فاقت صباح على ضوء الشمس لي تسلل للغرفة وبدا يداعب في لحمها دارت للجيهة الثانية تتفقدو لقات لبلاصة فارغة ناضت حلت الصالدوبان ملقاتوش راحت للدريسينڨ كيف كيف حبطت التحت دخلت للكوزينة ملقاتوش اما لقاتو محضرلها لفطور
لانا: صار هكا
قعدت فطرت كانو ماصرا والو لمت الطابلة غسلت الماعن وطلعت الفوق دارت دوش خفيف شيحت شعرها جبداتو وبدات دير فمكياجها جات دير ڨلوص حتى شافت روج
لانا: حاب تلعب اوكي نلعبو
دارت روج غامق شويا ولبست روبة دوميمونش خضرة فيها عقاش فضي من جيهت سدرها وعلى يديها لبست بليغة فضية ورفدت مفاتحها لي حطتهم فوق تابل دو نوي وقت طلعت جيب le poing American حبطت تحوس على تليفونها حتى لقاتو فلاكاف رفداتو ركبت فطونوبيلتها طول لدار ايهم لحقت لقات لبورطاي مغلوق حبطت تشوف لعساس وين حتى خرج ليها يجري
العساس: سام.سامحيني مدام
لانا: لا عادي هاك برك دخلها
شد عليها لمفاتح محبط راسو فالارض
العساس: حاضر مدام
لانا: بلا مدام حبيتو تكبروني بسيف مدموازال تكفي
العساس: سامحيني مدام هادي اوامر
لانا: اوامر؟!؛
العساس: اوامر موسيو ايهم
لانا: اوكي تقدر تروح
راحت دقت لباب حلتلها لخدامة
الخدامة: بونجوغ مدام لانا تفضلي
لانا: نت تان
الخدامة: سامحيني مفهمتكش
لانا: لا والو كل شي حاضر
الخدامة: وي مدام كل شي واجد
لانا: مليح ايهم راو هنا
الخدامة: لالا مدام جا مقبيل بصح عاود خرج تمتم
لانا: معلابالكش وقتاش يجي
الخدامة: لالا مقاليش
لانا: اوكي مرسي ... السكات مزال مناضو؟!
الخدامة: ايه مزال مناضوش مدام تحبي نوضهم
لانا: انا نوض وفاء ونتي نوضي البقية
الخدامة: حاضر.
طلعت لبيتها لقات وفاء راقدة غير توشاتها باش تنوضها فطنت
لانا: صباح الخير
وفاء: صباح النور وين كنتي لبارح مخليتني وحدي
لانا: ممم باين كانت معاك فرح وزيد خليتك بحمايت قيس
وفاء: اه ايه
لانا: وشبيك حمرتي اواه وقيل رح تلحقي جنة ونبقى وحدي بايرة
وفاء: حبسي متخلطي
لانا: علاه انا لي كنت نشطح مع قيس لبارح علاحساب مشفيت نتي كنتي معاه فلابيست يعني الصح الصح خرجتو تهبلو
ضربتها بمخدة بصح لانا شدتها وبدات تضحك عليها كفاه رجعت حمرة
وفاء: صامطة
لانا: ههههه مزوجتكم مزوجتكم يالوكان اخر حاجة في حياتي
وفاء: زوجي روحك امبعد خمي فالناس
لانا: ههههه هادي امبعد نخمم فيها وجدي روحك قريب يجو لجماعة ونتي مزالكي بلبيجامة
وفاء: ايه بيسك انا بنادم ماشي سردوك نوض قبل من لفجر
لانا: ههههه تمعني عليا
رجعت ضربتها بلمخدة لي كانت في يدها وخرجت خلاتها دوش وتبدل في راحتها اما هي فراحت طول لبيت رهف تتفقد الضرف لي خلاهولها ايمن حلت لباب لقاتو فوق فراشها محوستش تفهم بزاف رفداتو وخرجت عيطت الايمن صونا صونا ما جوبهاش
أنت تقرأ
كنت ولم اعد
حركة (أكشن)هكذا هي الأيام .. حَرمتني حتى من الأحلام .. عشقت الوحدة والعذاب ..الأفراح بيني وبينها حِجاب .. إلى مَتى يا قلبي؟ ..... إلى متى ستؤلمني الأيام؟ .... وإلى متى سأكتم الأحزان الى متى ساتحمل احساسي بالاشعور والفقدان ؟؟ ... الى متى ساحس بذاك الفراغ الك...
