كنت ولم اعد

#61

ايمن: بلعقل عزيزتي مانيش ناوي نعاود لباب
لانا: شوف نتا متزيدليش
ايمن: ههههه شواطنك حاضرين على حساب شوفة وجاني لفضول نعرف شكون ستدعاهم
لانا: وشكون من غيرو
ايمن: خلينا منو نحكو فالمفيد قلتيلي من بعد تعرف جوابي

خزرت فيه جبدت ورقة من صاكها وحطتها قدامو قرن حواجبو

ايمن: وش هاذي لورقة
لانا: اقراها ولا نجي نعلمك
ايمن: no way كفاه جبتيها وانا داير مخططات كفاش ندخلو ونجيبوها مدوهالك خلاوك تدخلي

خزرت فيه وتبسمت نص تبسيمة 😏

   ____________ ( flash back ) __________

    لانا تحكي

جنة: ايه نخرجو وش رايك نعملو شوبينغ

وفجأة جا في بالي لمول لي قدام دارنا

لانا: ايه نروحو ... خلي نلبس ونجي

طلعت لبيتي لبست ريڨلت روحي حطيت الدوزان لي رح نحتاجهم في صاكي ساعتي مفاتحي شويا مكياج نغطي بيه لي ساغن لي على عيني وحبطت نشوف في جنة قاعدة على لفوتاي او وقت شافتني تقعدت و حاولت تصفر منظرها ضحكني بعد محاولات بائست بائت بالفشل ستسلمت وقررت تبدل الطريقة

جنة: مصلحتش خليني على طاريقة التقليدية ... احم احم .... اوووووهوووو بدلنا ستيل
لانا: هههه لالا برك والفتيني بلي robe
جنة: هههه امشي

خرجنا ما لدار ركبنا فالطونوبيل وديماريت لين وصلنا قدام لمول جيت حابطة نشوف في كارمن حابطة مالباطيمة ايييي قلبي على زهري يكون كاش عتروس مات باش تسڨم حان وقت تنفيذ الخطة

حلت جنة لباب و خزرت فيا تاع احبطي وش تستناي وانا مخي خير كفاه ندخل ومنين حتى دارنا جايا فالطابق ل 11 طاح راح مات

لانا: اسبقيني نڨاري الطونوبيل ونلحقك
جنة: اوكي نتلاقو فلجيهة تاع ل make-up
لانا: اوكي.

حبطت مالطونوبيل ستنيتها حتى دخلت للمول نحيت مونتويا حطيتو فالطونوبيل باش ميثقلنيش رفدت صاكي وخرجت طول للباطيمة طلعت فلاسونسور وصلت وجبدت مفتاحي نسيي نحل لباب لعل وعسى مبدلوش la sérure امبوسيبل منقدرش نامن زهري راو داير تحالف معايا ولا كفاه وقيل صاح لعتروس هاداك مات دخلت غلقت لباب مورايا ورحت نشوف بيت ماما اكيد لورق يكونو تما شديت لباس راح نحلها حتى نلقاها مغلوقة حي خلاص التعاهد ولا كفاه جيت نحوس على لمفتاح حتى نسمع المفتاح فالباب تاع برا والٱن تاكدت انو صرا انذار كاذب لعتروس ما ماتش وانما تغاشا برك ومع لي فطن خاني زهري وتخلى عليا جريت للبيت لي قدامي من زهري تاع كارمن مع صوت الطالون لي راهو يقرب للبيت فاكيد هي

      كارمن تحكي

حبطت نمشي حتى نتفكر بلي نسيت لا كاغت تاعي افففف طلعت ستنيت الزبل تاع لاسونسوغ فتحت لباب دخلت طول لبيتي نحوس عليها حتا لمحتها فوق لا كوافوز جيت نجبدها حتى طاحت البوبية لي معلقة عليها خواتمي افففف هداك ما خص زيد راني روطار بديت نلم فيهم بالواحد حتى خزرت تحت فراشي ادا طاحولي تحتو طليت نلقى زوج طايحين رفدتهم رجعتهم لبلاصتهم وخرجت

        لانا تحكي

خرجت للبالكون ندعي ربي انها مجيش والا رح نضطر نصوطي ونتعلق فكاش تاقة شفتها خرجت شويا من بعد سمعت لباب تخبطت مزالت فعوايدها متتبدلش خرجت معنديش لوقت نحوس على المفتاح جبدت موس صغير من صاكي حطيتو عثقبت المفتاح وقعدت ندور ثواني وكان الباب مفتوح دخلت لبيت مزالها كيما كانت الشي الوحيد لي تغير فيها انو صارت ضلمه النور لي كانت فيها ماتت الدنيا غبرة شعور غريب انتابني دموعي ساحو مستناوش حتى نفهم وعلاش ولا حتى كفاش هزيت راسي يمين وشمال ومسحت لكم دمعة لي نزلو حوست فالقجار كامل ملقيت حتى ورقة تثبت اني ماشي بنتها حتى مالدفتر العائلي متأكدة اني مقيدة على اسمها لحضة تفكرت الصندوق لي مكانتش تخليني نمسو
لانا: وين حاطاتو
حليت لخزانة فارغة
لانا: وين وين وين زعما رفدوه اكيد لا .... وايت سريرها مكانش فهاد لبلاصة

دنيتو على الحيط
لانا: وكانو باب صغيرة

خبطت الحيط نتأكد حتى خرج صوت دليل على انو لحيط مفرغ ملداخل جبدت لموس وحاولت نخلعو من مكانو الشي لي صرا بعد 4 محاولات

لانا: واخيرا

جبدت الصندوق من مكانو حطيتو على حجري وفتحتو لقيت فيه مجموعة من الاوراق رفدت وحدة فيهم لقيتها لي نحتاجها الورقة لي مقيد عليها انو متكفلين بيا مذكور عليها اسمي وٱسم عيلتي وين او وقتاش زدت صح كنت عارفة اني عايشة فكذبة اما كان عندي امل انو يطلع كلشي مجرد حلمة خايبة وانو انا بنت جنة وٱدم تمنيت اما وين طول عمري وانا نقرى من عند اساتذة الادب انو التمني هو طلب المستحيل اما لليوم باش تأكدت من هاذ القاعدة صحيح الدنيا تعلمك اكثر من ما تتعلم عند اي استاذ اما عندها طريقة قاسية فالتدريس

كملت قريت الورقة اما لفتت انتباهي حاجة مش ماما جنة لي تبناتني شكونها كنزة رجاء هاذي عمري سمعت بٱسمها على لسان ماما متأكدة من هاد الشي خلي يجي نهار ونعرفو شكونها طويت الورقة حطيتها فصاكي و لميت الصندوق محلاه من برة اما في قلبو مخبي اسرار سودة ضلمت معاها قلبي وخلاتو يدوي كيف الرعود فوسط السما الكحلة لمعمرة غيوم رجعت كلشي مكانو غلقت لباب وخرجت تم تم حطيت صاكي فالطونوبيل جبت la carte Banquére وطلعت لجنة اكيد تندبلي

طلعت ل centre commercial نلقاها تستنا فيا قدام وحد لحانوت حاطة يديها على خصرا وتخزر فيا

لانا: هههه مهبولة
جنة: وين كنتي يا لالة
لانا: ملقيتش ستاسيونمون لغاشي
جنة: وملقيتيش ستاسيونمون نص ساعة
لانا: كنت نحكي مع الموضفة.... تي وشبيك عاملتيلي محضر امشي .... وريلي وش شريتي

    ___________ ( flash back and ) ________