ف المبزره ... نزلوا من السياره حصه ومنال وتموا يمشون ويسولفون حصة: منال ما تخافين منال: من؟! حصه: من ربج .. مطلعه شعرج برا وتحوطين وانتي تعرفين هالمكان كله شباب وسوالف المغازل وغيره منال: امبلى اخاف .. بس هذي حريه شخصيه .. وبعدين عشان الحرام والحلال امي وابوي ما علموني هالشيء يعني هم الي بيتحاسبون مب انا حصة: كيف يعني حريه شخصيه منال: شوفي حبيبتي .. مجتمعنا دايماً يشوف الأنثى عوره وماادري شو ولازم تتستر وغيره .. وشوي شوي يحبسون الأنثى ف البيت عشان الدين .. ودايماً الوحدة لما تطلع مع ابوها او اخوها دايماً يقولون نفس الشيء غطي شعرج غطي ويهج وما ادري شو.. أحسهم معقدين .. لازم يعرفون شو يعني حريه شخصيه حصه: وشو هي حريه شخصيه منال: الحريه الشخصيه هي .. تكلمين الي تبينه تطلعين تردين الوقت الي تبينه بدون محد يقولج شيء او يحاسبج على شيء بالمختصر يعاملون البنت مثل ما يعاملون الولد مب يفرقون بينهم حصة: بس اهلنا يسون جذي عشان نحن ما نطيح ف مشاكل وغيره وتعرفين الحين كثروا عيال الحرام ف اكيد بيخافون علينا وبيحمونا منال: هذا عباره عن سيناريو هم الفوه وعاشوه مثل ما تقولين كذب الكذبه وصدقها .. ولا في زمن ما فيه عيال حرام .. وبعدين الحين الي تتكلمين عنهم لو دخلتي عنزه ولبستيها كيس زباله بيلحقونها ويرقمونها .. يعني ابداً ماله دخل .. تفكيرهم ومعتقداتهم هي الي غلط .. اما نحن البنات لازم ناخذ حريه شخصيه وانا مع كل بنت تغصب اَهلها يعطونها حريه شخصيه شوي لو ان شاء الله بالقو اهم شيء راحتنا حصة: حلو كلامج.. يعجبني الناس الي شخصياتهم قويه وعندهم أسلوب إقناع منال: افا عليج بس .. ف هالزمن لو ما وقفتي بويه الكل ودافعتي عن حقج كلوج اكل حصه: هيه والله ..................................... نقدم الأحداث .. بعد يومين اليده وهي تدخل الغرفه: دوكم انتو حد ينام لين الساعه 2 يلا قوموا .. قوموا بسرعه جود ونجود:.... اليده بطلت الستاير وسكرت المكيف: جوووود .. نجوووود .. قوموا يلا بيأذن العصر وانتن بعدكن نايمات شافت ان ما في فايده منهم راحت يابت ماي بارد وصبته عليهم .. وهم على طول فزوا وكل وحده تشاهق وتكح اليده بعصبيه: قومن يلا بنات اخر زمن يبأذن المغرب الحين شوفت الساعه كم .. حد ينام لين الساعه 4 العصر .. يلا قومن بسرعه لا صلاه ولا عباده .. كفار انتو صرتوا يهود تنامن وقت الصلاة .. شو ها المذهب نجود وهي تشوف الساعه بعين وحده : يدوه يدوووووه ... سااااعه 9 الصبح وتقولين بيأذن العصر .. شو ها الخريط اليده وهي تضربها بالعصا: تكذبيني يا بنت سعيد .. قومي قومي لا اكسر العصا على ظهرج جود: يدووووه شوفوا الساعه تسع كيف صارت 4 العصر ولا الوقت عندج ملخبط مره الظهر ومره العصر ومره المغرب اليده: ساعتكم ساعة كفار .. انا ساعتي ساعة مسلمين اتخبرني وقت الصلاة اما انتو ابد بس جذي زينه لا تنبهكم حق الصلاة ولا شيء نجود: ههههههههههههههههه والله يدوه .. من وين تيبين هالكلام اليده: من مخبأة أبوج .. يعني من وين بيبه هذا الصدق .. قومن لا اخلي العصا اتقومكن الحين هند : السلام عليكم الكل :وعليكم السلام والرحمه هند وهي تبوس راس يدتها: شحالج يدوه اليده: بخير الحمدلله يا بنتي ..