أحتجتلك يا أطيب بشر وين ألاقيك؟؟

37

بعد أسبوع ...
حمد ودانه: دانه طلعت من المستشفى والأهل حبوها وتقبلوها ورضوا على حمد من بعد ما سألوا عن دانه

فارس واميره: تتعب من الحمال  وفارس مهتم فيها ويداريها ويلبي كل طلباتها

خليفه وخلود: منشغلين ب مولودهم الجديد وطبعاً لاهين عن بنتهم حصه الي  كل مالها تضيع

محمد ونوره: علاقتهم صارت احسن من قبل مع وجود شوية خلافات بسيطه

ذياب وهند: هند حالتها الصحيه بدت تتحسن وذياب يدور على جاسم الي شرد من بعد ما عرف ان ذياب يدوره وناوي عليه .. بس هند صارت تخاف من اي ريال يقرب منها

سعيد وخوله: لين الحين خوله ما ردت خبر لاهلها عشان رجعتها لسعيد والكل يحاول يقنعها انها ترجع له عشان عيالهم
......................................
يوم الجمعه ف بيت اليد .. كانوا متجمعين يتريون وصول المعاريس " محمد و نوره" .. و مجهزين لهم النثور ومبخرين الميلس وقاعدين يتريونهم ف الحوي
اليد: ابوي خليفه اتصل ف حمد اخوك شوف وين وصلوا
خليفه: على وصول أبويه على وصول
ام خليفه: يا الله كيف مشتاقه حق بنتي فديتها
اليده: كلنا اشتقتنا لها ولحشرتها
اليد: اقول احمد حرمتك وينها ما بتي تستقبل ولدها وحرمته
ابوحمود: لا ابوي ما تقدر تي مشغوله ف البيت وتعبانه
اليد: مشغوله ولا ضاربنها مثل كل مره
ابو حمود: ااااا ... لا لا تت تتعبانه
اليد: خير ان شاء الله .. الله يشفيها ويعافيها
شوي ولا يسمعون صوت اليهال يصارخون معلنين وصول المعاريس .. الحريم بدوا يزغرطون والبنات كل وحده متحمسه ويغنون والشباب بطلوا البيبان عشان المعاريس يدخلون .. وقفوا السياره ونزلوا محمد ونوره وهم ماسكين إيدين بعض ومبتسمين .. سلموا على الكل ودخلوا الميلس عن الحر
اليد: الحمدلله على السلامه .. نورت البلاد نورت
محمد: منوره بوجودك يا أبويه
ابوحمود: وكيف الشغل هناك عسى بس ماشي مثل ما نبا
محمد: لا تحاتي ابوي شغلك خلصته ف يومين بس
ابوحمود: زين زين .. عاد بعدين بقعد معاك عشان التفاصيل
اليده: شو تبا فيه انت تسأله عن الشغل .. الولد توه راد من السفر
ابوحمود: اطمن على الحلال يا اميه ما قلت شيء غلط
اليده: انزين مب وقته الحين مب وقته .. موزه قولي حقهم يجهزون الغدا حق عيالي .. مسوتلهم بحري اليوم
ام خليفه: ان شاء الله يا امايه
جود بهمس لنوره: شفيج ساكته وسرحانه
نوره: ما شيء بس تعبانه ابا انام
جود: متأكده ؟!
نوره: هيه متأكده
جود مسكت ايدها: قومي تعالي .. بنروح غرفتنا وقوليلي شو فيج
اليده: وين وين ...وين ماخذه الحرمه عن ريلها
جود: شوي بس يدوه براويها شيء ضروري
اليده: انزين خليها تاكل وبعدين راويها الي تبين
جود: ما بنطول بسرعه بنرد
اليده: لا تبطون
جود: ان شاء الله
......................................
ف بيت ام خليفه / غرفة حمد ودانه
كانت قاعده تمشط شعرها ومعصبه .. دخل عليها وشافها معصبه على شعرها وتتلحطم
حمد: شفيج تكلمين روحج
دانه: حمد بقص شعري خلاص انا طفرت
حمد: لا
دانه: شو لا .. شوف وايد طويل ويتعب انا ما أتحمله
حمد: ايبي انا بمشطه حقج
دانه: انت ما تعرف
حمد: انتي قولي شو اسوي وبسويلج
دانه :اوك اول شيء مشطه كامل ورتبه عدل
حمد: انزين اسهل شيء وبعدين
دانه: بعدين لفه على فوق نفس الدونت
حمد وهو يسوي مثل ما تقول: جذي؟!!
دانه: لا لا مب جي سوه عدل
حمد: جي
دانه بعصبيه : قوم عني قوم .. بروح اقول حق الخدامه اتمشطه حقي
حمد: تعالي وين رايحه
دانه: بخليها تمشط شعري وبعدين بتوديني الصالون عشان اقصه
