أحتجتلك يا أطيب بشر وين ألاقيك؟؟

40

ف المستشفى .. وصل محمد وسأل عن فهد وطمنوه عليه ودلوه الغرفه .. راح محمد الغرف وشاف فهد قاعد وقاعدين يجبسون ايده ورأسه ملفوف وفي كدمات على ويهه .. راح محمد عند فهد وحط ايده على كتفه
فهد لف عليه وابتسم : انا بخير ما فيني شيء
محمد: منو مسوي فيك جذيه
فهد: حادث 
محمد: لا تكذب عليّ وقول الصدق
فهد: منو قالك اني ف المستشفى
ةمحمد: الدكتور الي عالجك
فهد :....
محمد عرف انه ما يبا يتكلم الحين ف سكت عنه وتريا لين يخلصون ايده وفونه شغال اتصالات بس هو ما يرد لين اخر شيء اغلقه .. من بعد ما خلص فهد ركبوا السياره وكانوا متوجهين للبيت وفهد بعده رايق و مبتسم .. ومحمد مب قادر يمسك أعصابه اكثر بس مستحمل عشان يعرف السالفه
محمد وهو يدق أصابعه على السكان: ما تبا تخبرني منو الي مسوي فيك جذي
فهد: قتلك حادث
محمد ضرب بريك ولف عليه بعصبيه: لاااا تكذذذببب عليّ
فهد لف ورا يطالع اذا كانت في سياره وراهم وبعد لف على محمد ببرود: شفيك معصب انزين
محمد: ما اقدر استحملك والله العظيم بتذبحني ببرودك هذا .. وبعدين على شو مبتسم على حظك الخايس ولا على الحاله الي انت فيها
فهد: بس بعدني عايش
محمد وهو يطالع قدام: لو ميت احسن
فهد ابتسم وتم يطالع قدام ومحمد من شافه الضغط ارتفع عنده وده يصفعه كف يرقده ف غيبوبه .. خذ فونه ووفتحه عشان اذا اي حد يتصل يصب عصبيته فيه .. دقايق وكانوا قريبين من البيت ورن فونه
محمد بعصبيه: خيييرررر
نوره: الو
محمد: هلا نوره شو بغيتي
نوره ( بلاه هذا يتكلم بنفسيه): ما ابا شيء خلاص مع السلامه
وسكرت الخط فويهه .. زادت عصبية محمد وسرع لين وصل بيت اليد وقف ونزل من السياره .. نزل وراه فهد وكان ياي يبا يروح بيتهم بس محمد سحبه ودخله بيت اليد
فهد: وين مودني
محمد: جهنم .. وين بعد اهلك يتريونك داخل أمك من متى تحاتيك
فهد : شفيك تتكلم جي انزين ليش معصب
محمد: شوف اذا ما شليت ابتسامتك الخايسه هذي عادي ارتكب فيك جريمه فهمت
فهد: يلا خلنا ندخل امي تحاتيني
محمد مسك فهد من كندورته وتم يسحبه مثل العنز و وداه الميلس بطل الباب وسحبه لين ام فارس
محمد: عموه خذي عنزج حصلته
ام فارس: فهد شفيك شو الي مسوي فيك جذي .. ليش لافين إيدك ورأسك شفيه .. وكندورتك ليش كلها دم
فهد: ما فيني شيء .. حادث بسيط
ام فارس حضنته وهي تصيح: فديتك يا ولدي .. فيني ولا فيك .. فيني ولا فيك .. كيف صار الحادث
فهد:  لا تحاتين امايه حادث بسيط بس واحد دعمني و وصلني المستشفى
اليده: صدق قليلين أدب يدعمك ويوصلك المستشفى .. ليكون هو الي ياب سيارتك عند الباب بعد
فهد استغرب وهز راسه باستغراب
حمد يسلم على فهد: ما تشوف شر
فهد :الشر ما اييك
