أحتجتلك يا أطيب بشر وين ألاقيك؟؟

23

ف بيت حمد ودانه .. زهبت الصحون عشان حمد اذا يا يكون كل شيء جاهز .. دخنت البيت وزهبت له الحمام وكل شيء عشان يخفف من تعبه ويرتاح ويرخي أعصابه .. لما خلصت قعدت بتعب على الكنب وخلاص حيلها منهد لانها تشتغل بايد وحده بس .. شوي وسمعت صوت الجرس
دانه بصوت عالي: حبيبي الباب مفتوح ادخل
دخل وسكر عيونها .. دانه ابتسمت : يعني ابداً ما بعرف انك حمد
حمد:....
دانه: يلا قوم خلنا ناكل انا يوعانه وايد اليوم
حمد:....
دانه: خلاص كشفتك انت منو ليش لين الحين مغطي عيني .. يلا خوز عني ابا أخذ دواي بعد
حمد:...
دانه استغربت وحطت ايدها على ايده وتمت تتحسس .. وفجأة وقفت بخوف
دانه: انت شو تسوي هني
الريال: ابا الفلوس .. عندي ديون ولازم أسددها ولا بنسجن
دانه: بدبر لك والله بدبرها وانت عطيتيني مهله شهر
الريال عاقد حواجبه: قتلج ما اقدر اتريا لازم ادفع الفلوس اليوم قبل باجر
دانه: ومن وين لي ما عندي
الريال: قولي حق ريلج وما بيقصر معاج .. اطلبي منه فلوس ترضين ابوج يدخل السجن عشان فلوس
دانه: أبويه افهمني والله ما اقدر شو بقول حق حمد .. بيقتلني
ابو دانه وهو يقعد على الكرسي: خلاص عيل انا بقعد هني لين اي وبكلمه بروحي .. اذا الشيء هذا صعب عليج
دانه: دخيلك اطلع برا ما ابا مشاكل مع حمد انا ما صدقت يرضى عليّ ويعاملني شرات العالم والناس
ابو دانه: جب جب يلا اذلفي المطبخ وسويلي كوب شاي يقند الراس وابا غدا حرمتي تعبانه اليوم ما تقدر تطبخ .. اطبخيلي انت بوديه البيت
دانه : أبويه انا حق نفسي وريلي ما سويت غدا بسوي حقك وحق حرمتك وبعدين ما اقدر ايدي مكسوره
ابو دانه بعصبيه وهو يصفعها كف ورا بعض: انت يبالج تربية من اول ويديد .. دقي على ريلج خل يستعيل ابا فلوس انا
دانه وهي اطيح عند ريل ابوها: الله يخليك أبوس ريلك اطلع والله بيطلقني اذا شافك هني الله يخليك .. تبا فلوس بيبلك بس لا تي هني
ابو دانه: قلتي هالكلام قبل وما شفت شيء
دانه وهي تصيح: أوعدك الفلوس بتكون عندك ف اقرب فرصه .. بأخذ قرض من البنك ولا بتشحت بسوي اي شيء عشان اوفر لك الفلوس بس اطلع من هني دخيلك
ابو دانه بنبرة تهديد: لو ما وصلني الفلوس واقسم بالله اني اي لين بيت ريلج واخليه يعقج فالشارع عقت الجلاب سمعتيني
دانه هزت راسها وهي تصيح .. دز راسها وطلع من البيت وسكر الباب بالقو .. اول ما طلع دانه على طول انهارت .. دخلت حمام الصاله وشغلت الماي وقَعَدت اتصيح وأتطلع الي فيها ما تعرف شو اتسوي وعلى شو اتصيح بالضبط .. خايفه من ابوها وخايفه من مستقبلها مع حمد واهله وخايفه من علاقتها هي وحمد خايفه من حرمت ابوها خايفه من العالم خايفه من كل شيء
فجأة
حمد: داااانهه دانههه
دانه من سمعت صوته زاد صياحها وحطت ايدها على حلجها عشان ما يطلع صوتها
حمد وهو يدق باب الحمام: داااااانوووههه
دانه:...
راح حمد وجهز الاكل ورتبهم على الطاوله وقعد يكلم نوره الي اتصلت فيه تخبره عن الي صاير فالبيت ... خمس دقايق وطلعت دانه ويت عيون حمد عليها
حمد: يلا خلاص نوير بكلمج بعدين
نوره: بترد تنام فالبيت ولا عند دانوه
حمد: لا لا بي بعد العصر جذي
نوره: انزين .. سلم على دانه
حمد: يوصل
سكر من نوره ولف على دانه الي تحاول تنشغل باي شيء و تتجنب اتشوفه .. استغرب حمد من تصرفها وراح عندها
حمد باستغراب: شفيها عيونج حمرا .. انتي كنتي اتصيحين وشو ها الي على خدج كانه طبعت ايد
دانه بدون ما تحط عينها ف عينه: لا ما كنت اصيح .. بس شسمه في شيء دخل ف عيني ولعوزني وخدي لاني كنت نايمه على الكنب وحاطه مخده كل عليها خيوط وخرز عشان جذي
حمد بعدم تصديق: انزين تعالي تغدي عشان تأخذين دواج
