أحتجتلك يا أطيب بشر وين ألاقيك؟؟

56

الظهر ف بيت اليده صالحه .. وصلوا نوره ومحمد وحطوا الغدا والكل اجتمع على الطاوله عشان يتغدا
ام حمود: ما قلتوا بتقعدون كم يوم ليش رجعتوا بسرعه
محمد طالع نوره وبعدين لف على امه: نوير الي طلبت .. تقول انها تحسنت وما يحتاي اتم اكثر هناك
ام حمود: ليش نوره .. على الاقل تحوطين او تتشرين لج شيء .. وبعد رمضان قرب تاخذين لج ملابس او غيره
نوره: ما احب اروح السوق وانا مب حاطه ف بالي شيء .. لازم اكون محتاجه شيء معين عشان اروح
ساره: انزين جان رحتي صالون تسوين نيولوك تغيرين شوي من نفسيتج وخاصة ان ف دبي في صوالين وايد يمدحونها
نوره: ما احب جذي كل شوي شكل وما ادري شو احب اكون طبيعيه اكثر
ساره: انزين ما فكرتي تسوين عمليات تجميل
اليده صالحة: بسج خلاص لعوزتي البنت من كثر الاسئلة كلي وانتي ساكته وخليها تاكل
ساره: ما قلت شيء بس سئلتها سؤال واحد
محمد: ما يحتاي عمليات تجميل .. هي بروحها حلوه وابتسامتها بس تعتبر احلى تجميل
نوره استحت من كلام محمد وانقلب ويهها احمر
ام حمود: هيه والله انه صادق ما شاء الله عليها نوره ما تحتاج كل هذا
نوره ابتسمت لها
حمدان: خلاص ارحمي البنت انتي و ولدج لونها صار احمر كل حد يتغزل فيها من صوب
الكل:ههههههههههههه
نوره قامت: الحمدلله
محمد مسك ايدها وبصوت خفيف: قعدي ما كليتي شيء
نوره: خلاص شبعت
محمد: شو شبعتي اصلاً ما كليتي شيء تعالي قعدي كلي
نوره: تراني ماكله ف الطريق شفيك
محمد: قعدي
نوره: ما اريد خلاص
محمد: تبيني ازعل قومي
نوره قامت وراحت غسلت ايدها وبعدها بدا الكل يقوم شوي شوي لين اتجمعوا كلهم ف الصاله وتموا يسولفون شوي
محمد وقف: يلا عيل نحن نستأذن
اليده صالحه: ليش مستعيلين خلكم قاعدين شوي
محمد: تعبان يدوه ابا ارتاح شوي وعشان نوره تاخذ دواها بعد
اليده صالحه: انزين بس زورونا بعدين مب لازم نحن نعزمكم كل مره
محمد : ان شاء الله من عيوني
حمدان: حَمود بي معاكم
محمد عقد حوايبه: اصغر عيالك تقولي حمود
حمدان: عادي انزين اخوي تراك
محمد: روح روح يب اغراضك خلصني بترياك ف السيارة
طلعوا محمد ونوره وركبوا السياره دقايق ويا حمدان وبعدها ردوا البيت
......................................
ف بيت ابو خليفه .. كانوا خوله ودانه قاعدين ف حديقة البيت والجو كان مغيم وفيه هوا بارد
خوله: شكله الشتا على الابواب
دانه: هيه ما شاء الله
خوله: بسج من هالقطاو ارحميهم وارحمي حالج
دانه: ههههه نفس كلام حمد .. بس والله انهم حلوين ليش انتو ما تحبونهم
خوله: انا ما احب اربي حيوانات .. اخاف اقصر معاهم ولا انساهم ويموتون بعدين يأنبني ضميري
دانه: لا انا احب القطاو اكثر احسهم جي كيوت وحلوين
خوله: يا الله يارب يرزقج بياهل يلهيج عن القطاو هذي
دانه: حرااااام عليج والله هههههه
خوله: اليوم قوم ابوي تأخروا وايد
دانه: تلقين زاد عليهم الشغل او عندهم اجتماع
شوي وطلعت ميره وشافتهم قاعدين
خوله: ميره تعالي قعدي معانا
ميره: سمعتوا صوت الجرس
خوله : لا
ميره: افففف ما ادري متى بيوصل
خوله: ليش شو تترين
ميره: طالبه من المطعم
خوله: اتصلي فيه شو فيه وين وص..