والكل قام يتحمد له بالسلامه الا نجود كانت قاعده ف الزاويه واتصيح واتطالعه وهو مب منتبه لها .. قعد  فهد بين امه ويدته ويأكل فواكه ومحمد قاعد يطالعه بعصبيه يترياه يتكلم
حامد: محمد شفيك معصب بسم الله
محمد يطالع فهد .. لف عليه فهد وابتسم
محمد قام ومسكه من كندورته: ابتسامه ثانيه بيك شلل سمعت .. صدقني بصفعك بيبلك عاهه مستديمه
فهد: هههههههه شفيك عليّ اليوم
اليده تضرب محمد : قوم عن الولد بتعوره
محمد : اضربيه هو مب انا .. قاعد يوزع ابتسامات كأنه ما فيه شيء
اليده: عيل شو تباه يسوي يصيح شرات البنيات
فهد: سير سير اقعد عند حرمتك وفكني من حشرتك
محمد: ما يخصك فيها
فهد: يدوه تعرفين انه هزب حرمته وصارخ عليها بعد
اليده : شوووو .. وليش ان شاء الله تصارخ على البنت .. وينها نوره .. نوير .. نويييرررر
جود: يدوه راحت المطبخ بتي بعد شوي
اليده: ما عليه ما عليه يا محمد هازب بنتي ومصارخ عليها بعد
محمد: يكذب عليج يدوه انتي صدقتيه على طول
اليده: هيه صدقته ومكذبتنك انت .. قوم يلا رد مكانك لا افلعك بهالقلاص
شوي ودخلت نوره وهي شاله صينية عصاير و وزعتهم على الموجدين و قعدت عند دانه
اليده: نوير محمد هازبنج ومصارخ عليج
نوره رفعت راسها اتطالع محمد وبعدين لفت على اليده : لا يدوه
اليد: عيل شفيج متغير حالج جذي فجاة .. مب نوره الي قبل والي اعرفها
نوره:انا مثل ما انا ما تغيرت .. بس لاني تعبانه شوي عشان جذي
اليده: من شو تعبانه .. شوالي يعورج
نوره نزلت راسها: جسمي يعورني فيني خمول وابا ارقد طول الوقت
اليده: هيييه .. هذا من تعب السفر لازم ترتاحين .. وانت ايييه خل الحرمه ترتاح مب تلعوزها
محمد: ان شاء الله ... ان شاء الله
فهد وقف: انا بروح ارتاح شوي
ام فارس: خذني معاك .. بسويلك شيء تشربه وتريح
فهد: لا امايه ارتاحي انا بحط راسي وبرقد
ام فارس : على راحتك ابوي .. بس اذا بغيت شيء قولي
فهد: ان شاء الله
...........................................
ف مكان ثاني .. بيت منال
كان الكل موجود من اولاد وبنات مسوين مفاجئة حق منال عشان عيد ميلادها .. وطبعاً البيت فاضي ما فيه حد
حصه:منال يلا لا تتأخرين
منال: يلا الحين بي بس اضبط المكياج
حصه: خلاص بسج حلوه جذي لا تزيدين شيء
منال: خلاص اوك
وطلعوا رايحين صوب صالة المسبح عند البقيه .. دخلوا منال وحصه وبدت صوت الاغاني وغنوا لمنال وقصوا الكيكه وكل واحد قعد ف مكان
سيف وهو يعطيها قطعة كيكة: كل عام وانتي بخير
منال بعد ما كلت الكيك: وانت بخير
حصه: كل عام وانتي بخير منال وعقبال مليون سنه يارب
منال: وانت بخير حبيبتي
راشد:كل عام وانتي بخير
منال: وانت بخير
حصه: يلا منال انا لازم اروح الحين تأخرت على البيت
