أحتجتلك يا أطيب بشر وين ألاقيك؟؟

54

عند محمد ونوره ...
وصلوا دبي بالتحديد البحر .. نزلت نوره ونزل معاها محمد وقعدوا قدام البحر بصمت وكل واحد فيهم ابحر بافكاره وقادها مثل ما يبا ......
بعد مده من الصمت
نوره: وصتني على ذياب قبل لا تدخل الغيبوبه .. قالت انتبهي عليه وديري بالج عليه .. اتذكر يومها اني عصبت عليها عشان اتشل فكرة الموت من راسها بس ما شيء فايده كانت وايد هاديه وتتكلم بثقه
محمد سحب راسها وحطه على كتفه ومسك ايدها: نوره.. تعرفين ان بين يوم وليله يمكن يصير شيء نحن ما توقعناه او على اشخاص نحن ما توقعناهم .. هذا كله قضاء وقدر .. محد يقدر يغيره ولا يعترض على امر الله كتبه
نوره: الكل يقول انه هند ما كان فيها شيء .. هذا الدليل ان محد كان منتبه لها .. كانت تعبانه ودوم مرهقه وتحس بتعب وغيره حتى مره شكيت انها اعراض حمل
محمد: ادعي لها ان الله يقومها بالسلامه ويشفيها يا رب
نوره: امين .. خلاص خلنا نروح
محمد: ارتحتي
نوره هزت راسها بهيه
ركبوا السياره وتحرك محمد متوجه صوب العين دقايق
نوره: محمد وقف عند الشيشه
محمد: شفيج
نوره وهي حاطها ايدها عند حلجها: محمد بسرعه برجع
من حسن حظهم انهم كانوا قريبين من الشيشه و وقف محمد ونوره نزلت بسرعه ودخلت الحمام( تكرمون) شوي وطلعت وركبت السياره
محمد: شو تحسين الحين
نوره: احس بدوخه وجسمي يعورني
محمد: بوديج المستشفى
حرك السياره واتوجه صوب المستشفى ولين وصل المستشفى نوره كان مغمي عليها .. شلها ودخلها الطواري وقعد يتريا لين يطلع حد ويطمنه
.......................................
بيت ابو حمود
حامد بعصبيه: نحن مب يهال عشان نمشي على كيفه
ام حمود: حامد خلاص سو الي هو يباه ليش تخلونه يمد ايده عليكم يعني
حامد: مب رايح مكان
ام حمود : حامد الله يخليك ما ابا مشاكل .. تعال سلم على يدتك وبعدها اطلع المكان الي تباه
حامد : بس عشانج .. ولا انا مستحيل امشي على نظامه واسوي اي شيء يباه
ام حمود حطت ايدها على حلجه: اسكت قبل لا يسمعك خلاص خلك ساكت
شوي وطلع ابو حمود: يلا عشان اوصلكم
حامد: انا بوصلهم .. عشان انت ما تتأخر في الخط
ابو حمود: انزين ..روحوا يلا
طلعوا ام حمود وحامد وحمدان وركبوا السياره وحركوا
حمدان: حامد اذا بتطلع بي معاك ما اريد اقعد هناك
ام حمود: وين تبا تروح يعني
حمدان: مستحيل اقعد ف مكان كله بنات .. وهناك اصلاً اغلبهم بنات ما ابا اقعد عندهم
ام حمود تنهدت: سو الي تبون تسوونه
حامد لف يطالع اخوه وبعدها كمل سواقته متوجه لبيت يدته
.........................................
ف المستشفى عند ذياب كان قاعد عند وحده من الكراسي الي مقابل العنايه المركزه كالعاده .. ينتظر ف اي لحظه اي الدكتور ويقوله هند قامت من الغيبوبه ..
طلع من الاصنصير و شافه قاعد ومنزل راسه راح عنده وحط ايده على كتفه
فهد: لين متى بتم على هذا الحال
ذياب: لين تقوم
فهد: ذياب الدوام عطوك انذار اخير اذا ما داومت بيفصلونك
ذياب: ما يهمني الدوام اهم شيء هند اتقوم بالسلامه
فهد: ذياب اسمعني .. انت روح الدوام والفتره الي بتكون مداوم فيها انا بقعد عند هند لين ترد انت
ذياب تم يفكر
فهد: ذياب هند اختي واكيد اني بحرسها مثل ما تحرسها انت .. بس اهم شيء انهم ما يفصلونك من  شغلك
ذياب: لا تقعد عندها انت .. انا بداوم وبخليهم يحطون حرس عندها .. اخاف حد يدخل ويسوي فيها شيء
فهد: بعد فكره حلوه
ذياب: بس الحين اقعد عندها لين اطرش الحرس .. لا تروح الا اذا شفتهم واقفين عند باب غرفتها
فهد: ان شاء الله
....................................