وطلعت عنه بدون ما تسمع رده اما هو ابتسم ودخل الحمام يبدل كندورته الي تخيست .. تعود عليها دايماً نفس الشيء .. قبل كانت تربط نص شعرها والنص الثاني تخليه او تخليه شعرها كامل مفتوح .. بس الحين ما تقدر لان في ريايل ف صعب عليها .. و يوم كانت تروح السوق اتسوي ذيل حصان وأتدخل شعرها داخل العباه .. مرت دقايق ودخلت دانه وتعطرت ويت تبا تطلع
حمد: صبري لا تطلعين الحين
دانه: ليش تبا شيء
حمد وهو يروح صوبها: لا بس بنطلع مع بعض
دانه ابتسمت: يلا انزين خلص بسرعه .. ابا اشوف نوير
حمد: دقيقه بس بيب تلفوناتي
خذ تلفوناته وطلع وهو ماسك ايد دانه .. وصلوا بيت اليد ودانه دخلت الميلس وسلمت على الموجودين وقالوا لها البنات ف المطبخ وراحت عشان تساعدهم
دانه: السلام عليكم
الكل: عليكم السلام والرحمه
دانه: تبوني أساعدكم ف شيء
ام خليفه: خذيتي دواج
دانه: لا امايه بعد الاكل اخذه
ام خليفه: انزين تعالي ايبي الخضره عشان اسوي سلطه
دانه: خلاص انا بسوي السلطه
ام خليفه: عيل ميروه سوي العصير
ميره: ما اعرف اسوي عصير .. اصلاً بطلع برا المطبخ صار كتمة
ام خليفه بعصبيه: قعدي سوي العصير خلصينا الناس تتريا الاكل
ميره : ما بسوي شيء خلي الخدامه اتسوي
ام خليفه: زين ميره زين .. بخبر ابوج خله يضربج صبري شوي انتي
طلعت ميره برا المطبخ وتمت ترتب طاولة الحريم مع اليده .. والبقيه يغرفون الاكل ويودون الصحون وغيره
..........................................
ف غرفة التوأم .. اول ما دخلوا قعدوا على شبرية جود
جود: شفيج
نوره: ما فيني شيء جود بس تعبانه
جود:قالج شيء سوالج شيء
نوره هزت راسها ب لا
جود: نوره انتي اختي وما احب اشوفج متضايقه جذي واعرف انج متضايقه لو شو ما سويتي .. انتي مثل نجود ونفس مكانتها بعد .. اذا في شيء مضايقج قوليلي وان شاء الله بساعدج وبدون محد يدري
نوره تمت اتطالعها ثواني وبعدين حضنتها وتمت تصيح
نوره: جود بيطلقني .. انا بتطلق خلاص
جود بصدمه:شوووووو!! ليش شو مسويه انتي
نوره: خالي احمد اجبره انه يتزوجني عشان فلوس ابوي وانه يكون شريك معاه وبعد مده يطلقني وينفض شراكته مع ابوي من بعد ما ياخذ الي يباه من الفلوس
جود: وانتي كيف عرفتي .. هو خبرج؟!!
نوره وهي تبتعد عنها من بعد ما مسحت دموعها: قبل لا نطلع من الفندق عشان نروح المطار سمعته يكلم ابوه .. واتخيلي خالي متصل فيه اونه حصلت لك عروس سنعه تأخذها بدال الي عندك من بعد ما اتطلقها
جود: ف حياتي ما شفت إنسان احقر من عمي هذا .. معقوله حقارته وصلت لهدرجة انه يجبر ولده على الطلاق
نوره نزلت راسها: ومنو قالج انه مجبور
جود: شوووو لا تقولين انه راضي على الي يسويه ابوه
نوره هزت راسها بهيه : والله اني حبيته ووثقت فيه بس هدم كل شيء كل شيء .. ما توقعته يسوي فيني جذي ابداً .. دايماً كنت اقول ان محمد غير ومحمد احسن واحد ومستحيل يسوي نفس ابوه .. بس للأسفل محمد طلع نسخه من ابوه .. نسخه منه
جود ردت حضنت نوره: يا عمري يا نوير ما تستاهلين الي يصير فيج والله العظيم
نوره ودموعها ينزلن: تخيلي اول مره احتاج فيها ذياب وما ألاقيه .. احتاج حضنه احتاج حنانه احتاج نصايحه احتاجه يقولي نوره انت الغلط ومحمد الصح .. احتاج اخوي و وقفته معاي
جود وهي تمسح على ظهرها: ما عليه حبيبتي ما عليه نحن معاج و اي شيء تبينه نحن موجودين
نوره وهي تبتعد عنها:ما تقصرين جود
جود: يلا قومي اغسلي ويهج وعدلي مكياجج وتعالي تغدي
