم ابتسم له الدكتور وحط ايده على كتفه وضغط عليه وراح .. اما ذياب ف اول شيء سواه راح يصلي ركعتين شكر وبعدها بلغ الكل وهو طاير من الوناسه .. وطلع من المستشفى بدون ما يشوف هند .............................................. بعد ساعه تقريباً .. كانوا ام فارس وعيالها ف المستشفى عند هند فهد وهو يبوس راسها: الحمدلله على السلامه خيتي هند بتعب: الله يسلمك فهد: شو تحسين فيه الحين هند: احس بخمول وتعب ف جسمي كامل وشيء مثل الثقل على راسي فيصل: اكيد بتحسين بكل هذا راقده ست ما ادري خمس شهور هند ابتسمت فيصل: ترا اعرف شو السبب هند: شو فيصل: لاني ابتعدت عنج .. صراحة ما كنت ادري ان فراقي جذي يسوي فيج فارس ضربه على راسه: وايد شايف نفسك ويا راسك الكل: هههههههههه هند: وينها اميره فارس : هنوده عندها موعد هند باستغراب: قصدك انا ولا شسالفه فارس: احم باركيلي صرت ابو لبنت هند: والله!! .. مبروك مبروك تتربى بعزك ان شاء الله .. انزين وينها ابا اشوفها فارس: هني ف المستشفى عندهم موعد .. بتخلص وبتي هني عندنا هند: شو سميتها فارس: هند هند : اونه .. ما اصدق ام فارس: اميره الي سمتها هند ولا اخوج ما يبا الاسم فارس: افا افا انا ما ابا اسم هند هند: بصدقك بصدقك شوي وسمعوا صوت الباب ودخلوا جود ونجود ونوره ومحمد :السلام عليكم الكل: عليكم السلام والرحمه نجود راحت عند هند وحضنتها وتمت فتره حاضنتنها بدون ما تتكلم هند: هههههههههههه ابتعدت عنها وهي تمسح دموعها: الحمدلله على سلامتج هند: الله يسلمج جود باستها على خدها: ما تشوفين شر يا عمري هند: الشر ما ايج نوره: قوموا قوموا خلوني اسلم عليها ابتعدوا عنها وقربت نوره وحضنت هند: ما تشوفين شر يا روحي هند: الشر ما ايج .. قومي ابا اشوف كرشتج نوره: هههههههههه ... الحمدلله انه مب وايد كبير هند: ف اي شهر نوره: الخامس هند: اووه يعني عرفتي شو نوع الجنين صح نوره هزت راسها بهيه: بنوته هند: يس يسسس يسسس .. سميها هند عاد ما اوصيج نوره: روحي زين من زين اسمج هند: شوفيه اسمي ان شاء الله نوره: عسل عسل محمد: الحمدلله على سلامتج بنت العم هند: الله يسلمك محمد .. شحالك محمد: تمام الحمدلله هند: وين البقيه جود: بيون بعد شوي .. وفي بعضهم ف الدرب هند باحباط: اها نوره:خلاص ريحي نفسج و اسالي عنه ليش تسألين عن الكل هند: وينه محمد: ما نعرف .. هو اتصل فينا الصبح وخبرنا عنج وبعدها ما قام يرد على اتصالاتنا هند: فهد انت تعرف صح فهد: لا والله ما خبرني وين بيروح نوره: ما عليه بي شوي ودخلوا الباقي والغرفة ما شاء الله انترست .. تموا يسولفون مع هند وخبروها عن كل شيء صار لما كانت ف الغيبوبه .. لين يت الممرضه وطردتهم برا عشان تسوي لها فحوصات اتشوف حالتها بعد الغيبوبه وغيره .. اول ما خلصت دخل ذياب وبايده باقه ورد احمر
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
ابتسمت هند لما شافته يتقرب منها بعد ما حط الباقه على الطاوله .. حضنها وهي دفنت نفسها ف حضنه اشتاقلها واشتاقتله .. فقدها وفقدته .. كانت ف منامه وكان ف منامها .. كان يحس بالمها وهي تحس بالمه .. بالمختصر كانوا روحين ف جسد ابتعد عنها وهي مسحت دموعه : اول ما قمت تمنيت عيوني اتشوف عيونك وتغرق ف بحرها ذياب: احتجتلك يا اطيب البشر وين الاقيك هند حطت ايده على صدره: هني .. انا دايماً ف قلبك وبظل ف قلبك حتى لو اطهره بديتول حضنها ذياب وهو يضحك ......................................... تمت
هذي نهاية ابطال رواية " احتجتلك يا اطيب البشر وين الاقيك" .. واشكر كل شخص تابع الروايه اول باول وصوّت وعلق .. اشكركم من كل قلبي انتو بالطريقه هذي اتشجعوني اني احسن مهاراتي اكثر ف كتابة الروايات واني اطلع لكم افكار احلى واجمل ... ترقبوا روايتي اليديده باسم" مدريهوايهعندكاتعذبانسانوالااصدفتوياكوطاحتبراسي" ... وعشان الجزء الثاني لروايتي الاولى ابا ااجل الموضوع شوي او يمكن ما اكتبها .. واخيراً حابه اقول ان كل من تابع الروايه او صّوت او علق سويت لكم follow على الواتباد واتقبل منكم اي انتقاد او فكره والخاص مفتوح للجميع
