أحتجتلك يا أطيب بشر وين ألاقيك؟؟

39

عند فهد ... كان قاعد يسوق سيارته ورن فونه .. شل الفون وشاف الرقم غريب .. رد عليه
فهد: السلام عليكم
المتصل: تعرف حصة خليفه سعد ال.. ؟!!
فهد: هيه نعم اعرفها ليش
المتصل: تعال شلها من عندنا قبل لا يقتلها الزعيم
فهد: وانت منو ومنو الزعيم وحصه وينها
المتصل : بطرش لك اللوكيشن
فهد: دقيقه منو الزعيم
المتصل: انتو تسمونه المجهول .. تعال شلّها ولا بتستلمون جثتها عند باب بيتكم
فهد: يال....
قاطعه صوت انقطاع المكالمة عق فهد فونه وهو معصب  رد خذ فونه عشان يتصل ف خليفه يتأكد بس خاف ان تصير مشكلة ف خله فونه وراح للمكان الي طرشه له المتصل
......................................
ف ألمانيا .. دخلوا الفندق وهم يركضون بسبب الأمطار الغزيرة الي برا وقعدوا ف وحده من الكراسي الي موجوده ف الفندق
هند: ما شاء الله هذا ثالث يوم والأمطار بعدها مواصله
ذياب وهو يرتجف من البرد: يقولج يتوقعون ينزل ثلج الفليل او بعد كم يوم
هند: وناسه عيل .. خلنا نروح الغرفه نبدل وبعدين ننزل ناكل ف الفندق
ذياب: انزين
راحوا شقتهم وذياب قعد ف الصاله وهند راحت الغرفه وخذت ملابسها ودخلت تبدل وتعطرت حطت ماسكرا ورسمت عينها بالايلينر وحطت قلوس وردي وطلعت الصاله لقت ذياب مبدل وقاعد يترياها
ذياب: جاكيتج وين
هند: لبست شيء ثقيل تحت ما احتاج جاكيت
ذياب تقدم صوبها ومسك ويهها: احمدي ربج ان نحن بنتم ف الفندق ولا جان تميتي ف الغرفه
هند ابتسمت: ما حاطه وايد مكياج
ذياب: والله كل شيء فيج يسحر بمكياج ولا بدونه انتي قمر
هند بحيا: مب يوعان انا يوعانه
ذياب وهو يقرص خدها: انتي دواج عندي بعدين دايماً تخربين هاللحظات
هند: هههههههههههههههههه
..........................................
ف بيت بو خليفه .. كانوا قاعدين يسولفون ف الصاله شوي ودخلت عليهم ميره وشافت امها حاضنه دانه وتضحك
ميره: السلام عليكم
الكل: عليكم السلام
ميره برفعة حاجب: خير شعندكم صوت ضحكم واصل لين برا
نوره: عادي قاعدين نسولف .. حياج تعالي قعدي مشتاقتلج ابا اقعد معاج واسولف معاج
ميره: انتي روحي ريلج يدور عليج ف بيت يدوه وآخر شيء انتي قاعده هني تضحكين
نوره: برايه محمد بعدين بروح له.. تعالي انتي اقعدي
ميره: لا ما اقدر اقعد بحضور الشياطين يوم بتروح بي اقعد معاكم
ام خليفه: بسج يا بنت عيب عليج حرمة اخوج هذي اذا ما تحترمينها احترمي وجودي شو ها المذهب
ميره وهي تروح صوب دانه: اذا ما خليته يطلقج ويفرج فرة الجلاب ما اطلع بنت ابوي
دانه: انزين ليش شو مسويتلج انا
ميره: كيفي لانج كريهه وخذيتي اخوي وتبين تقصين عليه .. اعرف عيال الفقر الي نفسكم ما يفكرون الا ف الفلوس ولو واحد فقير  تقدم لكم رفضتوه
نوره: ميره احترمي نفسج شو هالكلام .. كلنا عباد الله و كلن له نصيب ف هالدنيا والواحد ما ياخذ الا نصيبه ودانه نصيبها مع حمد .. حمد و بس
ميره: هه مساكين انتو والله العظيم انكم مساكين .. بطلوا عيونكم وشوفوا عدل و بتعرفون انا عن شو اتكلم
