أحتجتلك يا أطيب بشر وين ألاقيك؟؟

14

عند نجود .. اتصلت على فهد واتريت لين يرد
فهد: الو
نجود:الو
فهد: هندوه شو تبين متصله عندي شغل ترا !!
نجود: انا نجود مب هند
فهد: نجود!!!  .... منو نجود ؟؟
نجود: نجود بنت عمك سعيد
فهد: ايوا هلا نجود بغيتي شيء
نجود: بغيت اقولك شيء
فهد: قولي
نجود: فهد ابوي مات وقبله امي والحين اختي بين الحيا والموت .. ما اعرف شو اسوي احس اني وحيده
فهد: نجود انا مشغول مب فاضي .. كلمي هند وبتساعدج ان شاء الله
نجود: بس انا ابا أكلمك انت
فهد: اوك بعدين كلميني .. الحين انا مشغول وما عندي وقت .. متى ما فضيت كلمتج
نجود وهي تصيح: ومتى بتفضى .. انت طول الوقت مشغول وانا محتاجه اتكلم مع حد
فهد: اوعدج اني اكلمج اذا فضيت .. وإذا ما فضيت بخلي هند اتكلمج .. مع السلامه
وسكر فويهها .. غمضت عيونها بمجرد ما سمعت صوت الفون يسكر .. نزلت دموعها على طول .. محد بيسمعها غير اختها ومحد بيفهمها اصلاً .. اختها الوحيدة الي تفهمها من نظرة عيونها من صوتها وطريقة كلامها .. ما تقدر تكلم هند او وحده من البنات لان محد يفهم طريقة كلامها او هي شو تبا توصله .. كلمت فهد لانها تحبه وتعتقد انه يبادلها نفس الشعور وبيفهمها مثل ما اختها تفهمها .. بيواسيها مثل ما اختها تواسيها .. محتاجه حضن حنون يلمها .. ومحد عنده حنان مثل حنان اختها
نجود:((ما عرفت شو اسوي .. او شو اقول .. مشيت ومشيت ومشيت .. كانت الأفكار تتلاعب ف مخي .. ف هذي الدقيقتين فكرة بمليون فكره .. وكلها افكار متلخبطه.. مشيت وما وعيت الا وانا واقفه قدام هند وذياب .. كانوا يكلموني ويحاولون يفهمون شفيني .. بس ما اقدر اتكلم .. ف شيء يمنعني اني اتكلم .. حسيت في شيء على خدي .. حطيت ايدي وتفاجأت انها دموعي .. يعني انا اصيح .. بس ليش ... ابا اتكلم .. ابا اشكي همومي .. ابا اطلع الي بداخلي .. ابا اعرف شو ابا بالضبط .. ما كان قدامي الا حل واحد .. الي هو اني احضن هند .. وفعلاً كل الي سويته تقدمت وحضنتها وقَعَدت اصيح ))
................................................
ف بيت بو خليفه ف قسم خليفه .. كانت تعبانه ومنسدحه ف الصاله .. شوي وطلعت حصه وشافت امها راحت عندها وحطت ايدها على راسها
حصه: ماما شفيج
خلود: راسي يعورني
حصه: ماما راسج حار .. انتي فيج حراره
خلود: ما ادري .. ديمه وهدى وين ؟!
حصه: داخل قاعدين يلعبون
خلود: ابوج رجع ولا بعده
حصه: لا بعده
دخلت حصه غرفة امها وقَعَدت ادور جهاز مال الحرارة .. لين حصلته وطلعت عند امها .. قاست حرارة امها وطلعت حرارتها 40.6
حصه: ماما حرارتج مرتفعه وايد 40.6
خلود: عطيني بنادول
راحت يابتلها بنادول وماي وعطتها .. بعدين نزلت تحت وسوت كمادات ماي بارد وودته عند امها فوق .. قعدت اتحط حق امها كمادات واتبدل لها .. دقايق وردت اتشوف حرارة امها وكانت 39.8
حصه: ماما بتصل ف بابا حرارتج وايد مرتفعه
خلود: لا .. لا تتصلين اكيد الحين مشغول
حصه: مب زين تقعدين جذي
خلود: عادي عادي .. روحي شوفي خواتج
حصه راحت شافت خواتها واتصلت ف ابوها بدون ما امها تدري ... طلعت هيه وخواتها وقعدوا عند امهم
ديمه وهي تحضن امها: ماما شوفيج؟!
خلود: ما فيني شيء
هدى: ماما خذيتي دوا
خلود: هيه ماما خذيت دوا
هدى وهي تهمز ريول امها: بسويلج مساج حق ريولج
حصه وهي تحط الكماده على يبهتها: وانا بحطلج الكمادات
ديمه وهي تهمز راسها: انا بعد بسوي مساج حق راسج
وقَعَدت كل وحده اتسوي حق امها شيء .. وخلود مستانسه على اهتمام بناتها فيها .. بعد 10 دقايق بالضبط دخل خليفه القسم وشافهم متجمعين على خلود .. وديمه اول ما شافته ركضت عنده وهو بدوره شلها وبأسها على خدها كالعاده
خليفه: شحالج يا أميرتي
ديمه: بابا انا بخير بس ماما مب بخير
خليفه وهو يروح صوب خلود: ليش شو فيها ماما ؟!
