أحتجتلك يا أطيب بشر وين ألاقيك؟؟

44

نقدم الأحداث .. بعد أسبوع : الي ف اسبانيا صاروا كل يوم يطلعون يتمشون ومستانسين على الأجواء .. وجود بعدها تحلم نفس الحلم المزعج وتقوم الفليل اتصيح ومحد يدري عنها .. الزعيم صار يتصل ف فهد بشكل يومي ويهدده بمحمد ونوره بس لين الحين ما نفذ شيء من الي يقوله .. محمد ونوره قالها عن البوديقارد وطبعاً رفضت هالشيء وعصبت وعاندت وهو ما قدر يسوي شيء ثاني وطبعاً قاعد ينفذ أوامر ابوه انه يداوم من7 الصبح لين2 الظهر .. ام حمود ما ردت البيت بأمر من ابو حمود.. خلود صارت تتصل كل يوم ف  نوره عشان ديمه تكلم محمد لانها وايد تصيح تباه .. اما الباقي ف حياتهم ماشيه
...........................................
يوم الجمعه .. ف بيت ابو حمود .. كانت نوره مشغله سورة الكهف ف البيت وبعدها راحت اتدخن كندورة محمد ويوم خلصت دخنت البيت وبعدها راحت المطبخ تغسل الصحون وفجأة سمعت صوت باب البيت ينفتح طلعت وشافت ابو حمود وتمت واقفه اتطالعه
ابوحمود بنظرة: شو ما تعرفين اتسلمين ولا ما علموج
نورة: ااا .. السلام عليكم
ابو حمود: وعليكم السلام .. وينه محمد غريبة مخلنج بروحج
نورة: محمد يتسبح عشان المسيد
ابو حمود: زين .. انا بروح اتجهز عشان الحق على المسيد بعد وتراني ما برد البيت
نورة: اوك
يا ابو حمود يبا يروح بس وقفته نوره
نورة: خالي احمد
ابو حمود: شوعندج
نورة: خالي متى بتخلي عموه ترد البيت .. اشتقت لها
ابو حمود: يوم انتي بتطلعين من البيت هذا
نورة عقدت حوايبها: كيف يعني يوم بطلع.. قصدك يوم بطلع مع محمد اليوم
ابو حمود وهو يتقرب منها: اقصد يوم بتطلقين من محمد انا بردها البيت .. ما بقعدها ف مكان انتي فيه سامعه!!!
نورة: بس محمد ما بيطلقني .. هو قالي هذا الكلام انه ما بيطلقني لو مهما صار
ابو حمود: وتعتقدين ان محمد يقدر يعيش بدون امه .. ولا يقدر يعارض كلامي هو يقولج جذي بس عشان ينسيج السالفه واتمين عنده وما تصير مشكله حق محمد .. ولا انتي بعد 6 شهور بالضبط بتطلقين
نورة: انا مب متخيله ان عندي خال نفسك انت .. انت اكبر واحد والمفروض تكون احن واحد على البقية مب اقاسهم .. حالك مثل حال خالي سعيد بس الفرق ان هذاك يشرب وانت لا
ابو حمود وهو يمشي  : روحي روحي عند ريلج قبل لا اطلعج برا البيت
نورة تمت اتطالعه بقهر وقالت بصوت خفيف: كررريه الله ياخذك ان شاء الله .. ما في حد سالم من شره
ردت الغرفة وشافت محمد قاعد يتغتر
محمد: وين كنتي انتي
نورة: فالمطبخ
محمد: ليكون اتسوين غدا
نورة: لا بس اغسل الصحون
محمد: انزين روحي اتجهزي بعد ما ارد من المسيد بنطلع على طول
نورة : انزين
حط محمد دهن العود وطلع ونورة راحت صلت وتلبست وتمت تتريا محمد شوي ويا محمد وطلعوا رايحين صوب المطار
...............................
ف اسبانيا / برشلونة .. كانوا منقسمين ف شقتين .. شقة فيها البنات كلهم وشقة فيها الشباب
ف شقة البنات...  كانوا قاعدين يسولفون عشان يتفقون على الطلعه
ميره: شرايكم نروح الالعاب .. قريت ان عندهم مدن العاب وملاهي وايد كبيرة وحلوة
خولة: لا لا خلي هذا باجر او الاحد .. اليوم نبا شيء خفيف
جود: اممم شرايكم ف مكان تاريخي جذي
خولة: حلو .. شرايكم بنات
ميره: اممم .. بس بشرط بعدها نبا نروح المطعم لان الصراحه انا ما احب سوالف المتاحف وغيرها
نجود: انا اشوف لو نخلي سالفة المطعم على صوب ونقول حق الشباب ان نبا نطلع الفليل بس نكون نحن يعني ما نبا يهال معانا
جود: حلو بعد
ام خليفة: برايكم عيل روحوا انتو وانا بقعد هني مع مزنة
خولة: ليش تقعدون .. يعني بتروحون مكان ثاني؟؟
ام خليفة: هي بنروح السوق الي قريب من هني بنشتري لنا كم غرض
نجود: زين الحين اتفقنا صح منو الي بيروح يخبر الشباب بالخطة كلها
جود بابتسامه: اصغر القوم خادمهم يعني انتي .. يلا روحي قوليلهم
نجود: لا انا ما اقدر راسي يعورني .. روحي انتي انتي الاكبر
ميره: خلاص انا بروح
خولة : لا انتي لا تروحين .. امممم حصة روحي انتي مع هدى
حصة: ان شاء الله
راحت حصه مع هدى شقة الشباب ودقوا الجرس وطلع سلطان
سلطان برفعت حاجب: خير شيايبنج هني .. ترا كلهم كبار
حصة: افففففف .. انت ليش طلعت .. قوم قوم ابا اكلم ابويه
سلطان: انثبري مكانج داخل كله شباب وين تبين تروحين
حصة بعصبية: ترا بدخل عند اعمامي مب شقة دعاره .. خلني ابا اقولهم شيء
سلطان: لا تصارخين لا كف سامعه .. وبعدين يلا ردي مكان ما يتي خلي غيرج اي
حصة دزته: مب على كيفك انت ايييه خلني ادخل يالعنز بكلم ابوي
سلطان : يلا يلا كشش كشش .. ردي عندهم وخلي غيرج اي
حصة: انت يالغ..
ما كملت كلامها لانه سلطان سكر الباب فويهها
حصة: غبي عنز افففف يقهر
هدى: ههههههههههه انتي شو مسوتله عشان جذي يعصب منج
حصة: انتي جب ما يخصج اففف ... سمعي انا بنخش هني وانتي دقي الباب ويوم بيبطل وبيدخلج قوليلي عشان ادخل
هدى: مابا توج اتسكتيني والحين تبيني اسمع كلامج .. اعتذري اول وبعدين بسوي الي تبينه
حصة: افففففففف .. اسفه اسفه يلا دقي الباب
راحت حصة وانخشت فزاوية وهدى دقت الباب وطلع سلطان
هدى: سلطان ابا اكلم ابوي شوي ممكن .. عموه خوله مطرشتنا
سلطان: اختج ام لسان زرافة وينها
هدى: راحت
بطل سلطان الباب حق هدى .. وهدى دخلت ودخلت وراها حصة على طول وهي تضحك عليه .. اما سلطان فانقهر من حصه وتم يتوعدها