أحتجتلك يا أطيب بشر وين ألاقيك؟؟

36

ف هولندا ف الفندق .. دخلت نوره الغرفه وبدلت ملابسها وحطت راسها عشان ترقد ..شوي ودخل محمد
محمد: ما تبين تاكلين
نوره: لا .. روح كل بروحك
محمد: عيل ليش خليتيني اطلب هالكثر دامج ما بتاكلين
نوره: محد ضربك على إيدك وقالك اطلب وايد
محمد قعد قدامها على الفراش: شو فيج معصبه
نوره: ابا انام وارتاح من اليوم الخايس هذا ممكن
محمد وهو يمسك ايدها و بصوت حنون : شفيج
نوره تمت اتطالعه وبعدين قالت بعصبيه: محمد لا تقعد تكلمني بالنبره هذي .. انت تعرف شو مسوي ف ماله داعي الاسئله هذي
محمد: افا افا .. بلاج معصبه جذي شفيج
نوره: بتطلع برا ولا اتطلع انا
محمد بزعل: خلاص بروحي بطلع خلج قاعده
قام وبطل الباب وطلع .. اول ما سكر الباب تنهدت
نوره: هو الغلطان وبعد يزعل .. احسن خله يزعل .. رايح يقعد مع وحده شقرا وجيكره وقاعد سوالف معاها وانا مخلني بروحي .. هه اكيد الحين بيروح عندها معلوم ما يقدر يصبر بدونها .. يارب متى بنرد البلاد ابا اطلع الي ف خاطري متضايقه احس بقمته ف قلبي بموت والله العظيم بموت .. بديت أتقبله ف حياتي واثق فيه بس اليوم كسر كل شيء جرحني يوم راح وقعد عندها .. والله العظيم قطع قلبي .. يارب صبرني والله ما اقدر اتحمل كل ها والله ...
وحطت راسها بين المخدات وقَعَدت اتصيح .. اليوم كان بالنسبه لها مثل الكابوس لين الحين يمر ف بالها السياره الي بغت تدعمها و لولا وجود محمد جان الحين هي ميته وبعدين محمد وهو معصب عليها وبعدها  يوم قعد عند البنت وتم يسولف ويضحك معاها وآخر شيء صورته وهو يطلع برا الغرفه وهو زعلان ... ما حست الا بايد تمسح على راسها
محمد: معقوله كل ها شايلتنه بقلبج ومتعبنج
نوره انصدمت من وجوده .. قامت وعطته ظهرها وتمت تمسح دموعها عشان ما يشوفها
محمد وهو يمسك ايدها: لا تمسحينهم .. خليهم طلعي الي بخاطرج وانا موجود
نوره وهي تشل ايدها: ما احب حد يشوف دموعي
محمد: بس انا مب حد
نوره:...
محمد قعد عندها ولف ويهها صوبه: شوفيني وتكلمي وقولي شو الي مضايقنج شو الي معور قلبج ومب مخلنج ترتاحين
نوره: محمد ابا اقعد بروحي شوي .. نفسيتي الحين تعبانه وانت ما بتتحملني وانا جذي
محمد: نوره اذا انا ما تحملتج الحين وف اللحظة هذي عيل شو خانتي ف حياتج .. قولي شو الي مضايقنج
نوره: منو الي قعدت معاها اليوم .. وليش جذي سويت فيني .. ليش فشلتني قدام الناس وقمت عني ورحت عندها وتسولف وتضحك معاها ولا كان عندك حرمه وفوق هذا عصبت عليّ قدام الناس
محمد: هذا الي مضايقنج
نوره نزلت راسها: جزء منه
محمد: اوك عشان اريحج بس .. انا ما عصبت عليج الا لاني كنت خايف عليج من السياره تعرفين انج كنت بتروحين مني وبعدين هذي ردة فعل لا إرادية من خوفي عليج .. والحرمه الي قعدت معاها هذي خالتي اسمها حلا مسافره هني تكمل دراستها وخلصت وبترد البلاد قريب بعد
نوره بصوت واطي بينها وبين نفسها: حلا وجي جيكره وعععع
محمد بابتسامه: سمعتج ترا
نوره طالعته
محمد: ارتحتي الحين
نوره:..
