أحتجتلك يا أطيب بشر وين ألاقيك؟؟

57

بعد اسبوعين .......
الكل كان قاعد يتجهز عشان يروحون المزرعه بأمر من اليد وهالمره بتروح معاهم ام حمود والكل مستانس على الشيء هذا
ف بيت ابو حمود .. ام حمود كانت ف المطبخ ونوره معاها اتساعدها
ام حمود: خلاص خلصت الحين انتي روحي ارتاحي
نوره: امايه شفيج عادي مب تعبانه انا
ام حمود: تبين محمد يقتلنا صح!! .. يلا تعالي قعدي هني
نوره: هههههههه ما بيقول شيء .. خليني اساعدج
تمت اتساعدها وخلصوا كل شيء تقريباً وحطوا الاغراض ف الكرتون
ام حمود: ازقري حد اي يشل الكرتون
نوره طلعت وشافت حمدان قاعد يلعب بفونه : حمدان امايه تقولك تعال شل الكرتون و وده السياره
حمدان وعينه على الفون: شوفي حد ثاني انا الحين مشغول ف مهمه
نوره بطلت عينها : شوو؟!! .. ايييهه قوم شله ما في حد غيرك
حمدان: ما اقدر تعبان
نوره فرته بالمخده الصغيره مالت الكنب: قوم اقولك
حمدان : هههههههههه مشغول مشغول
ام حمود بصوت عالي: حمداااااااان تعال شل الكرتون و وده السياره
نوره: سمعت يلا قوم
حمدان سكر تلفونه بعصبيه: كله منج خسرت القيم زين جذي
نوره: احسن
راح حمدان المطبخ وخذ الصندوق وطلع الحوش وطلعت نوره معاه شافهم محمد وقرب صوبهم
حمدان: شل الكرتون وحطه ف سيارتك
محمد: ما شي مكان ف السياره حطه عند حامد
راح حمدان ومحمد لف على نوره: خلصتوا باقي الاغراض ولا
نوره: هيه خلاص خلصنا بس باقي نتجهز
محمد: زين يلا عيل عجلوا شوي
نوره: ان شاء الله
.............................
ف بيت ابو خليفه .. كانت ميره ف المطبخ قاعده تساعد امها ومعاهم دانه وخلود
ام خليفه: ميره رتبي الاغراض عدل مب نوصل هناك نلاقي كل شيء مخترب وفوق بعضه
ميره: يا ربي امايه كم مره تعيدين الكلام خلاص اوكيه برتبه
ام خليفه: لا تعالي اصفعيني بعد رتبي وانتي ساكته
ميره بصوت خفيف: كله يهزبون استغفر الله ما يقدرون يتفاهمون عدل
ام خليفه: اسمعج ترا اسمعج
ميره:ما قلت شيء
دانه: عموه انا خلصت تبين شيء بعد
ام خليفه: لا حبيبتي ما قصرتي .. اذا في شيء بعد ميره موجوده
ميره: نعم لا طبعاً انا ما بسوي شيء اذا في شيء خليها اتسويه وتروح
ام خليفه: جب يلا جب والله يا ميره كلمه ثانيه بناديلج ذياب
ميره لفت عنهم بعصبيه
ام خليفه: خلاص روحي برايج وقولي حق حمد يسوق شوي شوي مب يقعد يسرع
دانه: ان شاء الله
شوي وسمعوا صوت ذياب
ذياب: امااااااايهههه .. يمهههه
ام خليفه بصوت عالي: ذياب انا ف المطبخ
ذياب: يمههه
ام خليفه: ميره روحي شوفي اخوج شو يبا
ميره: ليش كله انا
ام خليفه: يعني منو تبيني اطرش الخدامه .. روحي شوفي اخوج شو يبا
ميره: استغفر الله العلي العظيم .. استغفر الله متى بعرس وافتك
طلعت ميره من المطبخ وراحت الصاله شافت ذياب منسدح
ميره: ذياب تبا شيء
ذياب: ميره نادي امي
ميره: مشغوله .. قول شو تبا منها
ذياب: عيل نادي خليفه
ميره باستغراب: ذياب فيك شيء
ذياب هز راسه ب لا: لا ما فيني شيء روحي نادي اي حد بسرعه
ميره طلعت برا وشافت خليفه وحمد قاعدين يسولفون نادتهم ودخلوا الصاله عند ذياب
خليفه قعد عنده: ذياب تبا شيء؟!