حصه: بابا حرارتها مرتفعه .. اول مره كانت 40 وبعدين 39
خليفه قعد عند خلود وحط ايده على راسها : عطيني جهاز الحرارة
خذ الجهاز وقاس حرارتها وكانت 39.9
خليفه: حصه ايبي عباية امج بوديها المستشفى
حصه : ان شاء الله
ديمه: انا بيب الشوز مالها
هدى: وانا بيب شنطتها
وراحوا .. لف خليفه على خلود وشافها ماسكه راسها
خليفه: شفيج
خلود: خليفه راسي بينفجر من العوار
خليفه: خذيتي بنادول
خلود: هيه خذيت حبتين وماشيء فايده
خليفه: الحين بوديج المستشفى وبيشوفون شو فيج
خلود: ما ابا اروح
خليفه: لازم تروحين .. حرارتج 39 وراسج يعورج من امس .. اصلاً مستحيل اخليج جذي
خلود: خليفه الحين عزا خالك وانت تبا تروح .. خلاص اقعد والفليل بنروح .. ابوك بينازع اذا ما رحت العزا
خليفه: ما عليه بقول حق ابوي انج مريضه وبوديج المستشفى .. وبيعذرني ما فيها شيء
خلود: والله ما اروح مكان الحين دام انه عزا خالك ..  برايه مب لازم اروح اصلاً
خليفه:  ليش هالعناد يعني .. ليش ما تبين تروحين
خلود: ما ابا اروح وبس .. بعدين بنروح
خليفه مسك ايدها وسحبها عشان تقعد : انزين اقعدي شوي عشان ما يزيد عوار راسج
شوي ويو البنات ويايبين اغراض امهم
خليفه: حصيص قولي حق الخدامه تسوي عصير ليمون حق امج
حصه: ان شاء الله (( وراحت))
خليفه سحب خلود وحط راسها على كتفه ولف ايده على خصرها: ما يهون عليّ أروح واخليج بهالحاله
خلود: كلها  على بعضها حمى ولا فايروس يمكن .. ما فيني شيء خطير
خليفه: انا بالنسبه لي الحمى والفايروس شيء خطير .. حتى الكحه شيء خطيرر
خلود: هههههههههه
خليفه: مديمه الضحكه
خلود: امين وياك
شوي ودخلت حصه وهي شاله عصير ليمون خذاه منها خليفه وعطاه خلود
خليفه: يلا قومي اشربي العصير
خلود: اشربه انت .. الحين بتروح العزا وغيره وبتتعب
خليفه: شو تبين فيني انتي الحين .. انا بدبر نفسي بعدين
خلود وهي تبعد القلاص: خليفه ما ابا شيء ما اقدر اشربه اصلاً
خليفه: اذا ما شربتي العصير بوديج المستشفى
خلود خذت القلاص من ايده: هات هات .. بس يهدد اف
خليفه: ههههههههه ترا ما ينفع معاج الا التهديد
شربت خلود شويه من العصير وما قدرت تكمل بس خليفه غصبها تشربه كامل وشربته .. لكن ثواني وركضت الحمام( تكرمون) ورجعت كل الي شربته .. قام خليفه وراها وشاف حالتها و غصبها انها تروح المستشفى معاه و وداها وراحت معاهم ديمه
.............................................
ف المستشفى ف قسم العمليات طلعوا جود و ودوها العنايه المركزه وقالولهم لازم ترتاح اليوم ومحد يزعجها .. و طبعا منعوا الزيارات لين تقوم ويتأكدون من صحتها .. ذياب غصب هند ونجود انهم يردون البيت معاه و وعدهم انه يردهم عند جود اذا قامت
..................................
ف نفس المستشفى بس قسم الطوارئ .. سو حق خلود فحوصات وينتظرون النتيجة .. وخلود معصبه من خليفه وقَعَدت تتحرطم على راسه
خليفه: اشششش بس خلاص
خلود: شو اششش .. يعني لو مخلني فالبيت مب احسن لازم تيبني هني .. كل شوي إبره وكل شوي مأخذين دم
خليفه: ....
خلود: بس هذا انت بتقعد ساكت لين باجر وما بتتكلم .. تحب اتشوفني معصبه صح .. قوم شل بنتك واطلع برا
خليفه:....
خلود بقهر : وااااااي تقهر تقهر .. يا الله يا رب اتصبرني عليهم
الدكتوره: السلام عليكم
خلود وخليفه: و عليكم السلام
الدكتوره: اشحالج الحين
خلود: تمام الحمدلله
الدكتوره: الحمدلله .. نحن سوينالج فحوصات والحمدلله النتايج سليمه وما فيها شيء .. بس الي فيج أعراض حمل .. مبروك انتي حامل
✖️✖️✖️✖️✖️✖️✖️✖️✖️✖️✖️✖️✖️
توقعاتكم يالورود🌸🌸 ؟!

1) كيف بتكون ردة فعل خليفه وخلود والبنات على الخبر هذا؟!
2) باعتقادكم جود متى بتصحى؟!
3) كيف بيكون اللقاء بين فهد و نجود ؟!
4) اكثر شخصيه حبيتوها !!