أحتجتلك يا أطيب بشر وين ألاقيك؟؟

41

اليوم الثاني الصبح .. الكل قام يجهز السياير ويحطون الشنط وغيره وكانت البيوت عباره عن حركة وربشة.. الا غرفه وحده كانت ف قمة الهدوء .. بس رنة الفون اقتحمت هالهدوء وانزعجوا الي فالغرفة من الصوت
نوره بانزعاج : استغفر الله شو هالازعاج .. محمد محمد قوم
محمد:همممم
نوره وهي شوي وبتصيح من التعب: محمد قوم شوف فونك أزعجني ترا
محمد بنوم: برايه خليه
نوره: شو الي خليه .. شوفه يمكن عموه فيها شيء ولا تبا شيء
محمد خذ الفون ورد عليه بدون ما يطالع الاسم: الو
فجأة فز من مكانه وقعد ونوره تراقبه على بالها حد فيه شيء ويوم خلص مكالمته رد الفون مكانه وتنهد
نوره: شفيك .. حد فيه شيء
محمد:لا .. انتي ردي نامي وارتاحي انا بطلع شوي وبرد
نوره مسكت ايده: محمد متأكد ان محد فيه شيء
محمد: صدقيني محد فيه شيء بس ابوي يباني ف مكتبه بروح اشوف شو يبا وبرد
نوره: اها .. اوك
قام محمد واتسبح وبدل ولبس ملابسه تعطر وطلع رايح عند ابوه اما نوره كملت رقادها
....................................................
ف بيت وليد.. كان وليد يحط الشنط ف السياره وجود اتطلعهم حقه ونجود كانت قاعده تتجهز ويوم خلصت تاكدت من اغراضها وو..
نجود بصوت عالي: جووووود .. جوووود .. جوووجووو
جود وهي تبطل الباب: بلاج اتصارخين
نجود: وين حبوبي
جود: اي حبوب
نجود: المنوم
جود: عند وليد
نجود: بروح اشله
جود: ما بيعطيج
نجود: مب على كيفه
طلعت عنها وراحت الحوش وين وليد كان موقف سيارته ويرتب الشنط فيها
نجود: وليد وين دواي
وليد: شو تبين فيهم
نجود: بأخذه عشان الطياره انت تعرف اني اخاف وما اقدر اتحمل
وليد:ما تبينهم انا معاج
نجود: وليد لا تتمصخر .. انا اخاف من الطيارات خلني باخذ الحبه عشان يبدا مفعولها
وليد وهو يمشيها معاه: خلاص بعطيج اياه  ف المطار
...............................................
بيت بوخليفه / قسم خليفه وخلود
خلود متلعوزه مع البنات وكل وحده تبا شيء و ناصر من صوب يصيح
حصه: ماما وين ملابسي مال السفر
خلود: فالشنطة
حصه: اقصد الملابس الي بروح فيهم المطار
خلود: دوريه عدل فالكبت انا امس حاطتنه
هدى: ماما سوي شعري وايد طويل ما اقدر
خلود: يبي المشط وتعالي
ديمه تصيح: ماما انا بعد ابا اسير
خلود وهي تمسك راسها: انا بموت والسبه انتو .. خ..
قطع عليها صوت الباب
خلود: تفضل
دانه: السلام عليكم
خلود: وعليكم السلام والرحمه هلا دانه حياج
دانه: كنت بنزل تحت بس سمعت صوت ناصر يصيح قلت اي اشله
خلود: ليش انتي ما بتسافرين
دانه: هيه بسافر بس قلت اشله لين تخلصين البنات .. احسج متلعوزه معاهم
خلود: والله زين تسوين
دانه وهي تشل ناصر : ديموه ما بتين معاي
خلود: ما بتي عندج بنت ابوها هذي
دانه: هههههههههه ما عليج يوم بيروح عنها ما بتلاقي غيرج تدلع عليه
خلود: والله يا خوفي تقعد اتصيح ليل ونهار عشان ابوها
دانه:لا ان شاء الله تنسى وتلتهي بأي شيء تحبه
خلود: جان زين
دانه: ديمه تعالي بعطيج حلاوه
ديمه: ما ابا
خلود: روحي عمي حمد يباج يقول بيعطيج حلاوه .. روحي بسرعه
ديمه: صدق!!
خلود. هيه يلا روحي
ديمه راحت ومسكت ايد دانه: يلا بنروح عند عمي حمد بسرعه
دانه: تحب حمد بعد؟!
