An Accident in Broad Daylight || ဘာသာပြန်《Completed》

Chapter 51

"ကျွန်တော် ဂရုမစိုက်ဘူး"

ထိုစကားကိုပြောပြီးနောက် ရိကျယ်ကလှည့်၍ မီးဖိုချောင်မှ ထွက်သွားလေတော့သည်။ရွှီထန်းချန်သည် တံခါးဆောင့်ပိတ်သံကိုကြားလိုက်ရ၏။ထိုသူကဒီလိုမျိုးထွက်သွားလိမ့်မည်ဟု တစ်ခါမှမထင်ခဲ့မိချေ။

အချိန်အကြာကြီးအတူရှိခဲ့ပြီးနောက် သူတို့ရန်ဖြစ်ကြသည်က ယခုပထမဆုံးအကြိမ်ပင်။

ရိကျယ်သည် သူ့စိတ်ခံစားချက်များကိုတတ်နိုင်သမျှ မျိုသိပ်ထားပြီးဖြစ်သည်ကို သူခံစားနိုင်လေသည်။သူတကယ်ဒေါသထွက်နေမှန်းလည်း သူသိလေသည်။ယွီအန်း၏ လဲလှယ်မှုအခြေအနေအား သူသဘောတူလိုက်သောအခါ ရိကျယ်မည်သို့တုံ့ပြန်မည်ကို တွေးထားပြီးဖြစ်လေသည်။ရိကျယ်၏ နှလုံးသားထဲရှိ ရွှီထန်းချန်၏တည်ရှိမှုကို အခြားသူများထက် ပို၍နားလည်သဘောပေါက်သွားသည်ဟု ခံစားလိုက်ရတော့သည်။သို့သော် သူ့တို့နှစ်ဦးစလုံးရှိနေမည်ဖြစ်သောကြောင့် အနာဂတ်ဆိုသည့်အရာကသူတို့နှစ်ဦးနှင့်အတူ မရှိမဖြစ်ရှိထားရမည့်လိုအပ်ချက်ဖြစ်ကြောင်း ရိကျယ်နားလည်လာအောင်မည်သို့ပြုရမည်လဲ သူမသိတော့။

မီးဖိုချောင်သည် အလွန်အမင်းတိတ်ဆိတ်နေ၏။ရွှီထန်းချန်သည် ထိုနေရာတွင်တစ်ယောက်ထဲရပ်မနေနိုင်တော့။ပြတင်းပေါက်ကိုဖွင့်ကာ စီးကရက်သောက်ချင်သော်လည်း တစ်ကိုယ်လုံး၌လှည့်ပတ်ရှာဖွေပြီးနောက်တွင်ပင် စီးကရက်တစ်လိပ်ကိုမှမတွေ့ခဲ့ပေ။ပြတင်းပေါက်မှဖြတ်တိုက်လာသော လေသည်ပူနွေးနေကာ ပြတင်းပေါက်ဘောင်ပေါ်ရှိပလပ်စတစ်အိတ်များကိုလှုပ်ခါသွားစေပြီး သူ၏စိတ်ပျက်အားငယ်မှုများကို ပို၍တိုးလာစေခဲ့၏။

ရွှီထန်းချန်သည် ပြတင်းပေါက်မှခဏမျှစိုက်ကြည့်နေမိလေသည်။နောက်ဆုံးတွင်လက်ကို မြှောက်ပြီး မျက်လုံးကိုဖိပွတ်လိုက်၏။အနည်းဆုံးတော့ ချက်ပြုတ်ရမည်ဟုတွေးကာ ပြတင်းပေါက်ကို ပိတ်လိုက်လေသည်။

သူကခရမ်းချဉ်သီးများကို လက်ဆေးကန်ထဲသို့ယူလာ၏။သူသည်ခွန်အားကိုမထိန်းနိုင်ဘဲ ပိုက်ကိုဖွင့်လိုက်ရာ ရေစီးသည်ပြင်းထန်သွားလေတော့သည်။ ဆူညံသံကအရာအားလုံးကို တိမ်မြုပ်သွားစေပြီး ရွှီထန်းချန်သည်ရေစီးဆင်းမှုကိုပေါ့ပါးစေရန်ချိန်ညှိလိုက်သောအခါတွင် နီးကပ်လာသောခြေသံများကိုကြားလိုက်ရ၏။