أحتجتلك يا أطيب بشر وين ألاقيك؟؟

43

ألمانيا ... فز من نومه وهو يتنفس بسرعه .. تقربت منه هند وقَعَدت عنده
هند: بسم الله عليك .. حلم ذياب حلم
ذياب سكر عيونه ورد راسه ورا: كابوس اعوذ بالله
هند: ذياب انته حران ؟!.. جسمك معرق وايد .. حتى شوف شعرك كيف مستوي
ذياب: ما ادري .. بروح اتسبح
راحت هند معاه وطلعت له ملابس وهو دخل الحمام يتسبح .. وهند طلعت وراحت المطبخ خذت لها بسكوت وتمت تاكل وهي اتطالع تلفزيون .. دقايق وطلع ذياب وانسدح وحط راسه على ريلها
هند: ليش مب منشف شعرك شوف كيف الماي يقطر منه
ذياب: برايه عادي
هند وقفت: لا مب عادي بيزيد عليك المرض بعدين
راحت يابت فوطة وتمت تنشف شعره وبعدها قعدت وهو رد حط راسه على ريلها
ذياب: خلينا نطلع
هند: لا انت تعبان
ذياب: هني قريب ما بنروح مكان بعيد .. ابا اشم هوا شوي
هند: انزين بس مب الحين خل تي الساعه 1 ولا 2
ذياب: زين
هند: فهد اتصل عليك .. قتله انك راقد فقال اذا قمت كلمه
ذياب قام وخذ فونه واتصل على فهد
فهد: الو
ذياب: السلام عليك والرحمه .. شحالك
فهد: عليكم السلام والرحمه .. بخير الحمدلله .. انت شخبارك
ذياب: تمام الحمدلله
فهد: ذياب ابا بوديقارد تعرف وين بحصل
ذياب: حق منو بالضبط
فهد: نوره
ذياب: ليش شفيها نوره
فهد: ما فيها شيء بس لان الكل سافر وقوم يدوه محد ومحمد عنده دوام ف نوره أتم بروحها .. وانا ما أأمن عليها جذي ابا وحده تحميها طول الوقت
ذياب: اهااا .. خلاص انا بكلمهم وبشوف لها وحده زينه
فهد: أتمنى تعجل بالموضوع .. ما اباها أتم بروحها ف البيت
ذياب: اوك الحين بشوف وبكلمهم .. وان شاء الله تيكم باجر
فهد: ان شاء الله .. يلا بخليك الحين وديروا بالكم
ذياب: ان شاء الله يلا مع السلامه
............................................
عند محمد ونوره .. نزلها ونزل معاها عشان ياخذ اغراضه
نوره: لو خليتني عند عموه مب احسن
محمد وهو يدور اغراضه: لا هناك عندهم كله شباب
نوره: انزين محمد شو بسوي هني بروحي
محمد: قفلي البيبان والدرايش عدل .. ولا تبطلين الباب ابداً لو شو ما يصير لا تبطلين الباب .. اذا انا يت بفتح الباب بالمفتاح الثاني الي عندي
نوره: ليش تقول جذي في شيء مستوي
محمد وهو يتقرب صوبها: لا .. بس خايف عليج .. ديري بالج على نفسج وخلج قريبه من الفون
نوره: ان شاء الله
محمد باس راسها وطلع .. اما نوره قفلت البيبان عدل وبعدها دخلت غرفتها ونامت
...........................................
ف مطار برشلونه الدولي .. خلصوا إجراءاتهم بسرعه وخذولهم بطاقه عشان تلفوناتهم و توزعوا ف سيارتين كبار كانت تترياهم قدام باب المطار.. لين وصلوا الفندق وكل واحد راح شقته
شقة حمد..
دخل حمد وعلى طول راح يتسبح اما دانه ف طلعت عشان تطمن على البنات راحت غرفتهم ودقت الباب
خوله: تعالي دانه
دانه: يت اتطمن عليكم
خوله: لا تحاتينا روحي ارتاحي نحن كل وحده بتتسبح وبتنام
دانه: اذا بغيتوا شيء كلموني
خوله: ان شاء الله
دانه: عيل ميره وينها
خوله: تتسبح
دانه: اها .. يلا عيل انا بروح
طلعت دانه ودخلت غرفتها ومسحت ميكبها وبطلت شعرها ومشطته وخلته مفلول .. وبعد ما طلع حمد دخلت بسرعه دقايق وطلعت رشت عطر وانسدحت عشان تنام
حمد: ربطي شعرج
دانه: برايه ابا ارتاح راسي مصدع
حمد: ربطيه عشان ما تقوميني من النوم وتقولين راقد على شعري
دانه: ههههه ما بقول خلاص
حمد مط شعرها: خليه جذي طول العمر لا تصكينه ابداً
دانه: انزين لا تمط بروحه راسي يعورني
حمد: خذي بندول
دانه: ما ابا أخذ أدوية .. برتاح وان شاء الله بيخف
حمد سحبها لحضنه : خلاص نامي .. حتى يالله يالله الكلمه تطلع من حلجج
.........................................
