An Accident in Broad Daylight || ဘာသာပြန်《Completed》

Chapter 52

တကယ်တော့ရွှီထန်းချန်သည် အချက်အလက်နှင့်မော်ဒယ်အား ယွီအန်းအားပေးလိုက်ရခြင်းသည် သူ့အပေါ် ကြီးကြီးမားမားသက်ရောက်မှုမရှိဟု ခံစားခဲ့ရလေသည်။ဘွဲ့အတွက်ပြုစုသောစာတမ်းများသည် တစ်ကြိမ်တည်းဖြင့် ပြီးမြောက်နိုင်သောအရာမဟုတ်ပေ။အစောပိုင်းအဆင့်များတွင် သူ၏ သုတေသနရလဒ်အများစုကို စာရွက်ထဲသို့ပြောင်းလဲကာ ထုတ်ဝေသင့်သည်များကိုထုတ်ဝေခဲ့ပြီးဖြစ်လေသည်။

ယခုအမှန်တကယ်လွတ်သွားသော အပိုင်းသည် သူ့စာတမ်း၏ နောက်ဆုံးအပိုင်းသာဖြစ်လေသည်။သို့သော်သူ၏စာတမ်းကိုရွှေ့ဆိုင်းရသည်က ရှောင်လွှဲမရတော့ဘဲ သူ၏ဘွဲ့ယူရန်နှောင့်နှေးနေရခြင်းသည် သဘာဝကျကျပင် မေးခွန်းထုတ်စရာဖြစ်လာတော့သည်။သူသည်အခြားလူများကို လိမ်လည်လှည့်ဖြားနိုင်ခဲ့သော်လည်း သူ့ဆရာထံရောက်လာသောအခါတွင် ရွှီထန်းချန်သည်ရွှေးချယ်စရာမရှိတော့ဘဲ အားတင်းကာရှင်းပြလိုက်ရလေတော့သည်။

သူ့ဆရာကသူပြောလာသည်ကိုကြားပြီးနောက် နားမလည်နိုင်ခဲ့ဘဲ ရွှီထန်းချန်အားမေးလာ၏။ရွှီထန်းချန်သည် ယခင်ကသူ၏ပြင်ဆင်မှုများဟာ ပြီးလုနီးပါးဖြစ်နေပြီဟု ပြောလာခဲ့သည်မဟုတ်ဘူးလား?

"Mm ကောင်းမွန်လာအောင်လုပ်ဖို့လို့တဲ့........အကြောင်းအရာတစ်ချို့ရှိနေလို့ပါ"

ရွှီထန်းချန်ကယောင်ဝါးဝါးပြောလိုက်၏။

ဆရာကဆက်ပြီးမေးလာ၏။

"ကောင်းမွန်လာအောင်? ဘယ်အပိုင်းကလဲ?"

ရွှီထန်းချန်သည် ထိုမေးခွန်းကိုမဖြေနိုင်ခဲ့ပေ။အဖြစ်အပျက်များဖြစ်ပျက်သွားသည်က ဆယ်ရက်ပင်မပြည့်သေးပေ။ဤမျှအချိန်တိုလေးအတွင်း နှစ်ပေါင်းများစွာသုတေသနပြုခဲ့သော သူ၏တွေးခေါ်မြော်မြင်မှုလမ်းကြောင်းတွင် ရုတ်တရက်ပြောင်းလဲခြင်း သို့မဟုတ် ဖောက်ထွင်းဝင်ရောက်ခြင်းမျိုးရှိနိုင်မည်မဟုတ်ပေ။

သူ့ဆရာက သူ့ကိုခဏလောက်ကြည့်ပြီးနောက် ရုတ်တရက်ထကာ ရုံးခန်းတံခါးကိုပိတ်လိုက်လေသည်။

ရွှီထန်းချန်ကအနည်းငယ်အံ့ဩသွားပြီး မော့ကြည့်လိုက်ရာ သူ့ဆရာကသက်ပြင်းချလာသည်ကို တွေ့လိုက်ရလေသည်။