كنت ولم اعد

#28

خلاهم يحكو وخرج ركب فطونوبيلتو وقلع بكل سرعة رايح ليها عيط عيط مكان والو

ايهم: افففف هاد الطفلة متقدرش تقعد طرونكيل لازم تدير مشاكل

كمل يصوڨ حارڨ كل الاشارات تقول الطريق ملكو حتى لحق قدام باب دارها ستاسيونا الطونوبيل وخرج دق لباب حتى شبع بصح والو حتى جرب انو يحلها تحلت

ايهم: كي لعادة بابها دايمن مفتوح ( شفيتو اول مرة 😂😂 متبدلش كيلعادة ادخل يا مبارك بحمارك )

دخل غلق موراه لباب لقا الدنيا ضلمة كلش طافي طلع فدروج رايح لبيتها ( باين يعرفها نسيتو بلي بات عندها وقت جا اول مرة )

لقاها راقدة على لفراش رايحة فسابع نومة حاطة يديها على كرشها راح يفيقها وغير حط يدو عليها شداتو من يدو بيدها وحطت يدها الثانية على رقبتو رايحة تخنقو الا انو سحبت يدها وقت شافت عينيه لي يبرقو مع انعكاس لقمر لي يضوي مالتاقة عليهم ( كان راح يخلخلها باش تنوض السيد موالف مع جنة تضرب الزنزلة ومتنوضش واما على لانا فمتتوقعوش منها اقل من هكا الوسط لي راهي فيه يفرض عليها تكون صاحيا حتى فاعمق نومها )

عض على شفافو يتمعن فيها مستناش منها ردة الفعل لقوية هادي قرب اكثر ليها متركز عل يد و بليد الثانيا قاعد يرتب فخصلات شعرها ويحكي بكل هدوء مخلي لكل كلمة بلاصتها وعاطيها قيمتها

ايهم: وقت تلاقيت بيك اول مرة كنتي قطة تخبشي غفلت عليك يامات لقيتك لبؤة تعضي
لانا: ايهم بعد
ايهم: ولوكان منبعدش
لانا: نبعدك على طريقتي ديجا علاه جيت
ايهم: جيت نتفقدك
لانا: علاه وش قالولك bebe نرضع في صبعي جي تتفقدني

بعد عليها ووقف عدل الشوميز تاعو

ايهم: هاد لكلام دخليه لراس جنة
لانا:  tqt ميدخلش وندير وش ندير
ايهم: المهم وجدي روحك نروحو للدار راي تستناك حرقت التيليفون متهناتش حتى جيت
لانا: اه

خبطت يدها على راسها نحات من عليها لكوفيرطا وخرجت من فراشها تجري هكاك بالشوغت والبيستيي وهو يتبع فيها حبطت فالدروج وهو تبعها راحت مجيهت لفوتاي جبدت صاكها لي رماتو كي دخلت ( شفيتو عليه ) حلاتو وجبدت منو تليفونها لقات طاشما لي appel من عند جنة وايهم مساج من عند حسام وابال من عند نائل و 2 من عند نجم

رسمت تبسيمة عريضة على فمها تخزر فيه او تحكي

لانا: يووووووو راني نحس روحي Paris Hilton في نهار لحقوني ڨاع هاد les appel
ايهم: ادا تفرحي هكا ونشوفو ضرست لعقل لي معندكش نولي كل يوم نعيطلك حاجة ساهلة

قربت ليه علخر تحكي

لانا: لالا عندي ضرست لعقل شوف هاهي

وحلت فمها على آخرو تحاول توريهالو تصرفها خلاه يتبسم بدون ارادتو حكمها من فمها بزوج صبعتين وكمشهولها حتى ولا كشغل فم حوتة