ذياب مسك ايد خليفه: خليفه
خليفه: شفيك
ذياب: خليفه قلبي يعورني و جسمي مب قادر اتحمل العوار
ميره بخوف: خليفه سو شيء .. جسمه وايد معرق كانه متسبح
حمد: اليوم ما راح الدوام ولا طلع من قسمه .. في حد راح يشوفه
ميره: انا الصبح دقيت عليه الباب بس ما رد عليّ عبالي نايم
ذياب بتعب: نادوا امي .. اباها
خليفه: ميره روحي بسرعه
ركضت ميره ونادت ام خليفه الي يت تركض من الخوف على ولدها قعدت عنده
ام خليفه : ذياب ماما شفيك
ذياب طالعها بعيون غرقانه دموع: يمه ما اقدر اتحمل .. تعبان يمه تعبان
ام خليفه حضنته: بسم الله عليك من التعب حبيبي بسم الله عليك
ذياب من حضنته امه ما قدر يمسك نفسه وصاح: يمههه قلبي يعورني وجسمي عظامي كل شيء مب قادر اتحمل .. يمهه بعدها ذبحني مب قادر اتحمل والله العظيم مب قادر
ام خليفه وهي تمسح على شعره: الله يشفيها يارب الله يشفيها ويقومها بالسلامه
ذياب تم يصيح وخليفه وحمد قاعدين عنده اما ميره ما قدرت تتحمل حالة اخوها وطلعت برا البيت عشان تزقر ابوها بس ما حصلته .. شافوها محمد ونوره
محمد: ميره
ميره لفت عليهم وهي تصيح
قربوا صوبها محمد ونوره .. ونوره خايفه وحاطه ايدها على قلبها
نوره: شفيج ليش اتصيحين
ميره:ذياب
نوره: شفيه ذياب
ميره: ما ادري ما ادري .. تعبان ف الصاله والكل حواليه
نوره دخلت داخل بسرعه ودخل وراها محمد وشافوا ذياب منسدح  وحالته حاله وام خليفه حاضنتنه وخليفه وحمد قاعدين عنده
نوره قعدت عند امها على الارض : يمه شفيه ذياب .. ليش حذي حالته
ام خليفه : ما فيه شيء بس تعبان شوي
نوره حطت ايدها على راس ذياب وهي تسمعه يتكلم ومنصدمه من حالته اول مره ذياب يكون بالحاله هذي
نوره: جسمه حار .. يبوا شوي كمادات بارده عشان احطه على راسه
من خلصت جملتها ما حست الا و ذياب يصارخ  من الم جسمه وقلبه ويصيح كانه ياهل .. شلوه خليفه وحمد وركبوه السياره و على طول على المستشفى اما محمد خذ نوره وام خليفه وميره ولحقهم
........................................
عند البقيه راحوا المزرعه وما يدرون عن ذياب وعن الي صار معاه
وليد بعصبيه: كيف يعني ما قدرتوا اتسون شيء
جاسم: ما ندري شو الي صار فجأة وشكلهم بيربحون الصفقه هذي
وليد: اسمع لو سمعت انهم ربحوا الصفقه ما بتسلمون من ايدي .. سو الي يسعدني ولا والله لا اراويكم نجوم الظهر فهمتوا؟!!!
