أحتجتلك يا أطيب بشر وين ألاقيك؟؟

49

الظهر ف بيت اليد .. هالمره اتجمعوا عند اليد عشان يتغدون .. وطبعاً كلهم ف الميلس الكبير الا حصه وهند وذياب
نجود: يدوه ما شاء الله عليج طباخج نااااررر .. اول مره تسوين شيء احبه
اليده: هني وعافيه
جود: عاد نجود عشقها مندي لحم
اليد: هند وذياب وينهم .. حصه بعد مب موجوده
ميره: يدي هندوه تتريا ذياب لين يوصل وبعدين بتي
اليد: و حصه؟!
خليفه: ابويه حصه ف البيت تتغدا
اليد: خلك قاعد بعد الغدا اباك بكلمة راس .. واحمد وسعد و وليد و انتو بعد اباكم
الكل: ان شاء الله
نوره: يدوه عطيني البطيخ الي عندج
اليده: هذا انا خليته حق هند بس خذيه بخليهم يقصون لها بعدين
ام خليفه: نوره بنتي ما اشوفج كليتي العيش
نوره: كنت ناويه اكله بس شفت البطيخ واشتهيته
ميره: ما شاء الله كليتي صحن كامل بطيخ وهذا الثاني بعد
نوره: صحن حقي وصحن حق البيبي
ابو حمود: نعم!!! .. بيبي؟؟ .. ليش انتي حامل؟!!!
اليده: هيه حامل ليش انت ما تدري
ابو حمود: لا والله توني ادري .. عندي حمار يداوم معاي من الصبح لين الظهر ولا قالي شيء
وليد: هههههههههه
الكل لف يطالعه: اسف اسف .. بس في حد طرشلي نكته
اليد: والله يا احمد السالفه هذي من امس و الكل يدري عن حمال نوره
ابو حمود: شو اسوي يوم عندي ولد سكانة مرته شو ما تقوله يركض وراها نفس الجلب وينفذه .. اكيد هي الي رفضت انه يقولي و الجلب لبى طلبها ولا خبرني
محمد بعصبيه: ابويه ماله داعي الكلام هذا .. على الاقل احترم الي موجودين هني
ابو حمود: جبب ججبببب!!! .. مب انت الي تعلمني الاحترام فهمت
محمد قام وطلع من الميلس وهو معصب ونوره قامت وراه .. دقايق ودخلوا هند وذياب
اليد: ليش تأخرتوا
ذياب: لين ابدل واصلي تأخرنا
اليده: تعالوا تغدوا حياكم .. هندوه خليهم ايبولج صحن بطيخ من المطبخ .. صحنج كلته نوره
هند: لا عادي ماله داعي باكل تمر
وقعدوا ياكلون وهند تاكل شوي شوي
فهد: هندوه فيج شيء
هند هزت راسها ب لا: انا شبعت
ذياب: ما كليتي شيء
هند: احس بتعب بروح ارتاح
اليده: قعدي كلي .. شيء طبيعي تحسين بتعب لانج ما تاكلين عدل
هند قعدت تاكل وفجأه حست برجفه ف جسمها ومسكت ايد ذياب
ذياب: هند شفيج
هند بصعوبه: ذ يا ب
دانه وهي تمسح ويهها بكلينكس: ليش جذي معرقه
ذياب: شكله السكر نزل عندها .. عطوني عصير
تم ذياب يشربها عصير ويعطيها تمر لين بدت شوي شوي ترد طبيعيه
ذياب: انتي بخير
هند هزت راسها بهيه
ام فارس: هندوه انتي خذيتي ابرتج قبل لا تتغدين
ذياب: هي عموه خذت الابره ... وانا بنفسي معطنها اياه بس ما ادري ليش جذي تعبت
ام فارس: موعدها الشهر الياي.. بس ودها العياده يمكن فيها شيء
ذياب: ان شاء الله
....................................
عند محمد ونوره .. كان قاعد ويطالع زاويه وهو معصب .. دخلت نوره وهي شاله صينية الاكل  ووقفت قدامه
نوره: محمد الاكل
محمد: ما اريد
نوره: مب على كيفك لازم تتغدا
محمد : نوره قتلج ما اريد اكل خلاص
نوره: بس انت ما كليت شيء .. تعال ك..
قاطعها محمد وهو يعق صينية الاكل من ايدها ومسك ذراعها بعصبيه
محمد بصوت عالي: قتلج ما ابا ... لازم اعيد واكرر الجمله يعني ؟؟! .. شلي اكلج واطلعي برا( دزها ورد قعد )
نوره تمت اتطالعه بعصبيه وخوف ف نفس الوقت وطلعت برا الغرفه ثواني ودخلت وف ايدها مخمه وتمت اتشل الاكل وتلقط الزجاج المكسور بدون ما تقول شيء .. بعدها طلعت دقايق وردت بدلت ملابسها حطت راسها ورقدت اما محمد حط راسه على الكرسي ورقد
...........................................