دانه:....
يا يبا يمشي بس مسكته دانه من كندورته .. لف عليها حمد بدون ما يقول شيء
دانه: ابا اقولك شيء
حمد: قولي
دانه: حمد ... ابا توعدني انك ما تتركني لو شو ما صار ... وأنك تسألني وتستفسر مني اي شيء تسمعه عني او قرار انت تبا تتخذه تخص علاقتنا انا وياك .. اوعدني انك دايماً تكون عندي اذا احتجتك ف شيء وتكون إيدك بايدي بكل الأوقات
حمد وهو يمسك ويهها: في شيء انا ما اعرفه .. حد قالج شيء ؟!
دانه هزت راسها بلا : بس ابا اتأكد كيف بتكون علاقتنا بعدين
حمد باس راسها : اوعدج بكل شيء قلتيه توج دامج ما تسوين شيء يعصي الله ورسوله ويعصيني انا
دانه ما عرفت شو تقول بس دعت ف خاطرها ان الله يسهل عليها المشاكل الي كل مره تتراكم عليها ويفرج لها همها
.........................................
بيت اليد من بعد ما طلعت نجود وطمنتهم هند عليها قعدوا كلهم مع بعض يسولفون مع وليد وخاصة جود كانت وايد مستانسه فيه لدرجة انها نست نجود
جود: انزين اخر سؤال
وليد: بسج جوجو تعبتيني من اسألتج
جود: امانه بس هذا .. بتردني يا لودي
وليد: اخر سؤال يلا قولي شو سؤالج
جود: امممم حبيت ولا بعدك
وليد: لا بعدني ما حبيت
ميره:  اذا ما تحب اكيد تغازل وتقص على بنات الناس صح
وليد:هههههههههه لا والله انا محترم
ميره: صييييييييييوووووووو طاااااااخ 🚀🚀 .. قول غيرها ما في ريال ما يغازل وخاصة ف عائلتنا
هند تفعلها بعلبة الكلينكس: عدلي لسانج يالهبله .. على كيفج انتي اصلاً ما عندنا حد يغازل غير اخوج حمد وحامد بس هذيل أما الباقي محترمين
ميره: هيه خير ان شاء الله
نوره: جود لا تنسين تأخذين دواج
جود: بأخذه بعدين ابا اقعد مع اخويه
وليد: لا قومي خذي دواج .. انا ما بطير
جود: والله بعدين بأخذه الحين متعايزه أقوم
هند: انزين ما بتطمنين على نجود
جود: لا برايها بترضى بروحها وبترجع تكلمني ولا كأنه صاير شيء
اول ما خلصت جملتها دخلت نجود وعطتها نظره لانها كانت حاضنه ايد وليد وحاطه راسها على كتفه .. جود لفت عليها وسوتلها طاف وتمت تسولف مع وليد .. والبنات عيونهم على نجود الي انقهرت و دخلت داخل ...
هند: جود ترا توامج الي دخلت .. وباين عليها انها متضايقه
جود عقدت حواجبها:وبعدين يعني شو تبوني اسوي لها برايها
هند توقف: انا برد البيت
البنات : بني معاج
هند: اوك
طلعت هند والبنات معاها .. وصلت بيتهم ودخلوا ف ميلس الحريم
ميره: بنات الحقوني ... احس حبيت وليد
نوره وهي تضربها على راسها: استحي على ويهج خواتج الكبار موجودات
ميره: شو استحي .. والله جميل اول مره حد من عيال خوالي جميل جذي .. أحسه هيبه وشخصيه وجي جنتل
خوله: ميروه تبيني اخبر عليج خليفه ويعلمج الجنتل كيف يصير ؟!
ميره: ياخي خلوني اعبر عن مشاعري .. اول مره اعجب ف شخص
نوره: هندوه شفيج
هند: ما ادري مش مرتاحه للإنسان هذا احس وراه شيء
خوله: لا انتي ما تعرفين وليد عدل .. إنسان طيب جداً جداً .. عمري ما شفته يغلط .. إنسان محترم ومصلي ومسمي .. بس هو عصبي شوي وما يحب الغلط ومع هذا فيه حنان مش طبيعي
ميره وهي اتطيح على نوره وتحط ايدها على قلبها : واااااي وااااي فديت العصبي والحنون .. خلاص يا بنات لقيت فارس أحلامي .. احجزوه حقي
نوره قرصتها على ايدها: تعدلي لا اروح الحين وأخبر ابوي واخليه يحول فارس احلامج لبقر احلامج
البنات: هههههههههههههههههههههههههههههه
رن فون هند وأول ما شافت المتصل ابتسمت و وقفت بتطلع
نوره: هيه هيه موووول ما عرفنا منو المتصل
هند بابتسامه: ههههههههههه جب جب
طلعت وردت عليه : الو
ذياب: وينج
هند: فالبيت
ذياب: تعالي غرفة اخوج فهد
هند: اجتماع
ذياب: هيه
هند: ذياب البنات معاي ما اقدر اهدهم
