An Accident in Broad Daylight || ဘာသာပြန်《Completed》

Valentine Extra

ရိကျယ်သည် မကြာသေးမီကအလုပ်များနေခဲ့၏။ညဘက်သူအိမ်ပြန်ရောက်သောအခါ သန်းခေါင်ကျော်နေပြီဖြစ်ပြီး အိမ်ပြန်ရောက်ပြီးနောက်တွင်ပင် လေ့လာမှု၏အမျိုးမျိုးသောခွဲခြမ်းစိတ်ဖြာမှုများနှင့်အစီရင်ခံစာများကိုလည်း ရေးသားရလေသည်။ရွှီထန်းချန်ကသူနှင့်အတူညအနည်းငယ်မျှအတူရှိနေပေးပြီးနောက် သူ့ရင်ဘတ်များကစတင်နာကျင်လာတော့သည်။သူက၎င်းကိုရိကျယ်အားပြောပြခဲ့ပြီး ရိကျယ်မှာကြောက်လန့်သွားသဖြင့် သူ့အားထပ်မစောင့်တော့ဘဲ ဆယ့်တစ်နာရီမတိုင်မီ၌အိပ်ရန် ထပ်တလဲလဲတောင်းပန်ခဲ့၏။

ထို့ကြောင့် ညတိုင်းရိကျယ်အိမ်ပြန်ရောက်သောအခါ ရွှီထန်းချန်သည်စောင်တစ်ထည်ကိုခြုံလျက် ဆိုဖာပေါ်တွင်အိပ်ပျော်နေသည်ကို မြင်ခဲ့ရလေသည်။ဟိုယခင်က အခန်းထဲ၌အလင်းရောင်များရှိနေလျှင် ရွှီထန်းချန်ကအိပ်ပျော်မည်မဟုတ်ပေ။ယခုတော့ မည်မျှပင်နောက်ကျသည်ဖြစ်စေ ဧည့်ခန်းထဲ၌ အမြဲတမ်းမီးလင်းနေပေလိမ့်မည်။၎င်းက သူတို့နှစ်ယောက်အတူတူဝယ်ထားခဲ့သည့် မီးအိမ်မှအလင်းရောင်ပင်။ရွှီထန်းချန်က ၎င်းကိုအလွန်နှစ်သက်၏။

ယနေ့ညသန်းခေါင်ကျော်ပြီးနှစ်မိနစ်၌ ရိကျယ်ကတံခါးဖွင့်ကာဝင်လာခဲ့၏။သူကဂျာကင်အင်္ကျီကိုချွတ်လိုက်ပြီး တံခါးဝတွင်ရပ်ကာအအေးဓာတ်များလွင့်ပျယ်သွားစေရန်အတွက် သူ့လက်နှစ်ဘက်အားပွတ်တိုက်လိုက်ပြီးမှ ခြေဖော့ကာဆိုဖာဆီသို့လျှောက်သွားလိုက်လေသည်။

အနည်းငယ်အေးစက်နေသော နူးညံ့မှုတစ်ခုကသူ့နှုတ်ခမ်းပေါ်သို့ ကျရောက်လာခဲ့လေသည်။တစ်ချိန်တည်းမှာပင် ရွှီထန်းချန်ကသူ့မျက်ဝန်းများကို ဖြည်းညှင်းစွာဖွင့်လိုက်၏။

"ပျော်ရွှင်စရာချစ်သူများနေ့ပါ"

ရိကျယ်ကပြောလာ၏။

ရွှီထန်းချန်သည်သူ့ရှေ့တွင် ကိုယ်ကိုကိုင်းကာရပ်နေသောလူကိုကြည့်ရင်း သူ့နှလုံးသားအတွင်းမှနွေးထွေး၍ သက်တောင့်သက်သာရှိသောခံစားချက်နှင့်အားရကျေနပ်သောခံစားချက်များမှာ အကန့်အသတ်ပင်မရှိတော့။သူ့အတွက်တော့ ရီဝေနေသောမျက်လုံးများကိုဖွင့်လိုက်ချိန်၌ သူ့အမြင်အာရုံထဲပထမဆုံးဝင်ရောက်လာသည်မှာ ရိကျယ်ဖြစ်နေသည်ထပ် ပို၍လှပသောအရာမရှိနိုင်တော့ပေ။