محمد: تعالي كلي الحين و الفليل بوديج المكان الي تبينه
نوره: ما ابا اكل بنام
محمد مسك ايدها: قومي يلا يلا ابا اكل انا يوعان
نوره: انزين روح كل انا شو يخصني
محمد: المشكلة ما اقدر اكل بدونج قومي يلا
نوره بابتسامه تحاول تخفيها: انزين
................................................
ف المستشفى
بطلت عيونها ولقت المغذي ف ايدها لفت حواليها وما حصلت حد .. شوي ودخلوا خوله وميره
خوله: السلام عليكم
دانه: وعليكم السلام
خوله: شو تحسين فيه الحين
دانه: شوية دوخة بس احسن عن قبل
خوله: ما تشوفين شر
دانه: الشر ما اييج يا عمري
خوله: تعرفين انا منو ولا؟!
دانه ابتسمت: اعرفج .. انتي خوله والي معاج ميره
خوله: صح عليج .. ما شاء الله حافظتنا
دانه: ههههه حمد خبرني عن اسمائكم ... حمد وين
خوله: حمد يا بعد عمري راح ايبلج اكل قالوله انج وايد تعبانه
دانة: تفضلي قعدي ليش واقفه .. تعالي مياري قعدي
ميره برفعة حاجب: اسمي ميره مب مياري من وين يايبه الاسم هذا
دانه بإحراج: اسفه ميره بس حمد يحب يناديج مياري حتى ف فونه كاتب مياري
ميره: هذاك حمد اخوي .. اما أنتي ولا شيء بالنسبه لي وما تقربيلي فهمتي
خوله: و ويعههه كلمي حرمة اخوج عدل
ميره: اي حرمة .. اخوي ما عنده حرمه .. هذي يومين و بتطلق
خوله بعصبيه: ميروه لو ما سكتي بتنضربين اسكتي ما ابا اسمع صوتج .. وخلي حمد اي وبخبره خل يغسل شراعج
دانه : ما عليه خوله خليها تتكلم برايها
ميره: غصباً عنج ات...
قاطعها دخول حمد: السلام عليكم
الكل: وعليكم السلام
حمد: شحالج الحين شو تحسين فيه
دانه: الحمدلله بخير
ميره: توج تقولين احس بدوخة والحين صرتي بخير شهالمنكر
خوله: بس جب قومي اطلعي برا يلا
مسكت خوله ايد ميره وطلعوا برا
حمد لف على دانه: تحسين بدوخة؟!
دانه: شوي بس .. الحين انا احسن
حمد تنهد: الحمدلله
دانه مسكت ايده: حمد انا اسفه اذا خربت عليك السالفه والله ما قدرت امسك نفسي اكثر عن جي .. حسيت جسمي ما فيه قوه
حمد: لا لا تحاتين كل شيء عدى على خير الحمدلله
دانه: كيف يعني عدى على خير
حمد: يعني ابوي من بعد ما سمع عن حالتج الصحيه وافق ورضا عني .. شكله اشفق عليج وامي قالت انها هي اصلاً من زمان كانت تباج لي بس هند قالت لها انج متزوجة
دانه وهي تبلع ريجها: كيف .. يعني ما بتطلقني؟!
حمد: لا ما بتطلقج ليش اطلقج اصلاً
دانه: انزين انا شفيني
حمد: فقر الدم حاد .. هذا الي مسبب لج دوخة وتعب .. لازم تاكلين عدل وتبتعدين عن القهوة والشاي
دانه بطلت عيونها : شوووو !!!! لا لا ما اقدر راسي يعورني اذا ما شربت واحد منهم ف اليوم
حمد: بتتوعدين
دانه: يصير خير
............................................
عند خوله وميره .. طلعوا من المستشفى وركبوا مع الدريول وحركوا رادين البيت .. دقايق و وصلوا البيت ونزلوا من السياره
ميره: ما بتروحين بيت خالو مزنه
خوله: ليش اروح هناك
ميره وهي تأشر: لان بعلج لاحقنا من المستشفى
خوله لفت وشافت سعيد ياي صوبها .. خافت وسحبت ميره ودخلت بيتهم وسكرت الباب
خوله: الله يأخذك ان شاء الله هذا ما يطلع الا يوم يكون البيت فاضي
ميره: انزين قعدي معاه شوفي شو يبا
خوله: يخسي اقعد معاه يبا شيء يتفاهم مع اخواني
ميره: اي اخوان؟!! ... حبيبتي اخوانج كل واحد فيهم بصوب مع حرمته واحد حرمته توها مربيه والثاني مسافر معاها شهر العسل والثالث حرمته الله ياخذها ان شاء الله ف المستشفى تعبانه
خوله: ميره انتي ليش تكرهين دانه شو مسويتلج
ميره: من الله ما احبها من الله
دخلت ميره الصالة ودخلت وراها خوله وشافت ولدها سلطان قاعد ف الصاله
خوله: السلام عليكم
سلطان وهو يقرب منها ويبوس راسها: وعليكم السلام
خوله: ليش قاعد بروحك اخوك زايد وينه
سلطان: زايد فوق راقد
خوله: انزين انا بروح فوق ارتاح شوي وبعدين يمكن اروح المستشفى
سلطان: ليش يدوه ما طلعوها
خوله وهي تمشي: بعد شوي بيطلعونها
سلطان:زين
...............................................
