كنت ولم اعد

#3

سامي يحكي

لحقنا للدار ڨاريت الطونوبيل خرجت مالطونوبيل ورحت حليتلها لباب
لانا: اووو عالجنتلمان
سامي: هادا ڨاع ومعجبناكش
لانا: سام امشي خالتي فاطما تستنانا
محسيتش كفاه امي خرجت مالباب وعيطت
فاطما: مرحبا بيك بنتي عاش مان شافك
ونزلت تبوس وتعنق فيها المسكينا خنقتها
سامي:اذكر القط يجيك ينط
فاطمة: قلت شي ولدي
سامي: مقلت والو سلامتك
فاطمة: فوتي فوتي بنتي طيبتلك وحد التشختشوخة تلحسي صبعتيك موراها
لانا: بلحق خالتي لوكان تشوفي شحال متشهيتها ( مام انا تقول حست بينا بصح نتي راح تاكلي وانت نقعد نتخيل 😂😂 المهم عايلت سامي كانو يسكنو في Alger علابيها يهدرو الدزيرية ونتقلو لوهران بحكم خدمت بابات سامي)
فاطمة:نعرفك تحبيها ارواحي
شدتها عنقتها ودخلو للدار
سامي: والله وانا نسيتوني

ضحكو ومشاو وعلى سعدي تبعتهم هاد الزوج مش نرمال غير يتلاقاو ببعضهم ينساو العالم الخارجي
فطرنا وضحكنا وتفرهدنا وماما مخلاتش لانا تروح حتا عشاتها امبعد سلمت عليها 77 خطرة او وصاتها عشرين خطرة باش خلاتني نوصلها

عند لانا

لمت ڨاع لغراض لي عندها وحطتهم في فاليز صغيرة
حكمت صورة يماها( تشفاو عليها هاديك لي حطتها فالساكادو تاعها كي هربت 😁) و بدلت تمسح علا وجها تحتول تسترجع فملامحها
لانا: توحشتك توحشتك يا ماما شفتي وي وصلت بنتك تمنيت لوكان شفتيني لوكان فتخرتي بيا ودرتي وعدة تسمع بيها ڨاع الحومة وينك يا حببتي وين تبدلت بزاف يا ماما هاني رجعت قوية كيما كنتي تحبي تشوفيني بصح على حساب واش على حساب برائتي برائتي كلها راحت نهشوه واحد واحد كل واحد على طريقتو وكل واحد على اسلوبو
تحجرت دمعة في عينها مش راضيا تنزل حطت لكادر فالفاليز غلقتها وحطتها قدام الباب وراحت طول رقدت

________________________________________

صباح جديد واحداث جديدة تسنا فيها (و فيكم 😃) قامت صباح بصح ليوم مخرجتش تعمل فوتينغ اصلا راح لحال على الفوتينغ قعدت في فراشها تخرب في تيليفونها حتا صونا

لانا: نائل
نائل: ناس تقول صباح الخير ههه
لانا: صباح الخير
نائل: عيطت نسقسيك ادا خممتي
لانا: مش قلت تعطيني وقت نفكر
نائل: وملبارح لليوم ماشي وقت
( نقوللكم وش طلب منها ولا مزال 🤔🤔 خلي نقوللكم اصلا شوقتكم بما فيه الكفاية )
نائل: زيد كاينة مبارات فنهايت هاد الاسبوع وادا قبلتي حاب تشاركي فيا
لانا: اه انا نشارك ونفوت ديراكت على لحلبة
نائل: لي يسمع يقول اول مرة تدخلي للحلبة وديري بوكس

( ايوة صح ايوة ايه 😂😂 لانا دير لبوكس ونائل لكوتش لي كان يدربها لانو نهار دخلت للنادي طلبو منها تختار رياضا ديرها اضافتا للتمارينات تاع انقاس الوزن وهي خيرت البوكس لانو حست روحها محتاجة تتعلم فن من فنون الدفاع عن النفس بحطم انو ملت من انو كل خطرة تنضرب وتكون الضحية هكا بش تقدر تحمي روحها مالناس عامة ومن جاد وجود خاصة)