كنت ولم اعد

#62

لانا: حاجة متصعب عليا يا خويا وريني شطارتك دكا و طبق لخطوة الثانية
ايمن: ناوية تروحي لروسيا بعد متلقايهم
لانا: منعرفش
ايمن: رايحة ياك
لانا: امممم حابة نعرف علاش وفنفس لوقت خايفة
ايمن: مناش
لانا: منعرفش بالضبط اما علاه تخلاو عليا خايفة ما يكونوش حوسو عليا
ايمن: مكانش واحد ميحوسش على كبدتو راكي قطعة منهم اكيد تكون صرات حاجة كبيرة
لانا: ..........
ايمن: ايه خلينا نشوفو وش نلقاو
لانا: وش تلقا انا نروح كاش ما كاين عيطلي
ايمن: وين ماشية
لانا: باي

رفدت صاكها وخرجت من دارو ركبت فطونوبيل تمتم مع روحها راكي قعدتي وحدك من جديد يا لانا مع اللول حصلتي فجسمك وشكلك وبعد ما صلحتيه ما تبدل ولا شي يا ترى المشكل فيا ولا وين حمد لله يا ربي على كل شي عسى لي جاي فيه خير منعرف وش مخبي

مسحت الزوج دمعاته لي حبطو من عينيها شعلت الضواو وطلعت لبيتها رمات صاكها على فراشها ودخلت للدريسينغ روم لبست بيجامة خفيفة وخرجت لفت انتباهها لمعة الصندوق لي خرج شويا مالصاك وقت لاحتو على لفراش

رفدت صاكها وجبدت منو الصنوق حطت صاكها بجنب وقعدت في فراشها وحطاتو في حجرها حلاتو وبدات تجبد فلورق المطوين و بدات تقرى فيهم ورقة ورقة

                                                      28/2/2015

ليوم يا لانا كبرتي رغم صغر سنك طول عمرك تبهريني بالمواقف لي تتاخذيها عقلك كبير ياسر متاكدة انو رح يوصلك لمكان بعيد صحيح مراحش نكون جنبك اما متأكدة انو رح يكون عندي مكان فقلبك سامحيني طول عمرك ونتي متوهمة انو باباك مات وتحملتي لعيشة كيتيمة بلا اب يحميك متوهمة اني امك اما الواقع لعكس تماما سامحيني يا بنتي سامحيني

دموعها صارو يحبطو وحدهم مع كل حرف تقراه دمعات ينسابو بكل خفة ويطيحو على الورقة لي شادتها عنيها خدودها وعينيها حمارو غصة تجمعت في حلقها مش قادرة مش قادرة تستحمل اكثر

                                                    29/07/2017

لانا عزيزتي بما انو قاعدة تقراي فهاد الرسائل معناها انتقلت لرحمت ربي خايفة نواجهك ونعطيك هاد الصندوق خايفة من رد فعلك من نضرات عينيك خايفة تنسايني وتنساي حبي ليك خايفة نشوف ملامح الكره على وجهك صدقيني حبي ليك كان كبير حب يكفي انو يدفي لعالم ومافيه حبيتك وكانك قطعة مني والشاهد عليا ربي مع مرضي هاذا عارفة مراحش نطول نتمنى تلقاي الصندوق عارفة انو حاجة ما تخفى عليك بنيتي الشاطرة المزيانة

لانا: 😭 ماما رح نقعد نحبك طول عمري لاخر نفس في حياتي ليوم وين يرفدو نعشي ويحطوني تحت التراب ورح نقعد نحبك خيرك عليا سابق ومستحيل ننسى الحضن الدافي لي ضمني ليه وخباني مستحيل ننسى اليد لي مسحت دموعي وعاونتني نوض بعد كل طيحة

                                                    05/03/2018

لانا بنتي ورح تقعدي ديما بنتي صح مش من دمي اما لي بيناتنا اقوى بكثير من رابطة الدم اصلا يقولو ان الام لي تربي مش لي تولد حابة نقولك اني راضية عليك دنيا واخرا يا ملاكي متعرفيش كمية الفرحة لي حسيتها اول مرة حملتك فيها حبيتك من اول نضرة اصلا بضحكتك البريئة المزيانة لي تترسم عشفافك وتخلي عينيك يضحكو بدورهم فيهم هاديك اللمعة لي عمري مشفتها في حتى واحد تدخلي للقلب بلا ما تطرقي بابو

لانا: راحت ياما الضحكة و تمحات اللمعة مسحوها يماما مسحوها 😭😭 راحت لمرا لي ضحكني لي تفرحي ومطيقش زعافي راحت 😭

                                                    06/04/2018

لانا بنتي فمثل هاد اليوم دخلتي لداري ودخلتي معاك الفرحة يا فرحت عمري بزينك بخفة دمك بحبك لكل الناس بعفويتك بطيبتك بحنيتك بكرمك بكل شي فيك شي لي تمنيت نشوفو فاولادي سامحيني على كل شي داروه فيك وكل شي رح يديروهولك اما اتاكدي مهما صرا ومهما راح يصرا راح نبقى امك لي صهرت عليك ولي تحبك حافضي على روحك وعلى طيبت قلبك يا كبدتي

لانا: راحت طيبة القلب والحنية راحت لانا بعد ما رحتي و خليتيني فهاد لعالم لكبير القاسي والبارد وانا وانا كيف الورقة لي طاحت ماشجرة وحملها الريح خلاها تتخبط من بلاصة لبلاصة وحطها فوسط لبحر خليتيني ياماما وحدي تايهة ماعرفتش الطريق يا ماما الموجة لي جي ترفدني وتخبطني على حجرة وينك اماما وينك ارجعي وديني معاك مشتاقة لحضنك ودفاه مشتاقة لريحتك ادني معاك وهنيني تعبت راني تعبت افهموني منيش قادرة للقوة هاذي تعبت منها خلااص 😭