ف بيت ام فارس .. كان سعيد قاعد مع اليد واليده وفارس
اليد: بس انت الي سويته ف البنت شيء مب سهل
سعيد: ادري انه ما كان سهل وانا ندمان على الي سويته وتبت والحين ابا أرجعها خاصةً اني طلقتها طلقه وحده بس يعني بعدها ف ذمتي
اليده: انت تعرف الرأي الاول والأخير عند خوله محد يقدر يجبرها على شيء حتى ابوها .. وبعدين البنت انذلت وانضربت عندك شو الي يضمنا انك ما بترد اتسوي فيها نفس الشيء
سعيد: والله ندمان على كل شيء سويته ومستعد اسوي اي شيء تطلبه مني خوله بس ترد لي
اليد: خير ان شاء الله انا بكلم سعد وان شاء الله خير
سعيد: أبويه الله يخليك أقنعه وبعدين لا تنسى انا عندي عيال ما أباهم يتشتتون
اليد: ان شاء الله بكلمهم وبرد لك خبر
سعيد وهو يبوس راس اليد: مشكور وما قصرت
فارس: هيه بس من الحين لين يردون لك الخبر ما ابا اشوفك تلاحق البنت من مكان ل مكان واتطفرها وحركات المراهقين هذي فهمت!!!
سعيد بإحراج :اااا... شااا... ااان شاء الله
...........................................
اليوم الثاني ف ألمانيا / المستشفى
بطلت عيونها وشافت مكان غريب .. لفت يمين وشافت ذياب راقد وباين على ويهه التعب .. خافت تتحرك ويطلع صوت ويقوم ف تمت مكانها وسكرت عيونها ومر على بالها كل الي صار معاها امس .. عضت شفايفها عشان تمنع صوتها يطلع بس ما قدرت تمنع عيونها انها اتدمع تمت على هذي الحاله لين حست بحد يمسح دموعها .. دزت ايده و بطلت عيونها بخوف
ذياب: هذا انا انا ذياب
هند تمت اتطالعه وهو تقرب منها شوي شوي وحضنها .. وأول ما حضنها انفجرت من الصياح
هند: ليش خليتني بروحي .. ليش طلعت وخليتني .. كنت خايفه ذياب كنت خايفه.. كان بيقتلني
ذياب وهو يمسح على شعرها: اهدي اهدي يا قلبي ما صار شيء ما صار شيء
هند وهي تقوم من حضنه: ك ككان ظلام .. ما كنت اعرف مكانه بالظبط ف كل مكان اسمع صوته .. تت تعرف شو قال .. قال انه بيقتلك وبيقتلني انا بعد قال ما بيرحم حد.. ح حتى اهلنا بيق..
ذياب قاطعها: ما يقدر يسوي شيء دام نحن موجودين انا وانتي وفهد ومحمد ما يقدر علينا
هند بصوت عالي وهي تصيح: ذياب هم عصاااابه عصابههه ... هذيل من عصابة المجهوول ... قالي انهم يراقبونا من زمان حتى بيت يدي يراقبونه ... قالي انه ما بيرتاح لين يقتلنا كلنا ... ذياب كانوا يبون يقتلوني انا وي..
ذياب قاطعها وهو يمسك ويهها: اششش اهدي اهدي ما بيصير شيء .. هم بس يخوفونا .. لا تتأثرين قوي قلبج عشان ما ننهزم
تمت هند اتطالع ذياب وعيونها اتدمع وتشاهق .. ف هاللحظة دخلت النيرس وعطتها إبرة مهدي عشان ترتاح وقالت حق ذياب يخليها ترتاح شوي وما يخليها تتكلم عشان صحتها .. بعد ما تأكد ذياب انها رقدت طلع عشان يكلم فهد
....................................
