كنت ولم اعد

#71

نروحو عند توم ودان لي حاليا لبسو اقنعة تغير ملامح وجهم لبسو perruque وحطو لي لونتي باش يتناسب شكلهم مع الهوية لجديدة لي عطاهالهم يزن وقت تلاقاو في ليون وصلو لمطار موسكو مزاللهم 3 سوايع لوصول دافيد هيڨل للمطار

تفقدو البوابة لي يخرجو منها المسافرين لي جايين مالجزائر وتفقدو اقرب مرحاض لهاد البوابة جبدو مخططات التهوية لي توصلهم من المرحاض لبرا المطار بعد ما تولى توم فك البراغي تاع فتحات التهوية لي يسحقوها وقت يخرجو دان تولى تعطيل المرحاض الاول والثاني لانو بما انو هيڨل راح يكون مزروب فرح يدخل لاقرب واحد وبما انو عطل الاول والثاني فاكيد راح يدخل للثالث وميروحش للبقية

نص ساعة تفصلهم عن وصول الطيارة بعد ما حفض توم طريق الخروج عبر فتحات التهوية قطع المخطط ورماه فالتوالات وطلع وقعد داخل فتحة التهوية يستنا في هيڨل يوصل اما دان فكان واقف برا يتأكد من سير الخطة

شاف هيڨل من بعيد عطى اشارة لتوم مالسماعة حتى شاف راجل داخل للتوالات زرب خطواتو وسبقو غير دخل السيد عمل روحو يغسل في يديه

دان: ( يحكي بالانجليزية ) عفوا هادا تان معطل يمكن مزال مشافوهش
الراجل: اه اوكي مرسي رح نستعمل هاذا

دخل الراجل المرحاض الرابع اما دان فلمح هيڨل يدخل للثالث بسرعة بعد ما جرب الاول والثاني كيما توقع تماما اما توم خلاه وقت كان خارج وحبط مالفتحة بكل خفة بلا ما يعمل حتى صوت وحطلو مشوار فيه مادة لفلوران على نيفو وفمو شي لي خلاه يفقد وعيو تماما دخل دان المرحاض وشد هيڨل مابيد ما طلع توم في فتحة التهوية وشد هيڨل من يديه يحاول يطلعو ودان ساعدو ودفعو من رجليه بعد ما طلعوه طلع دان و قفل فتحة التهوية موراه ( توم طلع الاول لانو هو لي حفض طريق الخروج )

وصلو لبرا ركبوه فالطونوبيل ركب دان يصوڨ اما توم رجع للمطار باش يلحق الطيارة لي رايحة لنيس ( مكان اقامتو بالاساس ) وهكا وقت يوصل لنيس ينحي البيروك والماسك وليلونتي فكاش مرحاض يحطهم فكرطابو ويروح لليون  بهويتو الحقيقية على اساس انو ماغادرش نيس اطلاقا وهاداوين راهو رايح لليون باش يحضر الاجتماع الشهري تاعهم

اما دان فكمل يصوڨ للمستودع لي قالتلو عليه لانا بعتلها مساج انو " الطرد وصل للبيت العتيق وراهو فايدينا " ( قصدو بالطرد هو هيڨل والبيت العتيق هو الدار لقديمة وين مدتلو العنوان ) ورجع للمطار ڨارا الطونوبيل بعيد شويا وراح مباشرة لليون بعد 4  سوايع من التحليق وصل لمطار ليون خرج وراح لمكان فارغ نحى الماسك ل perruque ولي لونتي حطهم فكرطابو و خذا تاكسي وراح للمركز الرئيسي الانتربول
                _______________________

قبل 7 ساعات - مطار موسكو
الحارس1: وكانو طول فالمرحاض
الحارس2: ملٱحسن نتفقدوه

دخلو بين 5 يتفقدوه حلو ڨاع البيبان اما فص ملح وداب خرجو للسيارة لي تستناهم برا

*****: وينو
الحارس 2: راح
***: كفاه هدا راح ونتو وش كنتو ديرو
الحارس4: دخل للحمام وبعدها ملقيناهش
****: حوسو عليه فالمطار وحنا راح نشوفو كميرات المراقبة
                    ___________________

