أحتجتلك يا أطيب بشر وين ألاقيك؟؟

48

ذياب تقدم صوب حصه:منو هذا
حصه تمت منزله راسها
ذياب بصوت عالي : تكلمييييي!!
حصه : ه ههذا ررر راشد .. ع عع عرف عرفته م من ففتره .. وكك كنت اكك اكل اكلمه و ووو واطلع مم مع معاه .. بس والله عمي ما صار شيء ثاني والله العظيم
خلود بعصبيه: وليس كنت تكذبين عليّ طول الفتره هذي .. عطيتج الثقه واخر شيء جذي اتسوين
حصه وهي تصيح: اسفه امايه والله ما كنت اقصد بس ا..
خلود قاطعته بكف حرق خدها ويت تبا تكمل عليها بس حصه انخشت ورا ذياب
خلود: وين اودي اسفج هذا ها .. وهذا انتي اكبر عيالي وجذي تسوين البقيه شو بيسوون .. ليش دايماً مفشلتني عند الناس .. ف حياتي ما سمعت حد يمدحج ولا يقول عنج كلمه طيبه
ذياب وهو يعطي حصه مفتاح السياره: روحي السياره
هند: ذياب ا..
قاطعها ذياب: روحي معاها
دقايق وركب هو السياره وطلعوا من العزبه .. اما فهد ف تم يتصل ف خليفه ويحاول يعرف مكانه وغيره .. والبقيه كلهم ردوا البيت
.................................
عند ذياب وهند .. وصلوا البيت قبل الكل وذياب قعد مع حصه عشان يسألها
ذياب: سمعيني زين بسألج كم سؤال واباج اتجاوبين بكل صراحه عشان اعرف اتصرف معاج فهمتي؟؟!
حصه هزت راسها بهيه
ذياب: شو اسمه الكامل
حصه: ما اعرف كل الي اعرفه ان اسمه راشد وبس
ذياب: وكيف عرفتيه
حصه: ربيعتي منال هي الي عرفتني اياه على اساس اني اجرب الحب
ذياب: والكلام الي قاله والصور .. صدق ولا؟؟!
حصه: عمي والله العظيم انه يكذب حتى الصور كلها مركبه الشيء الوحيد الي قاله اني كنت اكلمه على الفون وكنت اركب معاه وبس
ذياب: وين كنتوا تروحون يوم كنتي تركبين معاه
حصه: ولا مكان صدقني بس كان يوصلني البيت
ذياب: تقدرين تواجهين ابوج اذا يا وتكلم معاج
حصه مسكت ايده: عمي الله يخليك لا تخليني بروحي ابوي عادي يقتلني صدقني .. ما بيسمع مني والله ما بيسمع .. خلك معاي عمي خلك معاي
ذياب: حصه اذا انتي فعلاً قلتي لي الصدق يعني تقدرين تواجهين ابوج .. تحملي عصبيته واعتبريه عقاب على الي سويتيه معاهم
حصه: عمي لا تخليني معاه بروحي الله يخليك .. خالو كلميه
هند: ذياب لازم حد يكون معاها لا تنسى ان خليفه عصبي ومستحيل يتفاهم معاها
ذياب: غلطتها والمفروض تتحمل
هند: ذياب مب هي الغلطانه وانت تعرف هالشيء .. واعتقد ان لازم نقول حق خليفه الي قاعد يصير
ذياب: يصير خير
....................................
عند نوره ومحمد .. كان قاعد ف الغرفه يطالع تلفزيون اما نوره كانت ف المطبخ وقاعده تاكل كيك .. شوي ودخل حمدان وشافها
حمدان: نوره؟!!
نوره: هلا حمدان حياك
حمدان: نوره مشكوره لانج وقفتي وياي اليوم .. وعرضتي حياتج وحياة جنينج بخطر عشان بس اتدافعين عني
نوره: افا عليك حمدان انت اخوي الصغير ولازم اوقف معاك .. وبعدين بيني وبينك خالي لازم الواحد يقعد معاه ويكلمه ويقوله الكلام الي قتله اياه
حمدان: ابوي جذي .. ما بيتغير لو شو ما قلتيله .. ما منه فايده
نوره: بس ما يصير تسكتون عن حقكم .. يعني صح هو ابوكم بس ب..
