أحتجتلك يا أطيب بشر وين ألاقيك؟؟

5

العصر من بعد الغدا كل واحد رد بيته .. الي حط راسه ورقد .. والي قاعد يطالع التلفزيون .. والي قاعد يشرب قهوه ويحلي .. ف بيت ابو خليفه وبالتحديد غرفة خولة .. كانت قاعده هيه وخلود ( حرمة خليفه) يسولفون وفجأة دخلوا عليهم عيال خوله وقعدوا بهدوء وباين عليهم ًالخوف
خوله: شفيكم جذي دخلتوا
سلطان : ما فينا شيء
خلود: يبين من أشكالكم انكم مسوين مصيبه
خوله: تكلموا شو مسوين .. بنات عمكم وين ؟؟!
سلطان: راحوا عند عمي خليفه
خلود: انا بروح اشوف البنات اكيد مسوين شيء
خوله: تعالي قعدي وين سايره .. حصوه عندهم هي بتشوفهم.. خلينا انسولف
خلود: والله حصه بروحها تبا حد يشوفها مستويه ياهل هالايام
خوله: ما عليه .. هذي فتره تمر فيها كل بنت بعمرها
خلود: ما احيد يوم كنا كبرهم سوينا نفسهم
خوله: نحن زمنا غير عن زمانهم
خلود: هيه والله ص..
قطع عليهم دخول ديمه وهي تلهث
ديمة: ماما .. مااامااا
خلود بخوف: بسم الله الرحمن الرحيم ... شفيج خرعتيني
ديمة: ماما بابا معصب واايد
خلود وخوله قاموا بسرعه وراحوا صوب قسم خليفه .. دخلوا وشافوه ينازع حصه ومعصب الف
خلود وهي تروح عنده: خليفه شفيك .. شو مستوي .. ليش تنازعها
خليفه بصوت عالي: المدرسههه متصلين عليّ اونهه تعال بنتك مسويهه مشاغبه فالصف وترادد الابلوات وغيره وغيره .. واليوم مطرشين معاها ورقة تعهد ويايبتلي اياه اونه وقع
حصه : انزين انا ما سويت شيء غلط .. بس طلعت من الصف أتمشى مليت من حصة الرياضيات وطلعت والابلة تدري اني بروح أتمشى
خوله: وليش تتمشين ان شاء الله فكورنيش انتي .. يا حبيبتي يا حصوه هذا كله ما بيفيدج عندج بريك استمتعي فيه محد بيقولج شيء
حصه: بريكنا قصير ما يكفيني 20 دقيقه .. وبعدين بابا انت مكبر الموضوع .. انا ما سويت شيء غلط يستاهل هالعصبيه كلها
خليفه عصب اكثر من برودها وكلامها ... دخل داخل غرفته وعلى طول لفت عليها خلود
خلود بعصبيه : شو انتي مينونه .. شو هذي المشاكل كلها .. انا مطرشتنج المدرسه عشان اتسوين هذا كله
حصه: شفيج معصبه ترا عادي انا ما رحت قتلت حد
خلود: تأدبي وتكلمي عدل وبعدين انا كم مره قايلتلج لا اتطولين لسانج على حد
حصه قعدت على الكرسي بلا مبالاة: دايماً تقولون نفس الكلام خلاص انا مليت
خوله بعصبيه خفيفه: شو ها القلة الأدب .. انتي دواج ابويا اصلاً .. وبعدين ليش تكلمين ابوج جذي
حصه: لانه دايماً يسوي نفس الشيء ينازع وبعدين يزعل وبعدين اي يتأسف لنا لانه ن..
فجأة نقزت ورا امها يوم شافت ابوها طالع وبيده حزام وما يشوف غيرها هيه ... سحبها خليفه من ورا خلود وطاح فيها ضرب وهي تصارخ واتصيح .. حاولت خوله تسحب حصه بس ما قدرت لان خليفه مب معطي المجال حق حد
خلود وهي تمسك ايده: خلاص خليفه خلها تروح .. انا بكلمها
خليفه: خلود قومي من قدامي.. قومي خلييني اربيهاا عدل
خلود: اخر مره تعديها .. بس خلاص هد أعصابك
خوله وهي تسحب حصه: خليفه خلاص ما نبا مشاكل .. عن يسمعك أبويا وعقب اي هني واتصير سالفه .. خلاص ارحم البنت شوي
خليفه: ما تستاهل حد يرحمها ... " بصوت عالي"  لكن والله العظيم لو سمعت شكوى ثانيه ولا مرادد .. لسانج ها الطويل بقصه لج .. وشوفي شو بسوي فيج
خلود : خلاص خليفه اهدى .. " لفت على بنتها" قومي روحي غرفتج بسرعه يلا
ركضت حصه ودخلت غرفتها وهي تصيح وخوله طلعت من بعد ما سحبت الحزام من خليفه الي دخل الغرفه وهو بعده معصب ... شوي ودخلت خلود وشافته معصب راحت عطته ماي بارد وقعدت عنده .. شرب خليفه الماي دفعه وحده وعطاها القلاص .. خذت منه القلاص وحطته على الطاوله ومسكت ايده وتقربت منه
خليفه: طول عمري احب الطلعات والكشتات وغيره ما كنت حاط فبالي ان بناتي يوم من الايام بيكونون جذي .. كنت مفكر انتي بس تكفين عشان تربينهم .. وان انا دوري اصرف عليهم وأطلعهم وبس .. اليوم اكتشفت وايد اشياء .. اول شيء ان الاشياء الي كنا انسويها قبل صارت معانا الحين .. تنعاد نفس الأحداث ونفس السيناريو .. نفس الكلام الي قالته حصه حقي اليوم انا قلته حق ابوي قبل .. خلود اليوم اكتشفت اني ابو فاشل .. ما عرف يربي بناته .. ما عرف يعلمهم الصح والغلط .. انا ابو فاشل يا خلود .. ابو فاشل يوم بنتي تعلي صوتها عليّ .. ابو فاشل يوم يتصلون عليّ المدرسة ويتشكون على بنتي .. ابو فاشل يوم بنتي ترد من المدرسه وبإيدها ورقة تعهد او إنذار ... ابو فاشل يوم بن...