الحديث بالانجليزية

دخلو لغرفة المراقبة او وراولهم شارة الانتربول لمزورة

****: حابين نراجعو كمرات المراقبة المتواجدة فالقسم ج لقبل حوالي نصف ساعة
$$$$: عفوا اما الكمرات مكانوش يمشو من شي 3 ساعات كان كاين une chutes de tension فالجزء الرئيسي وباش نمشو الرادار و وبوابات المسافرين واجهزة الكشف اضطرينا نستغناو على بعض الكمرات من بينها كميرات القسم ج لانو مفيهاش بزاف مسافرين
                    __________________

قبل 11 ساعات - ليون

قاعد فغرفتو حاكم ل PC تاعو حاط جهاز تشويش فالغرفة يستنى فالميساج متاع دان وتوم يوصل بعد ساعة مالانتضار وصلو ميساج لتيليفونو " توم وجيري رح يوصلو للميدان بعد ساعة اذا سيبدأ العرذض بعد 4 ساعات "

فهم من كلامهم انهم رح يوصلو للمطار بعد ساعة وانو هيڨل راح يوصل بعد 3 ساعات

حل نظام التهكير الخاص بيه وبدا يخترق فنظام مطار موسكو الدولي بعد حوالي ساعة كان وصل للنظام  بصورة تخليهم ميفيقوش انهم تعرضو للتهكير عطل كهرباء القسم الرئيسي وبهاد الفعل خلاهم تلقائيا يستعملو كهرباء الاقسام الفرعية وبما انهم رح يستعملو اجهزة كثيرة بكهرباء قليلة وانو الجزء الرئيسي لي عندو الاولوية فالكرباء رح يستنزف كهرباء الاقسام الفرعية وبالتالي رح تصرا une chutes de tension وهكا تلقائيا رح يستغناو عالاجهزة كيما الكمرات ورح يعوضوها بتكثيف المراقبة البشرية
قعد حوالي ساعتين ونص يتأكد من استمرارية مخططاتو بعد ما شافها نجحت وانو مستحيل يرجعوا الحالة الطبيعية الا بعد ساعتين عالاقل وهنا يكون دان وتوم عالاكيد غادرو المطار

غلق ل PC تاعو نحى جهاز التشويش وهبط للتحت يوجد في قهوتو سمع صوت الباب الشي لي خلاه يشوف في ساعتو

يزن: وكانو طولتي شويا

حطت كرطابها فبيتها ورجعت ليه

وفاء: تعرف الزبل تاع الغوتاغ تاعهم دايمن لازم تستنا ساعة ولا زوج
يزن: تشربي
وفاء: وي بليز، وقتاه يلحق توم
يزن: ساعة ونص ويكون هنا
وفاء: اوكي

قعدو مع بعض يحكو فامور خارج الخدمة حتى وصل توم

وفاء: ياهلا هادي غيبة
توم: منعرف شكون لي غاب ومسمعناش حسو
يزن: اسكتو علينا يرحم باباكم
توم: حقا جي لانا ليوم
يزن: وشكون يعلم لهدرة للبيبي لي جبناه
توم: بففففف خصارة كنت حابة نشوفو كفاه يتعلم
وفاء: ههه خايفة عليه طريقتها فالتنطيق صعيبة شويا
قعدو يحكو مع بعض حتى دخل دان
وفاء: والله جازو 4 ساعات بلا منفيق
يزن: 4 ساعات و نص
توم: حكيت معاها
دان: لالا قالتلي نخلي الطرد فمكانو ونمشي
توم: وقتاه الاجتماع
يزن: على ساعة
دان: اففف يااا حاب نرقد