راحت غرفتها قبل لا اي حد يرد عليها .. دانه نزلت راسها والدمعه ف عينها .. لفت عليها نوره
نوره: يا الله عليج يا دانه ثرج وايد حساسه
دانه وهي تصيح : انا احب حمد وتزوجته عن قناعه ما كنت ادري ان عنده فلوس وحلال الا بعد زواجي منه بشهر و بالصدفه عرفت بعد .. امايه والله اني ما خذيته عن طمع ولا اني ابا اطلق منه
ام خليفه وهي تمسح على ظهرها: ما عليه يا بنتي انا مصدقتنج وحمد شرح لي كل شيء وانا راضيه عنج وعنه ما عليج من كلام ميره تراها ياهل وتغار باجر اذا كبرت بتفهم وبتستوعب علاقتج انتي مع حمد
حمد: السلام عليكم
الكل : عليكم السلام
دانه من سمعت صوت حمد قامت من مكانها ودخلت داخل
حمد باستغراب: شفيها دانه
نوره: ما فيها شيء الحين بتي تعال اقعد اباك شوي
حمد وهو يقعد: والله نوير مشتاق لج ومشتاق للسوالف معاج
نوره: انزين شرايك تقول حق محمد انكم تبوني اقعد معاكم عشان نسهر على فلم ومنها نسولف
حمد: صاحية انتي .. انتي توج عروس يديده وتبين تهدين ريلج بروحه و تشوفين معانا فلم
ام خليفه: خل ريلها اي معاها وشوفوا الفلم .. لا تحط شيء ف خاطر البنت
حمد: اوك بشوف محمد
نوره: قول حق الشباب كلهم وانا بكلم البنات كلهم وبنقعد ف ميلسنا مال الريايل وبنطالع
حمد: اوك بس بشرط يكون فلم رعب
نوره: لا مستحيل ما اقدر اطالع رعب .. خله اكشن
حمد: اوك بس انا اختار الفلم
نوره: انزين
دانه وهي تمد لحمد قلاص ماي: تبا ماي
حمد شل عنها القلاص ومسك ايدها وقعدها عنده: شفيها عيونج حمر
دانه: يمكن شي دخل فيهم
حمد: انزين وخشمج ليش احمر.. انتي كنتي تصيحين
دانه: لا منو قال .. ما فيني شيء ما كنت اصيح .. اصلاً ليش اصيح
ام خليفه: حمد .. حرمتك حطها ف عيونك وشوي شوي عليها اسمع منها قبل لا تسمع من حد ثاني وبعدين لا تنسى انها يتيمه
حمد: دانه ف قلبي وعيوني
.......................................
عند فهد وصل المكان وكانت عباره عن رمله فاضيه وظلام ما فيها حد .. اتصل ف الريال الي اتصل عليه قبل وما في رد .. حرك سيارته قدام شوي ولقى عزبه نزل وياه الناطور
فهد: السلام عليكم
الناطور: عليكم السلام
فهد: هذي عزبة الزعيم
الناطور هز راسه بهيه: الهين يجي
تم فهد يتريا برا حوالي عشر دقايق .. شاف محد طلع لف عشان يرد سيارته وتفاجأ بواحد واقف وراه وعلى طول ضربه بخشب طويل خلاه يطيح على الارض .. ومن طاح اتجمعوا عليه مجموعه من الريايل وتموا يضربونه بأخشاب طويلة لين فقد وعيه
1: خلاص خلاص الريال شكلة مات
2: خلونا نشله و نوصله المستشفى
1: انا اقول جذي بعد نحطه عند باب المستشفى ونشرد
3: انزين خلونا نتحرك بسرعه قبل لا اي حد ويشوفنا
شلوا فهد وركبوه السياره ثنين يسوقون سيارة فهد وثنين سيارتهم وصلوا فهد المستشفى وفروه عند باب المستشفى وسيارته وصلوها بيتهم وخلوها مفتوحه وشردوا بدون محد ينتبه لهم
....................................................