ف قسم حمد ودانه .. كانت قاعده ف الصاله تلعب مع قطاوها .. شوي وطلع حمد وشافها
حمد:شكلي بشل هالقطاو وبفرهم ف الشارع
دانه حضنتهم: حرام عليك .. ليييش
حمد: اتجابلينهم اكثر مني
دانه: ههههههههه .. تغار من القطاو بعد
حمد:تعالي خلاص خليهم ف حالهم
دانه: بس شوي
حمد: لا
دانه بطفوليه: حمدد خلني شوي
حمد تقدم صوبها بس وقفه صوت الباب .. فتحه وكانت اخته ميره
ميره: بتوديني باسكن ولا غيرت رايك
حمد: بوديج يلا روحي تلبسي
ميره: مب لازم لانك انت الي بتنزل
حمد: لا باخذ باسكن بعدين بنحوط
ميره: حرمتك بتي ولا
حمد: هي اكيد بتي عيل وين اخليها
ميره: بروح اتلبس
حمد: يلا قومي بنطلع
دانه: اوك
...................................
عند محمد ونوره .. ف السياره توهم طالعين من المستشفى ومحمد معصب من نوره الف
نوره: محمد ا..
محمد قاطعها: اششش
نوره: انزين خلني ات..
محمد: ما ابا اسمع صوتج
نوره سكتت عنه لين وصلوا المطعم وسكر السياره ونزل
نوره تمت قاعده ف السياره وما نزلت .. يا صوبها وفتح الباب بعصبيه
محمد: شو تترين
نوره: ما اقدر انزل
محمد: يعني تبيني اشلج مثلاً
نوره تمت ساكته
محمد: نزلي بسرعه
نوره:..
محمد سحبها ونزلها من السياره وسحبها لداخل المطعم وقعدها على الطاوله
نوره: ابا ارد البيت
محمد : ما شيء
نوره عقدت حوايبها: كيف يع..
محمد ببرود: جب.. قولي شو تبين تاكلين
نوره لفت ويهها: ما ابا شيء
محمد قام وراح عنها
نوره" اف افففف اففففف .. يصير كريه اذا عصب .. اااه بقولكم شو السالفه .. طبعاً انا تعبت و وداني المستشفى قالوله انه سوء تغذيه وفي بعض الفيتامينات عندي ناقصه وهذا بيأثر على جنين اذا مب الحين مستقبلاً وانه ممكن يسبب في اجهاضه اذا استمريت على الحاله هذي .. وسألته الدكتوره كم مره حسيت بالغثيان والدوخة هو قالها بس اليوم بس انا ما ادري شو الي خلاني اقول من اربع ايام وقتها عصب عليّ ولا يبا يسمع صوتي .. صدقوني مب بيدي حزني على هند وحالتها مانعتني اسوي اي شيء وناسيه الي ف بطني بعد .. والحين يابني المطعم عشان اكل والله يعين بعد شو بيسوي فيني لان الدكتوره طلعت معاه برا وكلمته .. اممم تصدقون اني حتى ما اعرف شو نوع المطعم ولا حتى قريت اسمه من التعب ابا ارتاح بس وين الي عنده ريل مثل محمد وين بيرتاح .... احم توه يا .. و اونه بعد مطنشني واخاف اذا تكلمت يقول شيء ولا يسكتني .. نص ساعه وبدوا يحطون الاكل على الطاوله وشكله محمد طلب المنيو كله ويباني اكل والحبيب منوع من كل مطبخ طالب شيء .. التركي والشامي والهندي والايطالي .. اااه ياربي ما ادري شو الي ناوي عليه"
محمد: كلي
نوره: وانت ما تبا تاكل .. وايد عليّ هذا كله
محمد: باكل بس انتي كلي
نوره" بديت اكل الصراحه لاني يعت .. المطعم هذا لو كنتوا شبعانين من اتشوفون الاكل بتيوعون .. تميت اكل ومحمد ياكل .. لاني حسيت اني خلاص بنفجر من الاكل .. رديت ظهري ورا بارتياح وقلت الحمدلله .. بس وين الراحة ومحمد ريلي .. اهئ اهئ تخيلوا قالي ما كليتي شيء كل هذا ويقول ما كليتي شيء "
نوره: خلاص محمد ما اقدر اكل بعد شبعت
محمد طنشها وقعد ياكل ويوم خلص زقرهم عشان يشلون الصحون ويوم خلصوا طلعوا وطلع هو وراهم .. دقايق ورد و فايده كوبين ايسكريم وف كل كوب منوع ف الايسكريم
محمد: خذي حلي
نوره: خلاص خلنا نروح السياره تعبت من القعده ابا ارد البيت اريح
تم يطالعها ثواني وبعدها قام: يلا قومي انزين
قامت نوره وخذت ايسكريمها وطلعت ورا محمد وركبوا السياره وانطلقوا
...............................................
