أحتجتلك يا أطيب بشر وين ألاقيك؟؟

51

بعد مرور اسبوع ......
الزعيم وعصابته: بعدهم يخططون كيف يقتلون ذياب وحاولوا اكثر عن مره بس فشلوا .. ولين الحين يهددون دانه بابوها
هند وذياب: هند صارت وايد تتعب من الابر الي بدلوها وذياب كل مره يحاول معاها عشان تروح المستشفى بس ترفض وتعاند
ميره و وليد: ميره اصرت وسوت لويه بس عشان يوافقون على وليد واكثر عن مره كلمت ذياب لين وافق هو وخليفه .. ولين الحين ما اعتذرت من نوره ولا فكرت تعتذر منها
نوره ومحمد: كناري الحب 💛.. عايشين حياتهم مره يتضاربون ويتصالحون ف نفس الوقت .. ومره كل واحد يلعوز الثاني وضحك وغيره .. ونوره صارت روحاتها لبيت ابوها وايد قليله واذا راحت تسلم وترد بيتها
دانه وحمد: حمد صاير مشغول الفتره هذي وايد واذا رد البيت على طول ينام وما يقعد مع دانه الا اوقات بسيطه .. اما دانه تهديدات الزعيم ابداً مب مريحها ومرات تقعد اتصيح تترجاه يخليها ف حالها بس ما شيء فايده .. واكثر عن مره كلمت نوره ونوره تنسى
خليفه: طبق نصيحة اليد وصار يتقرب من بناته اكثر واكثر .. وطلعاته قلة وايد واذا بيطلع يطلع مع بناته وحرمته
والباقي حياتهم طبيعيه وما فيها وايد اكشن
......................................
يوم الخميس الصبح
بيت ابو حمود .. دخل الغرفه وشافها توها طالعه من الحمام ( وانتو بكرامه) ومتسانده على اليدار
محمد: شفيج
نوره: تعبت من هالحاله خلاص
محمد: والله انا الي معورني قلبي على الحاله الي انت فيها
نوره: افففف اخر مره احمل خلاص يكفي واحد
محمد: هههههه خير ان شاء الله .. المهم ما تبين تروحين الصالون ولا السوق
نوره: حق شو
محمد: اليوم خطبة اختج شو الي حق شو
نوره: لا .. بتعدل ف البيت وبلبس اي شيء موجود ف الكبت
محمد: نوره ما يصير تقاطعينها جذي عشان كم كلمة قالتها
نوره: تراها خطبه مب ملجة يعني عادي حتى لو ما رحت
محمد: انزين قومي بنروح عند قوم يدوه .. بنتريق عندهم اليوم
نوره: اوك
لبست شيلتها وطلعوا رايحين بيت اليده الي كانت قاعده فالحوش واتسوي خبز رقاق
نوره: السلام عليكم
اليده واليد: وعليكم السلام والرحمه
اليده: هلا هلا بالنور .. تعالي قعدي مسوتلج خبز رقاق ادريبج تحبينه
محمد: يدوه صار لي ساعه قاعد عندج ولا عزمتيني على حبة زيتون بعد والحين يوم نوره يت عزمتيها على خبز
اليده: انت جب يلا جب .. اصلاً الخبز هذا سويته عشانها
نوره: هههههههه فديتج يدوه
اليده: شوفي سويت لج كم حبه بالبيض وجبن .. مثل ما تحبينه
نوره: لا لا لا الا البيض يدوه الا البيض.. ما ادانيه ولا احبه حتى ما احب اشوفه تيني لوعه
اليده: ليش عاد
نوره: يدوه ما اقدر افهميني .. اممم شوفي سويلي خبز رقاق مع السكر
اليده: انزين يبي السكر عشان احطه ويبي سمن معاج
راحت نوره وردت ومعاها الاغراض واليده سوت لها وعطتها .. صبتلها شاي كرك وقعدت تاكل الخبز مع الشاي
محمد:ارحمي حالج ما خليتي سكر ما كليتيه
نوره: وانت شو يخصك فيني ها
محمد: شو شو يخصك فيني مب زين تاكلين هالكثر سكر
نوره وهي تشرب الشاي: خلاص خلني اكل لا تعكر مزاجي
