كنت ولم اعد

#59

انا: ايي خلاص عييييييييييت دك رجليا يرفعولي قضية خلع
جنة: ههههههه امشي بقات هاد lboutique
لانا: يا الاهي عناه عناه ديري فيا هكذا منغيضكش 3 سوايع وانا نمشي فكرتيني فيامات نهار بعتونا لبنما
جنة: نهار لقيتي فوقك حنش
لانا: هدا وش تفكرتي
جنة: ههههه
لانا: خلاص انا نستناك فالطونوبيل رجليا نحرقو.
جنة: نحرقو؟؟؟
لانا: ايه بيسك طابو مقبيل
جنة: هههههه خلاص هادي لبوتيك اللخرة بصح ناكلو قبل منروحو

كلاو شبعو وحبطو للطونوبيل حاملين في يديهم قنطار صواشا او وصلتها لدار نائل
جنة: هيا احبطي
لانا: خلي المرة الجاية
جنة: هيااااا Sinn نزعف عليك
لانا: اوووو والله راني عيانة خلي نهار ٱخر

راحت من جيهتها حلتلها الباب وجات تنحيلها La Cienture

جنة: هيا بدون نقاش
لانا: خلاص خلاص هاني هابطة
جنة: ياي شحال عندنا متعشينات عشاء عائلي حنا 4
لانا: ربعة؟؟؟
جنة: ايا متحكيش بزاف خلينا نلمو لغراض

دخلو مع بعض رافدين السشيات فيديهم وجاو طالعين لغرفتها

جنة: عيشة كملتي
عيشة: ايه مدام
جنة: يا بنتي بلا مدام هادي راني فمقام بنتك جنة حاف تكفي بلا رسميات.  ..... جا نائل
عيشة: لا مدام
جنة؛: وش تفاهمنا
عيشة: قصدي جنة ههههه
جنة: خلاص تقدري تروحي انا نكمل لباقي
عيشة: merciii
لانا:  شكون هادي
جنة: عيشة لبون تاعي تجي تعاوني سعات فالدار تخدم على ولادها يحليلها مسكينة
لانا: علاه مسكينة راهي لالات النسا بهاد لعمر قبلت تخدم وتعيل ولادها احسن ما تطلب فالشارع
جنة: ايه صح عندك حق

رمات روحها علبونك تخمم فخطوتها لجاية محست بروحها غير راقدة

جنة: تسمعي فيا ياخي

طلعت راسها لقاتها راقدة تبسمت لا اراديا

جنة: سامحيني لانا صح انا كبيرا عليك اما انت اوعى مني واحسن مني لولا نائل لكان غلطت في حقك وندمت طول حياتي

نحات لها باسكاتها غطاتها طفات الضو وحبطت لتحت تسخن فلعشا وتوجد فالطابلة حتا سمعت لباب نحل وصوت نائل لي وصلها

نائل: احنا جيينااا
جنة: شششششش نقس حسك لانا راقدة ... ايهووومي وحشتني
ايهم: ههههه هاني جيت
جنة: لكان مجيتش لكان قتلتك
نائل: لانا هنا
جنة: ايه خرجنا عملنا شوبينغ وبسيف باش قنعتها تقعد معانا
نائل: بصحتكم عزيزتي .....
جنة: راهي فغرفتنا راقدة متعملش حس تعرفها نومها خفيف
نائل: لا نغسل غير هنا اما مش من عادتها ترقد هاد الوقت بلعكس كانت تصرعني وقت تلقاني راقد هاد الوقت
جنة: ههههه والله نفس الشي محاضرة طويلة عريضة اما تعبانة لي مرت عليه ماشي ساهل
ايهم: علاه وش صرالها
جنة: عرفت انو هذوك ماشي عايلتها
نائل: وشنو
جنة: ايه والله هادا لي يفسر معاملتهم ليها
ايهم: وكفاه عرفت
جنة: منعرفش بالضبط تعرف لانا كل كلامها مشفر ومختصر تقول لكلمات رح يخلاصو اذا حكات بصح الضاهر انو اختها هي لي حكاتلها كفاه الله اعلم
ايهم: ايه ربي معاها
جنة: نتوما اغسلو و خلوني نحط لعشا باش نروح نوض لانا

راح كل واحد يغسل وكملت حطت لعشا جات تعيط للانا حتى شافتها حابطة تحك في عينيها
جنة: بونجوغ ولا بونسواغ
لانا: هههه على حساب شحال رقدت بونجوغ
جنة: bien dormi
لانا: ويي بصح راني مدڨدڨة تقول كنت ندارب فالمنام
جنة: هههههه اغسلي وارواحي نتعشاو

طلعت غسلت وجها رفدت صاكها تشوف تليفونها لقات ايمن معيطلها زوج خطرات رفداتو وحبطت للكوزينة لقاتهم قاعدين شافت فيه نفسيتها نسدت قعدت مقابلاتو

جنة: هاتي طبسيك نفرغلك

مدتلها طبسها

لانا: متسقيليش بزاف ..... يكفي merci

حطت طبسيها قدامها تلعب بفرشيطتها عليه حاسة بعنيه لي مستقرين عليها نائل غايضاتو حالتها بدات تاكل حتى سمعت تليفونها يصوني رفدت تليفونها تحكي بكل هدوء متجاهلة النضرات لي راح تخترقها

لانا: بونسواغ ايمن
ايمن: ..........
لانا: CV ونت
ايمن: .......
لانا: امممـ فكرت
ايمن: ........
لانا: من بعد تعرف جوابي
ايمن: .......
لانا: لالا خلي انا نجوز ليك متشقيش روحك
ايمن: ........
لانا: اوك صح دك شويا

كوبات عليه لقاتهم لكل يخزرو فيها شافت فيهم و دارتلهم اشارة بحواجبها تاع واش شي لي عطا الضوء الاخضر لجنة باش تحكي

جنة: شكونو
لانا: صديق
جنة: اوووهوووو معرفتينيش عليه
لانا: 😏😏
نائل: ومراحش تعرفك عليه وش ديري بيه
لانا: ههههههه
جنة: مغيار وش فيها
نائل: ني مغيار ني هم يحزنون قلت مكانش معناها مكانش
جنة: هيه فهمت
ايهم: انا نروح
جنة: وين مزال لحال
لانا: خليه تكون تستنا فيه

تبسيمة خبيثة ترسمت على وجهو

جنة: شكون هادي
ايهم: صديقتي

نائل: ڨاع عندكم اصدقاء وصديقات غير انا ولا كيفاه

جنة: والله نعميلك عينيك قال صديقات قال
لانا: ههههه افروها مع بعض انا تان عندي شكون يستنا فيا

خزر فيها لكان يلقى يحبسها ومايخليها تروح لحتى بلاصة سلم على جنة وائل وخرج اما هي فرفدت صاكها ودعتهم وخرجت بدورها حتى لقاتو متكي على طونوبيلتها يستنا فيها قربت منو تشوف فيه تشبع منو وتستجمع قوتها لي تتلاشا بمجرد ما توقف قدامو

ايهم: ننصحك متقربيلوش بزاف
لانا: والا