نوره: ان شاء الله ... هي صح نجود وينها
جود: نجود راحت مع وليد تاخذ لها اكل .. تعرفين تراها ما تاكل سمج ولا مأكولات بحريه
نوره: اها
جود: تبيني اترياج ولا اروح
نوره: لا برايج روحي انا بخلص وبطلع
جود: اوك .. باي
.......................................
ف الصاله كانوا الحريم قاعدات على الكرسي ويتريون نوره
دانه وهي تقعد: بعدها نوير ما يت؟!!
ميره: هذا مكانها .. روحي قعدي مكان ثاني
ام خليفه: مييييرررهههه عيب عليج احترمي حرمة اخوج شوي
ميره: وانا شو قلت تراه مكان نوير خل تقعد مكان ثاني
ام خليفه: تأدب..
دانه وهي تقاطعها: خلاص امايه برايها انا بقعد مكان ثاني
ام خليفه: صدق انج ما تستحين .. صبري خل نرد البيت وبخبر ابوج
نوره: السلام عليكم
الكل: عليكم السلام
دانه وهي تحضنها: نوير يا قلبي اشتقت لج يا حياتي
نوره وهي تضحك: حتى انا يا قلبي شحالج شخبارج .. متى أعلنتوا ؟!!
دانه: بخير يوم شفتج .. أمم صار لنا أسبوع تقريباً بخبرج التفاصيل بعدين
اليده: يلا يا بنات قعدوا تغدوا .. برد الاكل
نوره: يلا قعدي بقعد عندج
ميره: نوره قعدي عندي في مكان فاضي
نوره: لا بقعد عند حرمة اخوي فديتها من زمان عنها
نجود بصوت عالي: السلااااااااااااامووو علييييكممممم
الكل: عليكم السلام
اليده: وين داخله انتي جذي تصارخين .. ولد انتي ولد
نجود: يدوه شفيج تنازعيني .. ليش معصبه عليّ
اليده: وين اخوج انتي روحي زقريه خل يربطج على النخله
نجود: هههههههههههههههه يدوووه قديمه انتي الحين محد يعاقب جذي
اليده: امسكوها هذي خلني اضربها
جود: جوج تعالي قعدي وكلي طفرتينا تراج
نجود راحت عند جود وقَعَدت عندها .. طلعت برجر وعطتها : خذي وليد ماخذ لج وجبة
جود: ما ابا باكل اكل يدوه حرام تعبانه عليه
نجود: احسن بروحي بأكله
بعد ما تغدوا وخلصوا تجمعوا كلهم مع بعض وقعدوا يسولفون لين بدوا كل واحد يرد بيته
.......................................
بعد ما الكل رد بيته .. بيت بو حمود غرفة محمد ونوره
بدلت ملابسها ومشطت شعرها ورشت لها عطر وقَعَدت اتطالع تلفزيون .. شوي ودخل محمد وقعد عندها
محمد وهو يتنهد: افففف تعب اليوم ... كأني مب راقد 20 سنه
نوره:...
محمد: قعدتي عند امي ؟؟!.. والله مسكينه ابوي حارمنها من كل شيء حتى من بيت يدي تخيلي .. بس ما ادري شو الي مصبرنها عليه
نوره:...
محمد: اكثر عن مره قلنا لها تطلق منه بس ما تبا ورافضه هالفكره ما ادري ليش .. قتلها باخذ لها بيت تسكن فيه وبعد رافضه
نوره:...
محمد حط راسه على ريول نوره: نوره همزيلي راسي وايد يعورني .. مصدع الف
نوره قعدت تهمز راسه بدون ما اتطالعه
محمد: تدرين ما ادري وين البندول مالي .. شكلي نسيته ف هولندا .. بروح أخذ لي بعدين
نوره:...
محمد: شرايج بعد المغرب ن...
قاطعته نوره وهي تحط ايدها على حلجه: اششش خلاص اسكت ما ابا اسمع صوتك .. اسكت خلاص .. لا تتكلم صوتك يتعبني يذكرني بوايد اشياء كريهه ..  اسكت لا تتكلم عشان ما أكرهك اكثر خلاااااص
محمد وهو يشل ايدها ويمسكها: شفيج نوره .. ليش تقولين هالكلام
نوره شلت راسه عن ريلها وقامت عنه ودخلت الغرفه وقفلت الباب
تم محمد قاعد ف الصاله يفكر فيها .. يبا يعرف شو فيها شو الي جلب حالها فجأة .. شو الي خلاها تقول جذي .. قطع تفكيره صوت صياحها .. ما قدر يسوي شيء يعرف انها مستحيل تبطل الباب ومستحيل اتصيح قدامه ومستحيل تتكلم الحين .. تم يسمعها وهي تصيح لين غفت وغفى هو معاها
.................. ...................
توقعاتكم😁🔥