كنت ولم اعد

#65

قاعدة تشوف مالزجاج فالاطباء دايرين عليه وهو في وسطهم مش جايب خبر للي صاير من حولو وضعوا خطير لانو الرصاصة كانت عميقة وتحركت لحد لٱن مجبدوهاش وزاد على هاذا كمية الدم لي خسرها ولي راهو يخسر فيها وهاد الشي صعب عليهم المهمة اكثر مش قادرين يشوفو وينها من الدم لي يخرج اما هي فعالم بحالتها غير ربي قلبها رح يحبس من كمية لخوف لي تحس بيها خوفها من انها تخسرو وتكمل حياتها بلا بيه واخيرا حست بمكانتو عندها وتاكدت من مشاعرها تجاهو اما شويا روطار زعما ادا فاق راح يحاكيها يسامحها والاهم من هادا يعاود يطرح عليها عرضو اسئلة تدي وجيب فيها حتى شافت واحد من الممرضين خارج يجري عارضت طريقو تسأل فيه بعينيها حروفها خانوها مش قادرة تحكي

الممرض: طمني حالتو مزالت مستقرة الدكتور لقا مكان الرصاصة ورح يجبدها اما الدم لي عندنا خلاص ولازم نطلبولو من بنك الدم اما خايفين يطولو محتاجينو بسرعة باش نكفو العملية

وفاء: وش زمرة دموو
الممرض: +o
وفاء: نفس زمرة دمي خليني نعطيلو
الممرض: لازم نديرو فحوصات ادا ما عندك حتى مرض ينتقل عبر الدم
وفاء: لا معنديش ملفي الطبي عندكم اتأكدو منو معندناش وقت ( لانو المشفى هاذا تابع ليهم وعدندهم فحوصات دورية فاكيد عندهم الملف الطبي )

خذاها معاه للغرفة بعد ما تاكد من سجلها الطبي طلعت على ذراعها وربطهالها باش يبانو عروقها حضر ال seraing لي متصلة بالكيس متاع الدم الفارغ ودخلهالها فيدها وبقا ماسكها الدم بدا يخرج ويسيل عبر التيو للكيس

خذا منها زوج اكياس دم وداهم معاه باش يكملو الجراحة ما بيد ما يوصلو البقية من بنك الدم لانهم مقدروش يسيطرو على تخثر الدم متاعو
راح مخليها مع الممرضة تعتني بيها لانو داخت شويا مع كمية الدم لي نحاوهالها اما هي فلا مش راضية تقعد واصرت انها تروح تشوفو رغم كل محاولات الممرضة فاقناعها اما هي راصها يابس وخلات الممرضة ترضخلها

عاونتها تمشي لانو مش قادرة تخطي حتى الخطوات الاولى وحدها

وصلت قدام غرفة العمليات ووقفت عند الزجاج تشوف فيه تستحضر في كل لحضة جوزتها معاه من وقت ما تلقاو في عرس جنة لليوم لكل جازو عليها صحيح ماشي بزاف اما كانو كافيين باش يخلو قلبها يرفرف ودقاتو يعلاو بمجرد ما اتحط عينها على عينو دموعها جراو على طول خدها من جهة لامت روحها على انها مقدرتش تنفذ مهمتها على اكمل وجه وتخرج الارواح البريئة لي كانو تما فشلت ومقدرش تسلكو حتى هوا اما من جيهة ثانية فرحانة فرحانة انو يحبها باتم معنى الكلمة وانو مستعد يضحي على جالها حتى ولو كان الثمن حياتو

خرج الطبيب وراحت تجري ليه تسألو بعينيها

الدكتور: المريض تجاوز مرحلة الخطر الرصاصة كانت عميقة اما لحمد لله متسببت فتلف حتى عصب حتى وقت تحركت وهادا الشي فصالح المريض. الرصاصة خرجناها بقاو يوقفولو النزيف ويخيطوه