أحتجتلك يا أطيب بشر وين ألاقيك؟؟

52

اليوم الثاني .. يوم الجمعه الصبح
فز ذياب من نومه وهو يتعوذ من ابليس ويتلفت حواليه .. قام ودخل الحمام " وانتو بكرامه" دقايق وطلع ولبس ملابسه .. لف على هند وشافها راقده
ذياب: هندوه قومي اليوم الجمعه
هند:..
ذياب راح عندها وقعد: هند .. هندوه .. قومي خذي ابرتج الحين وقتها يلا قومي
هند:...
ذياب رفع راسها شوي وشاف جسمها كله معرق وراسها ثقيل .. راح ياب ماي وتم يرش عليها بس ما شيء فايده ..طلع برا القسم وشاف اخته خوله
ذياب: خوله تعالي شوي
خوله: شفيك
ذياب: تعالي
دخل ذياب قسمه ودخلت وراه خوله
ذياب: خوله لبسي هند عبايتها بوديها المستشفى
خوله بخوف: ليش شفيها
ذياب : ما ادري .. خلينا بنوديها المستشفى قبل لا يصير فيها شيء
خوله لبست هند عبايتها وذياب راح يشغل سيارته ورد شل هند وركبها السياره ولحقتهم خوله
..................................
عند حمد ودانه .. كانت قاعده تتجهز وتحط مكياجها .. يا حمد و وقف قدامها مثل كل مره اما دانه فابتسمت له بخجل
حمد: ما ادري ليش تحطين مكياج وتعذبين جمالج
دانه: بس شوي مب وايد
حمد غمز لها: يكفي امس كنتي ناااار
دانه: ههههههههه ... كان احلى يوم
حمد: وان شاء الله كل ايامج تكون حلوه باذن الله
دانه:  امين يارب .. طلبت ريوق ولا بنطلع
حمد: لا بنطلع عشان نقعد نحوط شوي
دانه: ليش بنرد اليوم؟!!
حمد: لا بنقعد ثلاث ايام وبعدين بنرد
دانه: عيل اليوم ابا اروح المكان الي يبيعون فيه حيوانات
حمد باستغراب: ليش شو تبين
دانه: ابا  اخذ لي قطوه بليز حمد بليييييييز
حمد: خلاص اتري عيدج ميلادج السنه اليايه وباخذلج
دانه: حمدددد .. حرام عليك قاعده اقولك بليز
حمد: خلاص انزين بشوف اذا حصلت باخذ بس بشرط يكون صغير
دانه:اوك انا موافقه
حمد وهو يسحب خدودها: يا زين الموافقه بس
دانه ضربته على ايده: يعور اخر شيء بيصير لي خدود من كثر ما تمطهم
حمد: ههههههههههه احسن
..........................................
عند محمد ونوره .. طلع من الحمام" تكرمون" وشافها قاعده تبخر كندورته
محمد: شو تسوين
نوره: ابخر الكندوره
محمد: قومي قومي بروحي ببخر كم مره قتلج لا تقعدين جذي
نوره: يوووه محمد تراك مكبر السالفه عادي انا مب ف الشهر السابع او التاسع
محمد: انتي ف الاسبوع الثاني يعني حملج مب مستقر لازم ترتاحين اكثر عشان الي ف بطنج
نوره وهو تقوم وتقعد على الشبريه: افففففف افففففف .. خذ المدخن ما ابا ابخر انزين بتم قاعده جذي طول اليوم اجابل اليدار واليدار يجابلني .. واذا حسيت بملل اسولف واضحك معاه زين جذي
محمد بعناد: هيه هيه زين جذي قعدي ولا تتحركين
نوره طالعتها بعصبيه
محمد: لا اتطالعيني جذي ما بتخوفيني ولا اني بي براضيج .. انتي اصلاً لازم حد يزعلج عشان تقعدين وما تشتغلين
نوره تمت اتطالعه بنظرات و ويهها صاير مثل اليهال الي يعصبون وخدودها صاروا حمر
محمد يا يتكلم بس قاطعه صوت الباب .. فتح الباب وكانت امه
محمد وهو يبوس راسها: صباح الخير
ام حمود: صباح النور ... محمد روح شوف ابوك شو يبا منك 
محمد: شو يبا
ام حمود: ما ادري يا من برا قال نادولي محمد ودخل مكتبه
محمد: خلاص الحين بروح اشوف
ام حمود: روح انت انا ابا اقعد مع نوره شوي
محمد: ان شاء الله
طلع محمد وام حمود دخلت وقعدت عند نوره الي من شافتها قامت وسلمت عليها
ام حمود: شفيج يا بنتي .. باين عليج متضايقه
نوره: عموه لازم تفهمين محمد ان الحامل تقدر اتسوي اي شيء
ام حمود: ههههههههههه ما عليه حبيبتي تراه خايف عليج
نوره: تخيلي توني كنت ابخر كندورته يقولي ليش اتبخرين الكندوره وانتي حامل وما ادري شو .. قتله خلاص بقعد اجابل اليدار واذا مليت بضحك وبسولف معاه .. قالي احسن ازعلي اونه اصلاً انتي لازم حد يزعلج عشان ما تشتغلين
ام حمود: ههههههههههههههههههه .. ما عليه يا ماما والله انه خايف عليج وعلى الي ف بطنج بعد لا تنسين انتي حالتج خطيره شوي يعني لازم تكونين حذره اكثر
نوره: بس انا ما احب هذي الحاله .. ما ابا اقعد وما اسوي شيء بس لاني حامل .. احس كأني ف سجن
ام حمود: مسألة وقت وبعدين بترتاحين من هذا كله
نوره نزلت راسها وتمت ساكته
ام حمود مسكت ايدها: شيء طبيعي انج بتحسين جذي ف اول حملج بس بعدين بتتعودين ..حتى محمد بيتعود .. وانا بكلمه عشان يخف عليج شوي
نوره باست راسها: لا خلا ولا عدم .. ولو تقرصين اذنه عشان مره ثانيه ما يزعلني بعد احسن
ام حمود: هههههههههههههههه حاضر عاد هذا اذا وصلت لاذنه
..............................................