قاطعها حمدان: غيري السالفه انا ما احب اتكلم عنه او اسمع سيرته .. مرده بياخذ جزاه سواء كان ف الدنيا ولا ف الاخره .. ونحن عياله وهو ابونا واجب علينا انه نطيعه ونبره هذا امر الله ورسوله ما نقدر نعصيه عشان غلط هو يرتكبه
نوره تمت اتطالعه
حمدان: تقدرين تسويلي اكل ولا
نوره: شو تبا تاكل
حمدان: امممم سويلي اندومي
نوره: ما تعرف تسويه
حمدان: لا.. قبل كانت خدامتنا تسويه بس يوم ابوي سفرها.. امي تسويلي اياه اذا سهرت معاي بس
نوره: خلاص الحين بسويلك
حمدان: تدرين اول مره اوقف مع بنت واسولف معاها جذي
نوره ابتسمت له: يمكن لاني دافعت عنك اليوم
حمدان: تبين الصراحه صح كلامج .. بس ترا يوم اتزوجتي محمد كنت اعتبرج حرمته وبس .. حتى كنت استحي اتكلم معاج واخذ واعطي نفس الحين .. بس اليوم تغير كل شيء الحين انا اعتبرج اختي
نوره: ا..
قاطعها دخول محمد: انتي ما شبعتي من الاكل
نوره: لا حول ولا قوة الا بالله انت ليش طلعت روح داخل وارقد باجر دوامك
محمد: شو هالطرده المحترمه
نوره: حمدان تحب السبايسي ولا
حمدان: هيه عادي
محمد: تبيني اساعدج
نوره: لا شكراً
محمد: غريبه اليوم مب لابسه كعب
نوره طالعته بنظره
محمد: خلاص خلاص بسكت
تمت نوره اتسوي الاندومي حق حمدان ويوم خلصت حطته ف صحن وزينته له وسوت له عصير وعطته
نوره: بالعافيه
حمدان: الله يعافيج .. شكراً
نوره: العفو
محمد: انزين وانا بعد يوعان
نوره:كل مع حمدان
محمد: ما احب هذا .. اممم سويلي بيض
طلعت نوره بيض وتمت اتسوي لمحمد ولايعه جبدها من ريحته بس متحمله عشان محمد ويوم خلصت حطته حق محمد وطلعت على الطول من المطبخ وراحت تتسبح وبعدها طلعت ورشت عطر وشوي ودخل محمد
محمد: ما تبين تتعشين
نوره: لا كليت كيك
محمد: الحين هذا عشى
نوره: ما لي نفس اكل شيء .. كان ف خاطري كيك وكليته وخلاص احس اني شبعانه
محمد: انزين ..باجر واعيني الساعه 6 لازم اروح الدوام قبل ابوي لاني لازم اجهز الاوراق و الملفات عندنا اجتماع
نوره: انزين
.....................................
ف غرفة حمد .. كانت دانه قاعده وماسكه فونها وسرحانه .. انتبه عليها حمد
حمد: دانه .. دااانهه شفيج سرحانه
دانه: ما فيني شيء
حمد: شو سويتي ف الموعد اليوم
دانه: ما شيء سوولي فحوصات و عطوني دوا الحديد وفيتامينات
حمد:لازم تهتمين بصحتج اكثر
دانه: هذا الي قاعده اسويه انزين
حمد: ب.....
قاطعه صوت تلفون دانه وهو يرن .. دانه شافت المتصل وسكرت ورد اتصل اكثر عن مره وسكرت
حمد: ليش ما تردين
دانه: ما اعرف منو هذا .. رقم غريب
حمد: هاتي انا برد عليه
دانه: لا برايه اذا رديت بيقعد يدق مره ثانيه
حمد: بالعكس اذا ما رديتي عليه بيقعد يتصل فيج طول الوقت
شوي و وصل لدانه رساله قرتها وبعدها على طول ياها اتصال وردت
دانه: الو
الزعيم: زين يوم انج رديتي .. ولا كان ابوج بينقتل
دانه:....
الزعيم: مهمتج الاولى خلصت .. وصراحةً تمثيلج على نوره اقنعني بصراحة بشوف الحين محمد شو بيسوي .. المهم مثل ما قتلج حمد ما اباه يعرف عن شيء ولو عرف رصاصتين وبتنهي حياة ابوج وحياتج انتي بعد .. والشيء الثالث الي ابا اقوله مهمتج اليديده هي .. اباج تاخذين ابر هند وتبدلينهم بأبر ثانيه بتوصلج باجر
دانه: شووو؟!! .. لا لا ما اقدر
الزعيم: ابوج ولا هند .. اختاري منو الي تبينه يعيش انتي حره.. سوي الي قتلج عنه بأي طريقه بس ما ابا هند تاخذ ابرتها باجر سمعتيني
دانه: اوك اوك .. بحاول
الزعيم: شاطره ههههههههههههه
حمد: منو؟؟!
