أحتجتلك يا أطيب بشر وين ألاقيك؟؟

55

الفليل...
عند نوره ومحمد .. خذولهم اغراض وملابس حق كم يوم وبعدها راح وحجز ف فندق
عند نوره بدلت ملابسها ولبست بجامه  القميص ابيض off shoulder والبنطول عليه مربعات بالوان الرصاصي والاسود وفتحت شعرها كامل وتعطرت وطلعت برا شافت محمد يطالع من البلكونه ويوم شافها دخل وسكر البلكونه
نوره: قلت حق حد ان بنبات ف دبي
محمد: مب لازم
نوره وهي تقعد: كيفك .. ما ابا اتناقش معاك وايد ما فيني حيل
محمد: خذيتي دواج
نوره بتعب: هيه
محمد قعد قدامها: بعدج تعبانه
نوره هزت راسها بهيه
محمد:تعالي داخل انسدحي شوي ونامي
نوره: ا...
قاطعها صوت تلفونها وهو يرن خذته وكانت جود هيه المتصله
نوره: الو
جود: هلا نوره شحالج
نوره: زينه الحمدلله
جود: رحت بيتج قالولي انج طلعتي
نوره: هيه يت البحر .. كنت ابا..
قاطعتها جود: تتذكرين هند
نوره: هيه
جود:اليوم رحنا عند خالوه مزنه حالتها حاله المسكينه وبروحها ف البيت
نوره: لا تلومينها طيحت هند خلتنا كلنا ندخل ف حاله ما يعلم فيها الا الله
جود: الله يقومها بالسلامه يارب
نوره: امين
جود: يلا بخليج الحين ترتاحين شوي ولا تفكرين بشيء
نوره: بحاول .. يلا مع السلامه
جود: مع السلامه
محمد مسك ايدها: تعالي ارتاحي شكلج وايد تعبانه
نوره مشت معاه وانسدحت على الشبريه
محمد: يلا نامي وانا بروح وبي
نوره : وين بتروح
محمد: ما بطول لا تحاتين بس كم شغله بسويها وبردلج
باس راسها وطلع بعد ما سكر الليتات اما نوره ف شوي شوي غمضت عيونها لين ما غرقت ف احلامها
...............................................
عند وليد .. كان قاعد ف الحوش ويتكلم ف الفون
وليد: اسمع اباها تموت .. روح المستشفى وحط اي سم ف المغذي عشان تموت ونرتاح منها
جاسم: يالزعيم ما نقدر انسوي شيء
وليد: كيف يعني ما تقدرون .. ذياب ف البيت .. شو الي ما تقدرون عليه
جاسم: ذياب موقف حرس عند بابها وممنوع حد يدخل الا الدكاتره المسؤولين عن حالتها وعندهم  بطاقه خاصه عشان يعرفونهم وفوق هذا عندهم الجدول متى دور كل دكتور اي يشوف حالتها
وليد بعصبيه: الحقير .. من وين يايب هالفكره وكيف طافتنا .. ما عليه يا ذياب ما عليه .. اذا مب هند الي بتموت .. انت بتموت بدالها .. هه لازم واحد فيكم يتألم على الثاني
جاسم: ودانه شو بتسوي معاها
وليد: بعدها هاديه ما سوت شيء واعرف واحد ممكن يساعدنا وهو مغمض
جاسم: منو
وليد غمض عيونه: ميره
جاسم: هههههههه حلو حلو
وليد: يلا روح شوف شغلك وما ابا اي اخطاء فاهمين
جاسم: حاظر
.........................................
ف قسم ذياب كان منسدح على الكنبه بتعب من دوام اليوم .. شوي وسمع صوت الباب
ذياب بصوت عالي: منووو
خوله بطلت الباب: انا خوله
ذياب وهو يقعد: هلا خوله تعالي حياج
خوله قعدت عنده: شحالك اليوم
ذياب: تعبان
خوله: الله يعينك ويشفيها يارب
ذياب: امين يارب
خوله: انزين ذياب دامك تعبان ليش ما تنام ف الغرفه
ذياب: ما اقدر .. دامها مب معاي ما اقدر ادخل الغرفه
خوله كسر خاطرها ذياب: الله يقومها بالسلامه ادعيلها
ذياب: ان شاء الله
خوله: عيل انا بخليك ترتاح باجر وراك دوام صح
ذياب: هيه
خوله يت تبا تروح بس ذياب مسك ايدها: تعالي قعدي قولي شو تبين
خوله:ما ابا شيء ارتاح انت
ذياب: تعالي تعالي ما عليج مني .. قولي الي تبينه
خوله قعدت عنده: اممم ذياب اليوم خليفه كلم ابوي عشان سعيد
ذياب: شوفيه سعيد
خوله : قايل حق خليفه انه يبا يردني وخليفه كلم ابوي .. وابوي ما مانع قال اي وقت يباها اي ياخذها
ذياب: وانتي شو رايج
خوله نزلت راسها: اكيد اني ما اباه انا وايد عانيت معاه وذقت المر .. مستحيل ارجع لذيك الايام مره ثانيه
ذياب: قلتي حق ابوي الكلام هذا
خوله: قتله قال الريال يقدر يرد حرمته ف اي وقت يباه دامها طلقه وحده بس .. وقال بعد ان سلطان وزايد محتاجين ابوهم بالعمر هذا
ذياب: وشو رايج ف كلام ابوي
خوله: كلامه صح بس انا ما اريد ارد حق سعيد خلاص ما اباه عفته
ذياب:ما عليه انتي صلي استخاره وقولي لي باجر شو تحسين فيه وبأمانه وبعدها انا بحل لج الموضوع
خوله : ان شاء الله .. يلا تصبح على خير
ذياب: وانتي من اهل الخير
...........................................