قاطعته خلود وهي تحط صبعها على حلجه: اشششش... خليفه ليش هذا الكلام الحين .. هذا شيء طبيعي يصير  مع الابو وعياله او الام وعيالها .. لا تغرك الأفلام والمسلسلات ان حياة الاسريه دايماً تكون حلوه وسعيده وما فيها مشاكل ومبنيه على النجاح .. صدقني لولا المشاكل هذي كان محد تعلم ... هذي مجرد فتره وبتعدي .. مب لان عيالنا علو اصواتهم علينا يعني نحن فشله .. مب لان عيالنا كساله يعني نحن فشله .. في اشياء يسويها الياهل عشان انت تهتم فيه اكثر عشان بس يلفت انتباهك
.............................................
بيت ابو فارس كان كل واحد ف غرفته الا هند كانت فالمطبخ اتسوي قهوه حقها وحق اخوها .. دخل عليها فيصل وهو مستغرب
فيصل باستغراب: هندوه حق منو القهوة
هند: حقي
فيصل: وبتشربين ف كوبين؟؟!
هند بابتسامة خوف: ااا .. اا.. لا بس .. هيه .. بنات عمي سعيد بيون عند البيت وسويتلهم قهوه
فيصل: احيدهم توم وانتي حاطه بس قلاصين
هند: الحين بحط القلاص الثالث شفيك .. شو تبا ياي المطبخ
فيصل: كنت ادورج .. مليت من القعده بروحي
هند: لو اني ما بقعد مع البنات كنت بقعد معاك
فيصل: اصلاً انتي هالايام وايد مشغوله عني
هند: يعني شو تباني اسوي اطردهم مثلاً .. المهم انتو متى بتروحون البر
فيصل: بعد صلاة العصر او المغرب
هند: خلاص روح اتزهب عيل عن يروحون عنك بعدين
فيصل: انزين انزين بروح ادري ما تبيني اقعد عندج
راح فيصل غرفته وجهز اغراضه وطلع رايح بيت عمه احمد هناك بيتجمعون الشباب وبعدها بيطلعون .. اما هند راحت عند فهد وقَعَدت معاه تسولف واتصلوا فيها البنات عشان يتجمعون ف بيت عمتهم موزة .. لبست شيلتها وراحت بيت عمتها وقبل لا توصل ... حد سحبها من أيدها و وداها ورا البيوت
هند بصدمه : ذياااااااااااب!!! ... شو تسوي انت وليش يبتني هني
ذياب: اسف بس ما لقيت غير هذي الطريقه عشان اكلمج
هند عقدت حواجبها: كنت تقدر اتكلمني داخل البيت .. مب تسحبني هني .. تخيل حد من عيال عمي خطف وشافنا جذي شو بيفكر ها
ذياب: ما في حد بيمر من هني .. بس بقولج كلمتين وبعدين روحي
هند بعصبيه خفيفه: ولييييش مب قدااام الكل .. ليييش يبتني هنييي .. الكلمتين الي بتقولهم هني كنت تقدر اتقولهم فالبيت قدام ال..
قاطعها ذياب وهو يتقدم اكثر ومسك أيدها: ممكن اتكلم ؟؟ .. هند انا .. انا احبج ومن زمان بس كنت خايف من شغله والحمدلله تأكدت منها .. هند لو طلبت ايدج من اخوج بتوافقين تتزوجيني .. انا قلت ابلغج قبل لا اكلم اخوج عشان ما نحرج بعض
هند: ذياب انا لازم أروح البنات يتريوني فالبيت
ذياب: متى بتردين عليّ
هند: الشور شور اخوي " وركضت راحت بيتهم بدال بيت عمتها "
اما ذياب ابتسم وحط ايده على قلبه وقال بصوت خفيف : فديييييتج يا بعد قلبي انتي
..................................................