قاطعها صوت الجرس .. راحت ميره ويابت الطلبيه وراحت عندهم
ميره: كلوا معاي وايد اشياء طلبت
دانه وقفت : انا بروح داخل .. بالعافيه عليكم
ميره: تعالي تعالي قعدي .. كلي معانا وترا اخر مره اعزمج
خوله: تعالي قعدي والله وايد علينا .. بالعاده نوره تي تقعد وتاكل الحين هي محد .. انتي بدالها
دانه: مشكوره ميره
ميره: العفو
وتموا ياكلون ويسولفون وشوي ودخلوا ابوخليفه وخليفه وحمد
ابو خليفه: السلام عليكم
البنات: عليكم السلام و الرحمه
ميره: حياك ابويه تعال كل
ابو خليفه: لا انا متغدي بالعافيه عليكم
البنات: الله يعافيك
دخلوا ابو خليفه وخليفه وحمد راح عندهم
خوله: ليش تأخرتوا اليوم
حمد: كنا مع سعيد
خوله لوت بوزها: مالت افففف ياربي افففف
حمد: شكله متغير وندمان صدق
خوله: ما اباه بس الله كريم .. والله لو لا ذياب انا ما ادري شو بسوي ف هالدنيا
حمد: على طاري ذياب ما رجع من دوامه
ميره: لا بعده .. بيرجع العصر يمكن
حمد: وانتي ما شبعتي من كثر ما تاكلين خلاص متنتي
ميره: ما يخصك فيني .. خلك ف حرمتك وبس
حمد لف على دانه وابتسم: فديتها حرمتي تاكل وتاكل ولا تمتن
خوله: احسن شيء .. لا تحاتي وزنها ولا شيء
حمد وهى يشد خدود دانه: بس يطلع لها خدود
دانه ضربته على ايده: حمددد!! يعور شفيك .. وبعدين خدودي هذي ما طلعت الا لانك تقعد اتشدهم كل يوم
خوله غمزت حق حمد: حمد ما تبا يهال
حمد فهم عليها: والله انا ودي بس الي عندي مشغوله بقطاوها
دانه بطلت عيونها: حمد !!!
حمد: صدق بعد شو انتي اغلب وقتج مع هالقطاو حتى مرات اقولج تعالي خلينا نقعد مع بعض وانسولف انتي ترفضين وتقعدين مع هالحيوانات
دانه: الحين انا جذي؟!!!
حمد: لا انا
ميره: بسيطه خلها هي مع قطاوها وانت روح دور لك حرمه تيب لك يهال
حمد: شكلي بفكر فيها هذي
دانه تمت اتطالع ميره وحمد وبعدها قامت: انا بدخل داخل
حمد مسك ايدها: وين تعالي اقعدي
دانه: ما ابا خلاص ابا اروح داخل
حمد: تعالي قعدي امزح معاج
دانه قعدت وهي تمسح دموعها
خوله: يا ربي يا دانه وايد حساسه تراج
ميره: هذا يسمونه دلع ماصخ
حمد حضن دانه: بسكم خلاص خلوها
دانه ضربته وقامت عنه: قوم عني .. تلعوزني وبعدين اونك اتدافع
حمد: افا انا لعوزتج متى!!
دانه تمت اتطالعه بنظرات
حمد ابتسم لها وطير لها بوسه ف الهوا: احبج
.............................................
ف بيت وليد ..
جود وهي اتدق الباب: نجوووووود بطلي الباب الله يخليج .. وليد الي ضربج عاقبيه هو تعاقبيني انا ليش
نجود:..
جود: نجود يلا بطلي الباب احس راسي مكان العمليه يعورني ويطلع منه دم بعد
نجود:..
جود: نجووووود بمووووووت م..