منال: ليش عاد خلينا قاعدين
حصه:لا تنسين ان باجر سفرتنا والصبح بعد ف لازم أقوم من وقت والحين بروح ارتب شنطتي
منال: وييييي نسيت السالفه .. المهم تروحين وتردين بالسلامه يارب .. وتواصلي معاي اوك
حصه وهي تسلم عليها: ان شاء الله من عيوني
راشد: في حد بي يشلج
حصه: أمممم الدريول
راشد: قوليله يرد انا بوصلج
حصه: لا راشد ما اقدر امي تترياني
راشد: اتصلي فيها وقوليلها برد مع ربيعتي لانها تبا تقعد معاي اكثر لاني بسافر
حصه: اوك بكلمها واتس وبشوف شو بتقول
كلمت حصه امها وقالت لها ترد البيت بسرعه
راشد: ها شو قالت
حصه: اوك تقدر توصلني بس على طول على البيت
راشد وهو يأشر على عيونه: من عيوني
ابتسمت له حصه وركبت معاه وانطلقوا .. مسك راشد ايدها
راشد: تدرين انج الوحيده الي ف الحفله انيقه وحلوه
حصه: وانت كنت اوسم وأجمل واحد
راشد:فديتج والله .. اما تسريحتج اليوم عجيبه .. عطتج ويه طفولي
حصه بحيا: راشد بقولك شيء
راشد: قولي اسمعج
حصة: بشتاقلك
راشد وهو يمسك ويهها: وانا اكثر يا روحي
حصه: خلنا على تواصل اوك
راشد: حاضر من عيون
.....................................
عند فهد .. اول ما طلع من البيت راح الصاله السريه دخلها وعلى طول على البوكسينغ .. لبس القفاز بايد وحده وتم يضرب ويضرب بكل قوته وبعصبية .. ويقول كل الي فخاطره ومتضايق منه وبعده مستمر ف الضرب .. لين حس ان في حد قاعد يراقبه .. لف وراه وشافها
فهد: نجوود!!!؟
نجود تمت اتطالعه بخوف
فهد: تعالي نجود شفيج واقفه هناك
نجود بصوت خفيف: الحين هذي عصبيتك
فهد تنهد : ليش يتي هني .. ليش الحين بالذات
نجود: يت اطمن عليك .. كنت ابا اشوفك أكلمك .. بس انت صدمتني
فهد: نجود انا قتلج قبل الصاله هذي لا تدخلينها الا وانتي معصبه او متضايقه و تبين تفريغين طاقتج هذي .. لانج لو يتيها وانتي ما فيج شيء بتنصدمين وايد من الي بتشوفينه
نجود: شو الي مسوي فيك جذي
فهد: حادث
نجود:كذاب
فهد لف يطالعها
نجود: اذا مشت عليهم ما بتمشي عليّ انا .. حادث وفي كدمات على ويهك
فهد:...
نجود: شو صار لك بالضبط
فهد: نجود طلعي برا .. ابا أتم بروحي شوي ولا تيين هالمكان وانتي ما فيج شيء
نجود: ان..
قاطعها فهد بصوت عالي: نجووووود .. اطلعيييي برااااااا
نجود تمت اتطالعه شوي وبعدها طلعت من عنده وهي معصبه
...................................................
بعد ما رد كل واحد بيته .. بيت ابو خليفه / غرفة حمد
توها دخلت الغرفه شافت حمد قاعد على الشبريه ويوم شافها وقف وراح صوبها
دانه تمت اتطالعه بخوف
حمد وهو يقفل الباب ويمسك ايدها: تعالي
دانه: لل ليش .. ش شو س س سويت ااانا
حمد: انت خبرتي حد على الي دار بينها الظهر؟!