ف بيت اليد بعد الغدا .. الكل راح وما بقى غير الي نادهم اليد وقالهم يقعدون
اليد: جمعتكم انتو بالذات لاني ابا اقولكم شيء على تصرفاتكم الي قاعدين اتسونها باستثناء سعد .. ببدا في خليفه .. حصه وين
خليفه: ف البيت
اليد: اليوم تيبها تتعشى معانا
خليفه: اسف ابويا بس ما اقدر البنت معاقبه انها ما تطلع من غرفتها
اليد: هذا مب عقاب .. انك تحرمها من الاكل والطلعه هذا العقاب على قولتك ابداً ما بيعلمها الصح والغلط ولا بيمنعها انها ترد اتسوي الي سوته مره ثانيه
خليفه نزل راسه
اليد: اذا تباها تتعلم صدق كلفها بشغله تسويها تتعب وتتعلم من غلطها بالمقابل تستفيد .. قوللها هذا عقابج واذا تكرر في عقاب ثاني
خليفه: مثل شو يعني
اليد: خلها تحفظ جزء من اجزاء القران .. وكل غلط اتسويه اتزيد جزء ثاني .. جذي هي بتتعلم وبتستفيد .. وخلها تحفظ السور الي تعلمها الصح والغلط والحرام والحلال تبين لها جمال النعيم والجنه وقباحة الجحيم وجهنم
خليفه: ان شاء الله
اليد : وانت يا احمد .. الي قاعد اتسويه مع اهلك هذا ابداً ما يرضي الله ورسوله ولا يرضيني انا بعد .. انت مب ياهل عشان اقول واعيد لك نفس الكلام كل مره واخر شيء تسمع من الاذن هذي واتطلع من الاذن الثانيه .. اعقل واكبر .. وبعدين كلامك اليوم مع محمد ونوره قدام الكل ابداً ما عيبني.. عيب اتكلم ريال طول وبعرض وقريب ان شاء الله بصير ابو بالطريقه هذي
ابو حمود: عيل يرضيك اني انا اخر من يعلم ان حرمة ولدي حامل .. ولو نوره ما تكلمت اليوم بالصدفه ما كنت بعرف الا يوم بتربي
اليد: ومنو وصلهم لهالمرحله مب انت .. تطلع وتدخل بصريخ وضرب واهانات وتجريح وكلام ماله معنى
ابو حمود: لازم اسوي جذي عشان يتربون صح
اليد: هذي مب تربيه .. عمرها ما كانت التربيه بالطريقه هذي .. اذا تبا تربي عيالك ربهم على الحب مب الكره .. ربهم على الامان مب الخوف .. خلهم يبرونك لانهم يحبونك ويتمنون لك الخير مب لانهم خايفين منك
ابو حمود: هه اذا ربيتهم جذي وين بحصل ريايل انا
اليد: عيالك ريايل يا احمد ريايل .. من كبيرهم لين صغيرهم .. ريالين وينشد فيهم الظهر .. تعرف اصغر عيالك شو قالي .. قال يدي انا ما اقدر اغير ابوي ولا اقدر اغير اطباعه بس اقدر ابره واطيعه .. اقعد معاهم شوفهم شو يبون شو مايبون ما يصير الي قاعد اتسويه .. وبعدين على قولتك اذا كانت الطيبه والحنان والامان ما يخلي الولد يصير ريال يعني انت مب ريال لاني انا ربيتك وكبرتك على هذا الاساس
ابو حمود: يبا نحن غير وهم غ..
قاطعه اليد: لا .. ما في شيء اسمه نحن غير وهم غير.. كلكم نفس الشيء .. كلكم كنتو ف بطون امهاتكم تسع اشهر و كنتوا يهال وصرتوا مراهقين وطايشين وبعدها صرتوا شباب وياما طحتوا ف الغلط وتعلمتوا منه.. كلكم ربكم واحد ودينكم واحد .. وكلكم بتموتون وبتندفنون بالتراب ما في حد بيندفن بالذهب
ابو حمود تم منزل راسه وساكت
اليد: وانت يا وليد رغم اني كنت بتكلم ف موضوع ثاني بس تصرفك اليوم وقت الغدا ما عيبني .. انك تضحك على محمد ولا غيره عيب عليك
وليد: يدي قريت نكته مطرشيلي اياها وضحكت
اليد: عيل مره ثانيه شغل التلفون وانت تقرا النكته
وليد تغيرت الوان ويهه من الاحراج
اليد: عموماً مب هذا موضوعنا .. يا سعد ولدي وليد يبا بنتك ميره على سنة الله ورسوله
ابو خليفه: والله يا عمي وليد ريال وشهم ما عليه كلام والف بنت تتمناه ويا بختها ميره يوم بتتزوج وليد .. بس لازم اشاور اخوانها واشاور البنت بعد
اليد: هيه لازم اتشاورهم وما اباك تجبرهم على شيء
ابو خليفه: ان شاء الله
.........................................