ذياب: خواتي؟!
هند: هيه
ذياب: الحين بخليهم يردون البيت .. وانتي تعالي في شيء يديد
هند: ان شاء الله
ذياب بهمس: فديت الي يسمع الكلام بس
هند : هههههههه
....................................
نرجع لبيت اليد .. اول ما طلعوا البنات
وليد: روحي شوفي نجود
جود: ما ابا وليد .. برايها نجود بقعد معاها بعدين
وليد: ما عليه جود بس هذي اختج وأختي بعد ما ارضى تزعل .. وبعدين خلاص انا برد البيت الحين
جود: ليييييش ... اقعد معانا وليد بلييز
وليد: جوجو ما اقدر لازم ارد بيتي ... احس هني محد مرتاح من وجودي غير يدي ويدوه وانتي اما الباقي وجودي وعدمه واحد عندهم
جود: صدقني بيتقبلونك بعدين.. الحين بس لانك يديد عليهم او يمكن من الصدمه ما عرفوا يعبرون
وليد: ما عليه انا ما برتاح الا ف بيتي
جود: خلاص برأيك ما بغصبك ..شكلك ما تبا تقعد معاي .. روح مكان ما تبا
يا وليد يبا يتكلم بس ما عطته فرصه ودخلت داخل .. اما وليد طلع من بعد ما شافها دخلت
:
:
:
:
:
دخلت جود غرفتها هي ونجود ولقتها منسدحه وأطالع السقف
جود بعصبيه: ارتحتي الحين ارتاح ضميرج يوم خليتيه يروح
نجود: جود اطلعي برا مب متفيقة لج
جود: وتطرديني بعد .. تدرين نجود توني ادري انج أنانيه كل شيء تبينه حق نفسج .. على الاقل خليني استانس بأخوي ساعه وحده بس .. حسستيه انه دخيل بتصرفاتج الي مالها داعي
نجود بصوت عالي: لا تقولين اخوي هذا مب اخونا .. متى بتفهمين .. ما في اخو يخلي خواته يعانون وهو عارف عن حالة ابوه ما في عذر يبرر له موقفه .. اقل شيء يسويه انه يساعدنا على الاقل .. يخفف عنا.. يوقف معانا ..مب يخلينا ويوم صرنا ما نحتاج لأي شخص اي ويقول انا اخوكم
جود تعلي صوتها: اذا كنتي صدق متضايقه من هالشيء ... كنتي بتقعدين معاه وبتستفسرين عن هذا كله وبيجاوبج .. مب تحقرينه
نجود وهي تصارخ : انا مب متقبلتنه ف حياتي .. اكرهه مثل ما كرهت ابوي .. كرهت كل الريايل من بعد أبوج
جود صارخت: عيل اشوفج حبيتي فهد معنه مينون والكل يذمه وسمعته خايسه
نجود وهي ادز جود واتصارخ: لا تقولين عنه مينون .. مب مينون ... وبعدين فهد غير .. غير عن كل ريال شفته وقابلته ف حياتي .. مب نفسهم خاين ومنافق .. مب نفس ابوج واخوج
جود صفعتها كف: لا تقولين عن وليد خاين ومنافق ما ارضى عليه مثل ما ترضين على فهد .. احبه واعتبره كل شيء ف حياتي مثل ما تعتبرين فهد كل شيء ف حياتج .. فرحت لان سندي رجع لي من بعد السنين هذي كلها .. مثل ما فرحتي يوم فهد ابتسم لج وعطاج ويه
نجود تمت اتطالع جود بعيون ممتليه دموع : عمري ما توقعت انج بتضربيني عشان واحد خاين وخسيس .. اخر شيء بقوله لج ومن بعدها لساني ما اي على لسانج .. ما في اخو يفرق بين خواته .. كان يقدر يصلح بينا قبل لا يروح بس ما سوا شيء وطلع
وطلعت عنها تركض وراحت بيت ام فارس وعلى طول على غرفة فهد دخلت ووووو.....
.....................................
توقعاتكم حبايب القلب😘♥️؟!

🔸تتوقعون شو نوع العداوه الي بين حمد وأبو دانه .. وليش دانه خايفه من حمد كل ما يا ابوها وتطرده؟!!

🔸وليد.. تحسون شو بيكون دوره ف الروايه وهل بيغير شيء من حياتهم؟؟!!!

🔸جود ونجود .. تعتقدون منو الي معاه الحق. ومع منو توقفون ؟؟!!

🔸الوضع الي بين جود ونجود بيتلصح ؟!!!.. ومنو بيصلح بينهم ؟!!!

ملاحظة 🔴
جاوبوا على الاسئله لا تسحبون عشان أتحمس واكتب البارت وأنزله بسرعه ... وأعذروني على التأخير كان المفروض انزله العصر بس اندمجت ف فلم ونسيت سالفة الروايه😂😂 .. شيء أخير حبايبي أباكم تدعون لأختي وحبيبتي seniora23 بالشفاء العاجل والله يلبسها ثوب العافيه ويبعد عنها كل شر يا رب

احبكم😘♥️♥️