جاسم: حاضر حاضر
::::::::::::::::::::::::::::
ف مكان ثاني .. كانوا قاعدين يسولفون وفجأة ياه اتصال وقام
اليد: وين رايح
فهد: يدي طلعت لي شغله ضروريه بروح اخلصها وبرد
اليد: هدو عنكم الشغل هذا وقعدوا استانسوا
فهد وهو يبوس راس يده: ما عليه ما بطول وايد .. وبعدين وناستك من وناستي
اليد: لا تتأخر عاد
فهد: ان شاء الله
طلع من عندهم متوجه صوب سيارته شوي وحس حد وراه لف وشافها وابتسم
فهد: شو تبين قاعده تمشين وراي كأنج حراميه
نجود: وين رايح
فهد:في حد مسلح داخل البيت بروح اشوفه
نجود بخوف: شووو .. لا لا ما تروح اقعد مكانك
فهد: اقولج داخل بيتنا يعني تبينه يسرق البيت وانا قاعد هني
نجود مسكت ايده: فهد امانه ما تروح ينسرق البيت ولا انه يصير فيك شيء
فهد: خلاص اذا صار شيء بقول نجود ما خلتني اروح
نجود: عادي قول .. اهم شيء ما يصير فيك شيء
فهد: ليش
نجود: لاني احبك واخاف عليك وما ابا يصير فيك شيء او تتأذى .. والله فهد بموت اذا صار فيك شيء
فهد: بسم الله عليج .. يومي قبل يومج يارب
نجود : لا تروح
فهد: امزح معاج .. بروح اشوف ذياب تعبان شوي
نجود: وبعدين بترد؟!
فهد: لا ما اعتقد اني برد يمكن ارقد عنده لانه تعبان ومحتاج حد يقعد معاه
نجود زعلت بس ما بينت شيء: زين انتبه على نفسك
فهد: مع السلامه
......................................
ف المستشفى .. كانوا قاعدين يتريون الدكتور يطلع ويطمنهم .. محمد كان قاعد ومقعد نوره معاه وهي كانت حاطه راسها على كتفه وماسكه ايده وسرحانه تفكر اما ميره ف كانت اتصيح ف حضن حمد وخليفه كان قاعد مع امه يتريون الدكتور .. شوي طلع الدكتور والكل تجمع حواليه
خليفه: دكتور طمني عن ذياب
الدكتور: منو فيكم هند
خليفه: هند حرمته و هي ف غيبوبه صارلها اربع اسابيع تقريباً
الدكتور: المريض كان ينادي باسمها والظاهر انه فيه حالة اكتئاب جسديه لانه سويناله فحوصات وطلع كل شيء سليم
ام خليفه: كيف يعني حالة اكتئاب جسديه
الدكتور: يعني المريض من شدة الاكتئاب الي فيه يتضرر جسمه بعد وهني تجيه الالام ف العظام والمفاصل والم ف القلب والتعرق و اضطراب ف النوم والم ف الصدر او انه يعاني من المشاكل الهضميه وغيرها
خليفه: وشو الحل مع حالة ذياب
الدكتور: نحن عطيناه مسكن عشان الالام الي يشتكي منها وحطينا له مغذي لانه مبين عليه مب ماكل شيء من فتره .. و انا بكلم دكتور نفسي مختص اي يشوف حالته وعشان يصرف له الادويه المناسبه
خليفه: ومتى يقدر يطلع
الدكتور: يعتمد على حالته وطاقته .. ما يشوف شر ان شاء الله
خليفه: الشر ما ايك تسلم
......................................
