أحتجتلك يا أطيب بشر وين ألاقيك؟؟

59

عند وليد ..
وليد: ههههههههههه حلو الحين تعجبوني
جاسم: الحين نحن جاهزين لاي امر تقوله
وليد: الحين اباكم تقتلون احمد قدام ولده حمود
جاسم: بس كيف نقتله ما نقدر نقتله وهو ف المستشفى وخاصةً محمد معاهم
وليد:ما ابا اسمع ولا عذر او اي شيء ثاني اجمد اليوم ينقتل .. وباجر ابا حد يشتغل على سيارة محمد
جاسم: ان شاء الله .. باجر ما بتسمع الا الي يسرك
وليد: كفو عليك
..........................................
عند البقيه تجمعوا عشان يتعشون .. الحريم بصوب والريايل بصوب ثاني
نجود: خلود ديمه و ناصر وينهم ما شفتهم اليوم
خلود: تعبانين من الحمى وعطيتهم دوا ولين الحين نايمين
نجود: ما يشوفون شر
خلود: الشر ما اييج
نوره: امايه عطيني الفواكه الي عندج
ام خليفه: نوير بسج من السكر خلاص مب زين
نوره: امايه تراها فواكه وين السكر عادي شيء صحي
ام خليفه: شيء صحي مره مرتين مب عشرين مره
خوله: صدقها امايه ما يصير تاكلين وايد سكر تراه بيأثر عليج وعلى الجنين وعادي يصير فيج سكري الحمل
نوره: انزين بس شويه
ام خليفه: ما شيء .. تبين كلي العشى الي قدامج ما تبين برايج
نوره زعلت: ما ابا اكل انزين .. وبخبر عليكم ذياب
قامت من عندهم ودخلت داخل
ميره: يلا عاد الحين فكوا نفسكم من لسان ذياب .. عاد نوره وزعلت
ام حمود: هههههههههههه دومها ف البيت تتضارب مع محمد عشان السالفه هذي تهد الغدا كامل وتقعد على صحن الفواكه لين اخر شيء لزم ان ما نحط غير الغدا حتى العصير مانعنه
ام خليفه: زين يسوي .. لانها وايد تاكل ف هالسكر .. ما احيد خوله جذي كانت ولا خلود هي الوحيده الي راسها يابس
شوي ويا ذياب وهو ماسك ايد نوره
ذياب: منو مزعل نوره
ام خليفه: محد مزعلها تبا تاكل فواكه وانا منعتها
ذياب: خلوها تاكل الي تباه
خوله: ذياب ما يصير تاكل وايد سكر مب زين حق الجنين ولا حقها
نوره: انزين بس شويه ما اباه كله
ذياب: عطوني صحن الفواكه
خذ صحن الفواكه وعطاها كلت حبة فراولة وتوت وقطعتين مانجو
نوره: بس خلاص شبعت
ذياب: بالعافيه
شوي ورن فونها
نوره: يلا انا بدخل داخل .. دخلت ودخل وراها ذياب
ام خليفه: دلوعه
ميره: انا اخر العنقود ومحد دلعني جذي وهذي من كل صوب تحصل دلع
دانه: حرام عليج عاد .. انا اشوف ان الكل ماخذ حقه ف الدلع وزياده بعد
ام خليفه: هي والله صادقه
ام فارس: صح والكل بالتساوي ما في حد اكثر عن الثاني
ام خليفه: وبعدهم ما يشبعون
............................................
عند نوره .. اول ما ردت على الفون
نوره: هلا محمد
محمد: وينج
نوره: ف الصاله مع ذياب .. ما قدرت اقعد بروحي
محمد: تعشيتي
نوره: هيه الحمدلله
محمد: انزين نوير انا وايد مشغول الحين يمكن ارد باجر الصبح ولا اي الفليل متأخر
نوره: محمد نحن بنام ف المزرعه تدري هالشيء ولا لا.. كيف تخليني بروحي بعد الي صار
محمد: لا ما بتنامون هناك بتردون البيت انا كلمت يدي واقتنع .. اذا تبين روحي بيت اهلج وارقدي عندهم
نوره: لا بترياك ف البيت .. لا تنسى الصبح عندي موعد واباك تكون معاي
محمد: ان شاء الله بحاول .. يلا لازم اسكر الحين
نوره: انتبه على نفسك
محمد: من عيوني وانت بعد انتبهي على نفسج ويويلج يا نوير لو سويتي اي شيء غبي
نوره: ههههه انزين انزين
..................................
