An Accident in Broad Daylight || ဘာသာပြန်《Completed》

Chapter 59

ရိကျယ်ဟိုတယ်အပြင်ဘက်၌ ရပ်လိုက်လေသည်။ယာဉ်ကြောပိတ်ဆို့မှုက ဘယ်တော့မှပြေလျော့သွားခြင်းမရှိဘဲ အချိန်အတော်ကြာသည်အထိ ငှါးရမ်းနိုင်သည့်တက္ကစီတစ်စီးကိုမှ မတွေ့ခဲ့ရပေ။အစောင့် ကတက္ကစီခေါ်ရန် အကူအညီလိုသေးလားဟုမေးရန်ပြေးလာခဲ့၏။ရိကျယ်ကခေါင်းခါလိုက်ပြီး ကျေးဇူးတင်ကြောင်းပြောကာ နောက်လှည့်၍လမ်းတစ်လျှောက် လျှောက်သွားခဲ့လေသည်။

သူသည် လမ်းကြောင်းများကိုမှတ်မိရာ၌ အလွန်ကောင်းမွန်သော်လည်း အကြောင်းတစ်ခုခုကြောင့် ဤနေရာကို အကြိမ်များစွာလာပြီးနောက်တွင်ပင် ရှန်ဟိုင်းရှိလမ်းများအပေါ် ခံစားနိုင်မှုသည်အလွန်အမင်း ဝေဝါးနေဆဲ။လမ်းဆုံတစ်ခုတွင် ရပ်ကာ ဘူတာရုံသို့သွားရမည့်လမ်းကို တွေးတောရင်း အချိန်အတော်ကြာအောင် နေခဲ့မိလေသည်။ထိုနေရာကို နှစ်ကြိမ်မျှလှည့်ပတ်နေပြီးနောက် အဆုံးတွင်အရှုံးပေးကာ တက္ကစီတစ်စီးကိုသာလှမ်းခေါ်လိုက်တော့သည်။

ရှန်ဟိုင်းမှမြို့တော် C သို့ တိုက်ရိုက်ရထားမရှိပေ။ ထုံးစံအတိုင်းရိကျယ်သည် ပေကျင်းသို့သာလက်မှတ်ဝယ်ခဲ့ရလေသည်။အစောဆုံးရထားသည် မနက်ဖြန်မနက်ခြောက်နာရီဝန်းကျင်သာ။ရိကျယ်သည် လက်မှတ်နှင့်ပြန်အမ်းငွေကို သူ့အိတ်ကပ်ထဲထည့်လိုက်ပြီး ထိုင်ရန်ခန်းမကျယ်ကြီးထဲ၌ နေရာရှာလိုက်၏။ထို့နောက် အချိန်များကိုငေးငိုင်ရင်းသာ ကုန်ဆုံးနေခဲ့လေသည်။

တခါတရံ ကြမ်းပြင်ပေါ်တွင်လူးလိမ့်နေသည့် ခရီးဆောင်အိတ်များ၏ဘီးများကို စိုက်ကြည့်နေမိလေသည်။အခြားအချိန်များတွင် သူသည်ဘာကိုမှမမြင်သည့်ပုံပင်။ကြမ်းခင်းကြွေပြားအစွန်းများ၊လျှောက်သွားနေသည့်ခြေထောက်များ၊သူ့မျက်လုံးထဲတွင် ဘာမျှမရှိသည့်အပြင် အချိန်မည်သို့ကုန်သွားသည်လဲဆိုသည်ကိုပင် သူမသိတော့။

သန်းခေါင်ကျော်ပြီးနောက် ရွှီထန်းချန်ကသူ့မက်ဆေ့ခ်ျကိုနောက်ဆုံးတွင် ပြန်ဖြေလာ၏။သူက ဖုန်းကိုအားသွင်းထားခဲ့သောကြောင့် ရိကျယ်၏မက်ဆေ့ချ်ကို မတွေ့ခဲ့ဟုဆိုလာ၏။

ရိကျယ်သည် ဖုန်းကိုကိုင်လိုက်ပြီး ဤရိုးရှင်းသော စကားလုံးများကိုအကြိမ်များစွာ ဖတ်နေခဲ့လေသည်။သူပြန်မဖြေခင်၌ ရွှီထန်းချန်ကနောက်ထပ်မက်ဆေ့ခ်ျတစ်စောင်ကို ပို့လာ၏။