عند هند وذياب
ذياب: يلا قومي بنروح
هند: وين
ذياب: المستشفى .. عشان يشوفون عندج السكر
هند: ما اريد اروح ما فيني شيء
ذياب: هندوه لازم تروحين
هند: مابا
ذياب: بتقومين ولا اشلج واركبج السياره
هند: ما بقوم
ذياب تقدم صوبها وهند ركضت وركبت فوق الشبريه
ذياب: تعالي
هند: هههههه  ذياب خلاص والله ما ابا اروح
ذياب: انزين تعالي بوديج الجمعيه
هند: ههههههههههههه .. انا مب ياهل تقعد تقص عليّ
ذياب: ما اقص عليج جد اتكلم .. وخذيلج حلويات بعد عشان اذا السكر نزل عندج تاخذينهم
هند صغرت عيونها: احلف انك بتوديني الجمعيه وبس
ذياب: والله بوديج الجمعيه
هند: انزين
ذياب: يلا نزلي
هند: عطني ظهرك بركب
ذياب: لا شكراً مابا اموت
هند بطلت عيونها: شو قصدك يالعملاق
ذياب : ههههههههههه ولا شيء .. يلا تعالي
ركبت هند على ظهر ذياب وهو مشى فيها و وداها عند غرفة الملابس ونزلها
ذياب: اخخخخخخ ظهري الحين يبالي انسدح عشر سنين
هند ضربته على كتفه: تراني ضعيفه انزين .. بس انت الشيبه الي ما تتحمل
ذياب ابتسم: امزح معاج .. ريشه ريشه
هند: بعد شو
ذياب: يلا روحي بدلي وانزلي .. اترياج ف السياره
هند: اوك
دقايق وركبت السايره وراحوا الجمعيه .. ودقايق ثانيه و وصلوا ونزلوا الجمعيه
ذياب: انا بحط الماي وانتي روحي ايبيلج حلويات
هند: ما تبا شيء
ذياب: سمعي شرايج ناخذ جذي سله ونترسها جبس وحلويات ونحطهم ف الغرفه
هند: يا حبك حق هالسوالف .. اوك بروح اخذ وبي .. خلك هني لا تتحرك ما فيني اقعد ادورك
ذياب: انزين يلا روحي
راحت هند تتنقى لهم حلويات وغيره وذياب كان يحط الماي والعصير .. شوي يت بنت صغيره تحاول تاخذ كرتون عصير
ذياب: تبيني اشله حقج
البنت: تقدر تشله؟؟!
ذياب وهو يراويها عضلاته: شوفيني قوي ولا لا؟؟!
البنت: امممم اوك شله .. بس ما ابا برتقال .. ابا فراوله
ذياب: حاضر
يا ذياب يبا يشل العصير بس قاطعه صوت ريال يزقر البنت
البنت: نعم!!
الريال: يلا بنروح تأخرنا وايد
البنت: ابا عصير ما عندي ف البيت
الريال: سلامه يلا خلصينا .. والله تأخرنا وايد
سلامه شافت ذياب: حط العصير ف السله
ذياب شل العصير وحطه ف السله وبعدها رفع راسه حق الريال
ذياب : السلام عليكم
الريال : عليكم السلام والرحمه .. هلا ذياب شحالك
ذياب باستغراب:بخير الحمدلله .. شحالك انت
الريال: تمام الحمدلله .. ما عرفتني
ذياب: لا والله منو الاخ
الويال: انا جاسم الي قابلتك ف المانيا .. ودعمت الحرمه
ذياب: ايواااااا ... هلا جاسم والله شكلك غير بالكندوره
جاسم: هي تعرف بعد امي المانيه وابوي تركي لازم ما تليق علينا الكندوره
ذياب: صدقتك صدقتك
جاسم:هههههههههههه ... عسى بس ما تلعوزت مع بنتنا
ذياب: بنتك؟؟
جاسم: لا بنت اختي
ذياب: اهااا .. لا و..