اليوم الثاني .. ف بيت ام خليفه / قسم حمد ودانه
دانه: حمد .. حمد قوم وراك دوام اليوم
حمد دزها ولف الصوب الثاني
دانه: حمددد قوووووم
حمد:..
دانه قربت من اذنه وصارخت: حمدددددد
فز حمد من نومه وهو يفرك اذنه: شو ها اففف
دانه: من الصبح اواعيك وما تقوم .. وراك دوام
حمد: استغفر الله .. حد يقوم الناس جذي
دانه: بدال ما انت قاعد جذي قوم اتسبح واتلبس وراك دوام .. ابوك يترياك تحت
حمد طالعها بنظره وقام دخل الحمام( وانتو بكرامه) واما هي ف رتبت الفراش والغرفه وطلعت ملابس حمد وبخرتهم وجهزت له قهوته .. شوي وطلع واتلبس ويا يبا يمشط شعره
دانه: صبر صبر انا ابا امشط شعرك
حمد: توصلين لين راسي؟؟!
دانه: لا تستهبل .. اقعد وبمشطه حقك
قعد حمد من بعد ما عطاها المشط وهي تمت تمشط شعره وكل شوي ترفع نفسها عشان تلحق عدل
حمد ابتسم وقرص خصرها: فديت القصيره الي ما تلحق ههههههه
دانه: حمد عاد .. بسك خلاص لا تلعوزني خلني اخلص شعرك
حمد: حسستيني بتسوين تسريحة
دانه: شو تباني اسوي يوم شعرك هالكثر .. روح تحلق
حمد: ايبي ايبي المشط
دانه: لا لا خلاص بروحي بسويه
مشطت شعره وخلصت وبعدها ابتعدت عنه : خلصت .. شرايك
حمد: ههههه حلو حلو
دانه ابتسمت
حمد:تعالي تعالي .. ليش شعرج مفتوح جذي
دانه: بروح عند الخدامه عشان تمشطه لي
حمد: هههههههههههههه طفرتي الحرمه كل شوي ناطه عندها تمشط لج شعرج
دانه: عيل شو تباني اسوي انا ما اقدر عليه .. خلني اقصه وارتاح واريح هالمسكينه معاي
حمد: احلمي تقصينه .. ما شيء
دانه: ما ادري ليش تحب الشعر الطويل
حمد باسها على خدها: جهزيلي الكوفي تاخرت ..وخلي عنج الشعر الطويل هذا
دانه:جاهز الكوفي.. هذوه على الطاوله
حمد خذ قهوته وطير لها بوسه وطلع
............................................
