أحتجتلك يا أطيب بشر وين ألاقيك؟؟

46

بعد اسبوع  الي ف اسبانيا ردو البلاد وعلاقتهم ف بعض تغيرت وايد .. وليد وميره صاروا يوميا  يتكلمون مع بعض وخذوا ارقام بعض بعد وميره مستانسه من هالشيء والباقي ما في شيء مهم .. اليد واليده ردوا البيت
............................
اليوم السبت .. كانوا كلهم قاعدين ف بيت اليد ويسولفون ف الميلس
ميره: يدي ليش ما تودينا العزبه انشوفها
اليد: العزبه موجوده بس انتو ما تبونها
ميره: شرايك نروح اليوم حق العشى هناك
اليد: خلاص مثل ما تبون
اليده:  موزه ولدج خليفه وينه
ام خليفه: ف الدوام امايه عندهم شغل هو وحمد
شوي ودخل وليد : السلام عليكم
الكل: عليكم السلام
محمد وقف: انا استأذن بروح ارتاح شوي
اليده: شفيك محمد .. اقعد توك ياي
محمد: بعدين يدوه ابا انام شوي
اليده: انزين على راحتك
طلع محمد ولحقته نوره ولحقوهم ذياب وهند
ذياب بصوت عالي: محمد .. محممددد
محمد لف عليه بدون ما يتكلم
ذياب: شفيك طلعت اول ما دخل وليد
محمد: ما فيني شيء بس ابا ارتاح مصدع 
ذياب: شوف اذا بينك وبين وليد خلاف انصحك ان يدوه ويدي ما يعرفون لانهم بيزعلون عليك وعادي يروغونك بعد
محمد هز راسه باوك وراح مع نوره اما ذياب وهند راحوا صوب قسمهم عشان يرتاحون
...........................
عند دانه .. كانت ف غرفتها قاعده اتطالع تلفزيون شوي ورن فونها وكان حمد
دانه: الو
حمد: يا هلا
دانه: وينك انت وايد تأخرت اليوم
حمد: ما عليه حبيبي وايد مشغول اليوم .. بعد شوي بخلصهم وبرد البيت
دانه: يعني ما يصير تأجلهم لين باجر
حمد: يا ليت اقدر بس ما يصير ... بخلص وبرد ما بطول ان شاء الله .. انا بس دقيت عشان اتطمن عليج
دانه: حمد ترا عندي موعد اليوم لا تنسى
حمد: مب ناسي بي قبل الموعد ان شاء الله واذا تأخرت روحي مع دريول وخذي معاج حد
دانه : ان شاء الله
.....................................
ف بيت ابو حمود ... كان محمد قاعد ف الغرفه وسرحان دخلت نوره وشافته وراحت عنده وقعدت قدامه
نوره: محمد
محمد طالعها بدون مايتكلم
نوره عقدت حواجبها وهي تبتسم: شفيك معصب بسم الله
محمد: نوره مب متفيق حق شيء الحين
نوره: ابا اقولك شيء انزين
محمد:قولي
نوره: ابا ا...
قاطعها صوت الصريخ الي ياي من الصاله .. وقاموا طلعوا برا وشافوا ابو حمود قاعد يهزب حمدان
ام حمود: خلاص يا احمد خل الولد لعوزته ما تسوى عليه هاللعبه
ابو حمود: هيه انتي علمي العيال الطفاسه وقلة الادب
حمدان: ابويه الحين لاني قعدت على البليستيشن كم ساعه صارت طفاسه وقلة ادب
ابو حمود: جب ولا كلمه يوم انا اتكلم انت تنزل عيونك وتتكلم سمعت ولا لا
حمدان عقد حوايبه وتم يطالع ابوه بعصبيه .. ابو حمود عصب منه وصفعه كف وطاح فيه ضرب ومحمد حاول انه يهدي ابوه ويبعده عن حمدان لين اخر شيء قدر عليه
محمد: ابوي خله خلاص انت بالطريقة هذي بتخليه يعاند اكثر لا تنسى انه بعده مراهق
ابو حمود بعصبيه وصراخ:انا يوم اعطي اوامر بهذا البيت الكل ينفذه بدون ولا كلمه فهموتوني ولا لا
نوره برفعة حاجب: بس نحن مب مستعدين نصير خدم عندك ونفذ اوامرك وبس ويوم نبا نتكلم اتسكتنا .. هذي مب حاله
محمد: نوره دخلي داخل ولا تطلعين
نوره: وانا كل ما تكلمت وقلت الصدق اتسكتني واتقولي دخلي داخل .. ليش محد يواجهه ويقول الحق ها
محمد وهو يدزها عشان تدخل: روحي الغرفه وما ابا اسمع صوتج دخلي بسرعه
ابو حمود: لا خلها .. خلها انا ابا اسمع شو الحق الي تبا تقوله
نوره تقربت صوبه: خالي ترا كل واحد فينا ف قلبه كلمه يبا يقولها بس مب قادرين .. تعرف ليش ؟!! .. بسبب العنف الي قاعد تمارسه على الطالع والداخل .. كيف تنام الليل وحد زعلان منك ولا شايل بقلبه عليك ولا كارهنك ولا انت ظالم حد .. كيف ترتاح .. كيف عيونك تغمض بسلام .. انزين ما تخاف انك تنام وما تقوم وقتها شو بتسوي ها تكلم