دانه: ااا .. هذي .. هيه هذي ربيعتي تباني اطلع معاها ورفضت
حمد: انزين .. انا بطلع الحين مع ربعي ويمكن اتأخر
دانه: اوك
..................................
ف بيت سعيد .. كانت نجود مروقه على الاخر .. ف راحت اونها تسوي تنظيف بشره وحطت ماسك وطلعت المطبخ تشرب ماي .. شوي وسمعت صوت ف الصاله راحت صوب الصاله وشافت وليد قاعد يتعبث بالتلفزيون
نجود بصوت عالي: شو تسويييي
وليد نقز وضرب راسه ف حافة التلفزيون
نجود: هههههههههههههههههههه
وليد لف عليها : شو ان... اعوذ بالله من الشيطان الرجيم
نجود: شو شايف جني
وليد: انا شايف رئيسهم مب الجني بروحه
نجود: لا والله
وليد: شو حاطه ف ويهج انتي
نجود: شو تشوف يعني حاطه ماسك
وليد: ماسك اسود !!!!
نجود: اففففففف لا برتقالي يعني شو تشوف المهم جود وين
وليد: عند قوم يدوه
نجود: هىىىىئ وليش تروح بدوني
وليد: انتي كنتي ف الحمام
نجود: جان تريت عاد
وليد: تفاهمي معاها بروحج بعدين
نجود: مب متفيقه بروح اجابل بشرتي يمكن باجر انخطب
وليد: الحمدلله والشكر
......................................
ف بيت ابو خليفه .. كان خليفه ياي معصب من برا وعلى طول دخل غرفة البنات وسحب حصه وطاح فيها ضرب وهدى وديمه طلعوا من الغرفه وراحوا عند امهم الي طلعت على صريخ حصه
خلود وهي تمسك ايد خليفه: خليفه خلاص خل البنت خلاااص
خليفه بصوت عالي وهو يضرب حصه: بتنقتل اليوم يعني بتنقتل .. انا ما برتاح الا اذا ماتت
خلود طلعت من قسمها وهي تركض وراحت قسم ذياب وتمت اتدق الباب لين طلع لها ذياب
ذياب: خلود .. شفيج
خلود وهي تصيح: ذياب تعال شوف اخوك بيقتل بنتي بيقتلها
ذياب ركض صوب قسم خليفه وطلعت هند وخلود وراحوا القسم
ذياب وهو يسحب خليفه: خليفه شو تسوي انت
خليفه وهو يتنفس بصعوبه: خلني بقتلها وارتاح لازم تموت
ذياب: خليفه مب كل شيء ينحل بالضرب والصريخ اقعد معاها واسمع شو بتقولك
خليفه:ما ابا اسمع منها شيء .. من اليوم ورايح ما شيء ايباد ولا لابتوب ولا تلفون .. حتى المدرسه بحرمج منها اقعدي ف الغرفه هذي وما بتطلعين منها بعد سمعتيني
ذياب وهو يسحب خليفه برا الغرفه: تعال معاي تعال وبقولك كل شيء
خليفه: خلني بعلمها الادب
ذياب: ما عليه اسمع الي بقولك عليه وبعدين سو الي تباه
طلعوا خليفه وذياب وهند راحت عند حصه وحضنتها وحصه تمت تصيح بصوت عالي
خلود: انا شو سويت ف دنيتي عشان الله يرزقني ف بنت مثلج .. ليش تسوين فيني جذي لييييششش .. ليش انتي يا حصه ومب حد ثاني ...ليش بنتي انا تسوي جذي
حصه: ماما والله مب قصدي .. انا سمعت كلام منال وتعرفت عليه
خلود بعصبيه: ليش شو الشيء الي ما حصلتيه هنيه ورحتي اتدورينه عند الغريب .. شو الي فاقدتنه هني وحصلتيه عند غيرنا .. ولا تحبين تسودين ويوهنا قدام الناس هذا الي تبينه
هند: خلود اهدي.. ما يصير جذي تعاملون البنت .. انتو بتعاملكم هذا بتخلونها تسوي الشيء من وراكم
:::::::::::::::::::::::::::::::::::::::::
عند خليفه وذياب.. ذياب فهم خليفه كل شيء و وضح له كل الي قاعد يصير و بين له براءة حصه بالي صار اليوم يعني بالمختصر خبره عن الزعيم