خلود: تحب كل شباب العايله .. يعني اذا تبينها تروح مكان حطي اسم واحد فيهم وبتسويه
دانه بتعجب: حلفي !! في يهال جذي الحين ولا بس هي
خلود: هههههه لا في وايد جذي.. تعرفين ان ديموه يوم كانت صغيره كانت تزقر الكل بابا .. حتى الغريب تزقره بابا
دانه: مستحيييل!!! توني اعرف ان في يهال جذي .. واااي أحسه شيء كيوت
خلود: الله يرزقج ان شاء الله الذريه الصالحه يارب وتستانسين معاهم
دانه: امين يارب .. يلا انا بروح قبل لا اي ريلج واتوهق
طلعت دانه وهي شاله ناصر و ديمه ماسكه ايدها .. نزلت تحت وتمت معاهم ف الصاله من بعد ما عطت ديمه حلاوة .. شوي ودخل حمد
ديمه بصوت عالي: عمييييييييييي
حمد وهو ينزل لها: هلا هلا بأحلى ديمه والله
ديمه وهي تحضنه: عمي انت وين رحت
حمد وهو يشلها: ما رحت مكان انا قاعد برا 
ديمه:يعني ما رحت بقاله
حمد : لا ما رحت .. تبيني اوديج
ديمه هزت راسها بهيه
حمد وهو يبوسها: فديت الحلوين والله .. فديت البنات .. اشوفج شوي .. جميله جميله
ديمه احمرت خدودها وضحكت: هههههههههه عميييي
حمد باسها ونزلها : يلا روحي لبسي نعالج وتعالي عشان نروح البقاله
دانه: رتبت السياره خلاص
حمد: هيه الحمدلله .. بنروح بثلاث سيارات .. سيارة وليد مع البنات .. وانا وانتي وخليفه وبناته وامايه .. سيارة فيها الشباب
دانه: احس ما بيكفي
حمد: ما عليج بيكفي واذا ما كفى في سياره ثانيه
خوله وهي تنزل: السلام عليكم
حمد ودانه: وعليكم السلام والرحمه
خوله:حمد شفت سلطان وزايد
حمد: راحوا مع عيال خالي احمد
خوله: يعني بيركبون معاهم
حمد: هيه .. وانتي معاي
خوله: زين بعد اذا في مكان حق ميروه خلوها معانا ما اباها تروح مع وليد
حمد : لا لا ما بيكفي مكان حق ميره وايد دبه خل تركب مع وليد
ميره من ورا خوله: سمعتك يالعنز .. الحين كل هالضعف والرشاقة تقول عني دبه
حمد: لو طاري مليون ابرك .. بالله عليج خوله شوفيها مب صح دبه تقولين برميل ديزل
ميره وهي تفلعه بقوطي الكلينكس: والله بخبر عليك ابوي
نوره: السلام عليكم
الكل: عليكم السلام والرحمه
حمد: هلا هلا .. هلا بالرشاقة والضعف والجمال كله هلا .. دوري دوري شوي خل يشوفون جمالج عل وعسى ياخذون منه شوي
نوره: ههههههههههه .. تغايض واتطفر ف منو
ميره وهي تسلم عليها: يعني اخوج الغثيث بيغايض منو مثلاً
خوله: نوير مفتاح غرفتي بحطه عندج اوك
نوره: زين
حمد: الحين انتي ليش ما تيين معانا
نوره: وين اي وانا قبل امس راجعه
حمد: عادي سفره ثانيه ترا
نوره: لا لا ما اقدر وايد تعب .. وبعدين ملابسي بعدهم ف الشنطه ما طلعتهم لين الحين
ديمه: عمي يلا بنسير
نوره: ديموه وين بتروحين
ديمه وهي تتعلق برقبة حمد: بروح مع عمي البقاله
نوره: ما بتيين معاي
ديمه هزت راسها ب لا
نوره وهي توها تنتبه لدانه: اوووههه حرمة اخوي اشحالج .. الله يهديج قاعده ف الزاويه ما تنبانين
دانه: هههههه كل هذا وما انبان
نوره: عاد انت الله يهديج مطقمه مع الكنب .. تعالي قعدي معانا ليش قاعده بعيد وبروحج .. ولا متضاربة مع بعلج
حمد وهو يقرصها: احترميني يا قليلة الأدب شو بعلج بعد
نوره وهي تمسح مكان القرصه: والله بخبر عليك
ديمه: عمييي يلاااااا بنسيييير
حمد: ان شاء الله .. دانه تبين شيء
دانه: سلامتك
طلع حمد وديمه ودانه قعدت مكانه ونوره قدامها وخوله على يمينها وميره يسارها .. وأول ما قعدت ميره تمت تأفف وقامت طلعت برا
خوله: ما عليج منها عطيني نويصر وانتي روحي اتجهزي
دانه: اوك
..............................................