شقة وليد
نجود: جود ما بتدبلين ملابسج
جود: لا ما اقدر مصدعه
نجود: اكيد من تعب السفر
جود: هيه اكيد
نجود: بروح ايبلج بندول من وليد .. ماخذ كل الادويه  ويحوط تقولين صيدليه
طلعت نجود الصاله وشافت وليد يتكلم بالفون ومعصب بس ما فهمت شيء .. راحت صوبه وأشرت له
نجود بهمس: وليييد
وليد اشر لها تسكت وتكلم شوي وسكر
وليد: شو تبين
نجود: شفيك معصب وبعدين انت اي لغة تتكلم هذا مب انجليزي
وليد ابتسم وغمز لها: هذا إسباني
نجود بطلت عيونها: اونههههه!! .. لا لا ما اصدق وليدوه الدب يتكلم إسباني .. انزين علمني شوي
وليد مد ايده: عطيني 200 وبعلمج
نجود: هههههه خل إيدك حقك ما ابا شيء .. اصلاً يا حلاة لغتنا وبعد من ضمن اصعب اللغات
وليد حط أيديه ف مخباه: زين .. والحين شو تبين
نجود: وييي نسيت .. ابا بندول
وليد: و ليش البندول
نجود: جود راسها يعورها وتبا بندول عشان تنام
وليد راح ياب لها بندول وعطاها
وليد: نجود انا بطلع شوي ويمكن أتأخر .. اذا احتجتوا شيء كلموا اي حد او روحوا عند عموه موزه
نجود: ليش وين بتروح الحين .. على الاقل ارتاح شوي
وليد: ما عليه عندي شغل .. بس سوي الي قتلج عنه سمعتيني
نجود وهي مستغربه: اوك
............................................
عند فهد .. كان قاعد يطالع تلفزيون وفجأة ياه اتصال
فهد: الو
..: هههه اوووههه الصوت مرتاح ومرتاح وايد بعد
فهد: نعم منو معاي
..: معقوله ما عرفت منو انا .. المفروض اتسيڤ رقمي عندك
فهد: انت يالنذل
الزعيم: تؤ تؤ تؤ ما يصير تقول جذي .. ولا ابوك ما علمك
فهد: حدك عاد الا ابوي لا تيب طاريه على لسانك سمعت .. وبعدين انت لو ريال جان طلعت و واجهتنا مب اتطرش جنودك علينا وانت منخش مثل الدياية
الزعيم: بطلع وبطلع قريب بعد .. بس ف البدايه أبا أشوفكم مذلولين وخايفين من كل شيء حتى ظلكم .. صدقني اذا طلعت انا بتنحنون قدامي تترجوني أتصدق عليكم بدرهم
فهد: اتخسي الا انت ننحني قدامك عشان درهم .. ربنا كريم وموجود ف كل وقت .. وبعدين يالجبان لو فيك خير جان هذاك اليوم يت بروحك مب خليتك جماعتك يضربوني من ورا وفوق هذا كله ردوا سيارتي مكانها
الزعيم: كانت نيتي اني اقتلك بس مب الحين وانت بالذات انا بنفسي بقتلك .. لكن هالمره دور محمد وحرمته .. خلهم يجهزون نفسهم تمام هههههههههههه .. مع السلامه يا .. البطل هههههههه
وسكر فويهه وهو معصب وفنفس الوقت خايف من الي بيصير
.........................................
عند محمد ف الشركة كان قاعد مع ابوه ف مكتبه وبينهم نقاش حاد شوي
محمد: ابوي ما اقدر ما اقدر .. هذي بنت عمتي يعني بنت اختك كيف ترضى ان يصير فيها جذي
ابو حمود: دامها بنت اختي انا ابا مصلحتها .. لازم تطلق وبياخذها غيرك
محمد: بياخذها غيري!! .. ليش لهدرجة بنت اختك رخيصه عندك وبعدين لنفترض اني طلقتها شو بيكون عذري ها ؟!!