محمد: حددي شو تبين الخبز الي متروس سكر ولا الكرك
نوره: كلهم
محمد سحب الشاي وشربه : يلا كلي
نوره ضربته على كتفه: ايييييه يالسخيف يدووه شوفيه شو يسوي فيني
اليده: هو صادق يا بنتي ما يصير تاكلين وايد سكر هذا يضر صحتج وصحة الي ف بطنج
نوره زعلت وخلت خبزتها وتمت تاكل زيتون: مره ثانيه لا تزقروني عشان اكل معاكم
اليد: زين جذي الحين زعلتوا نور عيني خليتوها تاكل زيتون بس
اليده: عشان صحتها وصحة جنينها لازم تكون حريصه اكثر
محمد خذ خبزتها ومد لها اياه: خلاص خذي كلي خبزتج
نوره دزت ايده: ما ابا كله بروحك
محمد شد خدودها: اويلي انا على الزعلانين بس
نوره:خوز عني 
محمد: خلاص انزين خذي كلي
نوره: ما ابا شبعت خلاص .. كله انت
اليد: محمد ما شفت وليد
محمد: لا
اليده: ما عليك بي بعد شوي
شوي ودخلوا جود ونجود وهم يتضاربون
اليده: ايييه ايييه شفيكم تتضاربون
نجود:  يدوه شوفيها ما اتطيع تسمع كلامي
اليده: انتي منو
نجود: نجود نجود
اليده: هيه ادري اصلاً المفروض ما اسأل الي لسانها طويل يعني نجود
نجود: يدووووووووووه
اليده: خير شفيج اتصارخين
نجود: شوفيها
نوره: بلاكم ياليهال قاعدين تتضاربون
جود راحت قعدت عند نوره وحطت ايدها على بطنها: صباح الخير
نوره ضربتها على ايدها: ايدج يالهبله
جود: ههههه .. شوفي كل يوم بسويلج جذي لين تربين
نوره: يصير خير
اليد: اخوكم وين
نجود: بي بعد شوي
اليده:بتروحون الصالون اليوم
جود: لا بس بنتعدل ف البيت لانه تعرفين بس خطبه
اليده:هيه زين بعد .. ومنو عند ميره الحين
نوره: خوله و امايه
اليده: وانتي ما بتروحين عندها
نوره :لا ما اقدر .. تعبانه ولازم ارتاح وبعدين امايه وخوله معاها .. وبعد هندوه وخلود ودانه يعني ما بيصير عليها شيء
وليد: السلام عليكم
الكل:وعليكم السلام والرحمه
اليده: تعال تريق
وليد: لا ما ابا بطلع عندي شغل بس ياي اصبح عليكم
محمد: الحمدلله .. يلا انا بسير
نوره: ما كليت عدل
محمد: شبعت الحمدلله .. لا تردين البيت بروحج اتري حمدان او اقعدي هني و اذا تبين روحي بيتكم
نوره: ان شاء الله
طلع محمد وبعدها بدقايق طلع وراه وليد .. اما الباقي ف كل واحد راح يسويله شغله ويجهزون الميلس عشان الخطبه
.............................................
ف بيت ام خليفه .. قسم حمد ودانه
دانه:اسمعني عاد انا مب مسويه ولا شيء من الي قاعد تقوله .. ما يهمني لا ابوي ولا يدي ولا نفسي حتى .. لازم اعرف منو انت واشوفك ولا ما بسويلك شيء فهمت
الزعيم: شوفي انا العاده ما اتهدد ولا ان في حد تجرأ وكلمني بالطريقه هذي من قبل .. بس بمشيها لج وبقولج انا منو.. اليوم بتشوفيني ف الخطبه
دانه: تستهبل عليّ ولا شو بالضبط
الزعيم: لوني المفضل الذهبي
وسكر فويهها على طول .. شوي ودخل حمد وشافها سرحانه .. راح وقعد عندها
حمد: دانه
دانه لفت عليه ونقزت: بسم الله الرحمن الرحيم
حمد: ههههههههه شفيج
دانه: خوفتني
حمد: ف شو كنت سرحانه
دانه :ولا شيء .. غريبه اليوم رديت من وقت
حمد اشر لها على صندوق كبير لونه اسود: شوفي هناك
دانه: عجيييب .. هذي هديه خطوبه ميره ؟!!