الساعه 2:40 .. توه واصل الشقه ودخل وشافها هاديه ومثل ما هيه من طلع .. راح المطبخ خذاله ماي وبعدها قعد ف الصاله يريح مخه من التفكير .. فجأة سمع صوت صريخ وصياح نوره ركض وراح الغرفه وشافها كانها قاعده ادور شيء راح عندها
محمد: نوره شفيج بسم الله عليج
نوره وهي تصيح لاول مره قدام محمد: كانت هني .. كانت واقفه هني
محمد: منو
نوره: هند كانت واقفه هني انا شفتها محمد صدقني كانت تبتسم لي .. قالت لي كوني بخير واهتمي ف ذياب
محمد: اشش نوره اهدي انتي حلمانه حلمانه
نوره هزت راسها بلا وهي ميته من الصياح: لا لا انا شفتها بس بعدين اختفت ما ادري وين راحت .. كلمتني بعد سمعتها والله ماكنت اتخيل .. صدقني محمد انت تصدقني صح .. انا ما ات..
قاطعها محمد: خلاص خلاص اهدي .. بقولج شيء اهدي شوي
نوره تمت اتشاهق واتطالعه تترياه يتكلم
محمد مسك ويهها: كنتي تحلمين .. هند ف المستشفى مب هني .. انتي لانج تفكرين فيها شفتيها ف حلمج
نوره: بس هي وصتني على ذياب وعلى نفسي
محمد ابتسم : هذا يعني ان هند حلمت فيج الحين.. يعني لازم تتبعين نصيحتها وتهتمين ف نفسج وف البيبي وعلى ذياب بعد
نوره تمت اتطالعه تستوعب كلامه بعدها حضنته وصاحت: محمد اشتقت لها ما اقدر اتحمل خلاص تعبت .. انا اباها واحبها ليش يصير فيها جذي ليش .. ليش هي الوحيده الي تعاني ونحن لا .. دايماً الابتسامه على ويهها ودايماً ايجابيه وما تقول الشيء الي وهي واثقه منه .. نادر ما كانت تعصب .. تعرف منو الي وقف معاي ف العرس هند رغم انها كانت مشغوله بعرسها الا انها ما نستني .. حتى يوم رحنا لها المطار كنت ناويه اخبر ذياب ويومها يمكن كنا بنطلق بس هند خلتني اتراجع عن الفكره .. اكثر عن مره كنت افكر اني اتطلق منك بس هند كانت توقف معاي واتشل الفكره من راسي .. وايد طيبه وقلبها ابيض .. والكل يحبها وعمرها ما ظلمت حد او اذته حتى الخدامات كانت تعاملهم مثل خواتها ومرات تقعد تاكل معاهم ولا تطلب لهم من برا وتاكل معاهم.. كنت احب هالشيء فيها والكل كان يحب الشيء هذا فيها .. بس ليش يصير معاها كل هذا لييييش لييييششش
محمد تم يمسح على راسها: هذا نصيبها ف الدنيا ادعيلها تقوم بالسلامه
نوره: محمد قلبي يعورني.. قلبي يعورني  عليها وايييد .. احس قلبي انشلع من طيحتها هذي
محمد: بسم الله على قلبج خلاص حبيبي اهدي خلاص
نوره تمت اتصيح ف حظنه لين غمضت عيونها ونامت وهي ف حضنه .. عدلها محمد وقام عشان ايب لها ماي بس مسكتها لقميصه منعته يتحرك اي حركه ثانيه ورقد
..............................................