ف هولندا
محمد: الحين وين تبينا نروح
نوره: ما ادري كيفك
محمد: شرايج نروح السوق ناخذ صوغه حق الأهل
نوره: لا هذا خله باجر .. اممم اليوم ابا احلل السفره
محمد: ههههههههه كل هذا وما حللتيه
نوره: اقصد نبا نسوي شيء اكشن مغامره جذي يعني
محمد: ما في الا ساحة سكوير
نوره: لاااا الا هناك مستحيل اروح .. اممم شرايك ملاهي خاطري اركب قطار الموت
محمد يطالعها بنص عين: متأكدة تبين الملاهي وتركبين قطار الموت
نوره: هيه متأكدة
محمد: ما تخافين
نوره: لا ما اخاف بالعكس اعشق المغامرة
محمد: خلاص اوك .. بنشوف الحين واذا طلعتي صدق ما تخافين بسوي الي تبينه وأوديج المكان الي تبينه بعد
نوره: احلف!!
محمد: والله العظيم .. واذا خفتي وما كنت قد التحدي انتي تسوين الي انا أباه وانا اوديج المكان الي انا أباه
نوره: اوك تم
راحوا حديقة walibi holland
وتموا يلعبون ويلعبون ويلعبون لين تعبوا
نوره وهي تقعد عند النافورة : اففففف حمااااس حمااااس حتى تعبت من الحماااس
محمد: والله وطلعتي قد التحدي .. يلا قولي شو تبين و وين تبينا نروح
نوره: ابا اروح سوق الزهور عيبني اخر مره وابا اروحه مره ثانيه .. اما شو ابا بعدني بفكر
محمد وهو يمسك ايدها: يلا عيل قومي خلينا نروح دام ما عندنا شيء
نوره بطلت ايده وهي اتدور ف شنطتها: دقيقه محمد ما اعرف وين فوني
محمد: انزين شوفي اقعدي دوريه ف الشنطه وانا بروح أخذ لنا شيء نأكله
نوره: اوك بس لا تتأخر
محمد: من عيوني
بعد نص ساعه تقريباً .. يا محمد ومعاه حلا ونوره كانت مشغوله ف فونها وتغني بصوت خفيف
حلا بدلع: السلام عليكم
نوره بدون اي تعبير ف ويهها : عليكم السلام
حلا: شحالج نوره
نوره: بخير
حلا: اممم بتروحون مكان ولا بتردون الفندق
محمد وهو يعطي نوره الاكل: ما ادري الرأي عند نوير
نوره:ما ابا اكل كلهم انت
محمد: شفيج ليش ما تبين
نوره: محمد لاعبه كل هالالعاب وين تباني اكل .. لازم اصبر شوي وبعدين اكل ولا ترا بتعب
محمد: انزين ما تبين ماي
نوره: لا
حلا: ليش جي جافه مع ولد اختي وتكلمينه من طرف خشمج وفوق هذا كله مزعلتنه بعد
محمد: حلا بس خلاص ما ابا مشاكل
حلا: لا .. خلها تعرف عشان تحس ولا بعد ما عندها احساس
محمد: حلا بس خلاص قلت ...انا مطلعنها عشان تستانس  مب تنغث
حلا: على راحتك
محمد وهو يمسك ايد نوره: لا تزعلين منها .. وبعدين انا مستانس وياج وأحبج وانت جذي ..صريحة وحنونه وحبوبه وفوق هذا كله جميله
نوره ابتسمت على الخفيف ونزلت راسها
محمد: وين تبينا نروح
نوره: وفي بوعدك .. تراني فزت ف التحدي
محمد وهو يأشر على عيونه: من عيوني
حلا: انزين محمد انا بروح ربيعاتي وصلوا
محمد: ما بتيين معانا
حلا: لا وين تباني اي معاريس انتو .. يلا مع السلامه
محمد: انتبهي على نفسج
نوره: كم بياخذ الوقت من هني لين السوق
محمد: تقريباً ساعه
نوره: عيل خلنا نروح مطعم وبعدين بنروح الفندق وباجر بنروح السوق وبالمره عشان ناخذ صوغه
محمد: الي تشوفينه
...................................
توقعاتكم🔫🔥😍