دانه: للل لا لا ما خبرت ححح ححد
حمد بعصبيه: عيل نورة وميره كيف عرفوا هااا
دانه اتجمعت الدموع ف عيونها: مم مادري
حمد وهو يدزها: بسج صياح ما تعبتي انتي ولا شو ما يجفن دموعج كل ما قلت كلمه طاحن على طووول
دانه: ح حمد شش شفيك ع عليّ والله مم ما سويت شيء والله
حمد: دايماً نفس القصه ودايماً نفس الكلام اتسوين مشاكل ومصايب ويوم اكلمج تقولين حمد شفيك عليّ
دانه بعصبيه وسط دموعها: حمد ما تباني ردني حق أبوي لا تخليني أعيش معاك مذلوله .. انا ما اتحملك وانت جذي كل ما شفتني مستانسه نكدت عليّ يومي .. ترا حتى انا تعبت
من بعد ما خلصت كلامها بطلت الباب وطلعت برا تصيح
..................................................
عند نوره ومحمد .. كانوا قاعدين مع ام حمود ويسولفون .. ونوره كانت قاعده عند ام حمود ومحمد قاعد قدامهم .. شوي ودخل عليهم ابوحمود
ابو حمود: السلام عليكم
الكل :عليكم السلام
نوره اول ما شافته مسكت ايد ام حمود بالقو ولصقت فيها
ابو حمود: ما شاء الله قاعدين عيل وين الباقي
محمد: كلهم عند ع....
قاطعه ابو حمود: اشششش انا ما سألتك سألت امك
ام حمود بتوتر: ما اعرف وينهم .. انا طول الوقت ف البيت
ابو حمود: ايواااا جذي يعني ..زين قومي دخلي الغرفه
ام حمود: ليش
ابو حمود بصوت عالي: قووومممميييييييي
يت ام حمود تبا تقوم بس نوره ماسكتنها بالقو
نوره : عمووه ااا ااباج شوي خلج معع معاي
محمد من سمع كلامها وقف وراح صوبها
محمد: نوره خليها تروح ونحن بعد بنروح داخل
نوره هزت راسها ب لا
ابو حمود تقدم صوبها: اشوف طلع لج لسان بنت سعد قمتي تعانديني بعد
محمد : ابوي هي وايد متعلقه ف امي ف خلهم شوي وبعدين امي بتروح داخل
ابو حمود: اقول بلا هالخرابيط شل حرمتك و ودها داخل واذا ما رضت بيت اَهلها موجود
مسك ايد ام حمود وسحبها بالقو لداخل الغرفه ... اما نوره ف قامت ودخلت غرفتها ودخل وراها محمد
محمد:نوره مره ثانيه اذا ابوي تكلم لا توقفين قدامه عادي يمد ايده عليج وانا ما ارضى بهالشيء
نوره تمت اتطالعه وبعدها قامت بدلت ملابسها وتعطرت وحطت راسها عشان ترقد ومحمد يطالعها
محمد: اعتقد اني قاعد اكلمج يعني من الأدب توقفين وتسمعيني مب تعطيني ظهرج
نوره:..
محمد عصب منها وراح عندها وسحبها لغرفة الملابس وطلع لها عبايه وفره عليها : لبسي
نوره: ليش
محمد بصوت عالي: لبسييييي بدووون اسئلة سخيييفه
نوره: مابا البس العبايه
محمد مسكها من فكها بالقو: لبسي لا والله العظيم اتشوفين شيء ثاني فهمتيييييي
نوره انصدمت منه وخافت .. لبست عبايتها وسحبها معاه وركبها السياره وتموا يمشون لمدة 20 دقيقة ونوره طول الوقت لافه ويهها صوب الدريشة واتصيح .. وقف محمد ف مكان ولف عليها
محمد تنهد: مستانسه الحين جذي .. مستانسه على الحاله الي وصلناها
نوره تمسح دموعها بدون ما تلف عليه:....
محمد لف ويهها صوبه: شفيج .. من وصلنا وانتي متغيره ما كنت جذي يوم كنا ف هولندا .. شو الي صار فجأة
نوره تمت اتطالعه وبعدها لفت ويهها: ما ابا اي علاقه بيني وبينك .. نكون مثل الاخوان وايد احسن
محمد بصدمه: لييييش شو السببب
نوره:...