قطع كلامها نجود وهي تفتح الباب بخوف
جود :ما بغيتي تفتحين الباب ويا راسج
نجود عقدت حوايبها: بعيد الشر .. ليش قاعده تفاولين على نفسج
جود: عشان تبطلين لي الباب
نجود: يالغبيه كنت ف الحمام( تكرمون) يعني ما سمعتي صوت الباب
جود هزت راسها ب لا
نجود: اكيد ما بتسمعين دامج اتصارخين كانج بقره شايفه حريقه
جود تمت اتطالعها
نجود تمت ثواني اتطالعها وبعدين حضنتها : لا تيبين طاري الموت دخيلج لا تيبينه .. دخيلج
وليد: الله يديم المحبه بينكم
نجود ابتعدت عن جود وشافت وليد بنظرات وبعدها دخلت الغرفه .. دخلت جود ودخل وراها وليد وراح قعد عند نجود على الشبريه
وليد: نجود انا اسف على الي صار الصبح .. والله كنت معصب لان الدوام ملخبطين كل اوراقي ويبوني ارد اعدلها و هذا غير انهم مضيعين اوراق ثانيه .. وكل هذا ويبوني اسلمه ف يومين بس وانا مشتغل على الاوراق اسبوع كامل .. و ولاقدرت امسك اعصابي يوم يت وشفتج محد وفوق هذا يوم اكلمج تعطيني ظهرج واتكلميني ببرود و ولا كانه صاير شيء ا...
قاطعته نجود: لانه فعلاً ما صار شيء .. انا رحت عند عموه مزنه لانها بروحها وين الغلط
وليد: نجود البيت كله شباب .. فيصل وفهد وفارس .. كيف تبيني اخليج هناك بروحج عيب .. ومن حقي امنعج من مكان انا مب مرتاح فيه لاني ابا مصلحتج
نجود: كلهم اخواني مالي دخل فيهم ومالهم دخل فيني واساساً انا ما اشوفهم الا اذا طلعوا من البيت وطول الوقت انا عند عموه مزنه لانها تعبانه من حالة هند ومحد معاها الشباب دايماً ما يعرفون يتصرفون ف المواقف هذي
وليد: ما عليه روحي عندها شوفيها اتطمني عليها بس لا ترقدين عندهم
نجود: الباب مقفول ترا حتى لو عمتي معاي تراها تقفل الباب .. بس ما عليه خلاص ما برقد عندهم بس لازم اروح عشان اتطمن عليها
وليد: على راحتج
......................................
عند محمد ونوره .. وصلوا البيت وحمدان راح يرقد ف غرفته و محمد ونوره راحوا غرفتهم .. دخل محمد وبدل ملابسه وبعدها راح وتلحف ونوره نفس الشيء بدلت ورشت لها عطر وحطت كريم وبعدها راحت وانسدحت عنده
نوره: محمد
محمد:..
نوره: محمد حرام عليك بتم تتجاهلني طول اليوم يعني
محمد:..
نوره: محمد بطني يعورني
محمد لف عليها وتم يطالعها وبعدها قام وراح ياب دواها ويابلها ماي وحطه عندها واشر لها عليه ورد مكانه
نوره ابتسمت وخذت دواها وبعدين لفت عليه: انزين ليش على وضع الصامت شفيك
محمد:..
نوره بدلع: حمودي عاد
محمد طالعها بنظره
نوره ابتسمت: يمههه فديت هالنظرات هذي
محمد:..
نوره قعدت وجابلته: لين متى بتم جذي يعني
محمد:..
نوره: محمد حمود حمودي حمحم حوحو مومو ريلي حبيبي رد عليّ
محمد:..
نوره تقدمت صوبه ومسكت راسه وباسته على راسه: اسفه
محمد:..
نوره: محمد عاد لا تسوي فيني جذي خلاص تراني تأسفت منك
محمد:..
نوره تقدمت وباسته بقوه على خده: اسفه يا بعد قلب قلب شرايني
محمد:..
نوره : محمدددد !! ردددد عليّ شفيك
محمد:..