ف ألمانيا
قامت من نومها ولقت نفسها على الشبريه استغربت ولفت الجهة الثانيه ولقت ذياب مب موجود ومخدته كلها دم .. خافت وقامت صوب الحمام وتمت ادق الباب وتنادي باسمه.. لين بطل لها الباب وهو متساند على الباب وتعبان
ذياب : عطيني دواي بتحصلينه ف الشنطة
هند: ان شاء الله .. بس انت تعال انسدح
ذياب: روحي وانا بنسدح
راحت هند يابت دواه وهو انسدح على الشبريه بتعب .. عطته الدوا وماي خذاهم وتم منسدح بتعب .. اما هند فتمت ماسكه ايده وتمسح عليه بخوف .. تمت على هذي الحاله نص ساعه تقريباً
ذياب وهو يرفع راسه: انا بخير لا تحاتين
هند: خلنا نروح المستشفى عشان نتأكد ان مب شيء خطير
ذياب: مب خطير لا تحاتين .. بس هذا يوم امرض يصير فيني جذي خاصة وقت الكحة
هند تمت اتطالعه بخوف
ذياب سحبها وخلاها ترقد عنده وحط راسها على صدره: خلج هني وكل شيء بيصير بخير
هند: ما تباني اسويلك شوربة
ذياب: لا ما ابا شيء الحين بنام وبعدين يصير خير
هند شبكة ايدها بايده وغفت وغفى هو معاها
............................................
بعد مده .. الكل ودع نوره ومحمد وركبوا سيايرهم وراحوا اما ديمه ف تمت اتصيح واتصيح تبا خليفه .. لين اتصلت خلود بنوره وقالت لها تعالي البيت بسرعه .. ف راحوا عندها ودخلوا ولقوها ف الصاله
نوره: وي وي وي بلاها تصيح جذي
خلود: تبا خليفه .. يوم طلع كانت حاضنتنه وتصيح عشان ما يخليها
نوره: حرااام .. المفروض خليفه ما يسافر
خلود: هذا الي كنت خايفه منه
محمد:ديمه .. ديموه تعالي عندي بنروح
ديمه رفعت راسها وشافت محمد .. ركضت صوبه وحضنته وتمت اتصيح( ديمه يوم اتشوف محمد تقوله بابا ودايماً اتشبه ابوها ف محمد لانهم طوال وعندهم نفس البنيه الجسميه ونفس الصوت وماخذين من ملامح بعض .. يعني بالمختصر ماتعرف تفرق بينهم)
محمد وهو يمسح على ظهرها: بس خلاص بس.. ليش اتصيحين
ديمه: بابا انت ما توديني معاك
محمد وهو يمسح دموعها: خلاص الحين بوديج وين تبين تروحين
ديمه : ابا اروح معاك
محمد : يلا الحين بوديج معاي انزين
ديمه هزت راسها بهيه
نوره: ديموه بتيين عندي
تديمه على طول حضنت محمد عشان محد يشلها
محمد: هههههههه خلاص ما تبا حد .. انا بروح اشغل السياره وبترياكم 
نوره: اوك
طلع محمد ومعاه ديمه اما نوره ف ساعدت خلود ان تحط اغراضها لانها بتروح عند اهلها من بعد ما حطوا الأغراض فالسيارة لبسوا عبيهن وركبوا السياره .. يا محمد يبا يسوق السياره بس وقفته نوره
نوره: محمد لحظه
محمد: شفيج نسيتي شيء
نوره : نسيت فوني ف الغرفة .. بروح ايبه وبي
محمد وهو يمسك ايدها: تعالي وين سايره اقعدي انا بيبه
نوره: تعرف مكانه
محمد: هيه اعرف وين تحطينه