ابوحمود: ما تيب عيال وخلاص انتهت السالفه
محمد بصدمه: شووو!!! ابوي انت إنسان مستحيل .. تباني اطلقها عشان شيء هي ما فيها ما اقدر .. وبعدين نوره بنت محترمه وطيبه وانا حبيتها وما اقدر افرط فيها عشان شوية فلوس
ابوحمود: الشوية فلوس هذي الي تتكلم عنها تعيشك وتعيش امك بعد .. محمد سو الي اقولك عنه بدون مجادل سمعتني
محمد نزل راسه و وقف: اسف أبويه هذا الشيء الوحيد الي ما اقدر أنفذه
وطلع عنه وخله وراه بركان من الغضب يتوعد له ف كل نفس ياخذه
..............................................
بعد ما ركب سيارته فتح تلفونه وهلت علييه مسجات ومكالمات فائته ... رد على فهد
محمد: الو
فهد: انت وينك
محمد: بسم الله شفيك جذي تتنفس وبعدين شفيه صوتك
فهد: نوره معاك
محمد: فهد شفيك قتلك نوره ف البيت بروحها وكنت موصنك عليها .. ليكون صاير شيء وانا ما ادري
فهد: لا ما صاير شيء .. بس توه المجهول اتصل و هددني
محمد: فهد انتبه على نفسك .. هذا بالذات اذا اتصل يعني بتصير مصيبه
فهد: ان شاء الله .. وانت رد بسرعه عشان تكون مع نوره .. وقولها عن البوديقارد
محمد: اوك .. يلا انا الحين ياي مسافة الطريق
..........................................
نقدم الأحداث شوي .. العصر ف اسبانيا
قاموا جود ونجود وراحوا شقة خليفه .. دقوا الباب وبطلت لهم حصة ودخلوا
ام خليفه: هلا ببنات اخوي حياكم تعالوا
نجود: عموه وليد ما مر عندج
ام خليفه: لا ما مرني ليش شفيكم
نجود: ما شيء بس هو طلع من اول ما وصلنا ولين الحين ما رد .. قال ان عنده شغل ويمكن يتأخر
ام خليفه: اكيد مشغول وايد حبيبتي وبعدين لا تحاتينه هو ريال ويقدر يتصرف
نجود: بس عموه وايد تأخر
ام خليفه: اكيد تلاقينه شاف حد من ربعه وقعد يسولف معاه ولا قاعد يرتب طلعاتنا .. انت لا تحاتين ان شاء الله ما فيه شيء
نجود: ان شاء الله
ام خليفه: شفيها اختج جذي سرحانه وشكلها تعبان .. والله ما اعرف افرق بينكم منو هذي
نجود : هههههه عموه هذي جود .. اممم. مصدعه شوي وفيها رقاد وانا قومتها غصب
ام خليفه: جود جووود
جود: هلا
ام خليفه: شفيج بنتي فيج شيء
جود هزت راسها بلا: انا بروح الشقه ابا ارتاح شوي
وأول ما طلعت شافت فويهها حامد
حامد: شحالج جود
جود: انا نجود .. جود داخل عند عموه موزه
حامد: اووه اسف على بالي جود .. كنت ابا أكلمها شوي
جود هزت راسها: انا بروح ارتاح عن إذنك
حامد: غريبه نجود من متى صايره مؤدبه احيدها حركيه وفضوليه ف نفس الوقت
جود لفت عليه: ليش متى وقفت معاك وكلمتك اصلاً ؟!!
حامد: بسم الله شفيج معصبه جذي .. خلاص اسف اسف حقج عليّ.. برايج روحي ارتاحي انا بنزل اللوبي
جود بطلت الباب ودخلت وانسدحت على الكنب
جود: افف استغفر الله .. احس اني بمرض وما يبت دوا الزكام .. ويدوه محد الحين شو الي بيخفف عليّ .. غير هذا راسي مصدع من الأحلام المزعجة الي أشوفها .. ابوي واقف بعيد يوصيني ويحذرني من شخص.. حتى ما اعرف اذا ريال ولا حرمه .. دايما يقولي انتبهي منهم تراهم يقصون عليج .. بيدمرونج مثل ما دمروني وقتلوني
...................................................
توقعاتكم يا اجمل قراء💕💕