ف مكان ثاني من زمان عنه .. بيت سعيد وخوله .. كانت ف الغرفه قاعده تتجهز شوي ودخلوا عيالها
سلطان: امايه ما خلصتي انتي
خوله: بس باقيلي شوي
زايد: ماما بابا بعده ما وصل
خوله: اتصلوا فيه شوفوه وينه
سلطان وهو يطلع من الغرفه: ما عندي رصيد اتصلي انتي
خوله: اتصل من تلفون البيت .. سلطااان تعال قاعده اكلمك
بس ما رد عليها وطلع وخلاها
خوله: افففففف استغفر الله ف كل شيء زينين وحلوين الا النذاله هذي ما ادري من وين يايبينها 
خذت تلفونها واتصلت ف سعيد .. ثواني ورد عليها
سعيد: هلا باللي رقمه نور تلفوني
خوله: وينك تأخرنا
سعيد: عند الباب الحين بدخل
خوله سكرت التلفون بدون ما تقول شيء او تسمع منه .. لبست عبايتها بعد ما حطت مكياج خفيف جداً وطلعت برا شافت سعيد قاعد وحواليه سلطان وزايد ويوم شافها وقف
خوله: زايد وسلطان روحوا ايبولكم ملابس عشان تبدلون بعدين
راحوا عيالها وهي لفت عشان تطلع بس مسكها سعيد من ايدها
سعيد: لين متى بتطنشيني جذي
خوله: ما اقدر انسى الي سويته فيني
سعيد: بس انا تغيرت ما عدت مثل اول
خوله لفت عليه:انا ما اتكلم عن التغيير انا اتكلم عن الجرح الي سببته لي الالم الي عشته معاك وكل شيء مر شفته معاك
سعيد: عطيني فرصه عشان اعالج جروحج وانسيج كل الم ومر عشتيه وشفتيه معاي
خوله:عطيتك وايد فرص سعيد عطيتك وايد فرص بس انت كنت ف كل مره تعيد نفس الغلطه واكبر عن الي قبلها
سعيد : انزين عطيني اخر فرصة واذا شفتي اني غلطت لج حرية اختيار مصير علاقتنا مع بعض
خوله: اسفه ما اقدر اعطيك فرص اكثر عن جذي قلبي لين الحين مكسور وبعده ما انجبر
......................................
بعد نص ساعه تقريباً وصل فهد المستشفى واتصل ف محمد عشان يدله على مكانهم دقايق و وصل عندهم
فهد: السلام عليكم
الكل: عليكم السلام والرحمه
فهد: شو قالولكم عن ذياب
خليفه: اكتئاب جسدي ( وقعد يشرح له مثل ما قال الدكتور)
فهد: لا حول ولا قوة الا بالله .. انزين وشو صحته الحين
خليفه: بعده راقد ما قام لين الحين
فهد: انزين انتو روحوا المزرعه لانه محد يدري عن حالته وانا بقعد معاه
ام خليفه: لا انا ما بتحرك الا يوم يقوم واتطمن عليه
حمد: وانا بعد جذي اقول .. نتطمن عليه وبعدين بنروح
شوي وحسوا بحركة ذياب وبعدها بطل عيونه
ذياب بصوت تعبان: يمهه
ام خليفه مسكت ايده: عيون امك
ذياب: يمهه هند .. هند
ام خليفه: الله يقومها بالسلامه يارب .. ويقومك بالسلامه
ذياب رفع عينه على الباقي وشافهم كلهم حواليه ابتسم لهم بتعب واشر على ميره الي كانت حاضنه حمد واتصيح بهدوء
ذياب: منو هذي
حمد: ميره ذياب يكلمج
ذياب: تعالي
ميره رفعت راسها وتمت ماسكه ايد حمد
ذياب مد لها ايده : تعالي
حمد: روحي ميره يلا
مسكت ميره ايده وهو سحب ايدها وباسها: انا بخير
ميره: ان شاء الله دوم تكون بخير
ذياب ابتسم لها ويت عينه على نوره الي كانت اتطالعه بعيون متحجره فيها الدموع: نوير شفيج واقفه بعيد .. تعالي
تقربت منه نوره وهو فتح لها ايده وهي على طول حضنته وصاحت 
ذياب وهو يمسح على راسها: ما فيني شيء انا بخير .. ليش اتصيحين
نوره ابتعدت عنه: عيل شو تباني اسوي ها .. ليش اتسوي ف نفسك جذي ليش .. يعني تباني اموت! 