هيه هذي البنات الي تقوم من الصبح واتساعد امها مب انتو رقاد لين المغرب جود ونجود:🤦🏻♀️🤦🏻♀️ هند: هههههههههههههه .. يدوه يدي يناديج محتشر اليده: شو يبا هذا بعد .. شوفن انتن انا رايحة عند يدكن ولو ما شفتكن هناك بعد خمس دقايق بتنضربن سمعتونييي؟!!! جود ونجود: ان شاء الله طالعوا بعض ونجود طالعت جود بنظرات وقامت رايحة الحمام (عزكم الله) هند: ما تصالحتوا جود هزت راسها ب لا هند:الله يهديكم يا رب .. يلا قومي ابا امشي شوي الجو يجنن برا .. مغيم ونفاف خفيف جود: شلي نجود انا بقعد مع يدوه هند: لييييش عاد جود: ما فيني امشي الصبح .. الكسل الف هند: اوك برايج طلعت هند وقَعَدت تتريه ف الصاله .. شوي وطلعت نجود وقالتلها هند تطلع معاها عشان يتمشون و وافقت وطلعوا يتمشون ف الحاره ............................................... ف مدرسة البنات ... كانوا شاردين من الحصة ويحوطون ف المدرسه حصة: اقولج خلاص خلينا نرد .. اخاف المس تودي اسمائنا عند الاداره منال: بطرش وحده من البنات عشان تودي الاسماء .. اذا شفنا بنت طالعه وعندها ورقة الاسماء بناخذ الورقه عنها حصه: واذا المس بروحها ودت الاسماء منال: عادي خل تودي يعني الاداره شو بيسون غير يكتبونا تعهد وإنذارات حصة: لا انا ما فيني على الإنذار وغيره ابوي لو درا بيدفني وانا حيه منال:وكيف بيعرف ان شاء الله لا تصيرين غبيه ركزي شوي حصه: انزين انزين ............................................. عند دانه ... كانت تتجهز عشان الموعد لان بيبدلون لها الجبس .. دخل حمد عليها وشافها توها تلبس عبايتها حمد: انتي بعدج ما خلصتي .. الموعد بيروح وانتي بعدج ما لفيتي الشيله دانه: يعني شو تباني اسوي تراني معتمده على ايد وحده ما اقدر احرك الثانيه اكيد بلاقي صعوبه حمد متعمد ينرفزها: طول هالوقت شو تسوين اصلاً .. مفروض تكونين لابسه العبايه ومخلصه دانه بعصبيه: بدال لا تتحلطم شرات العيايز تعال ساعدني .. لبسني العباه على الاقل حمد وهو يرفع ايده: ما اعرف شيء بسوالف الحريم طالعته دانه بنظره وهو طلع عشان يسويلهم كوفي .. شوي ودقت عليه نوره حمد: الو نوره: ها شو قالوا لها حمد: نوره ترا هذي سابع مره تتصلين تسألين نفس السؤال نوره: قاعده احاتيها حمد: تحاتين شو بيبدلون جبس مب عمليه نوره: انزين جان شليتني معاك .. عشان اتطمن حمد: وين اشلج انتي بعد رايحين ملاهي نحن .. يلا بندي بسويلي كوفي نوره: انزين حمد امانه يوم بتخلصون طمني عليها حمد: ان شاء الله ان شاء الله بس انتي بندي خلصينا نوره: مع السلامه سكر من نوره وتم يسوي الكوفي بعد ما خلص طلع لهم أكواب الكوفي ويا يبا يحطهم بس سمع صوت شيء يطيح وصرخت دانه .. ركض بسرعه صوب الغرفه حمد: داااااانههههه دانه وهي تقعد على الشبريه : خلاص ما ابا اروح الموعد تعبت حمد: لازم تروحين عشان يشوفون ايدج دانه وعيونها متروسة دموع: قتلك تعال ساعدني وما يت .. شوف الحين كل شيء طاح حمد: ياج شيء دانه: لا ما ياني شيء وغطت عيونها بايدها الي ما فيها شيء وتمت اتصيح .. حمد قعد عندها وحضنها وتم يهديها حمد: بس خلاص ما صار شيء .. انا رحت عشان اسويلنا كوفي وبعدين كنت ناوي اساعدج دانه تصيح:.... حمد: انزين خلاص خلاص .. انا اسف حقج عليّ دانه وهي تبعده عنها: قوم عني قوم .. خلاص اطلع برا ما ابا منك شيء حمد يحاول يخفي ابتسامته: شفيج قلبتي فجأة دانه عطته نظره وراحت صوب المرايه وخذت الكحال وتمت اتكحل عيونها وهي متجاهله حمد .. راح حمد واتساند على المرايه وتم يطالعها ويبتسم .. دانه ارتبكت وما عرفت كيف تتكحل دانه: شو تبا قاعد اتطالعني جذي حمد: أتأمل جمالج دانه بحيا بس ما بينته: قوم قوم عني .. ابا اخلص حمد ابتسم اكثر وربع ايده وتم يطالعها دانه دزت ويهه بعيد عنه وما انتبهت لقلم الكحل الي دخل ف عين حمد حمد حط ايده على عينه: اااااااااااااااااااااااخخخخخخخخ دانه بخوف: حمد .. اسفه