كنت ولم اعد

#34

     قطعو لقاطو كلاو شويا ولعبو بيه شويا طلسو بعضاهم ڨاع بيه ( يعني لوكان خليتولي حقي ماشي خير ما يترما حرام عليكم امبعد نتفاهمو يخي حلالف ) طلعت لانا غسلت وجهها تم تم وحبطت

لانا: نص ساعة ونرجع
ايهم: يرحم باباك مترجعيهاش بياس ديطاشي
لانا: هههه كون هاني

راحت وخلاتهم سمعو غير احتكاك الرود مع القاعة مالسرعة لي نطالقت فيها

ايهم: ايما قلبي
نائل: ههههه متخافش راي تدخل لل formula one وتخرج هي اللولة بدون كوارث لانا ونعرفها طول عمرها تعشق السرعة ولمخاطر
جنة: ههه نت مشفتهاش كي شافت طونوبيلتو ياو لوكان ما مدهالهاش راي تخطفها لانا ونعرفها
الكل: ههههه

نص ساعة تحديدا لااكثر ولا اقل وسمعو صوت لي frein تاع طونوبيل ثواني من بعد وسمعوها حلت لباب تاع الدخلة
لانا: وااو شعور لا يوصف

دخلت ليهم متحيرة علاش ساكتين وهي خلاتهم يرحو رحيان
لانا: شبيكم ساكتين شكون مات

دخلت للصالون لقات نجم قاعد

لانا: اه

حكت شعرها وتقدمت عطات لمفاتح لايهم

لانا: طمن مصرالها والو ... نعرفكم نجم المسؤول تاعي ورح يرجعني لفرانسا نجم عايلتي

   كتفت بهاد الزوج كلمات وطلعت للفوق جيب صاكها وشويا دوزان حاطتهم فالكابة وخلات الجو لتحت مكهرب جنة لي مش متحملة انو لانا تعاود تبعد عليها نائل لي متعاطف مع جنة برغم انو علابالو بلي هاذا في مصلحة لانا وايهم لي قاعد ببرودو لمعتاد حبطت لانا ولي خلات حاجز الصمت يتقطع على كلمات نجم لقليلة
نجم: خلينا نرجعو
لانا: حاضر

كانت كلمتها كافية باش تعطي الضوء الاخضر لجنة لي بمجرد ما سمعتها عطات العنان لدموعها وخلاتهم يسيلو على طول خدودها يرسمو فطريقهم باش يلحقو لمحطتهم لاخيرة ويوصلو للارض قد ما سيات تشد دموعها ومتبكيش باش تخليلها ذكرى مليحة عالاقل فهاد ليوم الا انها مقدرتش تعرف انو بقاولها غير شهرين مبقاش قد اللي فات الا انها مصدقتش روحها وقت شافتها ومش مستعدة تعاود تعيش شعور الحرمان من دارة وجديد مش مستعدة تفيق بلا بيها صحيح انو تفيقها وهي حالتها حالة لجاجة لمسرودة بصح احسن متكون بعيدة عليها طاحت لكابة من يد لانا وفتحتلها يديها لي مستناتش ولو جزء من الثانية باش تستقبل حضنها الدافي الحضن لي كان ورح يبقا سندها السند اللي تعتمد عليه تشكيلو احزانها وتخبرو افراحها السند لي وقف معاها وقت تخلى عليها باباها السند لي دعمها او وصلها لوين هي عليه دكا تحكي بصعوبة تحاول تخرج الكلمات بين شهقاتها لي غير يعلاو
جنة: متروحيش لانا ابقي معانا

لانا: شششششت يا روحي خلاص متبكيش دموعك غاليين عليا
جنة: رح نتوحشك متبطايش
لانا: رح ندير كلشي باش منبطاش ونجي نوعدك وهاني عطيتك كلمتي
جنة: نحبك لانا 😭
لانا: حتى انا نحبك يا عمري حتى انا خلاص امسحيلي هاد الدموع شكون يبكي فعيد ميلاد اختو
جنة: هههه اسكتي اسكتي اصلا نسيتيه
لانا: كفاش فقتي
جنة: لوكان منعرفكش يا خروب بلادي نقول عليك شيكولا
لانا: يااه كبرتي او وليتي تعرفي تحكي
جنة: نفكرك بلي كبيرة عليك بخمس سنين
لانا: ولي يشوفك دك يقول عليك بنتي
جنة: هههههه
لانا: ايوه ابقاي ديما تضحكي ونوعدك نبقاو نحكيو كل يوم
جنة: ماشي على الربعة تاع الصباح راني نقولك من دووك
لانا: ههههه خلاص ماشي على 4 تاع الصباح

جبدت عليها حكمت كابتها وخرجت تبع في نجم بعد ما شافت نضرة اخيرة فنائل وايهم لي مقدرتش تعرف فاش يخمم مع ملامحو لي متعكس حتى شعور وبما انها تعشق التحدي ايهم بالنسبة ليها لغز ولازم تحلو ركبت معاه فالطونوبيل بسكات منتقت بحتى حرف حتى وصلو للمطار جازو على نقطت التفتيش وعطاولهم اوراقهم فيريفياوهم وكملو للطيارة يلقاو فيزن تما

لانا: راك هنا
يزن: وين حبيتيني نكون خلاصت لعطلة وراجعين للجحيم
لانا: هههه
يزن: علاه تضحكي

قعدت قدامو واكتفت بالسكوت كجواب لسؤالو

4 سوايع تقريبا وكانو فملحق التدريب بالتحديد الفقسم الرئيسي واقفة مع مجموعة من المتدربين والمتدربات من بينهم يزن قاعدين فقاعة اجتماعات كبيرة دخل واحد متعرفوش لابس الزي الرسمي تاع الانتربول موراه 3 رجال من بينهم دانيال لابسين نفس الزي وبعدهم نجم و ربعة وحدوخرين لابسين قمجة زرقة مع سروال ادكن شويا على لون الشوميز دخلو وقعدو الراجل الاول على راس الطابلة دنيال ولي لابسين كيفو على يمينو ونجم والبقية على شمالو
قعدو لحضلت حتى دخلت مرا من لبستها تبان سكرتيرة jupe midi noir شوميز بيضة وطالون فنفس لون ال jupe فيه نص ميترا طول عطات مجموعة من الدوصيات للشخص يلي مترأس الطابلة واحد متجرأ يحل فمو ويحكي ويقطع الصمت لي خلق نوع من الخوف بين الحاضرين خوف لا منقدروش نقولو خوف لانهم بما انو وصلو لهنا معناها محاو الخوف من قاموسهم خلينا نقولو توتر احسن اما هو فخذا وقتو فتفحص كل ورقة ومع كل دوصيي يهز راسو ويشوف في  واحد من المتدربين العشرين