عند نوره كانت قاعده تتجهز عشان موعدها .. شوي وسمعت صوت الباب راحت وفتحته
نوره: امايه ..صباح الخير
ام حمود: صباح النور .. شحالج اليوم
نوره : تمام الحمدلله احسن عن امس
ام حمود: الحمدلله .. محمد بعده ما يا
نوره: لا والله بعده .. المفروض يكون واصل لان وراي موعد
ام حمود: اتصلي فيه شو فيه وين
نوره: امايه اتصلت ثلاث مرات ما يرد و خفت اتصل مره ثانيه ويعصب عليّ
ام حمود: محد بينني غير هالولد
محمد: السلام عليكم
نوره وام حمود: وعليكم السلام و الرحمه
ام حمود: وينك انت من امس اتصل فيك وما ترد
محمد: كنت مشغول
ام حمود: وقبل شوي نوره متصله فيك ثلاث مرات ليش رديت عليها
محمد: كنت ناسي تلفوني ف السياره
ام حمود: انزين يلا روح بدل ملابسك عشان توديها الموعد عن تتأخر ويقعدونها اكثر هناك
محمد : ان شاء الله
راحت ام حمود ومحمد لف على نوره وعقد حوايبه
نوره: شفيك
محمد: ليش واقفه عند الباب بدون شيله
نوره: كنت اكلم عموه وبعدين الحين الصبح والكل راقد
محمد: منو قالج الكل راقد حامد قاعد برا يغسل سيارته
نوره: محمد شفيك ترا غرفة حامد بعيده عن غرفتنا
محمد: انزين دخلي يلا
نوره دخلت داخل ودخل هو وراها
نوره: تباني اسويلك ريوق
محمد: سويلي توست وجبن مع قهوه .. راسي يعورني
نوره: محمد اذا ما تقدر تروح معاي عادي بخلي ذياب يوديني
محمد: اقدر اقدر .. انتي روحي لين اتسبح واطلع
نوره: انزين
دخل محمد يتسبح اما نوره سوت له الي يباه و حطته حقه على الطاوله وبعدين لبست شيلتها تعطرت وقعدت تترياه .. دقايق وطلع ولبس غترته وتعطر ولف عليها
نوره: محمد يلا بتأخرنا تراك
محمد خذ ريوقه: يلا قومي
نوره: انزين اقعد تريق
محمد: بتريق ف الطريق يلا قومي بسرعه
ركبوا السياره منطلقين صوب المستشفى
.................................................
نقدم الاحداث ... العصر كانوا كل الشباب مجتمعين ف ميلس اليد يسولفون ويلعبون ورقه
حامد: محمد ما تبا تلعب معانا
محمد: لا ما ابا
ذياب بهمس: كل هذا عشان وليد موجود
محمد: لا تيب لي طاريه الله يخليك .. انا بالقو ماسك نفسي عشان لا اقوم واقتله
ذياب: انزين ليش ما تروح ترتاح
محمد: ما ابا امايه تسألني عن شيء
ذياب باستغراب: تسألك عن شو بالضبط
محمد نزل راسه : امس انا طول الليل كنت ف المستشفى .. ابوي مرتفع عنده الضغط ومرقدينه ف المستشفى
ذياب: سلامات ما يشوف شر .. ليش مرتفع عنه الضغط
محمد: خسر كل فلوسه والشركه وكل فلس كان يملكه
ذياب: لا حول ولا قوة الا بالله .. الله يكون ف عونه ويعوضه باللي احسن عنه
محمد: امين .. بس انا متأكد ان وليد ورا السالفه هذي امس طول اليوم على التلفون وكل ما شافني ابتسم
ذياب: ما عليه مصيره بينفضح
محمد: ان...
قطع كلامه صوت فونه .. رد عليه
محمد: الو
حمود بتعب: عظم الله اجرك يا اخوي
محمد: شووو .. ف منو
حمود: ابوي مات .. مات وهو يوصي عليكم واحد واحد ويطلب السماح منكم .. كان يبا يشوفك محمد كان يبا يشوفك
محمد: حمود انت شو قاعد اتقول ابوي شفيه
حامد وحمدان وقفوا لعب وراحوا صوب اخوهم وذياب يحاول يعرف شو مستوي
حمود: اقولك ابوي توفى ... ما ادري شو الي صار فجاه وتوفى
محمد سكر التلفون ف ويه حمود وطلع يركض والكل يناديه بس ما شيء فايده ركب سيارته وتحرك بأقسى سرعة عنده
................................................