بيت ام فارس .. كانوا قاعدين ف قسمهم يسولفون وقاطع سوالفهم صوت دق الباب
فارس وهو يبطل الباب: امايه .. شفيج ؟!!
ام فارس: فارس عيالي فيهم شيء .. اتصل ف اختك شوفها
فارس: يمه انا توني مكلم هندوه عندهم امطار وهم ف الفندق ما فيهم شيء
ام فارس: اخوك فيصل وينه
فارس: امايه شفيج فيصل راقد ف غرفته
ام فارس: عيل فهد .. فهد وين
فارس: اكيد ف غرفته
ام فارس راحت صوب قسم فهد وتمت ادق الباب وما شيء رد .. دخلت غرفته و وراها فارس ولقوا الغرفه فاضيه
ام فارس: اخوك وين
فارس: امايه ما ادري عنه شيء
ام فارس: روح دور اخوك ويبه عندي ابا ولدي ابا ضناي
فارس: يعني وين بيروح هالمينون بيتمشى شوي وبيرد البيت .. انتي بس اهدي شوي
ام فارس مسكته من قميصه: اسمعني عاد هذا اخوك غصباً عنك و اصحى عنك بعد تبا ادوره حياك ما تبا بروح بروحي بدور ولدي
وطلعت برا من بعد ما قالت حق الدريول يجهز السياره ولقت سيارة فهد موجوده. .. راحت صوب السياره على امل انها تحصل فهد بس ما في حد .. طافت على كل بيوت الأهل ادور عليه وما حصلته موجود ومحد يدري .. والكل اتجمع ف بيت اليد وام فارس اتصيح
اليد: ها يا شباب عرفتوا شيء عن الولد
حامد: يدي ما عرفنا شيء لين الحين
حمد: انا كلمت ربعي الي ف مراكز الشرطه يقولون ما مر عليهم هالاسم
ام فارس وهو تصيح: راح ولدي راح .. راح ضناييي
اميره: عموه اهدي وان شاء الله بيحصلونه
ام فارس: محد يدري عنه محد .. يمكن صار فيه شيء .. قلبي منقبض حاسه ان الولد فيه شيء
اميره: لا ان شاء الله ما فيه الا العافيه انتي بس استهدي بالله اذكري الله
ام فارس: لا اله الا الله محمد رسول الله
محمد: السلام عليكم
الكل: عليكم السلام
اليد: عرفت عنه شيء
محمد: كلمت كم واحد وقالولي دقايق وبيردون عليّ .. والحين ما عندنا غير نتريا
دخل وليد و وراه جود ونجود وسألوا وقالوا لهم
وليد: هو كيف اختفى وسيارته عند البيت
حمد: محد يدري
وليد: انزين كلمتوا حد تواصلتوا مع حد عشان يعرف مكانه
حمد: محمد ما قصر
وليد: انزين محمد شرايك نروح ندور عليه
محمد:...
وليد: محمد شفيك أكلمك انا رد عليّ
محمد مطنش:...
وليد وهو يحط ايده على كتف محمد: محم...
قاطعه محمد وهو يدز ايده: شل إيدك ولا تلمسني فااااهممم
اليده: محمددد تكلم مع ولد عمك عدل
وليد: عادي يدوه هو الحين متوتر بس اذا عرف فهد وين بيهدى
محمد بعصبيه مسك وليد من رقبته: صدقني لو عرفت انك تعرف مكان فهد وين بتنقتل .. مستعد اروح فيها مؤبد ولا إعدام بس عشان فهد سمعتنييي!!!