اليوم الثاني .. ف بيت وليد
دخل الصاله وهو معصب من سالفة ذياب .. شاف جود قاعده بروحها مشلغه التلفزيون وسرحانه
وليد: يوم انج بتسرحين حق شو مشلغه التلفزيون
جود سكرت التلفزيون: شكلي شغلته بدون ما احس
وليد: توأمج وينها
جود: راقده عند عموه مزنه
وليد عقد حوايبه: شوووو!!! ... كيف راقده هناك والبيت كله شباب شو تسوي هناك اصلاً
جود: قالت انها تبا اتم مع عموه مزنه اكثر عشان جذي
وليد: دقي عليها خليها ترد البيت احسن لها
جود خذت تلفونها واتصلت ف نجود بس ما ردت عليها
جود: ما ترد
وليد:: اتصلي فيها لين ينفجر تلفونها
جود: يمكن راق..
نجود: السلام عليكم
جود: عليكم السلام
نجود: شعندج تتصلين
وليد: وين كنتي
نجود: عند عموه مزنه
وليد: وشو تسوين هناك
نجود وهي تمشي: ما اسوي شيء قاعده معاها
وليد بصوت عالي: انا يوم اكلمج توقفين تكلميني مب تعطيني ظهرج وتمشين
لفت عليه نجود بعصبيه: خيييير وليييد خيررر .. مب متفيقه حق سوالفك من صباح الله خير
وليد: كيف تروحين هناك والمكان كله شباب وفوق هذا نايمه عندهم
نجود بصوت عالي: نمت ف غرفة هند مب وسط الشباب الي تتكلم عنهم وكانت معاي عموه مزنه... وبعدين انا احسن من الي ينخشون ورا البيت والله يعلم شو يسوون على بالك ما ادري عن سوالفك مع ميره
وليد صفعها كف ومسك فكها بالقو: انا يوم اتكلم معاج تكلميني بادب واحترام وحسج هذا لا يعلى فاهمهههه!!!
جود: وليد هدها
وليد هد نجود وطلع برا البيت .. اما نجود ف تمت واقفه مكانها اتطالع الفراغ
جود حضنتها: عورج وايد
نجود دزتها: هذا الي قلتي عنه انه بيكون لنا سند وظهر
جود: كان معصب و ما يقصد شيء
نجود طنشتها وركضت على غرفتها وقفلت الباب اتصيح
........................................
ف بيت ابو خليفه .. كانوا قاعدين ف الصاله يسولفون .. وذياب كان ف غرفته يتجهز عشان يروح الدوام  .. تعطر وطلع من قسمه شاف اخته خوله طالعه من غرفتها
ذياب: صباح الخير
خوله ابتسمت: صباح النور والسرور
ذياب: صليتي استخاره ؟!
خوله: هيه .. ومرتاحه بعد
ذياب: الحمدلله .. يلا تعالي
خوله: توهم تكلموا عن الموضوع بس انا يت فوق عشان اتطمن على زايد امس كل شوي يفز من نومه
ذياب: زين يلا تعالي
خوله نزلت معاه
ذياب: السلام عليكم
الكل: عليكم السلام والرحمه
ذياب سلم على امه وابوه وقعد عند ابوه وخوله قعدت عنده
ذياب: يقولون سعيد يبا يرد خوله
ابو خليفه: هيه امس قال حق خليفه وانا موافق
ذياب: وخذيتوا شور البنت اذا تبا ترد له ولا لا
ابو خليفه: الشور شور الريال
ذياب : عيل اختي ما ترد له الا بشروط هي تحطها
ابو خليفه :شو الي ما ترد له الا بشروط وين قاعدين نحن
ذياب وقف: انا قلت الي عندي خوله ما ترد لسعيد الا اذا حطت شروطها .. واذا صار عكس الي اقوله بتمشون ف جنازة سعيد اليوم
وطلع وخلاهم منصدمين من كلامه .. لازم ينفذون الي يقوله لانهم يعرفون شكثر ذياب يحب خواته ويخاف عليهم وعادي يسوي اي شيء بس عشان يسعدهم ويحميهم
..........................................
ف الفندق عند نوره ومحمد .. قام من النوم وما شافها موجوده دخل الحمام( وانتو بكرامه) تسبح وبدل ملابسه تعطر وطلع .. شافها قاعده ترتب الصحون على الطاوله .. راح عندها وحضنها من ورا
محمد: صباح الخير
نوره بدون ما تلف عليه: صباح النور
محمد: لا اليوم شكلها النفسيه تمام التمام
نوره لفت عليه: الحمدلله من بعد امس احس رجعت طبيعيه
محمد باسها على راسها: يا حلاتج ويا حلاة الابتسامه الحلوه هذي
نوره: تعال تريق يلا
محمد قعد وهي قعدت معاه ياكلون شوي رن فون محمد ورد عليه
محمد: هلا حمدان
حمدان: عطني نوره
محمد: خير خير شو عطني نوره
حمدان: محمد اباها ضروري
محمد: ما شيء يلا يلا
حمدان: حَمود يالتيس ابا اكلم نوره بسرعه
محمد: انا تقول عني تيس ولا بعد تقولي حمود ويا راسك
نوره: ليش اتطفر به
حمدان: محمد خلصني يلااا ا..