عند نوره .. كانت ف بيت ابوها .. قاعده مع خلود ودانه وميره
نوره وهي تبوس ناصر: يمههه فديت اليهال وريحتهم
دانه: بس حرام عليج ارحمي الولد .. هذي ثامن مره تبوسينه
نوره: ما اقدر اتحمل كل هالكياته وما ابوسه .. انا ماسكه نفسي عشان ما اعضه
خلود: هيه عشان خليفه ينقز من فوق بالعصا
نوره:ههههههههههههههه
دانه: خوله ما بتي اليوم
نوره: ما اعتقد مشغوله مع سعيد
دانه:الله يهنيهم يارب ويوفقهم
الكل: امين
ميره: نوره
نوره لفت عليها : نعم
ميره تقربت منها وقعدت قدامها: نوره اسفه على هذاك اليوم والله ما كنت اقصد شيء من الكلام الي قلته .. بس كنت اباهم يوافقون على وليد
نوره: عادي ميره ما صار شيء .. فالاخير اذا كان وليد من نصيبج الله بيوفقج معاه ان شاء الله
دانه بدون ما تحس: ان شاء الله ما يكون من نصيبج
ميره بطلت عينها: نععمممم!!! .. خير حبيبتي عيدي اللي قلتيه ما سمعت
دانه: اسفه ما كنت اقصد .. ان شاء الله يكون من نصيبج
نوره: ميره اتصلي ف جود ونجود خل ايون يقعدون معانا
ميره طالعت دانه بنظرات وراحت فوق
خلود: بروح ايبلكم عصير
نوره: ليش تقولين جذي قدامها
دانه: والله ما حسيت على نفسي اباها تتخلص منه بسرعه قبل لا يصير اي شيء بينهم
نوره: الله يهديج بس
دقيقتين واتجمعوا كلهم مع بعض وقعدوا سوالف وحش وضحك
نوره: هههههههههه اهههه يا ربي ما اقدر اتحمل بطني قام يعورني من الضحك
جود: وييي نسيت اقولكم .. تخيلوا اليوم اختنا اونها بتسوي كوميديا ف البيت
نجود: لا لا لا ههههههههه امانه جود الا هذي السالفه امانه هههههههههه
نوره: لا لا قولي شو مستوي
جود: اسفه لازم اقول .. المهم راحت ولبست كندوره قصيره وضيقه عليها شوي وويها ترسته مكياج وشعرها خلته مثل الاندومي ومنفوش جذي واللي يشوفها يقول رايحة حفله تنكر مال الهيلوين .. المهم دخل وليد البيت والليتات مسكره شغل الليت ولا يشوف نجود قدامه .. والله العظيم من الخوف دعم الباب ثلاث مرات ههههههههههههه
الكل: هههههههههههههههههههههههههههههههههه
خلود: ههههههههههه حرام عليكم والله انا اشفق على هالوليد بتيه سكته قلبيه بسبتكم
دانه: هههههه جان صورتيها
جود: ما لحقت هي من خاف وليد راحت بدلت على طول عشان ما يهزبها
نوره:ههههههههههههههههههههههه
قاطع سوالفهم ذياب وحمد
نوره بابتسامه: هلا باخواني الي صار لي دهر مشتاقتلهم
اختفت ابتسامتها من شافت ويوهم وكانه في مصيبه بتطيح على راسهم
نوره وقفت: شفيكم
حمد حضن نوره: نوير بنقولج شيء بس لازم ما ..
قاطعته نوره وهي تبتعد عنه: شفيك شو تبا تقولي .. ذياب شو اللي مستوي
ذياب تقدم صوبها ومسك ايدها: نوره .. محمد م..
نوره قاطعته: شو فيه محمد .. وينه هو اصلاً كان معاك الحين هو وين
حمد: نوره محمد مسوي حادث ك..