ف بيت ام عمر ( اهل ام حمود) .. كانوا متجمعين ف الصاله ويسولفون وحمدان كاره عمره بينهم .. شوي وطلعت حلا
حلا بدلع: السلام عليكم
الكل: وعليكم السلام
سلمت على الكل ويوم وصلت عند حمدان: اوووه حمدون موجود بعد
حمدان تم يطالعها
حلا باسته على خده: ما شاء الله بعدك على جمالك .. صاير حليو
حمدان مسح خده بعصبيه وطلع برا
حلا انصدمت: شفيه
ام حمود: يعني ما تعرفينه ما يحب البنات
حلا: انزين ولين متى هالعقده الي فيه .. خلاص المفروض الحين يعيش حياته باجر بيكون على وجه زواج شو بيسوي
ام حمود: يصير خير لذاك الوقت
حامد: يلا امايه انا استأذن
اليده صالحه: ليش مستعيلين
حامد: يدوه شوي بطلع حمدان لانه معصب وبني الفليل
اليده صالحه: تعالوا من وقت عشان تتعشون
حامد: ان شاء الله
اليده صالحة: محمد ونوره وينهم
ام حمود: محمد طلع مع نوره لانها تعبانه شوي .. حرمت اخوها ذياب تعبانه و فغيبوبه ونوره كانت قريبه منها وايد
اليده صالحه: الله يشفيها ويقومها بالسلامه يارب .. خليها تي عندنا تغير جو شوي
ام حمود: كلمة محمد وقال بيشوف
بخيته: حبوبه نوره وايد .. ما الومه ولدج يوم يباها قدامه 24 ساعه
ام حمود: ههههههههههه عاد ف هذي صدقتي
................................................
ف بيت وليد .. كانوا التوام قاعدين ف الصاله ويطالعون تلفزيون .. ونجود كانت حاطه راسها على ريل جود .. وجود تلعب بشعر نجود
جود: بتيين عند يدوه
نجود: ما فيني اطلع من البيت
جود: ابا اروح اطمن عليها وبعدين بطمن على نوره وبعدها عمو مزنه( ام هند)
نجود: ما اقدر اروح هناك .. بتذكر هند
جود: قومي خلينا نروح عندها لازم نطمن عليها .. ترا ما عندها حد
نجود تنهدت: انزين
قاموا وكل وحده لبست شيلتها  وطلعوا وراحوا عند اليده واطمنوا عليها بعدها راحوا بيت ابو حمود تموا يدقون الباب بس محد بطل الباب
نجود بتعب: خلاص جود يمكن ما في حد
جود: كيف ما في حد .. نوره صار لها اسبوع ما طلعت من غرفتها
نجود: يمكن اليوم طلعت انزين
جود: لا لا ما اعتقد .. اتري ال..