اليد تصارخ على محمد: محمممد هد الولددد خنقته!!! محمممممددددد
حس محمد على دمه وهد وليد
جود: محمد وليد كان معانا ف السوق وتونا رادين ف ما اعتقد انه له دخل بفهد .. اصلاً ولا مره تقابل مع فهد او كلمه
طلع محمد برا من بعد ما رن تلفونه
محمد: الو .. ها بشر عرفت شيء ... شوووووو!!! ف اي مستشفى ... وعرفت منو مسوي فيه جذي ... عرفت انه هو ما في حد غيره بس كيف عرف فهد ... المشكلة ما نقدر نبلغ الشرطة ان في عصابه تلاحقنا لان ما عندنا دليل ... يلا الحين انا ياي ... لا لا بروحي بطمن عليه وبعدين بخبرهم ... اوك يلا مع السلامه
من بعد ما خلص مكالمته ركب سيارته وراح المستشفى
..........................................
ف ألمانيا / مطعم الفندق
طلبوا لهم شوربة مع خبز حار عشان يتدفون .. هند كانت مستمتعه بالأجواء وتآكل على راحتها اما ذياب ف كان يحس بتعب بس ما تكلم ولا قال شيء لانه شاف هند مستانسه
هند: ودي اقعد هني وأطالع الدنيا برا .. وايد حلو منظر المطر مع الطبيعه .. وتعرف وايد متحمسه للثلج خاطري اشوفه وهو ينزل
ذياب: لو ان المطر خفيف جان طلعنا نتمشى برا بس وايد قوي
هند: وناسه .. تعرف شو احلى فقره عندي صدق صدق .. يوم تنش الصبح وتشم ريحة المطر وصوت العصافير والجو مغيم والأرض مبلوله والشمس بين الغيوم واذا طلعت يصير قوس قزح
ذياب: ههههههههههه ... عيل بضبط لج المنبه عشان تقومين واتشوفين هذا كله
هند حطت ايدها على خدها: ودي أشل اجواء ألمانيا معاي العين ابا الكل يشوف كيف الأجواء حلوه
ذياب قدم ويهه صوبه: انا عاد عكسج ودي نتم هني بعيدين عن العين واهلها واتمين طول الوقت تحت عيني وحمايتي و ف حضني بعد
هند غطت ويهها بيدها: هههههههههه
ذياب وهو يقرص خذها: هههههههه كححح كحححححح كح كح كححح هههههههههه كح كح هههه
هند:صحه صحه .. اضحك شوي شوي قتلت بلاعيمك
ذياب : على قلبج .. والله يوم انتي كحححح كحححح تضحكيني شو تبيني كحححححح كحححح اسوي يعني كحح كح كح هاااا
هند: انزين اشرب الشوربة واعصر فيها ليمون زين حق الكحة
ذياب: ما ابا .. ما أروم اكل انتي لقميني
هند خذت الخاشوقه وتمت تاكل ذياب
ذياب: صارت عجيبه طعم الشوربة
هند: حركات انت بعد هههههه
ذياب: كححححح كحححح افا كح كح الحين انا صرت حركات
هند: ذياب قوم خلنا نروح فوق عشان ترتاح شوي
ذياب خذ الكلينكس وتم يكح بالقو ... وبعدين حطه ف مخباة الجاكيت
هند وهي توقف: يلا قوم خلنا نروح .. ادفع الحساب وأمش
ذياب: قعدي قعدي بنقعد شوي وبعدين بنروح
هند وهي تمسك ايده:لا ... يلا امش معاي عشان ترتاح فوق
وقف ذياب ودفع الحساب ومشى مع هند وهي ماسكه ايده وهو كل شوي تزيد كحته ..وصلوا شقتهم ودخلوا وذياب راح الغرفه وانسدح اما هند ف راحت عشان تسوي له ليمون وزنجبيل وعسل و يابته لذياب
هند: خذ اشرب هذا
ذياب: ما ابا شيء .. بس برتاح وبعدين بصير بخير
هند: ذياب خذ هذا اشربه زين حق الكحه
ذياب: انا بخير ما فيني شيء بس بنام شوي وبرتاح صدقيني
هند: خلاص عيل بتم قاعده عندك وهذا القلاص بحطه هني
راحت يابت كرسي وحطته عند ذياب وقَعَدت .. ذياب مد ايده ومسك ايدها ورقد اما هند ف تمت واعيه تحرسه وتدعي ان الله يخفف عليه ألمه
...........................................
توقعاتكم يالجميلين🥰♥️