حمد: لا .. هذي حقج
دانه:احلف .. وااااو شكلها حلو
حمد: روحي بطليها
راحت دانه عند الصندوق وبطلته شافت فيه فستان وشنطه وعلبة مكياج واكسسوارات وكعب بنفس لون الفستان
دانه: حمد وايد حلوين .. والفستان وايد فخم وراقي ف نفس الوقت
حمد: زين انه عيبج .. اباج تلبسينه اليوم
دانه: شووو!! .. ما يصير البسه اليوم .. مب عرس هذا حفلة خطوبه يعني لازم يلبسون شيء بسيط
حمد: بس انا اباج تلبسين هذا .. اباج تكونين مميزه ف حفلة اليوم
دانه: حمد بس ميره بتزعل هذا اليوم يومها
حمد سحب ايدها عشان توقف: ما تهمني اهم شيء انتي تطلعين جميلة ومميزه
دانه ابتسمت له
حمد: روحي تلبسي بوديج الصالون
دانه: اوك
.................................
ف قسم هند وذياب .. كانت قاعده تمشط شعرها شوي وسمعت صوت الباب
هند: منو
ميره: انا
هند: هلا بالعروس تعالي حياج
ميره: حطت البيت كله والكل مب متفيق لي ولا مب موجودين
هند: تلقينهم مشغولين عشان خطبتج اليوم .. تعالي نوره بعدها ما يت
ميره: نوره من وافقوا ذياب وخليفه على وليد وصارت ما تي عندنا .. حسوده استغفر الله
هند: وعلى شو بتحسدج يعني
ميره: لاني خذيت الي احبه وبتزوج عن حب وهي لا ..خذت واحد غصباً عنها والحين عايشه معاه غصباً عنها عشانها حامل
هند: لا تفسرين المواضيع على كيفج .. علاقة نوره ومحمد ما في احلى عنها
ميره: تراكم مخدوعين والله العظيم .. المهم ذياب متى بيرجع
هند: ما ادري .. المفروض انه اليوم بيطلع من وقت بس لين الحين ما اتصل
ميره: اها .. افف ملانه والله بروح اشوف لي فلم اتسلى فيه لين العصر
هند: اوك
شوي ودخل ذياب: السلام عليكم
هند وميره: وعليكم السلام والرحمه
ذياب وهو يقعد على الكرسي: افففف تعب اليوم
هند: طالع من وقت وبعد تعبان
ذياب: الحمدلله اني طلعت ولا كنت اليوم بنكرف كرف اليهد
ميره: شو ذياب ما شفتني يعني ولا شو من دخلت وانت تتكلم مع هند .. على الاقل اسئل عن حالي انزين
ذياب: هند جهزيلي ملابسي بروح اتسبح
ودخل يتسبح وميره واقفه اتطالعه بقهر .. يت هند تبا تكلمها بس طلعت برا وسكرت الباب وراها
.........................................
نقدم الاحداث
بعد صلاة العشا ف بيت ابو خليفه .. الكل كان موجود هناك تقريباً الا دانه .. وخطبة وليد وميره بدت ولبسوا بعض خاتم الخطوبه وقعدوا يسولفون مع بعض قدام الاهل .. اما نوره ف كانت مع هند وخوله وجود ومب معطيه اهميه حق ميره .. اما نجود ف كانت ف المطبخ قاعده تاكل
نجود:هذي بس خطوبه وهالكثر اكل .. عيل ف العرس شو بيسوون .. اااااه بس يارب كل يوم يكون في عرس عشان ناكل اكل مثل جذي
فهد: وبعدين دوري لج باب تدخلين منه
نجود لفت وراها بخوف: اعوذ بالله من الشيطان الرجيم
فهد برفعة حاجب: شايفه جني مثلاً
نجود: شو تبا ياي هني
فهد:ولا شيء بس شفتج مختفيه داخل وقلت اكيد قاعده تبلعين
نجود: عرفت انا وين صح خلاص اطلع برا
فهد: تعالي بقولج شيء
نجود: قول شو تبا
فهد: لا تعالي بهمس ف اذنج جذي ما يصير عن حد يسمعنا
نجود: استغفر الله يا ربي
تقدمت نجود صوبه وعطته اذنها : يلا قول