محمد: انزين خلاص جب .. عندك خمس دقايق تكلمها
نوره خذت الفون: الو هلا حمدان
حمدان: شحالج نوره
نوره: بخير الحمدلله
حمدان: نوره قولي حق محمد يردج اليوم
نوره: ليش عاد
حمدان: دخيلج خيتي قوليله يردج .. والله انا قاعد انتحر هني
نوره: انزين شو مستوي
حمدان: تخيلي ابوي قالنا نروح بيت يدوه صالحه وانتي تعرفين هني كله بنات .. وخاصة هذي الي يقولون انها خالتي هذي حلا .. كل شوي لاصقه فيني كرهت نفسي
نوره: ههههههههههههه عاد بهذي صدقت
حمدان: لا تتاخرون اوك
نوره: بنرد باجر خلاص
حمدان: انا قاعد اترجاج وقتلج سيرة حياتي واخر شيء تقولين برد باجر
نوره: انزين شو بتسوي اذا انا رديت شو تبا فيني
حمدان: عشان اقدر اقعد ف البيت .. الحين ما اقدر لانه البيت فاضي وحامد ما يبا يرد البيت عايبتنه القعده هني
نوره: ههههههههه خلاص انزين بشوف
حمدان: يلا بخليج الحين باي
نوره: باي
نوره: يصير نرد اليوم العين
محمد: هو قالج ارجعي
نوره: هيه يبانا نرجع عشان ما عنده حد ف البيت وما يبا يقعد بيت يدته صالحه
محمد طالعها : وانتي تبين تردين ولا
نوره: انا عادي عندي
محمد: انزين .. بنرد اليوم عيل
........................................
عند نجود كانت ف الغرفه اتصيح وبعدها ما فتحت الباب .. اما جود ف كانت قاعده عند الباب تترياها تبطل لها الباب .. يا وليد وشافها
وليد: بعدها قافله الباب
جود بدون ما اتطالعه: تتوقع انها بتفتح الباب بعد الي سويته
وليد: خليها برايها الفتره هذي وايد قامت تدلع
جود وقفت بعصبيه: يكون بعلمك انت اول واحد يمد ايده عليها واسكت له مب لانك على حق .. بس لاني وعدتها انك انت بتكون لها السند والظهر وما حبيت اقول شيء قدامها عشان لا تضعف اكثر
وليد: بس يبقى الي سوته غلط .. عيب تروح تنام ف بيت كله شباب
جود: كنت تقدر تكلمها بهدوء بدون الصريخ والضرب
وليد: انا ما احب اتكلم وحد معطيني ظهره .. كان لازم اعلمها الادب شوي
جود تقدمت صوبه ومسكته من ياقته وسكرت على اسنانها:غصباً عنك اختي متعلمه الادب .. وقسم بالله يا وليد كلمه ثانيه عنها بيصير شيء عمرك ما حلمت فيه ولا تتمنى انه يصير لك .. انا اذا ينيت محد يقدر يمسكني فهمت!!
هدته ونزلت تحت اما وليد ف كان واقف مصدوم من قوتها كان يظن انها ضعيفه وايد وان نجود هي ام لسان الي ما تسكت عن حقها بس الحين طلع كل شيء عكس توقعاته
.........................................
ف بيت اليده صالحه كانوا قاعدين يتريقون .. وحمدان كان قاعد بين امه وبين خاله عمر
حمدان: امايه اليوم برد البيت
ام حمود: لا البيت فاضي ما اقدر اخليك تقعد بروحك هناك
حمدان: نوره ومحمد بيردون اليوم
ام حمود: ادري بيون يتغدون عندنا
اليده صالحه: هيه صح ذكرتيني .. عمر شوف لنا مطعم يسوي لنا عيش ولحم .. وبعد يب لنا حلو ومن هالاشياء
عمر: وليش كل هذا بناتج موجودات خليهم يسون عيش ولحم ويسون حلو
حلا: انا مستحيل ادخل المطبخ لاني ما اعرف اسوي شيء
ساره: وانا امس مسويه اظافري ومستشوره شعري ما اباه يخيس بريحة الطباخ
عمر: وععععع وعععع مالت عليكم من بنات الله يعين ريايلكم عليكم وعلى دلعكم الماصخ
حلا: جب جب على اساس انت ابداً ما تدلع
اليده صالحة: بسكم خلاص .. عمر سو الي قتلك عليه بدون اي كلمه ثانيه
عمر: ان شاء الله.. تبون شيء ثاني بعد
ساره: يب بارد .. بيبسي وهالاشياء وسلامه بتسوي عصير
ام حمود: زين بسوي عصيرين يعني لا تكثر من البارد
عمر: ان شاء الله
.....................................
توقعاتكم؟!!!