راح محمد وياب فونها وعطاها: خذي فونج الي دايماً ناستنه
نوره: ههههه شكراً
دقايق وقف محمد عند محطة بترول وعبى سيارته بترول ويوم خلص وقف قدام سوبر ماركت ونزل هو وديمه
نوره: ما شاء الله ديمه بتحصل كل شيء اليوم
خلود:هههههههه عاد هذي اذا ادلعت غير شكل
نوره: برايها دامها بنت خل تعيش حياتها وتدلع
خلود:المهم نوير انا بروح الحمام شوي .. امسكي نصور
نوره: اوك
شلت نوره ناصر وتمت تلاعبه ومستانسه معاه .. شوي وركب محمد ومعاه ديمه .. وكان ياي يبا يحرك السياره
نوره وهي تلاعب ناصر: اصبر خلود نزلت
محمد وهو يعطيها الكوفي: خذي شربي كوفي
نوره: لا ما ابا حرانه
محمد: في عصير ف الأكياس طلعي واشربي لا اتمين جذي بطنج خالي
نوره: انزين
محمد : عطيني اياه ابا اشله شوي
نوره عطته ناصر : شوي شوي عليه
محمد: ليش شليتي عنه القماط
نوره: احلى جذي ما احب اشله بقماط
محمد: انزين لحفيه برد عليه جذي
نوره عطته اللحاف وهو لحفه وباسه وتموا يلعبون معاه لين يت خلود يت
خلود: نوير ليش بطلتي قماطه
نوره: خليه جذي احلى .. مب حلو القماط على اليهال
خلود: الله يهديج بس
تمت نوره تلعب معاه لين تعب ورقد وديمه بعد رقدت .. دقايق و وصلوا بيت خلود ونزل محمد ونزل شنطهم ونوره نزلت تساعد خلود الي شلت ناصر ونوره شلت ديمه ودخلوا داخل وأخو خلود طلع وسلم على محمد .. شوي وطلعت نوره 
علي( اخو خلود): شحالج نوير
نوره: هلا علي .. انا تمام الحمدلله شحالك انت
علي: بخير الحمدلله
محمد: يلا عيل نستأذن نحن
علي: وينن حياك عندنا تتقهوى
محمد: لا مشكور البيوت فاضيه ولازم اروح
علي:اها يلا عاد ما بعطلك
محمد: مع السلامه
ركب سيارته وحرك
محمد: كرييه
نوره: بسم الله توك مسلم على الريال مداك تكرهه
محمد: هيه .. يالس اتكلم معاه وهو قاعد لي نوير ونوير
نوره: تراه ولد عمي
محمد: ويعني ولد عمج .. يحترمني انزين
نوره: انزين ليش معصب عليّ
محمد: لانج رديتي عليه
نوره: ترا سلم عليّ تباني اركب السياره واطنشه
محمد : هيه المفروض جذي تسوين
نوره: هههههههههههه لا والله
محمد: ودي اعضج لين تتأدبين بس المشكلة قاعد اسوق
نوره:خير ان شاء الله .. وين ساير انت هذا مب درب البيت
محمد: بروح عند يدتي .. توها حلا مطرشه مسج تقول ان امايه عندهم ويدتي طلبتني
نوره: محمد لا تتمصخر شوف شكلي كيف متبهذل .. ودني البيت بتعدل وبنروح
محمد:لا لا ماشيء درب لين نوصل البيت .. وبعدين شحلاتج وانتي جذي مب لازم تحطين شيء
نوره: محمد عاد قدر شوي اني عروس يديده ما يصير اروح جذي
محمد : فديت العروس اليديده والله
نوره استحت : يلا عاد ردني البيت والله ما بتأخر
محمد اشر على عيونه: من عيوني كم نوره عندنا
............................................