خليفه: وشو علاقة حصه بهذا كله
ذياب: حصه فرد من افراد عائلة محمد ال.. يعني لازم بيصير فيها جذي وبعدين انا اتوقع المقصد انت .. لان نقطة ضعفك حصه
خليفه: كيف يعني
ذياب: يعني يبون يورطون حصه ف شيء مثل ما سو الحين عشان انت تتعب نفسياً ويقدرون يخلونك تسوي اي شيء بسهوله بحكم انك اذا عصبت تتصرف بدون تفكير
خليفه نزل راسه: الا حصه يا ذياب الا بناتي .. ما اقدر اسمع حد يتكلم عنهم بالسوء ويتهمهم ف شيء هم ما لهم دخل فيه
ذياب: تحمل الموضوع كله مسألة وقت .. واذا بتعاقب حصه عاقبها على كذبها عليكم وخيانتها لثقتكم غير جذي هي ما لها شغل ف شيء
خليفه هز راسه باوك
ذياب: ما ابا حد يعرف بالموضوع ابداً .. خله سر بيني وبينك ولا تفكر تتصرف بشيء بدون ما تخبرني
خليفه: اوك .. انا بروح الحين
ذياب: انتبه لنفسك
خليفه: ان شاء الله
..........................................
اليوم الثاني .. ف بيت ابو حمود .. قام من نومه متأخر وبسرعه دخل يتسبح وغيره ودقايق وطلع تلبس وتعطر .. بعدها راح عند نوره
محمد: نوره .. نوره .. نوييييير  .. نوروه
نوره دزته على الخفيف: محمد قوم ابا انام
محمد: قومي خذي دواج
نوره: بعدين باخذ الحين ما اقدر جسمي متكسر ويعورني
محمد: الا هي حبه خذيها ونامي
نوره:...
محمد: نوره
نوره:...
باسها على راسها وطلع يتريق مع امه
ام حمود: نوره وينها
محمد: راقده واعيتها من شوي تقول تعبانه وجسمها يعورها ف خليتها تكمل رقادها
ام حمود: زين سويت لازم ترتاح .. امس ابداً ما ارتاحت من المستشفى على طول على العزبه ومن العزبه على المطبخ
محمد: كيف عرفتي انها كانت ف المطبخ
ام حمود: كنت معاها ويوم ابوك يا رحت .. يعني ما كملت معاها دقيقتين جذي
محمد: انزين امايه .. كيف ابلغ ابوي عن حمال نوره
ام حمود: الحين يوم بتروح المكتب خبره
محمد: بس انتي تعرفين الي صار بينهم وان يباني اطلقها .. ف تخيلي ردت فعله اذا عرف
ام حمود: بس لازم يعرف .. ولا تخاف على نوره دام انها معاك ما بيصير فيها شيء باذن الله
...............................................
ف بيت ابو خليفه .. كانت قاعده تمشط شعرها وفجاه سمعت حد يدق الباب بطلت الباب وكانت دانه
هند: دندن يا هلا والله نوّر قسمي .. تعالي ادخلي حياج
دانه: ييت اشوفج .. ذياب طلع وانتي بعدج
هند: كنت قاعده ارتب وانظف ومن خلصت اتسبحت واتزينت وتوني كنت نازله
دانه: اها .. اممممم  تريقتي ولا بعدج
هند: لا والله بعدني .. باخذ الابره بعدين باكل
دانه: وينها ابرتج انا بيبها لج
هند: هناك ف الثلاجة
راحت دانه وخذت ابرة هند وبدلتها بابره ثانيه وعطتها.. وسوت نفس الشيء لباقي الابر بدون ما هند تنتبه
هند: مشكوره فديتج
خذت ابرتها ودانه ودها تصارخ وتسحب عنها الابره بس ما تقدر لان الزعيم يراقبها وغير جذي انها مجبوره تسوي جذي عشان ابوها
هند: خلاص خلصت يلا ننزل.. نوير يت؟!
دانه: لا بعدها
هند: عيل بترياها لين تي
دانه: اتصلي فيها انزين
هند اتصلت فيها مرتين وما ردت عليها: ما ترد يمكن مشغوله ولا بعيده عن الفون.. اذا شافت فونها بتي
دانه: اوك
....................................
توقعاتكم؟؟!