نزل لها فهد وهمس ف اذنها: اليوم بخطبج من يدي شرايج
نجود رفعت راسها: لا فهد
فهد: ليش
نجود: انا مب جاهزه معنوياً جذي انت بتفشلني قدامهم خلنا بعد خطوبة وليد وميره
فهد: لا انا ابا اليوم
نجود: ايييييه فهد ... والله ما اكلمك لو سويتها الله يخليك
فهد: انتي اساساً ما تكلميني .. ف ما يخصني وبتكلم
نجود: بسوي اي شيء تباه بس لا تقول شيء الله يخليك
فهد : اوك قربي بقولج شيء ثاني
قربت نجود: يلا قول شو تبا
فهد: مبروك عليج الخطبه
وباسها على خدها وركض .. نجود عصبت وشلت القلاص وفرته عليه بس القلاص يا على عين وليد
وليد وهو ماسك عينه: اااااه يا ربي انعميت انعميت
نجود: وليد والله اسفه كنت بفره على القطوه الي كانت هني
وليد: وما تشوفين انزين ما تشوفين .. شوفي حجمي وحجم القطوه يالحوله
نجود: انزين ما كنت قاصده .. خلني اشوف عينك يمكن كسر
وليد ضربها على راسها: قومي عني احسن لج .. كسر فالعين عيل ها .. انا ما ادري هالعائلة ليش فاشله ف العلوم ما ادري اصلا كيف تخرجتوا من الثانوي .. الحمدلله انكم ما كملتوا جامعه ولا بتجلطون الدكاتره الي هناك
نجود تمت اتطالعه بنظرات: اقولك شيء قوم اطلع برا .. يلا يلا اطلع برا احسن لك
وليد: انزين بطلع بس عطيني ماي
نجود عطته ماي شرب وطلع برا اما هي ف كملت اكلها
.................................
عند دانه ف الصالون كانت معصبه لان مال الصالون بطيئات وهي متأخره على الخطوبه .. ويوم خلصت اتصلت ف حمد عشان يشلها وهو بعد تأخر عليها .. تمت تترياه وشوي اتصل عليها وطلعت وركبت السياره وسكرت الباب بالقو
حمد: ايييه الباب شوي شوي عليه
دانه: احسن عيل انا تخليني اترياك ساعه كامله يالظالم .. يكفيني تأخير الصالون الي يبتني عنده
حمد: يبتج عند احلى صالون بعد شو
دانه: خير ان شاء الله احلى صالون قال
حمد: خلج لابسه الشيله يوم تدخلين الشباب كلهم داخل البيت قاعدين ف الصاله
دانه: لا تودني البيت
حمد: شو
دانه: لا تودني ما ابا اروح هناك.. اصلاً حق شو اروح خلاص خلصت الخطبه .. ودني الشقه بقعد هناك لين الفليل وبعدين تعال شلني
حمد: والمكياج والتسرحيه الي دفعت عليهم عشانج انا حتى كشختج ما شفتها لين الحين
دانه: احسن لا تشوف شيء اصلاً ما اباك اتشوف ودني الشقه ما ابا ارد البيت خلاص
حمد: ما بوديج مكان .. بنروح البيت وخلاص
دانه لفت ويهها صوب الدريشه وتمت ساكته
حمد: لا تصيحين عشان ما يخترب مكياجج
دانه: اسكت عني .. ما ابا اسمع صوتك
دقايق و وصلوا البيت نزلوا حمد ودانه
دانه باستغراب: ليش جذي البيت فاضي وهدوء
حمد: ما ادري .. يمكن طلعوا مكان
دخلوا الصاله وكانت الصاله ظلام
دانه: شسالفه ليش جي ظلام
حمد: صبري بروح اشوف الكهربا
دانه: تعال وين رايح .. حمد ..حمددد لا تخليني بروحي
تمت شوي وبعدين سمعت صوت وراها لفت ورا وما حصلت شيء .. تقدمت شوي وشافت حد يركض وبعدها على طول صرخه تمت تمشي لين حست انها داست شيء وصارخت
دانه: يمههههه شو هذا الي دسته ليكون جثه ... حمددد وين رحت
فجأة اشتغلت الليتات مع اغنيه