An Accident in Broad Daylight || ဘာသာပြန်《Completed》

Chapter 5

သူစက်ဘီးပေါ်ရောက်သည့်အခါ ရွှီထန်းချန်က ရိကျယ်၏အမြင်ကိုကွယ်နေမည်စိုးသည့်အတွက် ခေါင်းစွပ်ကိုချွတ်လိုက်လေသည်။

"မဖယ်လိုက်နဲ့ ဆောင်းထား"

ရိကျယ်က သူ့ခေါင်းအထက်မှရုတ်တရက်ပြောလာ၏။

"အေးတယ်လေ အစ်ကို့နားရွက်တွေနီလာလိမ့်မယ်"

ရွှီထန်းချန်သည် လက်နှစ်ဖက်လုံးကိုလက်ကိုင်တန်းပေါ်တင်လိုက်ပြီး သူ့ကိုယ်သူထိန်းရန် ခွန်အားထုတ်လိုက်လေသည်။သူကရှေ့နှင့် ပိုနီးကပ်သွား လေသည်။

"ငါကမင်းရဲ့မြင်ကွင်းကိုကွယ်နေမိလိမ့်မယ်"

"မဟုတ်တာ"

ရိကျယ်ကလျင်မြန်စွာ ပြောလိုက်၏။ထိုသို့ပြောပြီးနောက် သူကရှင်းပြချက်တစ်ခုကိုလည်းထည့်သွင်းလာ၏။

"အစ်ကိုက အဲ့လောက်အရပ်မရှည်ပါဘူး ဦးထုတ်ဆောင်းထားရင်တောင်မှ ကျွန်တော့်ကိုကွယ်မထားနိုင်ဘူး"

ရွှီထန်းချန်သည် သူ့လက်နှစ်ဖက်ကိုအုပ်သွားစေရန် အင်္ကျီကိုဆွဲချလိုက်ပြီး စက်ဘီးရွေ့ရန်စောင့်နေလေသည်။ထိုစကားများကိုကြားလိုက်ရပြီးနောက် သူကစက္ကန့်ပိုင်းမျှ အံ့သြသွား၏။သူ့မျက်လုံးများက အနည်းငယ်ကျယ်လာပြီး ခေါင်းကိုလှည့်လိုက်လေသည်။ရိကျယ်သည် အကြောင်းအရင်းကိုနားမလည်ဘဲ အံ့ဩစွာဖြင့်သူ့ကိုငေးကြည့်နေခဲ့၏။

"မင်းကငါ့ကိုအရပ်ပုတယ်လို့ပြောတာလား?"

ရွှီထန်းချန်ကမျက်မှောင်ကြုတ်ပြီး ခေါင်းကိုစောင်းလျက်မေးလာ၏။

ရိကျယ်မှာနောက်ဆုံးတွင် ရွှီထန်းချန်၏တိတ်ဆိတ်နေမှုကို နားလည်သွားတော့သည်။သူက
လျှာကိုကိုက်လိုက်ပြီး ခေါင်းကိုမြန်မြန်ခါကာအခြေအနေကို ကုစားရန်ကြိုးစားလိုက်၏။

"မပုပါဘူး အစ်ကိုကသာမန်အရပ်ပါပဲ"

'သာမန်အရပ်?'

သူသည် ၁.၈ မီတာသို့ရောက်ခြင်းမရှိဘဲ တကယ်ကိုအရပ်ရှည်သည်ဟု မယူဆနိုင်ပေ။သို့သော် သူကရိကျယ်ကဲ့သို့ အရပ်မြင့်သည့်လူတစ်ယောက်နားတွင် ရပ်နေခြင်းမရှိပါက သူ့အရပ်မှာလုံလောက်နေသေးသည်ဟု ခံစားရ၏။