عند فارس وأميره كانت قاعده تجهز اغراضه .. وهو ياخذ شور .. طلع من الحمام ( وانتو بكرامه) وشافها تجهز الشنطه راح عندها وحضنها من ورا وهمس ف أذنها: ليش الحلو زعلان ؟؟
لفت عليه أميره: ما فيني شيء .. يلا روح تلبس بعدين تأكد اذا كل أغراضك موجوده ولا لا
كانت يايه تبا تروح بس مسك أيدها ولفها صوبه ورفع راسها : شفيج ... شو الي مزعلنج ؟؟!
أميره: خلاص فارس قتلك ما فيني شيء .. تأكد من أغراضك وإذا في شيء ناقص قولي .. انا بكون ف غرفة هند
بطلت أيدها من ايده وطلعت برا اما فارس استغرب من ردة فعلها .. ومزاجها الي انقلب فجأة .. راح لبس ملابسه واتجهز عشان يطلع مع الشباب .. وتأكد ان كل الأغراض جاهزه وموجوده وبعدها راح غرفة هند
:::::::::::::::::::::::::::::::::::::::::::
ف غرفة هند .. كانت هند ماسكه دفترها وتكتب .. وطرشت قبلها مسج حق البنات انها ما تقدر تروحلهم الا بعد صلاة المغرب .. وقَعَدت تكتب وتكتب لين ما قطع عليها صوت حد يدق الباب .. حطت الدفتر فصندوق وقفلته وحطت المفتاح فالسده وراحت بطلت الباب ..
هند بابتسامه: هلا هلا .. هلا والله بحرمة اخوي الي قامت ما تيني هالايام
أميره حظنت هند وقعدت تصيح .. هند انصدمت اول شيء وبعدين خافت عليها يوم شافتها تصيح وكأن في شيء .. دخلتها داخل الغرفه وسكرت الباب وخلتها تقعد على الكنبات الموجودة ف الغرفه
هند : أميره شفيج حد قالج شيء .. فارس فيه شيء
أميره تصيح:...
هند: أمور تكلمي معاي لا تخليني جذي .. والله قلبي يعورني .. قوليلي شفيج
أميره: .....
هند وهي تمسح على ظهرها : لا حول الله ولا قوة الا بالله  .. خلاص انزين اهدي الحين شوي اهدي
بعد مرور دقايق هدت أميره شوي .. وقامت من حضن هند
هند: شفيج
أميره: هند انا تعبانه .. ما اعرف شفيني ها الايام .. كل مره مزاج و عوار ف ظهري ما اقدر أتحمله و دايماً الصبح أقوم ارجع ومرات تيني حمى وخاصة الفليل ما اقدر أتحملها
هند باستغراب: قولي حق فارس خليه يوديج المستشفى .. مب زين تقعدين جذي
أميره: كنت بقوله اليوم على أساس انروح باجر .. بس ما بيكون موجود .. مشغول مع عيال عمومج .. و دايماً مشغول
هند: قلتي حق امايه ولا
أميره: لا ما قتلها .. ما ابا اقوللها
هند: امممممم .. شرايج باجر انا وياج انروح المستشفى مع الدريول بدون ما حد يدري
أميره: خلاص اوك .. بنروح الصبح
هند: لا تزعلين وتضايقين عمرج .. كل شيء له حل
دخل فارس على اخر جمله بعد ما دق الباب ... شافته أميره ونزلت راسها
هند: هلا فارس .. حياك تفضل
فارس: معلش اختاه .. ياي اشوف الحرمه .. زعلانه علينا شوي .. يينا انراضيها
هند: لا افا عليك تعال تفضل ... تباني اطلع بعد
فارس: لا ما يحتاي ما بسوي شيء خطيرر
هند ضربت فارس على جتفه وضحكت: ههههههههههههههههههههههههههه
فارس ابتسم و قعد قدام أميره على الارض ومسك أيدها وبأسهم
فارس: اسف اذا زعلتج او ضايقتج بدون قصد
أميره: ليش تتأسف .. انا ما فيني شيء
قعد يطالعها فارس شوي وقام: خلاص انزين دام ما فيج شيء انا بروح يلا مع السلامه
يا يبا يروح مسكته أميره من ذراعه وأول ما لف عليها فارس انخشت ف حضنه.. ابتسم فارس وبادلها الحضن  شوي وقامت من حضنه : متى بتروحون
فارس: الحين
أميره: انتبه على نفسك ... ولا تسرع وتلعب بالسياره .. وقبل لا تقعد مكان افحصه زين عن يطلعلك شيء .. وكل عدل لا تطوف ولا وجبه .. خلك عند الفون يمكن أكلمك بعدين.. ولا...
قاطعها فارس وهو يبوسها بين أذنها وخدها وهمس ف أذنها : أحبك وأشتهي قربك وأضحي بالعمر لجلك ولو الناس لاموني أزيدك بوسه في خدك." ورد باسها وسلم على هند وطلع"
اما أميره قعدت كم دقيقه تستوعب حركته .. وبعدين حطت أيدها على عيونها وقعدت على الكنب وهي مستحيه وهند ميتهه ضحك عليها
✖️✖️✖️✖️✖️✖️✖️✖️✖️✖️✖️✖️✖️