ألمانيا .. فزوا من صوت البرق والرعد
هند: بسم الله الرحمن الرحيم
ذياب قام يشوف الجو: ما شاء الله ..اللهم بارك وزيد
هند: ذياب لا تقرب صوب الدريشة وايد عن يضربك البرد وتتعب اكثر
ذياب : تعالي شوفي الجو بتستانسين على المطر
هند راحت صوبه وبعدته عن الدريشة وسكرت الستاره: لا تبطلها سمعت
ذياب هز راسه بهيه وهو يبتسم .. دخلت هند الحمام " وانتو بكرامة".. وذياب بطل الستاره وهو مستمتع بالمنظر وسرحان .. شوي وطلعت هند وشافت ذياب
هند: ذيااااب
ذياب سكر الستاره بسرعه: بسم الله .. هاها سكرته
هند راحت صوبه: انزل شوي
ذياب: وين انزل
هند : نزل رأسك
ذياب نزل راسه وهند مسكت أذنه : انا ما قلت لك لا تبطل الستاره
ذياب بألم : أذني انزين ..ايييي يالقزمه يعور ترا
هند بطلت ايدها : عشان مره ثانيه تسمع الكلام
ذياب: ههههههههههههه .. تراج وايد تقعدين عند قوم يدوه .. متعلمه حركاتهم بعد
هند طنشته وراحت المطبخ سوت لهم شيء خفيف  وحطته على طاولة الطعام .. اما ذياب من بعد ما صلى طلع الصاله
هند: تعال كل عشان تاخذ دواك
ذياب: ما احتاج الدوا خلاص ما فيني شيء
هند وهي رايحه صوب الغرفه: برأيك
ذياب مسك ايدها: شفيج
هند: ما فيني شيء بروح اصلي وبأخذ الابره وبرد
دخلت داخل وصلت وخذت دواها ويوم خلصت طلعت الصاله ولقت ذياب ناقل كل الصحون عند الطاوله الي قدام التلفزيون وقاعد يأكل ويطالع فلم .. ابتسمت على وضعه لانها تعرف ان ذياب مستحيل يأكل بدون ما يطالع شيء .. راحت المطبخ سوت لها قهوه وردت الصاله عند ذياب وتمت تشرب  
ذياب: تبينا نطلع اليوم
هند هزت راسها ب لا
ذياب حط ايده على خصرها وقربها صوبه
هند بصدمه: شفيك كنت بتحرقني
ذياب: احسن .. لاني ما احب يوم اطنشيني و تسوين مسافه بينا وفوق هذا ماتبين نطلع مع بعض
هند رفعة حاجبها: لا والله .. تدري انك تصير ياهل يوم تمرض
ذياب تم يطالعها
هند خذت زيتون من الصحن وقربته صوب ذياب: كل
ذياب: ما ابا
هند: يلا عاد كل
ذياب يبعد ايدها: ما ابا زيتونج .. اصلاً مب حلو ما عيبني
هند: ههههههههههههه من بعد ما خلصت الصحن كله تقول مب حلو
ذياب يطالع تلفزيون ومطنشنها
هند انخشت ف حضنه: والله انك ياهل .. الحين انت صدق جذي ولا تدلع عليّ
ذياب وهو يرفع قصتها: لا اتدلع عليج بس انت سنه لين تفهمين
هند: ههههههههه ما اعرف ادلع حد للأسف
ذياب وهو يدزها: قومي قومي .. مب ويه حد يتدلع عندج
هند:هههههههههههه .. بودي الصحون وبي اجابلك يالدلوع
ذياب سوا نفسه بيلحقها وهي ركضت صوب المطبخ .. بعد ما حطت كل الصحون وغسلتهم ورتبتهم ردت صوب ذياب وشافته راقد .. يابت بطانيه ولحفته وقصرت على صوت التلفزيون.. شوي وشافت سناب من نوره .. خذت فونها وتمت تسولف معاها
هند: نوير اشتقت لكم والله .. احسكم كلكم تغيرتوا وكبرتوا
نوره : هههههه بنكبر في ثلاث أسابيع عاد
هند: هيه .. اممم شحالج مع محمد ان شاء الله احسن
نوره: الحمدلله بافضل الأحوال
هند: الحمدلله يا رب مبرووك  فديتج ... يلا نبا نسمع خبر حملج قريب
نوره: روحي زين انا مب فاضيه ... انتي احملي ويبي عيال وانا بربيهم
هند: ليش حبيبتي قالوا لج شركة انتاج .. حتى انا مب فاضيه
نوره: ما سمعج ذياب عيل ... هيه صح هو وينه
هند: مسكين ضربه البرد و مرض
نوره: سلامات شو ياه
هند: تخيلي انه يكح دم والله خايفه عليه وايد
نوره: هندوه ذياب دايماً ياخذ معاه دوا .. عطيه حبه وبيتحسن ان شاء الله
هند: هيه عطيته قبل شوي ونمنا وتوا قايمين خليته يأكل وبعدها رقد
نوره: هيه لان الدوا الي ياخذه يرقد عشان جذي .. يعني تحملي تطلعون عشان ما يطيح عليج
هند: انزين
نوره: هندوه اهتمي فيه وايد وكوني قريبه منه .. لانه يخاف من الحاله هذي ف لازم حد معاه يطمنه
هند: ان شاء الله لا تحاتين
نوره: يلا انا بروح بيت اهل محمد
هند: اكشخي عاد خل يشوفون بنتنا جميله
نوره: هههههههههههه لا توصين
....................................................
توقعاتكم للأحداث القادمه😉💙؟!