قاطعها سيارة حامد الي وقفت عند الباب ونزل منها ونزل حمدان وهو معصب ودخل داخل
حامد: السلام عليكم
جود ونجود: عليكم السلام
جود: نوره موجوده
حامد: نوره طلعت الظهر مع محمد كانت تعبانه وطلعها عشان ترتاح شوي
جود:خلاص بنتصل فيها
وبعدها مشوا متوجهين بيت ام فارس
نجود: غريبه ما قالج شيء ولا قلتي له شيء
جود: شيء مثل شنو يعني
نجود: هو يحبج وانتي تحبينه شو تتوقعين الشيء الي بتقولونه لبعض
جود: غلطانه انا ما احبه ولا هو يحبني الي كان بينا اعجاب مجرد اعجاب
نجود: وشو الي تغير
جود:انتي تدرين من البدايه اني مستحيل اتزوج واحد من عيال عمي احمد والسبب عمي احمد طبعاً .. ما ابا اذوق الويل مثل ما ذقته مع ابوي معني كنت متحمله بس عمي احمد ما اتوقع اني بقدر اتحمله
نجود" اويلي عليج يا توامي ثرج ما تدرين ان نسخة ابوي عندنا بالبيت بس المصيبه ان يلعب لعبته تحت الطاوله"
جود دقت الباب وشوي وطلعت الخدامه ودخلتهم الصاله
جود ونجود: السلام عليكم
ام فارس: وعليكم السلام والرحمة .. حياكم يا بنات تعالوا قعدوا
جود: شحالج عموه
ام فارس: شو تتوقعين بيكون حالي وبنتي ف المستشفى بين الحيا والموت
نجود: الله يقومها بالسلامه يا رب
جود: عموه اهل البيت وينهم .. اشوفه فاضي ومحد معاج
ام فارس: فارس ف دوامه .. اميره عند اهلها لان فترة ولادتها قربت<< كيفي 😂😂 ... وفهد طلع ما ادري وين راح .. وفيصل بعده ما رجع من الخدمه يمكن يرجع باجر
نجود: خبرتوه عن حالة هند
ام فارس: ما يدري .. فهد قال لحد يقوله عن شيء لين يرد
جود: هيه احسن عشان ما يتوتر ولا يسوي شيء ويخليهم يحجزونه هناك
ام فارس: الله يستر يوم بيعرف شو بيسوي .. صح هو هادي بس ورا هدوئه هذا بركان
جود: انزين عموه نحن نستأذن .. بنرد البيت عشان نتصل ف نوره نتطمن عليها بعد
ام فارس: زين بس تعالوا لي بعدين لا تخلوني بروحي
نجود: من عيوني .. بي بقعد عندج وبسهر ويمكن انام بعد
ام فارس: ههههه حياج حبيبتي بزهب لج غرفة هند
نجود: ترا اتكلم جد
ام فارس: وانا بعد اتكلم جد
طلعوا جود ونجود وصادفوا ف طريقهم فهد
جود ونجود: السلام عليكم
فهد: عليكم السلام والرحمه .. ها اشوف اليوم عندنا
جود: ينا نتطمن على عموه شوي
فهد: زين تسوون .. امايه ف الفتره هذي تحتاج من يواسيها
جود: ولا يهمك نحن موجودين
فهد: ما تقصرون هذا من طيب اصلكم
جود: يلا عيل نستأذن
فهد: الله معاكم
طلعت جود ويت نجود تبا تطلع بس فهد مسك ايدها وسحبها ف زاويه
نجود: شو تبا ساحبني هني
فهد: شفيج
نجود: ما فيني شيء
فهد رفع راسها: عيونج تقول العكس
نجود تنهدت: شحالها
فهد: على نفس الحال .. ما في تطور
نجود:و شو بتسوي مع و..
قاطعها فهد: اشششش ما ابا حد يعرف عن السالفه هذي
نجود: بس ما يصير تسكت عنه وهند بين الحيا والموت وانت تعرف انه هو السبب
فهد: ما عندي دليل .. ما اقدر اواجهه بدون دليل افهميني
نجود: انا بيبلك الدليل
فهد: ما تقدرين .. اخوج شخص وايد حذر مستحيل يخلي ادله مهمه ف اي مكان
نجود ضربته على صدره: لا تقول اخوي هذا مب اخوي .. انا ما عندي اخوان ما عندي غير جود وبس
فهد: ما تقدرين تخفين الحقيقه هذي والواقع عكس الي تبينه .. ف تقبليه
نجود: ليش دايماً تحب تغثني
فهد: مب قصدي اغثج بس انا ارجعج للواقع
نجود:اففففف ما في فايده منك
فهد همس لها: على فكره صايره حلوه اليوم
نجود بعفويه: مب احلى عنك
حطت ايدها على حلجها بصدمه وخجل من الي قالته .. فهد ابتسم وتقرب منه
فهد: صدق عاد
نجود: بالغلط قلته والله العظيم
فهد: ههههههههههه
نجود: اففف يارب تنسى يارب تنسى
فهد : انا ما انسى الا اذا سويت شيء واحد
نجود. شو
فهد تقرب منها وباسها على خدها برقى
نجود دزته وعقدت حوايبها: مب كانك وايد ماخذ راحتك هالايام
فهد: واقفه قدامي وما تبيني اسويلج شيء بعد
نجود فهمت عليه: انا اروح بيتنا وايد ابرك من حركاتك الغبيه
وعطته ظهرها وركضت وهو ابتسم ودخل يسولف مع امه
..........................................
توقعاتكم؟!!