ذياب وهو يمسح دموعها: لا تقولين جذي .. وبعدين ليش الدموع الحين امسحيهم ما احب حد يشوف ضعفي .. دموعج انت بالذات تعتبر ضعفي انا لا تنزلينهم لاي حد
نوره وهي تمسح دموعها: دومك انت السبب ف نزولهم
ذياب باس راسها: اسف
فهد: خلوه يرتاح شوي وانتو روحوا المزرعه انا بتم معاه
ام خليفه: فهد دير بالك عليه واتصل فيني كل شوي وطمني عنه
فهد: ان شاء الله عموه لا تحاتين
طلعوا كلهم وتم فهد معاه
ذياب: ابا اطلع
فهد: ما عليه انت ارتاح الحين ويصير خير بعدين
.............................
عند محمد ونوره
نوره: محمد خاطري ف فراوله وتوت
محمد: بتحصلين ف المزرعه
نوره: لا انا اباه الحين
محمد: استغفر الله .. اممم في محل خضروات قريب من المزرعه باخذلج من هناك
نوره: انزين ... اممم اتصلت ف قوم عموه اذا وصلوا ولا بعدهم
محمد: لا ما اتصلت بس اكيد انهم وصلوا لانهم من زمان طالعين
نوره:اها
دقايق و وقف عند محل صغير يبيع كل انواع الخضره والفواكه نزل وخذ الي يباه وبعدها رد عند نوره
محمد: نوير عطيني البوك ف السده الي قدامج
نوره: وليش حاطنه هني
محمد: هذا احتياط بوكي هذا ناسنه ف البيت
نوره طلعت البوك وعطته خذه منها وراح اما نوره يت تبا تسكر السده بس انتبهت على شيء طلعته وانصدمت خذته وتمت اتطالع .. اول ما يا محمد شاف نوره ماسكة باكيت زقارته
نوره لفت عليه وفرت عليه العلبه .. حط الاكياس وركب السياره ولف عليه
محمد: نوره
نوره: لا تتكلم ما ابا اسمع صوتك
محمد: نوره والله م..
قاطعته نوره: لا تحلف .. خلاص اسكت طول هذي الايام قاعد تكذب عليّ وانا مصدقه
محمد: ما كذبت عليج بس كنت
نوره: محمد تحرك ما ابا اسمع صوتك رجاءً
تحرك  شوي محمد و وقف على طرف الطريق ولف عليها ولفها صوبه
محمد: نوره انا ما خذيت هذا الا لانها الوسيله الافضل الي تهدي اعصابي
نوره: ما لقيت غير هذا .. هذا كله امراض و وساخة ليش ادخن
محمد: صدقيني نوره اني ما كنت استخدمه قبل بس من رديت هني وانا مشاكلي كل مره اتزيد مع ابوي ف اضطر اني افرغ عصبيتي في هذا الشيء
نوره: بس مب على حساب صحتك .. محمد انت تدري اذا صار فيك شيء انا بموت يكفي هند وذياب لا تزيدني
محمد: لا تقولين جذي .. انا بخير وان شاء الله ما بيصير فيني شيء
نوره: لا تكذب عليّ .. ترا اعرف عن الربو الي فيك وانه قوي وايد وانت قاعد تستخدم هالسم بدون ما تفكر ف اهلك وامك وحتى بدون ما تفكر فيني او ف الجنين الي ف بطني
محمد تم يطالعها وبعدها لف عنها
نوره مسكت ويهه ولفته صوبها: دريت بالصدفه عن مرضك .. ادري انك ما كنت تبا حد يدري بس الله اراد اني اعرف وعرفت .. وعشان صحتك اوعدني انك ما تستخدم السم هذا مره ثانيه
محمد: ما اقدر اوعدج .. قتلج انا استخدمه عشان افرغ عصبيتي
نوره: انا موجوده .. فرغ عصبيتك فيني ف اي وقت تباه بس لا تستخدمهم
محمد: نوره ما اقدر .. انتي حامل الحين ولو زعلتي ولا صار فيج اي شيء بسيط بنخسر الجنين وانا ما ابا هالشيء يصير
نوره: مستعده اخسر الجنين ولا اخسرك انت ومستعده اخسر الكل ولا اخسرك .. محمد صحتك  اهم شيء عندي من اي شيء ثاني
........................................
توقعاتكم ورايكم ف البارت؟!