قاطعته هند وهي تراويه كيستين جبس بدون ما تنتبه للي واقف معاه: حبيبي اي واحد اخذ
ذياب: خذيهم الاثنين
هند: انزين تعال معاي عشان تاخذ السله
ذياب: يبيها انزين
هند: ما اقدر اشلها ثقيله
ذياب لف على جاسم: اسمحلي جاسم عاد
جاسم : هههههه لا عادي
هند لفت عليه وبطلت عيونها وبحركه لا اردايه وقفت ورا ذياب ومسكت كندورته
جاسم: شرايك تي خيمة الربع هناك دايماً يتجمعون
ذياب: والله ما عندي اي مشكلة
جاسم  وهو يعطيه الفون: عيل عطني رقمك ومن يتجمعون بتصل بك
ذياب عطاه رقم تلفونه وسلموا على بعض وبعدها كل واحد راح ف طريقه .. اما هند ف تمت سرحانه طول الوقت وخايفه
................................
العصر .. ف بيت ابو حمود قامت من نومها وراحت توضت وصلت وبعدها طلعت برا وشافت ام حمود قاعده وحمدان حاط راسه على ريولها ويسولف معاها
نوره: السلام عليكم
الكل: عليكم السلام والرحمه
نوره: ها حمدان .. قاعد تدلع على عموه
حمدان ابتسم لها: لا يالس احش فيج
نوره: ههههههههههههه
ام حمود: محمد وينه
نوره: راقد
ام حمود: سوالج شيء لاني سمعته يصارخ ويكسر
نوره: لا لا ما سوالي شيء اطمني
ام حمود: بنتي سامحيه اذا غلط عليج او سوالج شيء .. تراه معصب وانت تعرفين الانسان ف وقت الغضب يسوي اي شيء
نوره: ما عليه عموه .. ما صار شيء
ام حمود: فديتج يا نوره الله لا يحرمنا منج يا رب .. اصبري بروح ايب العصير الي سويته
نوره: اوك
حمدان: الحين صدق محمد ما سوالج شيء
نوره: هيه صدق .. بس انه صارخ عليّ وعق صينية الاكل
حمدان: شرايج نطلع نقعد ف الحوش
نوره : لا ما فيني على الحر .. بتريا عموه وبعدين بروح بيتنا حمدان: انزين نوره .. بتسهرين معاي اليوم عشان نطالع فلم او مسرحية
نوره: خلاص تمام بس الترتيب عليك والاكل عليّ .. انت قول شو تبا وبسويلك
حمدان: خلاص عيل بسويلج قائمة اكل و سويهم
نوره: اوك
ام حمود: ها خذي العصير وعطيني رايج
يت نوره تبا تشرب بس محمد طلع من الغرفه وهي لفت عليه
ام حمود: محمد ما تبا تاكل شيء
محمد:لا
ام حمود: انزين على الاقل تعال اشرب عصير
محمد: ما ابا شيء
وطلع برا وما عطاهم فرصه يتكلمون .. اما نوره ف ردت عصيرها وقامت
ام حمود: وين رايحه نوره تعالي كملي عصيرج
نوره: بعدين بشربه .. بروح ارتب الغرفه وبعدها بروح عند امايه اتصلت تباني
ام حمود: خلاص عيل بحطه لج ف الثلاجه
نوره: اوك
دخلت نوره وتمت تنظف الغرفه وترتبها ويوم خلصت لبست شيلتها وطلعت رايحة بيتهم ..يوم وصلت كان الكل موجود ف الصاله الا حصة
نوره: السلام عليكم
الكل: عليكم السلام
ابو خليفه: هلا ببنتي حياج نوره تعالي قعدي عندي
راحت نوره وقعدت عند ابوها وحطت راسها على كتفه
ابو خليفه: شفيج يا  بنتي
نوره : ما فيني شيء
ام خليفه: تبين فراوله .. ابوج اليوم يايب كرتونين فراوله
نوره: لا ما ابا .. اذا بغيت بي اخذ لي بعدين
ابو خليفه: اليوم وليد طلب ايد ميره مني
ميره بطلت عيونها من الوناسه والابتسامه شقت حلجها شق
ذياب: وشو قلت له
ابو خليفه: انا قلت له بشاور اخوانها وبعدين برد لكم خبر
حمد: انا عن نفسي موافق .. وليد ريال وما عليه كلام وبعدين اكيد اذا خذ ميره بيصونها وبيحطها ف عيونه
ابو خليفه: خليفه و ذياب شو رايكم
ذياب: انا مب موافق
خليفه: وانا رايي من راي ذياب
ميره : لييييييششش
ذياب:....
.........................................
توقعاتكم؟؟!