قاطعته نوره: ليش تفاول عليه لا تقول جذي .. ذياب اسمعه شو يقول
ذياب: نوره محمد ف المستشفى ومسوي حادث
نوره بصوت عالي: لا تقولون عنه جذي .. محمد ف البيت
ذياب: نوره
نوره : تباني اثبت لك .. انزين اصبر شوي
خذت تلفونها وتمت تتصل ف محمد اكثر عن مره وكل مره يطلع مغلق لين اخر شيء فرت تلفونها بالقو على الارض
نوره: دايماً يتعمد يلعوزني .. بس اصبروا بروح ايبه حقكم عشان تتأكدون
يت تبا تطلع بس ذياب مسك ايدها
ذياب وصارخ عليها: نوره متى تبين تستوعبين محمد مسوي حادث مرقد ف المستشفى .. طلع من عندنا وسرعته 200
نوره تمت واقفه ما تعرف شو اتسوي .. او شو تقول .. تمت اتطالع ذياب وحمد تترجاهم بعيونها يقولون ان السالفه كلها مقلب .. بس شافت ف عيون كل واحد فيهم الحزن والصدق ما عرفت اتسوي شيء غير انها تقعد على الارض واتصيح
..................................................
بعد حوالي ساعه ونص .. الكل وصل له خبر وفاة ابو حمود وخبر حادث محمد .. وراحوا المستشفى عشان يشوفون محمد وابو حمود لانهم ف نفس المستشفى .. طبعا ام حمود منهاره ريلها توفى و ولدها ما تدري اي شيء عن حالته وحمدان وحامد وحمود منهارين نفس الشيء .. ونوره اكثر وحده فيهم تعبانه ومنهاره وهالمره قعدت اتصيح قدام الكل وما همها حد كل الي يهمها ان محمد يقوم بالسلامه .. ذياب كان واقف عندها عشان محد يشوف دموعها لانه ما يحب هالشيء
دقايق وطلع الدكتور
الدكتور: لو سمحتوا تفضلوا عند المريض يبا يشوفكم بس حاولوا انكم ما ترهقونه اكثر
دخلوا عند محمد وشافوه منسدح وايده اليمين مربوطه وويه فيه كدمات وحاطين لصق جروح على يبهته
تقدمت نوره صوبه ومسكت ايده وعيونها ادمع
نوره: خفت عليك وايد ..وايد خفت عليك لدرجة اني كنت اتمنى ان الحادث يصير فيني و...
محمد حط ايده على حلجها: اششش لا تكملين .. بسم الله عليج من كل شر ..انتي قلبي يعني اذا انتي بخير وبصحه زينه انا بكون بخير
نوره مسكت ايده الي على حلجها وباسته .. وهو بدوره مسح دموعها ولف على الباقي يرد على اللي يتحمد له بالسلامه .. شوي
محمد: ممكن شوي تطلعون برا ابا اكلم ذياب ف موضوع
كلهم طلعوا برا ونوره كانت بتطلع معاهم بس محمد مسك ايدها
محمد: انتي لا تطلعين خلج قاعده
قعدت نوره .. ذياب : شو تبا تقول
محمد: ابوي كيف توفى
ذياب باستغراب: قالولنا انها سكته قلبيه
محمد هز راسها ب لا: لا .. ابوي توفى متسمم .. في حد حط سم ف مغذيه وانتشر السم ف جسمه وتوفى
ذياب بصدمه: شووو .. ومنو هذا الي حاط السم
محمد: منو غيره .. ذياب ما اقدر اسكت اكثر عن جذي .. لازم نطلع حقيقته
نوره: انزين كيف عرفت انه هو
محمد: حمود قالي ان في واحد دخل على اساس انه الدكتور المناوب على الدكتور المسؤول عن ابوي وقال ان لازم يحط دوا ف المغذي يكون مثل الفيتامينات وغيره .. حمود استغرب بس ما تكلم وخل الدكتور يشوف شغله لين صار الي صار
ذياب: والدكتور هذا وينه الحين
محمد: محد يعرف مكانه او يعرف عنه اي معلومه وشافوا ف كيمرات المراقبه وماطلع لهم شيء .. لانه كان مغطي ويهه طول الوقت
ذياب: الخسيس .. انا ودي اقتله من اليوم قبل باجر بس فهد الي مب راضي يتحرك كل ما كلمته يقول بعده الوقت .. ما ادري شو الي يترياه
.............................................
توقعاتكم يالحلوين 💙💙