نوره تقربت منه اكثر وتمت اتبوسه على خده وتقول كلمة اسفه لين ابتعد عنها
محمد: خلاص قومي
نوره ابتسمت: يعني سامحتني
محمد:هيه خلاص قومي
نوره: واخيراً طلعت من الوضع الصامت هذا
محمد: مب عشانج عشان الي ف بطنج ما يفقد حنان الابو
نوره حطت ايدها على بطنها: فديت ابوه وحنانه بس
محمد: لا ما شاء الله اليوم وايد تتغزلين وتقولين كلام حلو كل هذا بس لاني زعلان منج
نوره: لا
محمد: عيل
نوره انسدحت على بطنها ويت تبا تتكلم بس محمد فز بسرعه
محمد: مينونه انتي قومي بسرعه
نوره قامت :شفيك بسم الله
محمد: كيف تنسدحين على بطنج شو ناسيه انج حامل
نوره: ههههه محمد شفيك عادي
محمد: لا مب عادي لا تنسدحين جذي
نوره : ان شاء الله
محمد تم يطالعها ونوره ابتسمت وحضنته : شفيك اتطالعني جذي
محمد: الله يحفظها ويقومها بالسلامه
نوره: منو
محمد: هند
نوره: امين يارب
محمد: لولاها جان انتي ما حضنتيني ولا صحتي قدامي ولا قلتي لي كلام حلو .. سبحان الله حتى وهي ف غيبوبه تساعدني
نوره ابتعدت عنه: هههههههههه
محمد: الله يديم هالضحكة الحلوه يارب و عسى ان شاء الله هالعيون ما اتدمع الا فرح وسعاده يارب << ويديم ابتسامتكم اللا شعوريه من موقفهم / رومنسيتهم قولوا امين 😂
...............................................
عند وليد من بعد ما طلع من غرفة جود ونجود ركب سيارته وتحرك و اتصل عليه جاسم
وليد: هلا جاسم .. عندك اخبار يديده عن احمد و ولده حمود
جاسم: هيه .. عرفنا مكانهم وشو غرضهم ف ابوظبي
وليد ابتسم: كفو عليكم والله
جاسم: راحوا هناك عشان صفقة واذا ربحوها بتهل عليهم الفلوس من كل صوب وفوق هذا بتصير شركتهم معروفه ومشهوره وبتكون اقوى مناسف لباقي الشركات
وليد: حلو حلو .. عاد انت تعرف شو الي يخليني انا الي اكون سعيد بالصفقه هذي ولا؟!
جاسم: افا عليك عارف اكيد و اتريا كم يوم وبتسمع الاخبار الحلوه باذن الله
........................................
عند جود و نجود
جود: قومي سكري الليت ابا انام تعبت من كثر ما اسولف معاج
نجود: مالت عليج .. انا بروح عند عموه مزنه
جود: الله معاج .. بس لا تتأخرين
نجود: اوكيه
سكرت الليتات وطلعت برا رايحه صوب بيت ام فارس دقت الجرس وبطلت لها الخدامه وقالت لها تقعد ف الصاله تتريا ..ويابت لها عصير وقطعة كيك
نجود تمت تاكل الكيك وهي سرحانه وفجأة حست بحد يمسح على خدها انتبهت وابتعدت عنه
نجود: شو قاعد اتسوي
فهد: امسح دموعج الي مب عارف شو سببها
نجود: هذي الكيكه كانت تحبها هند .. كانت دوم العصر تاكلها وحتى يوم ني نقعد عندها اتسوي الكيكه هذي ومرات كنت اطفربها لانها تاكل كيكة جزر وما تحب كيكة الجوكلت
فهد: تدرين ليس تحب كيكة الجزر اكثر من الجوكلت
نجود: ليش
فهد: لانها كيكة ابوي المفضله .. كان دايماً يوم اي من الدوام ايب نفس الكيكه هذي ويقعد العصر ياكلها مع الشاي وهند كانت تقعد معاه واتسولف .. ومره رد وما كان عنده الكيكه سألته هند قالها خلص راحت تعلمت الطريقه وسوتها وعيبه ابوي ومن بعدها وهي دايماً اتسوي الكيكه نفسها وعلمتها الخدامات
نجود : اشتقت لها وايد وايد وايد
فهد: الله يقومها بالسلامه يارب
نجود: امين
........................................
توقعاتكم؟!