محمد لفها صوبه: تكلمي شو السبب .. حد قالج شيء .. حد مسولج شيء .. ا..
قاطعته نوره بصوت عالي: لانك قصيت عليّ انت وأبوك .. قلت انك تباني انا وكم مره قلت لي انك تحبني بس طلعت كذاب .. كذبت عليّ .. عيشتي ف قصه كلها وهم وخيال عشان الفلوووس .. تبا اتطلقني محمد بعد ما وثقت فيك وكنيت لك مشاعر ف قلبي الحين تبا اتطلقني .. متفق انت وأبوك عشان بعد ست شهور اتطلقني وتردني بيت اهلي مطلقه ومذلوله
محمد:نوره انا صح تزوجتج بالغصب بس الله الشاهد ان محد دخل قلبي غيرج و فعمري ما حبيت غيرج .. وصدقيني ما بطلقج لان لو كان عندي اخت ما برضاها عليها وحتى على بنتي ف كيف لو على بنت عمتي وحبيبتي وزوجتي .. انا قاعد أساير ابوي ف الموضوع بس .. والي ما يعرفه ابوي اني قاعد ادور لنا بيت عشان بعد ست شهور نروح هناك
نوره: وشو الي يضمني انك ما قاعد تكذب عليّ .. وان كل الي قاعد تقوله صدق
محمد مسك ايدها وحطاه على صدره: حسي بنبضات قلبي كيف اتصير من تكونين قربي .. صدقيني انه كل نبض ينبضه قلبي وانت قريبه مني وعلى كل لحظه بينا انها صدق ومن خاطري بعد
نوره: محمد لا تكسر قلبي الله يخليك لا تكسره لاني ما اقدر اتحمل .. اذا كل واحد منا راح ف درب وقدرت انت اتطلعني من قلبك .. من الحين اقولك قلبي انا ما ينسى بسهوله بتم أعاني والله العظيم بتم أعاني ويمكن اموت
محمد وهو يحضنها:بعد عمر طويل .. وانا صرت ما اقدر اكمل يومي بدون لا اشوف عيونج وأصبح على جمالهن .. ثقي فيني اني مستحيل اهد ايدج ف يوم من الايام . مب محمد الي يهد ايد الي يحبهم ويعشقهم
...............................................
عند دانه .. من بعد ما طلعت من عند حمد تمت قاعده ف الصاله تفكر باللي صار لها .. شوي وطلعت خلود من قسمها و ف ايدها ناصر
خلود: دانه .. شو تسوين قاعده بروحج
دانه: ما شيء
خلود: صاير شيء بينج وبين حمد
دانه بتوتر: لا .. بس كنت اكلم اهلي ف قلت اطلع برا .. اا اكلمهم عشان ما ازعج حمد
خلود: اها .. انزين دانه ممكن طلب
دانه: هلا .. اطلبي عادي شو تبين
خلود: عادي تمسكين ناصر شوي لين ارتب شنط البنات .. حصه طالعه مع ربيعتها وما عندي حد يعاوني او على الاقل يمسك ناصر
دانه: خلاص انا بمسكه .. بطلع برا اشم هوا وبرد داخل .. عادي اطلعه معاي صح
خلود: هي عادي بس غطيه عدل عن البرد
دانه: ان شاء الله
شلت دانه ناصر وطلعت برا ف الحوش وقَعَدت قدام الباب تلاعب ناصر .. شوي شافت حصة تنزل من سياره و صوت ضحكتها عاليه .. دخلت وشافت ف ويهها دانه اول شيء خافت بس بعدين تظاهرت باللا مبالاة ومرت من صوبها
دانه وهي توقفها: مع منو يايه
حصه: ما يخصج
دانه مسكتها بعصبيه: منو ها الي يايه معاه وتضحكين بصوت عالي
حصه بطلت ايدها: هديني احسن لج .. وبعدين يايه مع دريول ربيعتي