عند ابو حمود ف المكتب .. كان قاعد ينتظر محمد شوي وسمع صوت الباب
ابو حمود: تعال
محمد: السلام عليكم
ابو حمود: اقعد اباك ف سالفه
محمد: امر
ابو حمود وهو يراويه صوره: شوف هذي شرايك فيها
محمد باستغراب: كيف يعني شرايك فيها .. منو هذي
ابو حمود: هذي بنت واحد راعي حلال ومال .. ابوها تاجر معروف واخوها بعد عنده محلات عالميه ف اوروبا
محمد رفع حايب: انزين شو اسوي ؟!
ابو حمود: تتزوجها طبعاً واتطلق الي عندك
محمد : ابويه انا نوره مستحيل اطلقها ومستحيل اتزوج عليها
ابو حمود: وبعدين معاك يعني ليش ما تبا تفهم ها .. نوره ما تناسبك وبعدين عشان اذا الي ف بطنها خلها تعقه ما تباه
محمد: يبه الي تتكلم عنها هذي حرمتي وبعدين الي ف بطنها ولدي مب قطعة حلاوة
ابو حمود ببرود: نفذ الي اقولك عليه لا اخلي ولدك وحرمتك يروحون ف يوم واحد
محمد سكت وتم يطالع ابوه بصدمه .. ما عرف شو يقول .. يبا يقتل بنت اخته وحفيده عشان الفلوس بس
ابو حمود: بنروح بعد يومين عشان اتشوف البنت وتقعد معاها شوي لان هذا طلبها وبعدها بنروح نخطبها لك .. اذا سويت الي اقولك عنه بدون ما تخرب عليّ الموضوع بسمح لك اتخلي نوره على ذمتك وتتزوج البنت بالسر وانا الي بدبر لك كل شيء
محمد تم يطالع ابوه بدون ما يتكلم او ترمش عيونه
ابو حمود: وانا اشوف انك اتخلي زواجك بالسر لين تربي نوره وبعدها تاخذ الولد وتعطيه حرمتك اليديده و اتخلي نوره تخدمك انت و ولدك وحرمتك بعد .. ها شقلت
محمد تم يطالع ابوه: انا مب مصدق انك انت ابوي .. لوين وصلتك الفلوس .. تبا تبيع كل شيء عشان كم فلس .. تبا بنت اختك تشتغل خدامه عند الي يسوى والي ما يسوى بس عشان الفلوس .. وفوق هذا تبا تذبح ولدي الي بعدني ما شفته عشان الفلوس .. انت اصلاً كيف عايش ف الدنيا هذي .. هه وكنت تعيب على عمي سعيد لانه كان يضيع فلوسه على اشياء الحرام وصرت مثله بس الفرق انك انت تركض ورا الحرام ومستعد تبيع الدنيا كلها عشان بس كم خرده .. اما عمي سعيد ف كان يركض ورا الحرام عشان ينسى زوجته وما يتعذب ف الاخير مات وتعذب اكثر واكثر حتى مب لاقي ولد صالح يدعي له .. وهذا بيكون حالك بالضبط
..........................................
ف المستشفى عند ذياب وخوله .. كانوا يتريون الدكتور يطلع وذياب رايح وراد ف الممر ومتوتر اما خوله ف كانت ماسكه اعصابها وقاعده تدعي .. ما تحب اللحظات هذي
خوله: ذياب بروح اخذ لي ماي وبرد
ذياب هز راسها باوك
قامت خوله وراحت الكانتين الي موجود ف المستشفى وخذت لها ماي وقهوه ساده حق ذياب .. ردت عند ذياب وشافته على حاله
مدت له القهوه: اشرب
ذياب هز راسه بلا
تنهدت وقعدت مكانها تتريا معاه
شوي وطلع الدكتور وباين على ويهه اليأس
ذياب بلع ريجه: خير دكتور طمني شحالها هند
الدكتور حط ايده على كتف ذياب: والله سوينا كل الي نقدر عليه .. بس البنت دخلت ف غيبوبه اثر زياده في جرعة الانسولين .. وعشان اكون صريح معاك هذا شيء خطير جداً واغلب الي دخلوا ف الغيبوبه هذي ما قاموا منها .. دعواتكم
ذياب تم يطالع الدكتور : كيف يعني ما قاموا منها شو تقصد بكلامك هذا
الدكتور: يعني عطوك عمرهم
ذياب: لا مستحيل .. مستحيل هند تروح وتخليني .. روح سو اي شيء بس اتقوم بعطيك الي تباه بس خلها تقوم .. لا تخليها تروح
الدكتور: اخوي سوينا كل الي نقدر عليه والباقي على الله .. انتو بس ادعولها هي محتاجه دعواتكم
وراح وخله ذياب ف حاله لا يحسد عليها .. اما خوله ف تمت اتصيح وتدعي ما قدرت اتسوي شيء ثاني
..................................................
توقعاتكم؟!