ابو حمود: انا اشوف يا نوره اختي ما عرفت تربيج عدل وشكلج وايد متأثره بحصص الدين الي خذيتيهم ف المدرسه روحي توكلي غرفتج عشان لا ينغسل شراعج هني
نوره بصوت عالي: بس انا ما ارضى اشوف وحده كبر امي تنضرب كل يوم وتنهان وفوق هذا تشتغل خدامه عندك وانت مب مالي عينك شيء .. ولا ارضى اشوف ريايل طول بعرض ينفذون كلام ابوهم بالحرف الواحد خوفاً منه مب حب وما يكترثون اذا كان الشيء الي يسونه صح ولا غلط .. وما ارضى اشوف واحد بسن المراهقه مجابل التلفزيون اربع وعشرين ساعه ومستعد يكلم اي حد غريب ويشكيله حال بيتهم بدال ما يقعد مع ابوه ويشكيله عن مشاكله .. وما ارضى اشوف خال يحاول يدمر حياة بنت اخته عشان الفلوس وبس
ابو حمود عقد حوايبه: انا يا نوير تعلين صوتج عليّ وتعلميني شو الصح وشو الغلط ... اذا انا  قبل كنت ابا اخلي محمد يطلقج الحين انا مصر انه يطلقج ويصير حالج مثل حال اختج مب عارفه شو تسوي بحياتها
نوره: تدري خالي ف حياتي ما شفت انسان مثلك .. كل الصفات السيئة فيك .. انت مثل الابليس بهيئة انسان
ابو حمود بصوت عالي: انتي يبالج تربيه من اول ويديد يا بنت موزه
وما عطاها فرصه تتكلم واتدافع عن نفسها الا وهو ساحبنها وضربها ضرب ونوره تصارخ ومحمد وام حمود يحاولون يبعدونه عنها اما حمدان ف كان قاعد يطالعهم بدون ما يتحرك او يسوي شيء اتذكر كلام نوره مع امه اليوم الصبح
" كانت ام حمود قاعده ف الصاله اتطالع تلفزيون شوي يت نوره وسلمت عليها
ام حمود: ما شاء الله نوره محلوه اليوم ويهج منور
نوره ابتسمت: تسلمين عموه
ام حمود: محمد وينه
نوره: طلع يخلص شغله وبيرد ان شاء الله
ام حمود: هيه اكيد راح يشوف البيت
نوره تقربت من ام حمود: عموه ابا اقولج شيء
ام حمود: قولي حبيبتي اسمعج
نوره نزلت راسها: عموه انا حامل
ام حمود بطلت عينها بصدمه: صدق!!!! .. لا لا ما اصدق كللللللللللوووووووشششش .. واخيراً بصير ماما سلامه ههههههههه .... مبررك يا بنتي مبروك 
نوره باست ايدها: هههههههههههه الله يبارك فيج
ام حمود: محمد يعرف
نوره هزت راسها ب لا: بعدني ما خبرته بسويله مفاجأه
ام حمود: هههههههههههه سويله مقلب عشان الخبر يكون مفاجئ صدق
نوره: ههههههههه ما عليج مرتبه كل شيء"
ما وعى الا على الهدوء الي حل فجأه .. لف عليهم وشاف نوره طايحة  ف حضن محمد مثل الجثه و ويهها كله دم وام حمود واقفه ومنصدمه 
محمد وهو يضرب نوره على ويهها بالخفيف: نوره .. نوره قومي .. كلميني انزين .. نوووووره!!
ام حمود مسكت محمد من كندورته:قووم .. قوم ودها المستشفى .. ودها بسرعه الحق عليها محمد قووووم ..لا تقعد جذي قووووووومم!!!
محمد قام وياب مفتاح سيارته وشل نوره وركبها السياره وام حمود راحت معاهم وطيران على المستشفى
................................
ف مكان ثاني كان منخش ف زاويه وقاعد يتكلم بالفون
الزعيم: اسمعني عدل .. اليوم بيروحون المزرعه .. واباك توصل صورها هناك وتي انت بعد وتفضحها فهمت عليّ
راشد: هي فهمت بس اذا ضربوني ولا سو فيني شيء
الزعيم: خل حد اي معاك عشان يدافع عنك .. وقول حق جاسم يبدا شغله مع ذياب
راشد: شو يعني
الزعيم: انت قوله وهو بروحه بيعرف شو يسوي
راشد: ان شاء الله

..............................
ف مكان ثاني .. شركة سعد
كانوا قاعدين ف مكتب ابوهم يتناقشون بأمور الشركة
حمد: انزين ابوي وشو عشان شراكتك مع خالي احمد
ابوخليفه: ما ادري .. بس احس ان وراه شيء ما اشوفه قاعد ايب صفقات تساعد الشركتين او تكون لصالحها .. بس يشتغل بروحه
خليفه: والله يابوي انا اشوف تفك هالشراكة الي بينكم وايد احسن .. عشان ما تصير مشاكل بالشركة ونخسر كل الي بنيناه
حمد: وانا رايي من راي خليفه كل واحد يجابل شركته وايد احسن .. وبعدين شركتنا ما تحتاج شريك ولله الحمد
ابو خليفه: بفكر بالموضوع ..يلا دام خلصتوا شغلكم خلونا نروح
خليفه: يلا
وطلعوا وكل واحد ركب سيارته وردوا البيت
....................................................
توقعاتكم