دانه: دريول ربيعتج قاعده تضحكين بصوت عالي وراكبه قدام وفي صوت ريال
حصه تقربت منها: لا تسوين نفسج شريفه عليّ وانتي اصلاً كنتي تطلعين مع عمي قبل .. تفكرين ما اعرف سوالفج
دانه: استحي على ويهج احسن لج .. انا متزوجة من سنه وما اعتقد انه شيء حرام بس الي انتي تسوينه الحين هذا اكبر حرام
حصة: انزين وقبل لا تتزوجون .. ما كنتوا تطلعون مع بعض .. هه حبيبتي سوالف الشرف ما الشرف خليها حقج و قصي على غيري انا انسانه حره واسوي الي أباه دام امي وابوي موجودين ومب معارضين
دانه عصبت عليها وصفعتها كف: امج وابوج معطينج ثقتهم مب لانهم راضيين على الي تسوينه .. واعتقد ابوج اذا درا عنج تعرفين شو بيسوي فيج صح ولا لا
حصة: انتي تمدين ايدج عليّ .. ما عليه اذا ما خربت عليج حياتج وخليتج تعتذرين مني قدام الكل ما اطلع بنت ابوي
دزت دانه ودخلت داخل .. اما دانه ف عصبت من حركاتها وتمت قاعده شوي وبعدين دخلت داخل وراحت غرفتها .. اول ما دخلت شافت حمد قاعد راحت عنده
دانه: امسك
حمد: شو امسك .. وبعدين انت وين كنتي
دانه حطت ناصر بين ايدينه ودخلت الحمام وغسلت ويهها بماي بارد عشان تهدي أعصابها وبعدها طلعت وخذت ماي بارد من الثلاجة وتمت تشرب.
حمد حط ناصر على الكرسي وراح صوبها
حمد: شفيج معصبه
دانه: ما اريد اتكلم معاك
حمد لفها صوبه: دانه اسف .. بس ما احب اي شيء يصير بينا الكل يعرفه .. ولا اني احب اشوفج انسانه ضعيفه .. اباج تكونين قويه مب على اي شيء تصيحين
دانه وهي تمشي عنه: ان شاء الله
حمد:شو الي صاير معاج و وين كنت
دانه تنهدت: حمد بقولك شيء
حمد قعد قدامها: اسمعج
دانه: حمد انا مديت ايدي على حصه بنت خليفه و خلود
حمد: ليش شو مسويه حصيص
دانه: بس توعدني ان يتم بيني وبين
حمد هز راسه بهيه: قولي
دانه: قلة أدبها عليّ وقالت عني كلام ما ينقال
حمد: كيف يعني كلام ما ينقال
دانه : طعنت بشرفي
حمد بعصبيه: شووووو!!
دانه مسكت ايده : حمد انت وعدتني ان الشيء هذا يتم بيني و بينك .. الله يخليك انا ما ابا مشاكل انا قلتلك عشان اذا صار شيء بعدين انت تكون على علم .. وتكون سامع السالفه مني لانك انت اذا عصبت عادي اتطلقني ( ونزلت راسها)
حمد مسك ويهها ورفعه: وليش حاطه ف بالج هالشيء .. ليش من يينا هني وانتي على لسانج كله كلمة الطلاق
دانه: ما ادري انا بروحي ما ادري .. اخاف تنتقم من ابوي لانه زوجك بالغصب .. ولا لانك ابتعدت عن مها
حمد: دانه انا اذا عصبت اسوي اي شيء الا اني اطلقج .. و بعدين ابوج اذا ابا انتقم منه جان انتقمت من زمان وما يهمني من حد ومها انا ابتعدت عنها بإرادتي مب عشان شيء ثاني .. وبعدين انت ذهب .. ذهب وما اقدر افرط فيج او ابيعج انتي شيء ثمين وملك حمد وبس
.................................................
توقعاتكم؟!