اسفه ما انتبهت للكحال الي ف ايدي حمد: انتي اصلاً متعمده تبين تعميني عشان تنتقمين لاني ما ساعدتج دانه وهي تنزل ايده: لا والله ما كان قصدي ... اشوف عينك حمد نزل ايده وكانت عيونه حمره وأدمع دانه يوم شافت جذي راحت يابت كمادات ثلج وحطته على عينه .. كانت تحط الكمادات وشوي تشلهم وتنفخ ف عينه حمد باسها على راسها: فديت القزمه الي ما توصل .. حتى وهي لابسه كعب دانه: يوم انت عملاق وين تباني أوصلك حمد: بس تبقين ملكة جمال بنظري دانه ابتسمت و خازت عنه حمد مسك ايدها: يلا تأخرنا على الموعد شلوا الكوفي وطلعوا من البيت وطيران على المستشفى ............................................. ف بيت اليد ... من بعد المشي الي مشوه ردوا البيت نجود: سيارة منو هذي الي عند الباب هند: ما ادري اول مره اشوفه نجود: ما علينا .. هند تعالي ندخل من السكه وأنروح البيت المهجور الي ورا بيتنا هند: تستهبلين شو تبين اتسوين هناك نجود: فيني فضول ابا اشوف شكل البيت كيف هند : لا ما فيني الصراحه ابا ارد اكل لي شيء نجود: افففففف لاحقه على الاكل خلينا انروح هند: لا .. اذا تبين بنخطف من عند البيت وبعدن بنرد اما ان ندخل البيت مستحيل نجود : اوك موافقه دخلوا هند ونجود من السكه و راحوا البيت المهجور تموا يطالعون البيت من برا ونجود كل شوي تتجدم تبا تشوف البيت من داخل هند: نجود يويلج لو دخلتي البيت ما تسمعين صوت الجلب نجود: في جلب داخل .. امانه ابا اشوفه هند: نجود لا والله يويلج نجود دخلت وهند واقفه عن الباب و تزقرها .. شوي وطلعت نجود وهي تركض واتصارخ و وراها جلب ضخم لونه ابيض ينابح وراها وهند يوم شافت نجود تركض ركضت معاها ... تموا يركضون وهند خلاص تحس شوي وبتطيح ونجود الأفكار المرعبه كله يت ف مخها وصلوا بيت اليد لانه الأقرب ومن حظهم الباب كان مفتوح .. دخلوا البيت وكانوا قاعدين ف الحوش نجود: سكروا الباب سكروا الباب وليد: شفيكم ت.. ما كمل جملته الا والكلب داخل البيت وينابح .. سحب وليد الكرسي لانه او شيء طاحت عينه عليه وخلاه بينه وبين الكلب .. خذ قطعة خشب موجوده وفرها بعيد عشان يلهي الجلب بس ما شيء فايده الكلب كل ماله ويتقدم .. تم وليد يصارخ عليه عشان يطلع والكلب يزيد نباحه لين اخر شيء شاف ان ماشيء فايده وطلع و وليد سكر الباب وقفله عدل اليد: وين كنتوا انتو كيف لحقكم الجلب؟!! كانت نجود اتصيح و تتنفس بصعوبه اما هند ف كانت متسانده على اليدار ومنهد حيلها جود وهي تحضن نجود: صارلج شيء سوالج شيء نجود اتصيح :... وليد وهو يبعد جود عن نجود: بعدي عنها شوي لازم تتنفس .. روحي يبي ماي جود عطته الماي الي موجود و وليد شله وتم يرشه على ويهها ويشربها شوي اليد: خلوها تقعد .. ولا ترتاح داخل وليد تم يشوف ايدينها و ريولها عشان اذا انجرحت او صار فيها شيء جود: نجود تعالي معاي بنسير داخل وليد: بوديها المستشفى عشان يفحصونها عدل نجود سحبت ايدها من وليد و دخلت داخل هند:" هذي ثاني مره اتصير معاي .. ليش دايماً الكلاب يلحقوني انا .. صرت اخاف منهم من كثر ما يلحقوني .. محتاجه سكر .. ابا اي شيء فيه سكر .. ابا أتحرك اروح ايبلي بس ما اقدر .. ريولي ما احس فيها ما ادري ليش .. احاول اخلي حد ينتبه عليّ بس كلهم مشغولين ب نجود .. يلا ما عليه بخدم نفسي بنفسي حتى لو ما احس بريولي بحاول .. مشيت شوي وحسيت الدنيا ادور فيني .. اخر شيء سمعته صوت وليد يناديني .. وبعدها ما ادري شو صار " ✖️✖️✖️✖️✖️✖️✖️✖️✖️✖️✖️✖️✖️ توقعاتكم يالحلوين💗💫؟!
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
